ADAM IN ZI MASA LILITH KICHI ANA NEI MAH HIAM?
-Valte Ginkhenpau
Thumasa:
Gul in Eden a huansung a Evi a khem ni (Genesis 3) apan in khovel ah khemna puaklut in hong om a huchi in khelhna leh sihna hong lut hi (Rom. 5:12). Huai ni apan in setan in lam chi tuamtuam zang in Pathian thu hing suksiat leh vuallelhsak sawm in panla tou ngitnget den hi. Setan in, “Lei a langkhat langkhat hoh a, a sung a tou vak a suk vakvak” ka hi chi hi (Job 1:7). Bang zong a Setan huchi vial vak hehu hi ding hiam i chih chiang in 1 Peter 5:8 in “humpinelkai humham bang in a nek theih ding zong in a vial vakvak” chi hi. Leitung siamchil apan tunitan in Setan a tu maimai naikei chih Laisiangthou vuallelhsak tum a thudik kimkhat khawng zang a thusia thehzakzakte’ thugente leh nasepte apan in a theihtheih hi.
Setan in a thuzoh zoh mi khenkhatte’ lungsim ah Laisiangthou sung a laibu masapen Genesis bung khatna leh nihnate pansan in thutak kaapna pan pah hi. Khemtu in thilsiamte tanchin pansan in ginlelte lungsim heikawi in, Pathian thutak gendausak sawm in pan naktak in latou ngitnget hi. Huchibang a khem zoh a omte’n Genesis 1:26-27 a ni kibang a Pathian in pasal leh numei siam ahi a, himahleh Evi pen bel Genesis 2:18-25 sung a siam a om pan ahi a chi uhi. Huaiziak in Genesis 1 a numei kisiam pen mi tuam ahi a, Genesis 2 a numei dang khat, Evi kichi Adam kithuahpih theih ding a piak a om pan ahi a chi zawmah uhi. Huai Evi siam a om ma a Adam toh ni kibang a siam a om numeinu min “Lilith” ahi chi in khanglui tangthu kigen khenkhatte toh mekmat in gen uhi. Hiai toh kisai thudik i theihchetna ding in Lilith kichi tanchin sut leng i chi ahi.
“Lilith” kichi minkhiatna bang hi a, kua genna hi hiam?
“Lilith” kichi tuh Sumerian-te pau apan kilakhia ahi a, a khiatna ahihleh “dawi nupi/sikhapi” ahihkeileh “huih khate” chih ahi1. Lilith tanchin kigenkhaknate ahihleh khanglui tangthu, a taktak a pom theih ngellouhte khawng hi tangpi hi. A tanchin a kigenkhakna peuhmah ah a hoih lam sang in a se lam ngen in kigen zaw hi.
Mi khenkhatte’n Lilith pen Adam’ zi masa ahi chi mahle uh Pathian’ Kha Siangthou hatkhum a piak a om Laisiangthou sung ah huaibang a a kigelhna muh ahi kei. Himahleh ginglel pawlte’n Genesis 1 leh 2 a kigen mihing siamna tungtang a theihsiam louh ziak un, ahihkeileh a theihsiam ut louh ziak uh i chi zaw diam ah, khanglui tangthu a kigen Lilith tanchin hon guanglut mawk uh hizaw hi.
“Lilith” tangthu tomkim bang ahia?
Lilith ahihleh Babylon-te dawi leh sikhate tangthu toh kisai a genkhak pat a hong om ahi a, vasate bang a lenna ding kha nei dawi numei ahi kichi hi. “Gilgamesh and Huluppu-Tree” kichi BC 2,000 vel a Sumerian-te laa kigelhna suangpek ah a min kimu masapen hi. Nupi gailaite leh naungekte mat thangsak ahihman in hiai dawi numei gilou hawlkhiakna ding in dawibuk leh dawilaa tamkhop pianloh hi. Babylon-te lak a kipan in a tanchin in Hittite-te, Egyptian-te, Israelite-te leh Greek-te lak hon zeel tou hi. Lilith pen gam khat apan gam dang ah tangthu khat apan tangthu dang ah mel tuamtuam in a kha latsak in om a, buaina lam toh kisai bang, zawlai a mi bumna lam bang, leh pathian zahlouhna chihte lamsang kawk in a min kizang hi2.
Lilith tanchin kigenna dang khat ah hiaibang in kigelh hi. Adam in, “Ka nuai ah lum in,” a chihleh Lilith in, “Ka nuai ah lum in e! I nih a leivui apan bawlkhiak i hihman in kikim i hi,” chihsan geugau hi. Huchi in, huai thu apan in lungkim lou in Lilith leengkhia hi.3 Hiai thu khawng pansan a nei in tu hun ah numeite leh pasalte dinmun kikim ahi chih genuang utte’n Lilith tanchin naktak in tawisang nuam leuleu uhi. Himahleh, hiai Lilith tangthu toh kisai thu kigente himhim a taktak a thiltung mah hina hiam chih chetna ding kiptak leh kingaknatham ching bangmah puaksuah ding om lou hi.
“Lilith” leh Bible.
Siamchil thu kigenna Genesis 1 apan 2 sung leh Laisiangthou a mihingte khangsimna kigelhkhakna munte ah “Lilith” chih min kimu ngeilou hi. Ginglel pawlkhat in bel hiai Lilith min chiangtak a Laisiangthou in a genkhiak louh pen thutak imguk a sawm ziak ahi chi in ngoh maimah uhi. Hichibang ngaihdan neite’n Laisiangthou ahihna bangtak in a theichian kei ua, a ginna uh a kip kei in a dengdel mahmah chihna ahi hi.
Ahi a, Hebrew Bible ah bel “liyliyth” chih thumal Isai 34:14 ah muh in om a4, himahleh huai mun ah mihing bang in gen in a om kei. A thumal pen eipau Bible in “zan thil lauhuaipi” chi in letkhia hi. English Bible khenkhatte ah ahihleh “screech owl” (KJV), “night creatures” (NIV & NLT), “night bird” (ESV), “night monster” (NASB & ASV) chih khawng in kiletkhia a, International Standard Version in ahihleh “liliths” chi in letkhia hi.
Bible suimi tamzawte’n Isai 34:14 a hilhchetna uah leng hiai “liyliyth” kichi tuh nitak a laang gamsa hiam ahihkeileh vasa hidan in gen uhi. Khenkhatte’n ahihleh khanglui dawithu-up lam toh kisai ahihdan gen in, Judate Talmud (Laisiangthou hilou) a kigendan leh tangthu bang a kigente pen hon genkik lel mai uhi5.
Genesis 1 toh 2 thu lah?
Genesis bung khatna ah lei leh van leh a sung a omte tengteng siamna thu i mu hi. Ni guk sung a Pathian in mihing masapente tel a thilsiam tengteng siamzou vek ahihdan kimu a, huaite tomkimtak in a ni ni a kisiamte abanban in hon gen suk daudau hi. Bung nihna in ahihleh ni sagihni a Pathian khawl ahihdan a hon gen masa hi. Huai zoh in, thilsiamte lak a thupipen leh lamdangpen mihing masate Adam leh Evi siamna thu toh kisai, bangchibang a siam a om uh hi hiam chihte lungluthuaitak in hon suutkhia hi.
Genesis 2:7, 18 leh 20-23 in pasal siam a omna toh numei siam a omna thute kizomsuak a hon gen daudau nawn louh pen mi pawlkhatte’n lakhial in Genesis 1:27 toh kibang lou hidan in genkawi sawm mawk uhi. Gendan kibang lou zek om ziak a thu kibang lou leh hun kibang lou va chih pah mawk pen hiai muntak ah dikthei chetlou hi. Etsakna ding in, Genesis 1:24-27 ah mihingte sang a gamsate leh ganhingte siamna thu kigen masazaw a himahleh Genesis 2:7 leh 19 i et nawnleh gamsate kigen ma in mihing kigen masazaw zel. Ahihleh, hiai tegel kikalh ah i chi mawk diam? Chi mawk lou e. Hiai thu apan i taklat nop pentak ahihleh, Genesis 2 in thilsiamna thu pen Genesis 1 a kigen bangbang a a kizomdan a hon lemsuk thak lou ahi chih ahi. Ban ah, numei siamna leh thilsiamna nihvei om hi mawkmawk lou ahi chih theihchet poimoh hi. Hiai tungtang chiangzaw sem in Wayne Jackson gelh “Are There Two Creation Accounts in Genesis?” ah simtheih ding in om hi6.
“Lilith” toh kisai mimal muhdan.
Hiai Lilith tanchin kigente pen eilak a “sikhapi” hiam “simbupi” hiam chi a lauhuaitak bang a gen a naupangte khemna a, “Na ihmut keileh sikhapi hon mansak ding ka hi,” peuh i chih mawkmawkte uh toh tehhuai hi. Ahihkeileh, i pupate un dawi leh kaute khawng hawlkhiakna ding a “manmasi” min peuh ana zat uh bang sim hileh kilawm hi. Hiaite pawl bel, atangpi in, a kipatna mumal kithei lou ahi a, khanglui tangthu kigen maimai ahihlel hi. Lilith tanchin kigente himhim leng thudik ahi chih chetna kichian bangmah om lou ahihna ah khanglui tangthu gen a kigenthoh lelmai ahi hi.
Thukhitna.
Laisiangthou i chih pen khanglui tangthute bang maimai hilou in Pathian’ Kha Siangthou Hatkhum a piak ahi (2 Tim. 3:16) chih pom kichian (1 Kor. 15:2) poimoh hi. Laisiangthou mah ah Evi loungal Adam’ zi chi a kigen midang om lou a, Evi ngei tuh “mihing tengteng nu” chih in om hi (Gen. 3:20). Paul in, “Adam tuh siam masak ahi a, huai nung in Evi siam ahi,” (1 Tim. 2:13) ana chi hi. Hiai mun a “huai nung in” chi a kiletkhia pen a Greek ah “eita” ahi a huai tuh “thil kizom (hun hiam ngaihtuahna a simna ah hitaleh)” chihna ahi chi in Strong in gen hi7. Adam leh Evi siamna kikal a Lilith kichi omkhak lamlam genphak hilou hi. Paul pen Gamaliel khebul a khangkhia a (Nas. 22:3) Judate thusiah leh sabiakdan a sinsiamsa ahihban ah a khanvual tampite na kheng hialkhop a laisiam (Gal. 1:14) ahihman in Lilith kichi tungtang thutak hileh thei lawtel ding hi. Hinapi in khatvei mah leng a laikhakte ah Paul in huai dawi numei ana minloh ngeilou himhim hi.
Hiai “Lilith” tungtang thu i suut sauleh dawithu leh sikhathu i chihte toh kisai ngen hi a, a tangthu paizia himhim leng gintakhuai lou chih ding bang pah hi. Sawltak Paul in, “Himahleh, tunung chiang in mi khenkkhatte’n pimangna khate leh dawite thuhilhna limsak in, ginna tuh a hon tawpsan ding uh chih Kha in kichiantak in a gen,” ana chi hi (1 Tim. 4:1). “Lilith” tungtang gintak mawk pen bang leng hiai a Paul in a gen “dawite thuhilhna” limsakna himai ding ahihman in khem zoh a i om louhna ding in pilvan poimoh hi.
Chiamtehnate:
1Butt, Kyle and Harrison Chastain (2015), Lilith... The First Wife of Adam?, Apologetics Press, http://apologeticspress.org/apcontent.aspx?category=13&article=1220
2Gaines, Janet Howe (2014), “Lilith: Seductress, Heroine, or Murderer?” Bible Archaeology, http://www.biblicalarchaeology.org/daily/people-cultures-in-the-bible/people-in-the-bible/lilith/.
3MySword for Android version 5.4, Isaiah 34:14 “screech owl”
4https://www.studylight.org/commentary/isaiah/34-14.html
5Hammer, Rabbi Jill, “Lilith: Lady Flying in Darkness,” https://www.myjewishlearning.com/article/lilith-lady-flying-in-darkness/
6Jackson, Wayne (1991), “Are There Two Creation Accounts in Genesis?” Apologetics Press, http://www.apologeticspress.org/APContent.aspx?category=127&article=1131.
7MySword for Android version 5.4, 1 Timothy 2:13 “then”
©Valte Ginkhenpau, 2019