MIZOTE PHATTUAMNGAIHNA MAH PHAWKPHAK IN OM EI!
Laigelhtu - Valte Ginkhenpau
Pu Zo' suante, abiktak in Zomite lak ah "Phattuamngaihna" a kigen chiang in Mizote "tlawmngaihna" tuk zou leh khekkhe zou ding om lou kichi ka za sek hi. Tutung Jiribam district lam zuan a ka zinna a ka thiltuah khat ka hon gelhkhe mawk ding.
June 23, 2019 in Imphal khopi apan Jiribam khua pai ding Tata Sumo khat ah ka zinpih ding valnou Muanthang Thraite toh a hektupa veilam ah ka nih un tutna 1na leh 2na luah in ka tuang lenlan tuak uhi. Ticket ka va laaklai a zaw zingkal dak guk geih a kipankhe ding ahi hon chih uh zaw hiven, hiai ni zing in bel dak 7 in hon kipatkhiakpih pan maimah uhi. Imphal khopi nawsia in, gari dim zou kei mahle ung, ka hong tai ua, Langjing leh New Keithelmanbi khuate taikheng pah in lamzangtak in meizun kai thithiai lak ah Jiribam zuan in ka tai ziahziah mai uhi. Dakkal 4 vel ka tai nung un kei tutna lampang a gari pei omna lak vel avangkim in hong ging thei zelzel hi. Gari hektu patau gu sim adiam ah a pei lak vel ana enkhe zel ding in hon hilh a, ke'n leng bangtanhiam ka enkhe tou hi. Bangmah kimu lou ahihdan gen kawm in huai thilging tuam deuh kiza pen a pei lak vel apan mah ahi chih ka hilhkik hi. Huai nung sawtlou in Nungba ka tungtou ua, zingan ne ding in ka kumkhia uhi. Bawngsa mah chihbawl ka hihman un Muslim hotel khat, nidang a leng dailenbuk a neih ziak ua ka va naih sekna ah, ka va ne uhi. Lawmpa'n an ka khamtak un gari omna lam zuan pah a, kei bel ka dailen suak ahihman in ka va daileng tadih photlai hi.
Zingan ne zou a daileng khin in ke'n leng gari khawlna mun lam ka va zuan hi. Gari hekpa'n kei tuanna lampang a gari pei pen ana tolkhia a, huai bawlpih in ka lawmpa ana tu keuhkauh man hi. Lawmpa kiang ah sektui bawm neute khat va pia in, awl in a pamlam deuh a niliapna inn kong khat ah ka va ding a, a nasep uh ka gal et hi. Lawmpa pen kizen leh phattuamngaihna hau mahmah khat ahihdan ka phawkkhe thakthak hi. A etkai zoh nung un gari pei hon bulhkik ua, huai zoh in ka kipankhe nawn leuleu uhi. Mel 10 leng pha lou ding a gamla ka tai nung un gari hektupa'n gari pei pen banghiam chi ahi chih thei ahi ding a, enzui ding in hon sawl nawn hi. Ka et hang in bangmah a lauhuai thei dingdan ka mu kei a, huai thu ka hilhkik ma in hong puak guih a gari pei pen lengkhe dingdan in hong kisa hi. Gari hektupa'n kintak in khawlsak a, ka et uleh a pei ana lengkhe dek mantak hi. Suangtum khat a gari pei doukip masa in, huchi in anuai apan dousang tou in a pei hon tolkhia hi. Kinohhuai simta ahihman in bawl zoh pah theih ding thil hi hiam chih ka dot chiang in gari hektupa'n hon dawng gina thei lou hi.
Nungba khua a ka tuanpihte uh mi thum in hon kumkhiaksan ahihman un a hektupa sim louh in mi 4 kia ka om uhi. Eimi ahihleh kei leh lawmpa kia ka hi ua, adangte tuh Meiteite leh vaite khawng ahi uhi. Ka khawlna uh lamlian dung ah pei 4 nei gari bangzahhiam hong kileh mahle uh kuamah a hong etpih a om kei uhi. Ka tuanpih uh mi nihte'n leng tomchik ka ngakkhawm nung un gari dang hong tai khat ana khaam in huai ah tuang ua, hon paisan uhi. Gari hektupa ka et chiang un awlmohhuai bang ka sa ua, a gari bawlna ah huh theih dandan in ka nih un ka huh uhi. Jiribam a hon na dawn dingte kiang a nitaklam dak 2 tan a tung man mahmah ding ka hihdan uh ka gensa ahih toh ana patauh luat ding uh ka lau hi. Mobile signal lah bangmah om lou ahihman in ka dinmun uh ka hilh thei kei a, amau leng a hon thuzak thei tuankei uhi.
Gari pei kithuahna lak kisia ahihman in a bawl buaihuai sim hihtuak hi. A kilhkipna khat bang kol zawmah ahihman in polythene bag khat balkek zok in huai in ka thekkip uhi. Duhthusam in kip zou kei mahleh kinepna dang om tuanlou ahihman in ka zat mai uh a ngai hi. Hong vialtai gari dangte bang in lah a van uh kheelsak utlou kia thamlou et leng hong etpih lou maimah uhi. Chikmah a gari bawl ngeilou himahle ung khut tegel bang vom nianua hial in ka va bawlpih ek sam uhi. Gari pei veilam pang brake gui tolkhiak ngai ding a chih man in huai leng ka tolkhia uhi. Bawl theih teng ka bawl zoh nung un a pei ka thuahkik ua, huchi in ka kipankhe nawn leuleu uhi. Hiai hun tan in nitaklam dak 2 ana peel manta hi.
Inn dung khat tan leng tai nailou phial ding chih theih khop in, bawl zoh phet huai gari pei kilhnate hong lengkhia hi. Taizom thei ding vual hilou in a pei bang lengkhe ding a kisa in hong kiveikham pian leiloi maimah hi. A hektupa toh chimoh selua ki-entuah in ka nui mai ua, kumkhia in lohngaihna thei tuanlou in ka va etthoh lel mai uhi. A kilhna khenkhatte koilam tung hiam chih leng kithei bun lou in ana leeng mang a, mawkna a bawl hoih theih pah vual hilou ding ahi chih ka mukhawl hi. Lamlian laizang chih theih phial a kipheikhun sim a gari khawl ahihman in gari neuzaw deuhte chih louh a sukpai leh toupai gari liante kuamah a taisuak theita kei uhi. Huchi in, taisuak theita lou gari hektute hong kumkhia ua ka buaina uh hong en in bangbang hiam hong gen nainai uhi. Hong zekai deuhdeuhleh gari dang bang leng vaang hiaihiai ding a, i vangsiat zawkmahleh gari bang leng hong om nawn lou thei ahi chih ngaihdan nei in lawmpa kiang ah paisan phot mai hoih ding a gingta ka hihdan ka hilh pah hi. Gari hektupa kiang ah leng gen in ka theisiamsak a, dim simtak a hong tai gari khat khaam in huai ah ka kihen uhi. Kou tuanna gari hektupa'n theisiamtak in hon genpih a, tuanman leng amau kihoulem in kou ka paisanta uhi.
Sunnung dak 2 tan a Jiribam tung man mahmah ding a kinemte tuh nitaklam dak 4 pelh in ka tung zou pan phet uhi. Jiribam apan in Betkhal ah lawmte Khanlal leh Tunson makaih in ka paiphei nawn ua, huai khua a om unaute toh nitak in tanghou balkhapnate nei in biakna nuamtak ka neikhawm thei uhi. Buaisiatna hial tuaklou a, liamna-baina leng tuak sam lou a, chidamtak a ka tun theih man un kipahhuai ka sa uhi.
I gennop pentak ah lutkik zual thakle. Ka gari tuanna uh hong siat masak hun in hong taisuk-taitou garite kuamah hong huh a om kei uhi. Taikawm a hon kan sunsunte'n lah ka dawnna uh zakik man ding uh hia chih theih ding khop a kinoh in hon taisuaksan uhi. Khente ngial in et leng hon en kei zawmah uhi. Gari hong taikhate lak a nihte kiang hiam ah ka gari tuanna uh hektupa'n vanzat poimoh ana ngen mahle uh paulap bawl in kheelsak lou uhi. Huaibang teng tuah nung in gari hektu Meiteipa'n, tuike nuih veivuai sim kawm in, "Mizoram hileh hichi lou ding a, hong bawlpih ding uh ahi," chi namnam hi.
Phattuamngaihna lam toh kisai a Mizote ettonhuai a sakdan uh namdangte gen ka zak patna ahi kei. Huaiziak mah in, ka lungsim ah, "Mizote phattuamngaihna mah phawkphak in om ei!," ka chi hi.
©Valte Ginkhenpau, 2019