Ginkhenpau Valte

ITNA VANGPHA
-Valte Ginkhenpau

“Nang phiangsan in ka tapa mo na deih? Nang bangbang mou deih hileng innsung dimlet mou mu ding ka hi,” chi in Pa Hang hong hangkhe loiloi mawk hi.

Ngaihnou a ding in etna ding himhim a omta kei. Kha nih paita a nitak khat a u Pau a va zuihlut phut mawk khak bang a kisik zou phial maimah hi.

“Pa, hon ngaidam in. Tunung chiang in ka pilvangta ding. Hehpihtak in hon ngaidam in.”

Khasia a kidik, lah kapkhe ngam lou in Ngaihnou in awlchik in chikhe khialkhial hi. A pa maitang leng en ngam lou in kun dedu hi.

“Ka tapa khasiat luat khak ding lau kei leng huai nitak a leng inn a hon lutsak lou ding ka hi chih mangngilh hetkei in.”

Pa Hang a han ek zoh in huai pindan apan in paikhia a, nu Zuii in a pasal zuipawt hi. Pau’ sanggam pasal nihte leh a zite uh ban ah a tate uh naupang chikchikte leng om vek uh ahihman in Ngaihnou a ding in maizumna lian lua a, etna ding leng thei lou in om hi. A mai teng bang san pempom hial a, etna ding thei lou in kun dedu in ding dinden hi.

A mou hihpihte’n leng simmoh kisa in mukpik kawm in paikhiaksan uhi.

Ngaihnou leng awl in amau pindan ah lut a, lupna tung kidenna in khuplup in lukham tung ah a maitang seelsuk a, lohngaihna tuan thei lou in kap keuhkeuh maimah hi.

“Ka u Pau omleh zaw hon hichih telsam ngallou maithei hi a maw... Kei zaw ka vangse lua... U Pau, hong paita maive maw...,” chi in Ngaihnou in khasetak in kahtam lou hi.

Zingkhangkhang a kisalh loiloi pah mawk pen Ngaihnou a ding in sunkhua a thuakkhop pha zou hi. A hih peuh lah a luutnate taai khak ding lauhna lungsim toh mitmei veng kawm a hih vek ngai ahihman in a lung nuam thei ngeilou hi. Huai ni zingsang a leng, singpi awmlai, hih hoih utse lua a a silsiang masakna lam a glass khat ketamsakkha ana hi lim hi.

Glass khat lel ziak a hiai tantan kisalhna ding om lou bang mahleh pa Hang leh a zi nu Zuii a ding in bel thangpaihna puakzaksaktu ding in ana hoih mahmah leuleu hi. Ngaihnou pen khosakna niamchik apan hong kipan ahihban ah a nu leh pate ngei leng kum 1997 a tualgal kipat tuung a Saikul khua a melmate khutlum a si masa pawl ana hi uhi. Huai hun in amah tuh kum 2 lel a upa hipan a, huchi in a nuneu in amah tate toh haksatak in ana enkoltou hi. A nuneu pasal lah zungolvei ahihna ah huai mun ah sawt omthei lou in a paneute kiang ah koih in om nawn hi. Huai ah kum giat ahihtan om a, huai nung in mi inn khawng a om in amah leh amah kichawm tou hi. Kemtu ding a neih ginat louh man in lehkha ana simkha lou hi. A hong let deuh nung a nna bang a hon sep theihtak in bel a tanaute bang uh amah ompih ut in kituhbawl zezen uhi. Himahleh ama’n tuh kuamah sukbuai ut lou in New Bazar, Lamka ah inn luah in kuva dawr lianlou hong in amah leh amah kivak hi.

Alehlam ah, Pau bel contractor minthang pa Hang leh DC office a sem nu Zuii’ tapa upapen ahi hi. A unau un pasal thum ahi ua, numei a om louh hang un a nau pasal tegel in zi a neih baih luat ziak un innsung ah numei bel a tasam kei uhi. A naute’n zi leh tate bang hon nei hial mahle uh Pau in bel a inntuan ding uh a deih naikei a, a zite ngei uh leng a pate’n mihausate’ tate a deihsakte uh ahihman un kituak mahmah uhi. Pau leh Ngaihnou kitendan bangloutak in a naute tuh biakinn a thupi theipen a kitengte ahi uhi.

Pau lah Assam Regiment a kum nga paita apan ana pang ahi a, inn ah a om mun kei hi. Suti saulou a neihlai a Ngaihnou toh gelkhawlna om loupi a kitaipihkha phut mawk ahi uhi. Huchi ahih ban ah, a sepna mun bang leng sa-le-gallak ahihna toh a heutute uh kiang ah suty behlapsak ding in ngen mahleh ni sawmli-le-nga lel behlapsak thei uhi. Nungak ngaihsak ngeilou mi khat ana hi a, a nu-le-pate’n a zi ding asuk-atou ah zonsak mahle uh a lunglutna taktak khatmah leng a tuakkha kei hi. Ngaihnou ahihleh, a tanchin a theihkhak apan in a lungsim ah hehpihna hong piang in itna hon gahsuah hi.

Pau leh Ngaihnou kitheihkhakdan leh a nungthu hiaibang ahi.

Sunnung khat Pau in a sepna lam ah a sepaih lupna tung ah khuplup hehhah kawm in whatsapp leh facebook goups a telkhaknate a thu kisuahte leh kikupnate abanban in en daudau hi. Whatsapp group khat ah “Nungak Ettonhuai Ngaihnou” chih thulu toh limlak kithuah mu hi. A limlak a et chiang in nungak pen naupan tuak sim lai a, a mel ahihleh hoih lawtel khollou, mi tangpi melpu ahi a himahleh a ngou deuh lam tuh ahi hi. A thu kigelhte a hon sim suksuk chiang in Ngaihnou pen a pate’n tualgal buailai a omlouhsan ahihdan leh sanggam dang nei lou a amah leh amah New Bazar lak a kuva dawr bawl a kivak ahihdan kigen hi. Hiai group a simna pen a om member-te’n like leh smiley chihte chauh a comment ahihman un group min kibang mah facebook group pen ah hiai thuthak toh kisai zong in mite’n huai nungak tanchin bangchi gen uh hiam chih theihbeh sawm hi.

Ngaihnou tanchin a simkhak in Pau’ lungsim la mahmah a, a limlak pen bang a et thakthak chiang in hehpihhuai bang sa deuhdeuh hi. Himahleh Ngaihnou tanchin theisau lou ahihman in mite gente leh kikupnate abanban in hon simta hi. Mi tamzaw in nungak pen chiamnuih bawlna in zang ua, kuva dawr kia a khamkhop ngah lou ding ahihdante khawng gen uhi. A vek a zuak hi ding ahi chi khawng bang in leng gen ua, a pa leh nute’ sanggamte leh tanaute kiang a omthei lou nungak tuh chavaih leh ler hi ding khawng peuh in a muanmoh thu uh gelh uhi. Khenkhat ngial in tuh, huai New Bazar lak i chih khawng Sodom leh Gomorrah bangbang hilel ven amahle siangthou nawn mahmah kei inte chi in a taksa ngei bang leng zuaksa hi ding peuh in a dem telngal uhi. Huchikhawng a kigente’n Pau lungsim ah aselam in ngaihdan pia a, thukup omte sim nawn louh sawm hi.

Huchihlai in, mi khat in thukup hon koihlutkha geih a, huai pen a sim photlai hi. Mipa in a gendan in, Ngaihnou pen amau tanaute ahihdan gen in a neu apan a theih mahmah ahi chi hi. A tanaute un Ngaihnou pen ompih nuam in kituh hial mahle uh ama’n amah vangsiatna ziak a kuamah dang a sukbuai ut louh ziak a amah leh amah kichawm a khosa tuam mah ahi chi in leng gelh hi. Thukup hon bawlthaktu in kuamah in Ngaihnou pen chiamnuih bawlna a zang nawn lou ding in ngetna bawl thakthak hial hi.

Pau in leng ngaihtuah dedu a, atawp in a lungsim ah, “Oho... Hiai a thukup ginalou taktak bawlte bel Ngaihnu thei kichian loute ngen ana hi uh eilimve uale maw,” chi hi. Ngaihnou mel en zel a, himahleh a mel ah etlah tuntunna ding bangmah a belh kei. A en thak zel a, a mel sangmah in a tanchin in a lungsim khoih zawta hi. Huchi in, ama’n leng awl in whatsapp group a hon koihluttu pen number ah Ngaihnou in mobile a zatleh a number pe ding in ngen hi. Vangsiathuaitak in huai mipa’n ana nei kei a, ama’n leng hiai thu pen mun dang khat apan a hon laksawn ahihdan hilh daih hi.

“Khatvei himhim kihoupihleh kichi a awkhai,” chi in Pau in ngaihtuah a, a number a ngahna ding dang thei tuanlou ahihman in huchi in daihsan hi. Huai ni sunni tum dong in Ngaihnou tanchin in a lungsim luahdim a, khatvei beek houpih ut tinten thak hi. Akhenchiang in lah, “Kei va kidaihlah luatna ding om zenzen kei. Amah a ki-enkol thei nungak khat hita hiven,” chi in kitheihmohbawl sawm zel hi. Hinapi in a lungsim khat ah Ngaihnou thu si lou in hing den hi.

Hun leh nite hong pailiam zel mahleh Pau’ lungtang sung a Ngaihnou’ tanchin kiphumkhata ahihman in sun ihmut leh zan ihmut hunte ah avangkim in mangmat zelzel hi. A huchih chiang in Pau in thawmhauna lungsim khat hon nei khongta a, ngaihsak nawn hetlouh mai ding a chih sim himahleh a thuzak theihna ding lampi gelkhiak hon sawm nawn thak hi. Huchia a omlai in, khatvei tuh dawr kiluh thu facebook mah ah hong kigenkha hi. Huai dawr pen Ngaihnou a ana hi a, kuahiam panpihna pe ut omleh chi in amah thuzak theihna ding mobile number toh a min kigelh hi.

“Kei aa di’a Pathian lemgel houh a hi zenhouh ding e,” chi in Pau in Ngaihnou number amah mobile ah gelhlut pah hi. Call sawm zelsam mahleh nidang a kitheisa hilou uh ahihna uah kisuanglah zel hi. Pau pen mi kisuanglah baihtak leh nungak khawng toh kihou zelzul mi leng hi sam lou ahihman in, houpih bang hitaleh leng bang gen masak hoih ding hiam chihte khawng a lungbuaina ahi hi. Sepaih lak a om sapsap ding in Pau bel kidekzou mahmah mi hi a, himahleh nitak khat tuh mi dangte theihkhak ding laugu sasa in amah kia in mun khat ah zu va dawn hi. Huchi in, kam nam philphel leh lu kipei vingveng sim kawmpi in Ngaihnou hon call hi.

“Hello!”
“Ee... Nang kua e? Eh, hilou! Kua ale ka houpih?... Oops! Genkhialkha... Ngaihnou hi mahteh maw?”
“He, himah ing ei. Nang kua e? Bang thu ahia?”
“I maw... Kei maw, i... i..., bangkhat....”
“Oho... Hon ngaisiam in, u. Na houpih louh dingpi khat houpihkha na hi ding...”

Ngaihnou in zukhamsa a mi’n houpih ahi chih a theih chiang in limsak ut lou in a houlimna uh khaktan sawm pah hi. Pau in lah a kisuanlahna lam in gen ding pentak leng thei melmul lou maimah a, lah Ngaihnou in a phone a koihkhak ding lau lawzel hi.

“Hilou!,” nakpi in chi khekha guih a, a khonung in kisuanglah thak sim in, “Oh, ngaihsiam aw...,” chi tottot hi.

“U aw, kei ka lunggim laitak ahi a hon theisiam inla ka koih mai ding...”
“Ashh... Hilou e... Hon houpih nuam keivoi... Koih mawk kei ou...”

Huai teng a gen zoh in, a zudawn kham lawkha ahingei ding a Pau tuh lawkhe ging loiloi hi. A huchih chiang in Ngaihnou in lamdangsakna toh koihkhum hi.

“Hello... Ngaihnou... Ngaihnou...,” Pau in sam thakthak hi. A dawnkik nawn louhtak in Pau leng thangpai sim a, a mobile phone tawi en vangvang kawm in, “Eheu, Ngaihnou! Ke’n nang k’on panpih theihna om hiam ka chihlai a nang hichi kisaktheih vial ding mo? Uttak na hihleh k’on ngaihsak nawnta lou zen ding aw...,” chi nuanua kawm in a giahbuk lam zuan in pai hi.

A zingchiang a a zukham a hong ven chiang in Pau tuh a lu naa sa bengbung in a om a nuam hetkei hi. Zan nitak a thil omdante thei meimuailai ahihman in Ngaihnou tung ah kisuanglah petmah mai a, lah a va houpih nawn thak ding zumhuai sa zel hi.

A number ngei mah a va houpih nawn thak ding a ngaihtuah chiang in zum a, huchi in a mobile number khat pen zang in a zinglam deuh in call thak hi. Hiai hun in zu bangmah dawn lou hi. Ngaihnou in hoihtak in a dawr ana kiluhdan gen a, social media a a tanchin ana kisuah zeuhzeuhte tungtawn a mite hehpihna thilpiak a ngahte kipak mahmah hinapi kisuanlahna leh zumna a dim ahihdan khawng hilh hi. Ama’n a gendan in bel huai a dawr ana luhtute leng facebook a amah tanchin kigelhte ana simkha khamtheih hihzongsang mi nih hi uhi. Ngaihnou pen panpihtu ding nei lou tagah khat ahihna ah ngapthoh uhi. A dawr sung a sum leh van nengneng omte laak theihtheih lakhe ding a va luh uh ana hidan ahi hi. Huai ni chitchiat in Ngaihnou in sum sang thum a dawr ah ana nawsekha nguttak a, poi a sakdan khawng leng Pau kiang ah hilh hi. Pau in leng Ngaihnou’ Job Card Bank Account number kipia ah sum bangzahhiam huhna ding in khaktei hi.

Huai hoihtak a a kihou theih ni ua kipan in avangkim in Pau in Ngaihnou tuh thuzak zelzel panta a, atawp in niteng in hong kithuzakkha gige khong uhi. Mel kimu nailou hinapi in kimu gige bang thei hial khop ding in video calling khawng hah zat mahmah uhi. Huchia kum kimkhat bang hong om touh zel chiang un amau kikal ah lamet phak louh kingaihnatna gui hong zaamta hi. Amau mimal hinkhuate uh bang leng hong kihilh ngam panpanta ua, ngaihzawng neih leh neih louh thu bang leng kizedot hauhau ngamta uhi. Pau bang in nitak khat zukhamsa a Ngaihnou houpihtu pen amah ahihdan hilh a, a hangsan deuhna ding a a dawn ngeilouhpi zu a va dawn zenzen leh flop gawp kholoh ahihdan khawngte leng genkhe vek hi. Ngaihnou leng a nuihza lua a, huai nitak a amah leng lunggim lua a kuamah kamsiam a houpih zou lou ahihdante hilhkik hi.

A kithuzakna uh kum khat bang hong ching ding ahita a, huchihlai in Pau tuh hunawl zang ding in inn lam ah hong pai thei hi. A kihousa mah bang un, taksa mahmah a kimuhtuah ding a genna mun uh Lungkuai Cafe, Lamka ah Pau leh Ngaihnou tuh Pau hong tun nitak in hong kimutuahta uhi. Hong kimuhtuah hialtak un nidang a mobile phone tungtawng a a kihou zalzal bang uh hong hi nawnta kei a, a kinep louh dantak un a pau masa zawsam ding kuamah a om kei uhi. Zahkai leh kam tawm mahmah tuak nih kiphutuah ana hiphing ua, nek ding bang leng sap ding lamlam phawk lou ahihman un a semtute’n nihvei hial va dong man uhi.

Lungkuai Cafe apan bangmah thupi kikum ngellou in hong pawtkhia uhi. Pau in a bike nung ah Ngaihnou tuangsak in New Bazar lam a a innluahna ah va kha ding in pawsuk hi. Tedim Road lamlian dung ah hong taisuk ua, Red Cross Road luutna mun a tuntak un Police-te lamlian khaktan in ana ding threpthrup maimah uhi. Fire Brigade-te gari ging ngaihtak ham vongvong nilouh a, huai apan in amau leng meikang om ahi chih theikhe pah uhi. Luut suk ding khaam uh ahihman un lamdangsa kawmtak in a nih un gari tung apan kumkhia in khodak uhi. A gal ua thawmging vengvung a zakte uh bildoh kawm leh vantung lam a meikhu leh meikuang san leiloi leengtoute khawng en in ding uhi. Huchihlai in a kiang nai uah mi khat hong paikha a amah kiang ah thu omdan dongchian uhi.

“Lawm, bang thu om ahia?”
“New Bazar lak a meikang om inchin huaiziak hiveh aw. Denlam deuh a patau dak ging vengvung za lou na tel uh maw?”
“Zakha hetlou mawk ka hi uh.”
“A bengngong na zezen uh mawleh, huai hial za lou... Ahi a, phawkphak louh theih mahle hi maw, tu hun a nungak leh tangval pawtkhawm in chu. Hehe...”

Mipa’n huai teng gen in paikhiaksan hi. Pau in leng mipa en vangvang in bangmah gen lou hi. A lungsim in huai Lungkuai Cafe a a omlai ua thiltung hikha maithei eive chi in ngaihtuah lel hi. Huchihlai in Ngaihnou in, “Oi... Ka nak lungkham a... Ka innluahna khawng ana hi mawkleh zaw...,” hon chikhia hi. Khapi lah vaak lou, mei lah meikang ziak a mit dildel ahihman in mel chiangtak in kimuhtuah haksa a, a gal a Police-te meivak vakte’n bel tanvak milmial pha sam hi. Meikatna lak tungzawn bel meikuang ziak in vak phemphom a, meikhu toh kidim in thawmging ngaih huntawk om in lum vengvung hi.

“Mawkmawk eive, nang innluahna hi mawk kei inte,” chih teng lel in Pau in khamuan hi. Ngaihnou in leng bangmah dang gen nawn tuanlou a, himahleh a om kinken theih louhdan apan in a lungsim khat patau mahmah ahi chih theihtheih hi.

Dakkal khat vel nung in mipi paisak nawn ua, huchi in amau leng Ngaihnou’ innluahna lam zuan in kipua uhi. Ngaihnou’ muanmoh mah bang in inn kangte lak ah amah innluahna leng ana telkha taktak maimah a, khaam leh hehnep zoh vuallouh in Ngaihnou tuh hong kapkhe loloih maimah hi. A sum kholkhiak sunsunte, a innsung van kaihkhawm zoh sunsunte, a um-le-bel leh puansilh-nikten tengteng, a vek sipsip in a inn toh kangbei vek hi.

“U Pau, kei bang suakta ding lah?,” chi in Ngaihnou tuh Pau’ liang langkhat len in kap huphup mai hi.

Sepaih hi hial mahleh hichibang a vangsiatna tuak nungak toh omkhawm ngeilou ahihman in kipasal zoh haksa sa ahi ngei ding a, a mittui hong paak likliak hial hi. Hehnep dingdan a thei zou kei a, bangloh a hoih ding hiam chih leng a thei sam kei.

“Pathian aw, ka tagahna leng deihkhop lou Na tel hiam? Haksatak a ka kaihkhawm sunsunte na hon laksaklai tel... Ki-awina tel chia maw... Ka hinna leng tu mahmah in hon la mai in, Pathian aw... Kei ding in hin man a om nawn himhim kei...”

Hichibang in Ngaihnou tuh kidek zou vuallou in hong hawkkheta mai hi. Huchi in, beidong lua ahi ngei ding a, Pau’ liangzang apan kikhinkhia in inn kangsiate lak ah dianlut sawm hi. Huchilaitak in Pau in kintak in sawk in a ban ah ana man man vanglak hi. “U Pau, hon khah zaw mai in. Kei aa di’a hin man om nawn lou ahi,” chi in, khitui-naptui toh Pau en liakliak hi. Pau in leng lohngaihna tuan thei lou in a angsung ah kailut top in kawi tonton hi.

“Ngaihnou aw, kei ziak beek a na hin man omlai lou ding hiam? N’on paisan ding k’on phal mahmah kei,” chih toh Pau in kawikip thakthak thuah hi.

“U Pau, tualniam vangsel lianu na angkawi di’n ka phu lou e. Sawnban kai lou aw, kei ka tuun leh zua siang zuan ding hi’ng,” chi in kipekkhia in tailut ding in kisa teitei hi. Himahleh Pau in a kawngbom a mantang in khahsuah nawn lou ding in lenkip tinten hi.

“U aw, bang selung gel na hiam? Lia in suan ding nei ke’ng. Na lunglai ka luahdim zong in tunnu leh zuapa’n bang lung gel ding hiam ngaingam kei veng. Kha ka pham nang di’n tawldamna hi zaw’n chia, u aw...,” kidik hithit kawm in chikik hi.

Pau in awlawl in Ngaihnou a letkipna khah hiaihiai in amah anglam nga ding in awl in heibawl hi. Ngaihnou in a u Pau’ mel leng en ngam nawn lou in kun dedu a, mittui-naptui toh kidik hithit hi. Pau in a khut taklam in awl in Ngaihnou’ khabe domtou mahleh ama’n en ngam lou in a mitsi hi.

Pau in, “Lungguk a leel ngam louh itna simthu zatamte hon leel leng, ka it luat Ngaihnou aw, naubang n’on sang diam?” chi in dong hi. Huaitak in Ngaihnou’ mit hong hak kuau a, Pau’ mittang tegel entou kilkel hi.

“Nuihchiam leel nang di’n val lua e, u aw. Lia in tak in naubang sang leng, kawlni suah chia’n tangpa lung sik ding hi chia.”
“Lungsik di’n gel lou aw, ka itna sim singbang gilden ding hi. Nang it vang a tangpa lungzuanna mel in theile chin chi’ng e.”

“U Pau,” chih teng lel gen in Ngaihnou in kawi-ek a, adang bangmah gen tuan nawn lou hi.

Pau in amau inn lam a kizuilut mai ding in zolzol mahleh Ngaihnou in hithei sa mahmah lou hi. Chikmah a Pau’ nu leh pate mukha ngeilou thamlou a agal a leng kihoukha ngei nailou ahihna uah Ngaihnou’ sisan in ngam vuallou hi. Amau gel ngial leng kingaihna mumal om lou hilai ahihman in lungbuaihuai sa hi. Nialnial mahleh Pau in kunkun ahihman in, a paina ding dang a theih tuanlouh toh atawptawp in nial zou nawn lou in zui khong hi.

A inn ua Pau in a pilut tuung in pa Hang leh nu Zuii ana kipak mahmah uhi. Himahleh a kipahna un sawt a daih kei. Ngaihnou’ tanchin a hon theihchian chiang un Pau’ nu leh pate leh sanggamte’n sit mahmah mai ua, nuamlou simsim in koih uhi. Pau in lah it lua ahihman in a nute’n amah muh in house ngam lou ua, himahleh amah kuan nawn ding kal bel a guktak in a sungkuante’n ngaklah mahmah uhi. Vangsiatna ziak a kitengkha chihdan suak uh hi zawmah ahihman in a mou lutpihte bang in simmohbawl in amau sep nop louhte khawng semsak uhi. Huai kia hilou in, genkhiak theih chetlouh kilungsim-uina bang leng a thuak ding khop niteng in om hi.

Kha khat val hong bei chiang in Pau leng a kuan nawn hong hunta hi. Huchi in a sepna lam ah kuansan nawn pah a, amah kuankhiat ni apan in Ngaihnou’ hinkhua leh dinmun tuh niteng in hong haksa hiaihiai hi. Kampau kha taktak leh engbawlna kampaute tuh a niteng zaak a hong hita mai a, kam khat dawngleh kam sawm in thukkik in om hi. A nawlam suan ding ginatak om lou zawmah ahihman in simmohna leh muhsitna chihte sialpi vuahthuak a a thuak a kul hi. A pasal kiang a lah bangmah genkhe ngam lou ahihman in Pathian kiang ah thumna in tuntou zel mai hi.

“Mihing tengteng lak a a vangse pen ka hi ding maw,” chi in Ngaihnou kingaihtuah sek a, himahleh mahni hinna laak ding leh inn apan taikhiak ding bel lunggel in a nei kei. A pasal’ nu leh pate bang in akhenchiang in a pasal paisan ding peuh in sawl uhi. Pau’ zi ding mi hausa’ tanu leh laisiam khawng hawi nei uh ahihdante a genkhum chiang un leng Ngaihnou in bangmah in dawng lou hi. A lungsim in, “Ka pasal in a hon it a, ama’n midang deih hileh kei hon nei lou in sawtpek in zi ana nei khinta ding,” chi in ngaihtuah a, patau lou hi. Kitenna zaw khatvei a setdet ding ahi chih a theichian lua. Biakna kikhopte ah a nungaklai in tel gige man kei mahleh Pathianni teng beek in tel gige hi. Huai in a khalam leh taksalam ah tampitak phattuamna pia hi.

Pathian’ dawnna zaw a zekai sek, himahleh thumnate dawn louh in A koih ngei kei. Ngaihnou in huai thei in, “Ka thumnate a vuaksuak kei ding a, khatveitei dawnna ka mu ngeingei ding,” chi hi.

Ngaihnou in kum khat nung in leng nau hon pai naikei lailai a, huai pansan in a pasal kiang ah a nu leh pate’n hekse zawmah uhi. A sanggamte’ zite bang in, “A nungaklai in mi teng khawng toh a lumkhawm a ahi ding, tutan nau neithei lou a a om,” peuh chihkhum uhi. Hiai thute mittui luang zoihzoih kawm in Ngaihnou in ngaikhe zel a, thuak mualsuah sawm in pang teitei hi. A pasal apan bel itna kampau leh hawmthohna ngen za a, huaite ziak in ana pang zou hamham hi.

Hun leh nite hong pai zel a, khatvei Moreh a pa Hang leh nu Zuii amau gari a a va hoh uleh tuahsia va tuak uhi. Migilou pawlkhat in a damdawi khamtheih puakte uh sepaihte’n a muhsuah louhna ding uh chi in pa Hang’ gari ah a guuk in ana koihgu uhi. A huchih chiang in, a tuahsiatna mun ua va delh sepaihte’n huai damdawi khamtheih muhkhia in case bulhkhum daih uhi. Pa Hang lah a khe lang nih a kisia in om a, nu Zuii ngei leng a mit veilam banghiam in dawtsiatsak hi. Khamtheih toh matkhawm a om chihdan suak zawmah ahihman un nu Zuii’ sepna toh kisai leng hong buaipha hi. Kisiamtanna thu a gente uh Court mai a chetna ding omthei om lou ahihman in vuallel ua, vangsiatna tung ah vangsiatna thak khat in buahkhum behlai hi. Nu Zuii tuh a sepna apan tawpsak in hong om hi. A lunggimna toh kingaisia in nu Zuii tuh lungsim lam buai in hong buai hi. A pasal lah a khe tegel etkolna toh zunkhum bang a neihlai zawkmah ziak in doctor-te’n a etkoldan buaihuai sa petmah uhi.

A dinmun uh hong se mahmahta a, pa Hang in lah sum zong thei nawn lou ahihman in kum khat bang zawngkhal a a hong om chiang hial in a neihsa teng uh hong bei hulhul mai hi. Nu Zuii lah Court a kainate leh a nupa ua a ki-etkolnate uh ziak mah in a Bank Account hong hawmgai khong ding bang hi. A nupa ua kumzawn a hong om nilouh chiang un sum-le-pai ah haksatna liantak hon tuaktou uhi. Nidang a Pau’ khaloh etlahsak hetlou himahle uh tuchiang in a nekpipen uh hong suak maimah hi.

A khosakna un siatlam leh haksat deuhdeuh lam manoh ahi chih a muhkhawl chiang un a tapa nihte’ zi tegel in amau nute’ inn lam tuak zotsan ding in a pasalte tuak uh hon thuzohta uhi. Ngaihnou in, “Anuam-ahaksa thuakkhawm dialdial ding i hi ua, bangteng hileh, u Pau khaloh bang leng hunkhop hita sam ahihna ah hon taisan kei unla nekhawm, dawnkhawm ni uh. Unau i hi ua, a kipaihthei kuamah om lou i hi. I nu leh pate ngei uh leng zawngkhal lua ahih chiang un enkol khawm thei leng hoih ding ahi,” a chih chiang bang in leng limsak nuam lou uhi. Pa Hang leh nu Zuii ngei in leng a moute uh khou mahle uh amaute poihlawng hita ahihna uah a enkol peih taktak om lou uhi. A tapate uh lah, a hatlai ua duat lua uh ahihman un bangmah semthei lou ua, sepna mumal leng nei lou in sumzat bang hat viau zawmah uhi. Nu Zuii ahihleh a lungsim lam buai zel mahleh a zia hong om hun omthei zelsam hi.

A mou masa tegel in a taisan chiang un pa Hang leh nu Zuii tuh a simmoh mahmah uh Ngaihnou etkol ding in hong omkha ua, a dinmun uh nuam hetlou hi. Ngaihnou in bel, “Ke’n pianna taktak nu leh pa chih ding nei nawn lou ka hihman in amaute ka nu leh pa taktak ahita mai ua, ka leitung Pathian ahi uh,” chi in kamsiamtak leh ittak in kem hi. Huchibang a a kep chiang in nu Zuii leh pa Thang tuh a thilhihkhelh ua kipan in hong kiphawkkhia ua, genkhe ngam kei mahle uh nidang a Ngaihnou a bawlsiatdan khawng uh a ngaihtuah chiang un kisik mahmah mai uhi. Ngaihnou a siam zoh khopleh amau kisuanlahna hong lian semsem hi. Himahleh, Ngaihnou in bel a nu leh pa toh hichibang a kituak zaw a hong om theih ziak un a lungkim petmah maita a, a pate’ vangsiatna bang vualzawlna khat a ngai in kiguk pah daih hi.

Kum hong pai zel ahihman in Ngaihnou in leng Pathian vualzawlna ngah in nau hon paai hi. Gilpuak kiukeu kawm in a pa khebul bang kisil ding in vialdop zel a, lungngaih luat ziak a teksot gawpta a nu bang leng daileng ding khawng in paipih tettet hi. Huchi in, sum-le-pai lam ah zawng mahle uh lungnopna leh kipahna lam ah niteng in hausa hulhul uhi. Nu Zuii ngei leng a sisan khawng hong dawk in hong hat thak hiaihiai a, a lungsim buainate bang leng awl in hong dam hiaihiai hi.

A sepna lam apan hunawl a ngah theih ziak in Pau tuh inn lam ah phalbi nuamlen hun zang ding in hong pai hi. Huai kum a innkuan kim a Khristmas nuamtak a a zat bang tuk ua nuam a zat lam uh pa Hangpu leh nu Zuii in thei ngei lou uhi.

A nu leh pate nuihmai leh a itna uh ngah zou a a om man in Ngaihnou kipak petmah mai hi. Nitak khat a lup un Pau in hawmthohtak in Ngaihnou kawiphei a, himahleh ama’n, “Hei... Pilvang in. Nanau delhkha leteh nuamsa lou ding ahi,” chi in chiamnuih hi. Pau leng nuikawm in kinungkin a, Ngaihnou’ gilpuak pingpeng zutsak hianhian kawm in, “Nanau, sorry! Papa in nanau mel mu ut gawpta, damtak in hong pawt pah in aw?,” chih toh tawp cheuh thuah hi.

“U Pau ei, itna vangtah a chih uh diklou hiveh aw maw? Itna vangpha hizaw ahi.”

Beita.

[Ataktak bang thei ding a phuahtawm pumlum ahi. Hiai tangthu a min, mun leh thu kigen khempeuhte toh ataktak a kibangkha a om zenzenleh tupmawng hilou in ana kibangkha zenzen hizaw ding hi. ©Valte Ginkhenpau, 2019]