MEIMATUM POSITIVE (Mmt +ve)
~Vanlallian Valte
Meimatum: Vun sunglam leh taksa nemna gamgi (no man's land) pansan a hong ki-salah veu meima-flu chi khat ahi. English a 'boils', Hindi a 'baal tuk' (sam kitat) ahi. Hinna nei te' sam zung pen nem ngi-ngei mahleh, infekson vaang a akitan chiang in, atan bong lam khauh pai giugeu pah hi. Huai ahi 'a zang – meimatum zang' i chih veu uh. A om louh na diing mun a om kha suak. Om louh na diing mun a om khaak thil poi ahi. Meimatum' zang hong pawt khiak theihna diing in, a kimvel meima; nasia a; naai hon paai phot kisam.
Meima in naai hon laak chiang in a zintunna pa tum lu-lut hiven, nat chihtak in naa sa hi. Zawlngaih sunglut toh tehkhin hial bang a om. Kei bel, zawl ana ngai ngial sek mahleng, a sunglut chitchiat zaw vei tadih lou ka hihna ah hiai thil nih te tehkhin thei diing in chitna ka nei kei. Nikum a Manipur Government in Bill 03 a passik uh; August ni 31, 2015 a thiltung leh; thunung-thuma om ningneng te leh hong om zel lai mohlou diing te ka puaknat toh teh ning chi leng, meimatum nat zia simtham ahih louh pi! "Meimatum vei zaw gawtmun naipen' cousin ahi" chi suk ni.
(A naai saal dok a nuamtuam hiau diing hizenpi, pawt dok pahpah lou - a zang ngaihthah vual hilou hi. Huhchi lou in pawdam ta leh, maa dang siam khia in hong kithakpat thouthou diing. )
Lei taksa dan a kum 10 ka chin kum in, ni khat – a tarik nalh sa in poimohna bei suaikaih ka zaalbawl hi. Suaikaihna nuai a 'dated 7-7-77' in zui maih lou. Kei bel, ka fuh hetkei: Tobou phel lang khat a meimatum ka neih ziak in lupna ngak in ka om. Kaizalal' papi te kongtual a lawmte, pekluum, lingkaap, giitphiik leh kilawnpi kimawl te thawm ging zaizai zabaan lel pa ka hi. Sam tantom toh kilawm dimlet nu' tongluang houh bil in za baih viau vial veh e! Thallup theih ahi kei. Siiklup nuam lou. Ka siam pen khuplup den tel lawmlawm le mihing' mihinna ah ning-kitel mohlou. Kinalhsak mahmah bang a tutkhiak kiangkuang ngai nakkhem.
Inkuanpihte' pummat in ka om, vuaktang in hon khuplup sak uhi. Agreement bangmah om lou in ka meimatum hon soisa taktak uh chu, thuak ahaksa ngei mai. "Kap nawn ken, tawpta in... a zang pawtta ahi. Hiai khawng maimai – tangval ngal dohna ahi..." chiin hon eng-hehnep bawl zawmah kei le uh hoih di hiven. "Ngal dohna in le ka sim kei – todohna mulkimhuai tawpkhawk ahi..." chiin ka kahnuih phemphom den hi.
Hun-le-ni te mual ah hong liam zel a: kum 39 sung vingveng Mmt +ve natna kipan in zalenna zaal zou mah leng, nuai simlei ah zaw zalenna taktak leh detdou a om lou e! India in British te opkhumna nuai kipan a zalenna amuh uh phaatpha 69 ni in, ka tobou munkhat – gamgi guam gei, tak lam zaau, ni-khovak kilat ngei ngel louh na, tungtuun pang lak hong thak sim siaisiai a'ihchia, mitsi deudau kawm a khuat sawksawk. Sawt kihal lou in muuk san sim hiuhiau hon suang. Ngaidih! zankal in ana huutbawk litlet voi!
Ngaihpha lou in Central Government Health Scheme nuai a 'Wellness Centre" khat ah ka va OPD hi. Vun Sipisialist: Na kawnggak phel in. Na khekol lipsuk. Hon nungngat oh. Bungbu ve. Na taw phen!" Namdang doctor meuh mai a tawphen na diing hun thoveng ka ngah man in angtang kisa ngiat ingh. Thumang tak in sep-leh-bawl tuak te ka mualsuah ta, Kawlphe khawnvaak in hon 'brass'. Meima huutbawkte khuttal muuk in dawt denden... Meimatum mah zaw ana hi vanglak.
Tumpi natna pan k'ong damkhia a, alopna lah hi – inlam meh hong tungthak om dia lunggulh vaang in New Delhi a "The Munirka Market" Airport tuamlak a ki-huihtheu diin khe in ka Indigo tou uhi. Eimi leh, eimi melpu khangthak momnou te etlawm thei petmah uhi. Amei-apa gamtat khohei leh namdang te pau ah kiva sa'ng. Changkaang taktak a a kichei ka muh chiang in kei le 'fashion concious' ve thou ka hihna ah mittai himai! Huihnung a nuam... Hat laak tawldam.
Siamsinna hiam sepna a dawm changkaan lou momnou te hi diing un ka koih hi. Zaan hong sawt telhtelh a, kicheinate saang hiaihiai. "Hichi dan di zaw hilou deuh di hiveh aw..." chih di kilang panta. "Khovel bukimna..." chiin Catherine Valte ka mitsaai hi. Aman, "Kong kochiik taktak khawng le Red-carpet muh a mu uh hitam?" chiin nui cheuchau. Anu-apa te'n mu le uh meimatum vei loh ngawn ve un chia...
Zaankim-zaankhang lunggel: "What were these girls thinking? Why go for the red-carpet attire; a thigh-high slits that ride up dangerously; all sheer fabrics that leave little to the imagination; cut-outs that bare all; snug fit dresses and navel-deep necklines. This could very well be a desperate cry for attention. Risqué fashion!"
VV/ Laidiip 15092016