1
NUNGAK SILUANG
By Ginkhenpau Valte
Nitak dak sagih vel a hong gin toh kiton in, ngeina bang in, bang thuthak a om hiam chih theih utna toh ka sungkuan un Tullou TV news ka en uhi. Thupuangtunu’n kizentak leh awchiang setset in thuthak a kaihkhawm theih teng uh puanna hon nei a, huaite lak ah khat in ka lung hon khoihkha deuhpen hi. Aziak ahihleh, tunitaklam apan khomui tan dong a ka buaipih nilouh thu khat ahih ziak ahi hi.
..........
Tusun, sepna toh kisai a mun tuamtuam ka phakkual zoh nung a ka pisa ka tun nung sawtlou in, ka nuai a semte khat naksam dekzen a hong tai in ka pindan ah hong lut guih hi. Nak thethu kawm a salam a hon buk zoh in, “Sahib, District Hospital lam ah buaina om chi uh. Denmah in huai kiim a galvil a om lawmte khat in mipi sousang thei dingdan a om ahi chi a, ‘hon delhtou kin un’ chi ahi,” hong chi somsom hi. A hong gentupa ka et chia’n hehpihhuai bang ka sa zezen hi.
“Huchi ahihleh kintak in gari hon tawlpawt unla delhtou pah ni eleh,” chi in ka dawngkik pah hi.
Department in hon piak gypsy ngou sung a tawmlut gaih in kintak in damdawiin lam ka naupangte toh ka delhtou pah uhi. Amun ka tuntak un mipi ana tam petmah manta uhi. Bang thu om hi hiam chih leng theichian ngelloupi a pau zoizoi leh avangkim a kikou kongkongte ka za pah ua, huchi in ka lawmte kiang ah pilvangtak a gamtang a kampau ding in ka hilhlawk masa hi. Huaizoh in, awl in ka gari apan ka kumkhia a, misikoihna a kikoih numei luang lum dildel khat om pen tuh ka va naihphei hi.
“Hiai siluang tanchin theisau deuh na om uleh hong pai unla i houlim ding uh,” chih teng ngaih lawtel lou in ka gen a, huai toh kiton in siluang tuh ka en vangvang kawm hi.
Mipi lungsou a pau zoizoite azia hong om deuhtak un ke’n leng Paite puandum a kikhuh huai siluang toh kisai First Information Report (F.I.R.) ngaikhe ding a kimansa a om ding in ka lawmte ka hilh a, huai toh kiton in sihna tuak nungaknu’ sungkuante kapsa in ka kiang ah hong pai uhi.
“Ka tanu neihsun uh ahi a, khopi lam a laisim ding a omkhia, tua suti hong zang zual ahi,” chi in a nu’n awling pelhpelh kawm a kap keuhkeuh in hon hilh a, “Ka tanu in mi siatna ding leng gen ngeilou hi a, hon hichi thahsak mawk uh zaw pawna lua ka hi,” chi in kap kawmkawm in hon gen hi.
“Abangbang hileh, hong kidek deuh phot inla thil omdan kikum masa leng a hoih ding e maw,” chi in ngetna ka bawl a, a luang tuamna puan ka hawk zualleh a sam teng khawng kawtgawp ahihman in tui a kithat hiam ahihkeileh tuikia chu hi peuhmah ding eive ka chi lungsim hi.
“Ahihleh i naunu uh min bang ahiale?,” chi in ka dong a, a nu mah in, “Jenny Hoiting ahi,” chi in hon dawngkik pah hi. A min omdan apan in unau Vaiphei lamte chu hi peuhmah eive ka chi lungsim a, Jenny nu pen Paite pau a siam luat man in a tanu min a hon gen ma in bel Paite mah hi dingdan in ka na koihsa mawk hi.
“Ahihleh amah bangchidan a si ahialeh?,” chi in amau ngaihdan ka dong nawn a, huaitak in papi khat in heh-aw deuhmai in, “A tangvalpa’n tuilak a a sawnkhiat ahi,” hon chi phei gamgam hi. Huai mipa aw sangsim ahihman in ka kiang a ding ka seppihnu bang kiguih in a laigelhlai bang khawl in enkha leklawk hial hi.
Ke’n leng huai mipa ka enphei a, huaitak in Jenny’ nu’n, “Ka naupa ahi,” chi in hon hilh a, bangmah ka gen kei. Siluang tuamna puan hawk in sawtlou ka en thak a, himahleh a taksa tung ah liamna ma muh ding bangmah om lou in ka thei hi. Huaizoh in, “Ahihleh, houlim sau poimoh ding a bat ziak in thana lam a na hon zuihsuk uh poimoh dingdan eive,” chih teng gen in Police Station a hong paisuk ding in ka hilh hi.
Pasal dang khat in kei hong naihphei a, ka kiang ah, “Pu aw, misi tungtang kihoufelna a om masiah siluang laak louh ding ka chih uh ahi aw,” chi in kamdamtak in hong hilh a, ke’n leng bangpi gen tuanlou in, “Hithei hileh tuh siluang pen post-mortem bawlzoh phet chiah na inn lam uah ana pawtheile uteh chu hoih mahmah maithei ahi,” ka chi hi.
A ngaihdan loupi uh genkha ka hi ngei ding a, a lungkim mel hetkei uhi. Kei bang leng paukhial leng hon bohhuan maimahle uh kilawm khop in tangval hon in hon umbawl uhi. Pilvan kan om lou ahi chih thei kawm in kampau ka kidek a, amau thugen tangtak in bangmah sel ka nei kei.
Doctor-te kiang ah post-mortem kintak a bawl a Jenny sihna toh kisai ka pisa a tuni ngei a kintak a thuchian hon khaksuk ding in ka hilh hi. Amau leng siluang tuh etchet di’n insung ah pawlut ua, huchi in kei leng Jenny’ sungkuante toh, ka gari a tateng, kihenlut in ka pisa lam ah ka paisukta uhi.
Ka pai nung a thil omdan enkai a buaina om ding veeng ding in ka nuai a semte mi bangzahhiam amun ah ka nawsia hi.
Pisa ka tuntak un ka nuai a semte kiang ah Jenny tanchin kimtak lakhia a, ni thum paita apan a kithuahpih a lawmte kuakua hi uh hiam chihte a nute kiang apan dongkhe di’n ka hilh vek hi. A tanchin kaihkhawm theih teng a kaihkhawm nung un kei dohkan ah a lehkha teng hon tuntou uhi. Huchi in ke’n leng huai lehkhate ka enen a, a nute bang houlimpih zel in thu omdante awlawl in sui ka pantou pah ngal hi.
Sawtkhop houlimna ka neih nung un amaute ana pai phot di’n ka theisak a, amaute’n tualthattu om hi di’a a muanmoh tinten ziak un tualthattu mankhe teitei di’n hon ngen thakthak uhi. Ke’n bel tualthattu om taktak ahihleh taimang thei lou ding ahihdante gen kawm in kuamah daan tung a thunei om thei lou ahihdante khawng leng gen in ka hehnem hi.
Jenny’ nute gendan in bel a ngaihzawngpa’n tuilak a a sawnkhiat hi ding ahi chih hi a, himahleh huai thu thudik ahih leh hih louh chetna ding bangmah bel pawsuah thei zel lou uhi. A muanmoh thu lelmai uh ahi tadih phot hi.
Nungaknou Jenny bel mingou leh mi zeen zitzet hi a, duangching leh sam hoihtak nei ahi hi. Tutung a inn a hong pai pen Delhi a laisim di’a a koihkhiat nung uh a hong pai patna ahi. A va omna lam ah Suanlian kichi khat toh va kimaikha in itna kipetuah uhi. A ki-itna tungtang uah Suanlian’ nu-le-pate’n deihsak lou bilbel in naktak in hal uh chih Jenny’ nute’n gen uhi. Huaiziak khawng mah a a thah hi di’n a muanmoh thu uh naktak in gen ua, himahleh thuchian puaksuah ding bangmah bel nei tuanlou zel uhi.
..........
Tunitak a ka thuthak ngaihkhiat un ka thusui tamtak hon gelkhesak thak nawn ahihman in manpha lua suak hi. Sihna gimnei thubuai suizui di’a mohpuakna ka khut a hong omkha pen, alehlamtak ah lithuai bangsim mahleh, ka sep dingmah leng hithou hiven chi peuh in kei leh kei ka kihehnem hi.
“Zingchiang a leng hiai thu toh kisai suizui ding a ka vialdian ngai ding ahihna ah tunitak tuh lup baih deuh ngai ding eive,” chi a ngaihtuah kawm in ka tate uh a lupna pindan uah kha in kei leh ka zi leng ka pindan uah ka kizuilut uhi. Ka zi in lupkuan hanawt zongsang ahihman in kei leng ha nawt ding in hon sawl a, kilawp ngelloupi in ka kisatei hi.
“Zan chiang inlah kei lam na hon nga ut ngeingei di’a, huaiziak in, na ha nawtsiang pah ou. Kam uih dik peih lou ka hi aw,” nuisim kawm in hon chi gaih a, ke’n leng nui veivuai kawm in a veilam tainem ka dawtsak kauh hi. Amah bang kitawm zotkha hial a, nuih in nui konkon hi.
“Numeite thuneihna mun lianpen lupna tung hiven na thugen hon man mai ding hilou ding hia,” chih toh hanawtna ah halou taat gaih thuah in hanawt ka pan hi.
“Na uang!,” chih toh tui tamlou in ka mai theh hon thuah phut a, kiguihzot in, “Ash!,” ka chi manlel hi. Kimawl uttak hi’nte chi in ka thoh zek hi. Hiaidan khawng eive nupa kop a omkhawm a nopna chih toh a kipahna ding chihbawl in, hanawt kawmpi in, ka nou hi. Sawtlou in ka mansiang uhi.
Ka luptak un lupna tung ah ka zi in, “Bang lungngai dedu na hia oi? Na nasepna mun a giak dek hi lou na hi aw. Huchi hahpan a zi bang phawk lou zen a lungngaih luat zezen ding hilou ahi,” hon chi hi. Ke’n leng kintak in, “Ka nasepna mun thupi penpen mun a giak dek ka hihlam hon thei lou na hi maw?,” chi in ka chiamnuih zui pah a, zanpuan kaitou in ka zi ka kawiphei hi.
Aban zaw na theisiam mai ding.
[“LAPD” kichi Valte Ginkhenpau’ gelh tangthubu apan lakkhiak ahi. A tangthubu deihte'n 9089402757 tungtawn in ngah theih ding hi.]