Laipau a ka pianthakna
Moreh Resolution hong piandan
~ Pauzagin Tonsing
Kum 19 a paita. Pawl IX ka sim lai in ‘... in lieu of MIL’ in Paite leh Elementary Manipuri ka tawi hi. Manipuri ahihleh simtheilou phial himahle’ng mahni pau om ngal a chi in Paite pau ka na lak teitei ahi. Siamthu chile’ng keisang in Paite pau zanglou ka lawmte’n ekzam chiang in tam amu zaw gige ua, Matriculation ah leng kei sang in tam a muzaw lai uhi. Khupching leh Ngambawmte’ tungtang mahmah gelh ningthoh gawp lam leng kihilim mawk hi. Huai hunlai a laibu kitawi ahihleh Thu leh La kichi Dr H Kamkhenthang in a gelh ahi.
Thu leh La bu masapen ahi a, CH tang in C kizang a, a bu pumpi a C kigelhna teng ah H ka behlap a, CH ka suah vek hi. Khat mawngmawng leng hawi hetlou a C tengteng H behlap a CH ka hon suah nung in chu a gial ngial bembom hi. Hilehleng ka lungkim mahmah a, lai ka sim chiang a ka hehguk tenna bei bang phial in ka ngaihtuah hi. Huchih lai tak in Thu leh La bu pen PLS vaipo thakte’n a sun thak ua, C apan CH in khek uhi. Abu lui pen a thak a khek utte’n khek theih ding a chih ziak un ke’n leng kin deuh in Pu Thangpau-te inn ah ka va khek pah hi. Lungsim bang nopzot hileh kilawm ka sa zawzen hi.
Ka ngaihtuahdan in, ‘Huai Burma lam ate’ zat C (read as sii) va zatpih bang a phatuamna, amau a ut uhleh a hon zom kei di ua,’ kichaphou sakna toh ka om hi. Huaiziak mah in huai Thu leh La bu sung a C teng H behlap a CH suah mah ka hi. Bang hoihna leh siatna om a, bang policy om ahia chih ngaihtuah sang in, ‘Simlamte’ zat C va kop khemkhem ngailou,’ chidan ka hi. Baptist misonari JH Cope in Tedim-te laimal dia a bawlsak Roman laimal va kikoppih mai chih tuh na ka sa hi. Surrender dan a kithei in, huai tan kia ngaihtuahna toh om ka hih man in dik bang ka kisa mahmah phengphang hi. Huchi in Pawlp X zoh tan in leng ka dinna tuh ka lenkip a, ka ki-surrender ut kei chih lungsim toh ngaihdan ka nei den hi.
Lavui leh article gelh khawng ka hon pan hi. Huai lai in Zougam Tangkou a lun mahmah a, Zougam a dia kilaankhe ngam kua teng om chih chouna ding in Sangsavai ding Tang ngalliam kua? chih khawng, leh article hunkhop ka gelh tak ban ah Kahla series bangzah hiam khawng ka gelhta hi. Kahla ngial bang series 9 tan phial phatou in ka hon gelh a, lavui suahkhiaklouh 20 lam bang huai in ka neikhinta hi.
Theihsiamna kha tang ding a kuama’n hon hilhlou leh theihsiamna kha thop ding a theihna neilou ka hihman in ka kilaan thei kei bilbel hi. ‘C’ va zat veuhvauh chih khawng in ngaihsiam theihna a om himhim kei. Huchih sawng lai in Paite laipau khansakna ding a mite’n bang ana hih uh hiam chihte theihna tan nei mahle’ng a hihna tak theihna kichian ka nei kei hi. Laibu simsim mah ana kihihsam chiang in ei lawi laimal toh kisai pen bangtan hiam theihna chiang om sam hi. Bukimlou tak theihna toh ei laimal pen savun a kigelh ui in hon tuah mangsak chihleh Pu David E Jones leh Pu T Vialphung in Aizawl a hon bawlsak uh chih khawng kithei hi. Aizawl a pen bangleng lawikhat in a dal ziak un bangchi bawl uh hiam chih theihlouh ding a suksiatsak a om thu khawng kisim kha nialnual hi. Huan, Paite laipau a dia Pu (Rev) H Nengzachin mipoimoh mahmah ahihdan ka thei lel hi.
Paite hisam i hihchiang in i gelhdan peuh dik ding bang a ngai in, Laisiangthou i simtheih apan i na theih CH mah ngaihnatna toh, ut chia TOPA chi in, akhenchiang a TOUPA chisuk ziau. Akhenleh TOPA a Z i behlap leh TOPAZ khawng kisuah zawzen hi. Hichi bang a huatna liantak ka neihlai in huai Burma-te C ka chih pen si ana hithahahlou in cha (read C as cha hereafter) ana hihlam ka hon phawk a, gamgi neitak a laipau ana it ka hihdan kiphawksuahna hun khat ka hon zang hi. Hiai kiphawksuahna ka hon neih ahihleh Paite Vernacular toh kisai a amasa pen ding a Workshop on Paite Vernacular kichi ka hon sai dek ua pan ahi.
Lamka khopi sung a School tuamtuam 25 tak khe a phasuak in, Class IX & X a Paite subject la bangzah om himhim hiam chih suina ka nei ua, tua hun (1993) in Class IX ah naupang 461 om a, Class X ah student 399 om hi. School a Paite subject toh kisai haksatna tuamtuam nouhkhawmna (workshop) July 23-24, 1993 sung in YPA Hall ah kinei a, student 750 ban ah Teacher 29 hong tel uhi. Paite subject tawikha leng hinawnlou, tawi nawnna dia chance om nawnlou himahleh naupangte awlmohna ziak in chi a hiai workshop ka hon sai uhleh skul ekzamna ding kia hilou in LAIPAU A PIANTHAKNA khat ka neihloh hi.
A utteng tukhawm zual a Simlamte toh kinaihtheihna ding a amau hihdan a A, B, C,... va chihpih mai ni chih ngaihdan hidia ka gintakdan ana hiphiangsan kei hi. Ana hi teuhlou in bangchidan a hiai bang hong piangkhia hiam chih ka hon theihchian chiang in, ‘E khaih! Thupi na lawmlawm e, hiai bang teng ahihvial in...,’ chi in laipau ah ka hong piangthak a, laipau khansak poimoh ahihdan ka hon phawksuah hi. Bangteng ahia hichi lawmlawm a thupi na sak na chi mai thei ua, anuai ah ban etsuk leng.
Paite laipau a hunbi a khen ding hile hunbi khatna ah Roman laimal i neihma uh savun a laimal gelh leh Laipian - 1900 malam, anihna ah 1900 – 1980, ahunbi thumna ah 1980 - ? chih theih ding hi. Hunbi khatna leh nihna pen theihdan chiat i neikhin ua, atung ah leng i genkha zek uhi. Hiaite pen theihna vantang a leng taang den phot ahihchiang in hiai tan ah pianthakna ka na nei kha kei hi.
Mihing a khanna om toh kizui in nam a kiphawkchianna leh gam leh nam itna hong khang in, mailam sawn zel a kalsangzaw tawi zel tuh nam leh jatte ngeina ahi. Nam leh gam itna hong khan toh kiton in Paite sung a pawl lian mahmah Paite Tribe Council/PTC (huailai a PNC), Young Paite Association (YPA), Siamsinpawlpi (SSPP), Paite Literature Society (PLS) leh Saptuam in laipau toh kisai awlmohna leh ngaihkhawkna hong uang hiaihiai hi. Hun paisa a mimal a lunglutte leh PLS mai in laipau khansakna dia ma ana laktouh ngitnget uh puah thakna ding in PTC makaih in October 2, 30, 1982 & November 1, 1982 in YPA Hall ah PAWLPI TUAMTUAM MAKAI U-LIANTE KIKHOPNA (JOINT MEETING) chih minvuah in ana kikhawm uhi. Hiai meeting a Agenda : Pau leh laimal (literature) tungtang hi a, a theme : ‘If the people will not follow their language they will become slaves’ chih ahi.
Amasa pen October 2, 1982 dak 11:30 am in pan ua, hiai ah makai tuamtuam in ngaihdan kum uhi. Hiai hun masa a thugenna tangkhate : Pu Vung D Tombing, Principal & President PLS; Dr H Kamkhenthang, Sr RO; Pu N Phungzapau, Fin Secy ECC; Pu G Lalthanglhun, President SSPP; Rev B Ginneihthang, Director of Evangelism ECC; Pu K Ginkhanthang, Gen Secy SSPP; Pu V Ngulthuam, Chairman CEC YPA; Pu Piangzathang; Pu Tualchin, Editor, Zogam News; Pu H Khatkhojam; Pu T Thangsei, Lecturer; Dr S Ngulzadal; Pu Lalneihthang; Pu Pachungnung; Pu Kaigin, Treasurer PNC; Pu Sumkhanjam MDC leh Pu L Chinkhanlian, Editor Manipur Express ahi uh. Hiai kikhopna masapen ah thupukna (resolution) om lou hi.
Hiai meeting a thukup tangpite ahihleh laimal zatdan ah uniformity neih kisam ahihdan nak tak a gen in om a, Roman alphabet 24 mah hia zat di 26 chihleh agindan tuamtuamte, G (ek/zi) pen ‘ga’ hiam ‘ge’ hiam a ginsak hoih ding chih khawng ngaihdan tampi lut hi.
Hiai meeting masa a telte mi 36-te : Vung D Tombing, Principal & President PLS; H Khatkhojam; Vungkham Tonsing, Member CEC PNC; V Thangkhum, Chairman CEC PNC; Thangkhum, Ex-Chairman; L Suakhnun; H Lalbuang, Town Commissioner & Member CEC PNC; Dr H Kamkhenthang, Sr RO; K Hanghal, Member CEC PNC; K Ginkhanthang, General Secretary SSPP Hqtrs; Lalthanglhun Guite, General President SSPP Hqtrs; Phungzapau, Fin Secy ECC, T Thangsei, Lecturer; Rev Ginneihthang, Director of Evangelism ECC, Khamvum, Headmaster CES Geljang; Thuamhau, Member CEC PNC; Pauchinkham, Member CEC PNC; H Haukung, Gen President YPA Hqtrs; Tualchin Neihsial, Editor Zogam News; Ginthiau, Member CEC PNC; V Ngulthuam, Chairman CEC YPA; T Jamkhanthang; T Mangkhopau, Ex-Vice President PNC; Vumsuan, Member CEC PNC; T Haukholian, Asst Gen Secy PNC; Lalneihthang; Thangkim Ngaihte; Piangzathang; Dr S Ngulzadal; Sumkhanjam, MDC& Member CEC PNC; G Kaigin, Treasurer PNC; L Chinkhanlian, Editor Manipur Express; LB Sona, Gen Secy, DCC(I); K. Guite, Headmaster; T Phungzathang, MLA & Gen President PNC.
PAWLPI TUAMTUAM MAKAI U-LIANTE KIKHOPNA (JOINT MEETING) masa sutzopna ding in October 30, 1982 dak 10am in YPA Hall mah ah om nawn hi. Hiai hun a thugenna nei leh a thupite uh hiai bang ahi: Dr H Kamkhenthang M Sc, Ph D, Sr RO in I pau leh laimal zatdan; Rev T Jam Khothang BA, BD, M Ed(USA), Secretary General ECC in Kristian La, Paite Spiritual, Lapau leh La lehdan toh kisai theih ding tuamtuamte; Pu Vung D Tombing MA, M Div (USA), Principal & Chairman PLS in Paite Literature Pawlpi bang chileh nasep silbawl ah a kihat thei dia; Rev H Nengzachin, Supt (Rtd) Mission Compound (MSD) in Paite leh Tedim mite’n lai gelhdan i neih ding ahi; Pu H Hanghal BA, SDC (Rtd), Member CEC PNC Hqtrs in La leh lapau poimohna; TS Hangzo BA (Hons), MA, Head Master, Rostad Memorial High School & Chairman, Paite Customary Law & Practice PNC in Paite Vernacular dinmun leh poimohna; Pu N Gouzanang, Asst Teacher, Songtal Govt High School (MSD) in Paite Grammar, etc leh Pu Valte Doutluang, BA (Eng), MA (Prev), Gen Secy PNC Hqtrs in namdangte pau akipan kila Paite pau khenkhatte (Foreign influence in Paite language & vocabulary) chih pansan in genkhiakna nei uh hi.
Hiai hun a meeting na ah thupukna la naisam lou in November 1, 1982 a kikupkhawmna nouneelzaw a neih ding chi in kikhen uhi.
Hiai hun ah Paite lak a suantham ching makai 56 paikhawmte: Rev H Nengzachin, Supt (Rtd) & Bible Translator; Rev T Jam Khothang, Secy Gen ECC; Rev Thangsut, Supt ECC; Dr H Kamkhenthang, Sr RO; Dr S Ngulzadal, Medical Officer; Thuamson Hangzo, Headmaster RM High School; T Thangsei, Lecturer; Vumkhokam, Invitee; Pauchinkham, Member CEC PNC; H Tunzakham, Member CEC PNC; K Thangkhogin, Invitee; T Chinzam, Invitee; H Thawngkhomang, Invitee; Lal Neih Thang, Invitee; Piangzathang, Invitee; Kamkhotuan, Asst Engineer; Kaithang, Invitee; Ginkhopau, Invitee; Thuamhau, Member CEC PNC; T Ginzatun, Invitee; Kaithang Tombing, President New Lamka YPA; S Vungzagin, Invitee; T Jamsuan, Invitee; Gouzanang, Asst Teacher Songtal; N Jamneng, Invitee; Chinkholian Guite, Lecturer; S Vungsing, Asst Inspector of Schools; H Lalbuang, T/C & Member CEC PNC; H Thangsei BA BT, Asst Teacher; D Khaizalian, Town Commissioner; Tualchin, Editor Zogam News; H Nengkhothon, Invitee; K Hanghal BA, SDC & Member CEC PNC; John Deng, DAO (South); N Thangkhum, Chairman CEC PNC; Tualsin, Agricuture Officer; Mrs T Pauli, Headmistress; H Khupjam Mahajon, Invitee; Thangkhum Mahajon, Invitee; John K Ngaihte, Invitee; V Ngulthuam, Chairman CEC YPA; N Sarat Chandra Singh, Jr Research Fellow; TK Hangzo BA LLB, Manipur Judicial Services; T Khamtual, Invitee; Ginzakap, Invitee; Sumkhanjam MDC, Member CEC PNC; Thongkhotuan Guite, Agricutre Officer; Vungkham Tonsing, Member CEC PNC; Haukung, Gen President YPA Hqtrs; Nengzagin, Invitee; Gin Khat Suan, Invitee; Tuanzathang, Invitee; Vungzapau, Invitee; Vumzakhup, Invitee; E Khannang, Invitee; Liankhovung, Invitee, T Phungzathang MLA, Gen President PNC.
November 1 pen Kut toh kituakkha ahihman in 11am – 1pm sung khawl in huchi in amun ngeimah ah meeting zom uhi. Hiai hun a kikupkhawm tangpite uh ahihleh laimal 24 maw 26 zat ding, bangchi gin ding, spelling thu, Laimal, J leh Z, G gindan ding ge, ga, ek thu, AW leh O, O leh OU, CH leh C, ban ah J Q R X Y W chihte leng i pau a poimoh pah ding ahihdan khawng leh gramar (r poimoh pah maw) thu naktak in kikum uhi.
Ni thum sung kikupkhawmna om nung in hiai anuai a bang thupukna la uhi:
Resolution No. 1: Paite pau zang khempeuhte’n paudik leh lai gelhdan (spelling) kibang i neih kul hi chih hiai Joint Meeting in sawtkuamtak a genkhawm nung in pau le lai gelhdan kibang zat hita hen chih thukim hi. Tua bang in pau leh lai gelhdan kibang i neih pah theihna ding in GUIDE BOOK kichi Paite Pau Gelh Dik Dan laibu Paite Literature Society in hon bawl uh hen chih pha kisa hi.
Resolution No. 2: Paite pau* zang India gam a omte leh Chin Hills a i unau Zomite toh lai gelhdan kibang neih ahih theihna ding in Common Alphabet neih hi hen chih zong hiai Joint Meeting in pha kisa hi. Tua Common Alphabet ding tungtang toh kisai in PLS (Paite Literature Soceity) in Chin Hills a om Zomite toh kithuah in a thukimna bangbang un hon bawl khia uh hen chih pha kisa hi.
*PTC Constitution a Paite pau a chihte :Bukpi, Dapzal, Khotak, Lamzang, Lousau, Ngennung, Teizang, Tedim, Tuichiap, Val (& Lamka pau chih leng behlap mai diam??)
Resolution No. 3:Tua sang a hatzaw sem in PLS in na a hon septheihna ding deihna ziak in hiai Joint Committee in hiai anuai a mi 7 te leh Pawlpi 3 ( PNC, SSPP, YPA) U-liante chiat Interim period hunsung a Co-opted member ding in kisep hi.
Rev Nengzachin, Supt (Rtd)
Rev T Jamkhothang, Secy General, ECC
R Kamkhanthang, Principal, JN Model School**
T Goukhenpau
H Tunzakham
John Deng, DAO (S)
Pawlpi U-liante
Gen. President – PNC
Gen. President – SSPP
Gen. President – YPA
** R pen Robert chihna ahi.
Resolution No. 4: I pau leh laimal gelhdan a kibat theihna ding leh kitanauna hoihzaw leh khantouhna a pian theihna ding in i pau a laibu gelh dingte kuapeuh in PLS approval la masa zelta uh hen chih zong pha kisa hi.
Resolution No 5: PLS bye law puahphatna ding leh kiteel thakna ding thu hiai ah tuang hi.
[PLS objective-te lak ah ‘khovel gamteng a Paite pau zangte Literature (laipau) khat nuai a omkhawm theihna ding ngaihtuah ahi’ chih tel hi]
Hiai bang a ni thum vive kikupkhawmna leh nouneel tak a lai leh laimal suina aneih nung ua thupukna a lakte uh tuni chiang na ngawn a i tunzoh nai/nawnlouh uh thute ahi mawk hi. Mohpuakna a kipiak bang un mohpuakna neite’n buching tak a semkhia in maban sawn zel uhi.
Huchi in PTC leh PLS makaihna mah in October 14-15, 1983 in YPA Hall a meeting nei nawn uhi. Hiai hun a thugenna taktak kipat ma in PLS Secretary Dr S Ngulzadal in report pia hi. Hiai hun a thugente: TC Tiankham IAS (Rtd); John Deng, President PLS; Dr H Kamkhenthang, M Sc, Ph D; H Haukung, Gen President YPA; Pumzachin, Chairman Church Hymnal & Music ECC; N Phungzapau, Fin Secy ECC; Rev Ginneihthang BA BRE, Chairman, Bible Translation Committee ECC; Upa Thang-au; Mrs T Pauli, Headmistress; H Tunzakham BA; Sumkhanjam MDC; Rev G Khamkam B Th, Principal GBC; Upa T Khamtual; H Jamchinlian MA; H Thangdam MA ahi uh.
Hiai hun ah laimal thu leh laimal gawm N + G, K + H, A + W, C + H, chih leh uniformity khat nei a common alphabet neih ding mah gen pipen ahi. Anizing October 15, 1983 in YPA Hall mah ah zinglam dak 10 in meeting sunzom nawn uhi. Hiai hun a thugentute: Rev T Jamkhothang BA BD M Ed, Secy Gen ECC; H Ginkap, Mission Compound; D Khaizalian; K Hanghal SDC (Rtd), Chairman CEC PNC; Zoukhankhual Group (Lalneihthang Tg); Liantual; M Kaizathang Guite; V Ngulthuam, Chairman CEC YPA; H Lalbuang, Town Commissioner; TS Hangzo MA; VK Tonsing, Member CEC PNC; TC Tiankham IAS (Rtd) ahi uh.
Ni nih sung Joint meeting zoh in hiai anuai abang in thupukna la uhi:
Resolution No. 1: PNC Hqtrs leh Pawlpi tuamtuam makaite kikhopna Joint Meeting Thupukna Resolution No. 2, dated Lamka 1st November 1982 dungzui in Manipur leh Mizoram a om ei mite leh simlam a om Zomite kikal ah Common Alphabet i neih ding uh deihna ziak in tua toh kisai Joint Meeting ah palai kisawl ding pha kisa hi. Huan, tua kikhopna a palai dingte PLS in ana sepkhia uh henla ana kisawl uh hen chih lem kisa hi. Huan, tua palaite khut ah akul leh poimoh dungzui in thuneihna piak lem kisa hi.
Resolution No. 2: Pau leh laimal gelh ding dan toh kisai in ‘Paite (Tedim) Pau Gelh Ding Dan’ kichi Guide Book Dr H Kamkhenthang, M Sc, Ph D in PNC/PLS etc Joint Meeting thupukna (dated Lamka 1st November 1982 Resolution No. 1) dungzui in a hon bawlkhit pen tu dinmun ah zatphot ding (in principle) in pomkip pha kisa hi.
Resolution No 3: Bibliography & Literature Award: Paite pau laibu gelhte leh tua laibu gelhtute min chiamtehna laibu Biobliography sut khiak ding lem kisa hi. Huan, Simlamte toh i kikawmtuahna a i palaite kiang ah Literary Award piak ding lem kisa hi.
Hiai hun a member paikhawmte: 1. TC Tiankham IAS (Rd), 2. Dr H Kamkhenthang, Vice President PLS, 3. Dr S Ngulzadal, Secretary PLS, 4. John Deng, President PLS, 5. Doutluang Valte, Gen Secy PNC Hqtrs, 6. TS Hangzo, Headmaster RM High School, 7. G Khamkam, Principal GBC, 8. Thangkhum, Board of Directors PLS, 9. M Kaizathang Guite, Member CEC PNC, 10. Chin Gouthang, Fin Secy PNC Hqtrs, 11. Thuamhau, Member CEC PNC, 12. Ginthiau, Member CEC PNC , 13. Ginlang, Author, Paite Bible Concordance, 14. Pumzachin Hangzo, Board of Director, PLS, 15. Miss Manlianniang, Editor, Thuthang, 16. D Khaizalian, Spl Invitee, 17. Upa Thang-au, Spl Invitee, 18. Phungkhogin, Spl Invitee, 19. Vumsuan, Member CEC PNC, 20. H Ginzakap, Spl Invitee, 21. H Lalbuang Town Commissioner, Member CEC PNC, 22. Kamkhotuan, Spl Invitee, 23. Thongkhotuan Guite, AO, Spl Invitee, 24. H Thangdam MA, Headmaster, Govt High School, 25.K Hanghal SDC (Rtd), Chairman CEC PNC, 26. H Tunzakham BA, Internal Auditor PLS, 27. N Raltawn, Member CEC PNC, 28. Vumzakap, Spl Invitee, 29. Phungzapau B Sc, B D, Fin Secy ECC, 30. Enkhannang, Editor & Spl Invitee, 31. V Ngulthuam, Chairman CEC YPA, 32. H Haukung, Gen President YPA Hqtrs, 33. Mrs T Pauli, Headmistress, Vimala Raina Govt H/S, 34. Mrs Chin Gouman, Spl Invitee, 35. S Tualhnun Ngaihte AE, Internal Auditors PLS, 36. E Vungkholian, Spl Invitee, 37. T Nengzathang, Spl Invitee, 38. Tualkhanjam BA, Spl Invitee, 39. Lalneihthang, Spl Invitee, 40. Ginzakhai, Spl Invitee, 41. T Chinkhothang MCS, SDO Thanlon, 42. K Ginhau, Manager(Handloom) DIC, 43. T Khamtual, Spl Invitee, 44. Thangkim Ngaihte, Spl Invitee, 45. Vumzalang BA BT, DI, 46. Rev Thangsut, Supt ECC, 47. Suakhnun Mahajon, Spl Invitee, 48. Rev Ginneihthang BA, BRS, Spl Invitee, 49. Pauchinkham, Member CEC PNC, 50. B Liantual, Author & Historian, 51. Chinkhokam Hangshing SDC, 52. L Thangchinlian Guite SDC, 53. T Chinzam, Spl Invitee, 54. Nengkhothon, Spl Invitee, 55. G Mangzagou, Spl Invitee, 56. Lalthanglhun Guite BA, Gen President SSPP, 57. K Ginkhanthang MA(Prev), Gen Secy SSPP, 58. NK Khuptong B Sc(Agri), Fin Secy SSPP, 59. Sumkhanjam MDC, Member CEC PNC, 60. H J Jamchinlian MA, Spl Invitee, 61. Thangsiankham Town Commisioner, Member CEC PNC, 62. T Thangzakam, Member CEC PNC, 63. T Pumzalian, Member CEC PNC, 64. G Kaigin, Treasurer PNC, 65. T Haukholian, Asst Gen Secy PNC, 66. G Thangchinlian Editor, Member CEC PNC, 67. S Thangkhanpau Guite, Member CEC PNC, 68. VK Tonsing, Member CEC PNC, 69. Piangzathang, Spl Invitee, 70. Rev T Jam Khothang BA BD M Ed(USA), Secy Gen ECC, 71. T Phungzathang MOS (Med), Gen President PNC Hqtrs & Convenor.
Paite Pawlpi leh makai tuamtuam Joint Meeting 1982 leh 1983 a kikupkhawmna neih nung in kimin dimdiam khin uhi. Hichi bang a Paite sung a milian leh dottham ching tengteng khatle siit omlou a ana kikupkhawm theih kia uh leng thil thupi lua hi khin hi. Heutu chin ngen ahih uh kilatna khat ahihleh kimin dimdem khitna dia kinoh hetlou a kum nih vive hun alaksak theih uh leng ahi. Hichi bang a kimin khit nung un thupukna leh mohpuakna piak a om bang in Paite Literature Society in Simlam a unaute toh kithuahkhawmna ding gel uhi. India lam ate PLS in a makaih bang in Simlam ate Zomi Christian Literature Soceity (ZCLS) in makaih uhi. Hun bangtan hiam laithon leh lehkha a kidawp tuahna leh kithuzak ban uah, mimal a kimuhna a neihkhit nung un March 27, 1984 in Liankhovung’ Inn Moreh ah IST 6:30am / BST 7:30am in meeting pan uhi. Hiai ah Recording in Tape Recorder zang ua, PLS Award piakkhiakna Dr S Ngulzadal in nei a, a dongtu ahihleh T Ginkhatsuan ahi. Hiai hun a a kikup uh : 1. NIV Translation thu etzuina, 2. Women of the New Testament lehna thu, 3. Zoulai Gelhdan bu kikhupna, 4. Thu tuamtuam kikupkhawmna – mailam ding ngimkolhna leh adangdang.
Hiai PLS leh ZCLS seminar a paikhawmte : S Ngulzadal, TK Tuan, T Ginkhatsuan, Tualchin Neihsial, Ginneihthang, H GE Cin, T Jam Khothang, C Pau, Rev T Thang. (ZCLS lam ate’ mintawn gelh ding ah Burma Solkal toh kisai a buaitheihna om ziak in gelh lou uhi). Hiai hun a thupukna hiai anuai a bang ahi:
Resolution No. 1: Laimal pen Roman alphabet 26 zat a alamdan vowel teng ei (mallam ate) lam leh zatdan a lam di. Tua ban ah consonant ‘C’ pen ‘cha’ leh ‘G’ pen ‘ga’ hihsak a, vowel a ‘O’ tulai a zatdan ‘O’ leh ‘OU’ kal a ginsak hileh chi a thukim ahi.
Resolution No. 2: Primer (Laibul) leng puahthak a zatkhop lemsak ahi.
Resolution No. 3: Laigelhdan leh min gelhdan pen tua i zatdan a hoihlam tum in mimal ki-enkik leng deihhuai hi.
Hiai ahive MOREH RESOLUTION kichi. Hiai Moreh Resolution hong piankhiakna pen Paite sung a Pawl tuamtuam in 1982 & 83 sung a seminar leh workshop ana neihte uh gahsuah khat ahi. Paite sung a Pawl tuamtuam makai ban a dottham ching heutute kiminna leh muhsuah ziak in Simlam ate toh kipolh lunggulhna hong piangkhia hi. Paite laipau toh kisai a kiminna chiantak nei in, policy leh ideology chiang mahmah toh saupi muhkholhna (vision) heutu masate’n ana neih hang un India a Paite kia hilou a gamdang ate toh kizopna hoihzawk duhthu ana sam thei uh hilel hi.
Huan, hiai Moreh Resolution chiantak a vel a i sui chiang in Manipur a PTC, YPA, SSPP, PLS, Saptuamte leh i nam makai leh dottham chingte’ duhthusam gahsuahna a ana himai mah hi. Manipur a Paite-te pen Burma a Tedim-te kiang a ki-surrender hilou in, Tedim-te leng Paite kiang a ki-surrender ahi tuan kei bok uhi. Laimal 26 ding chih himahleh Tedim-te zatdan a English laimal gindan A B C.. chih hilou in ei toh kituak ding a gindan bawlthak A (ak), B, C (cha)... chih a hong hizaw lai hi. Hiai bangthute chian tak a theihna ka hon neihchiang in Paite Laipau a Pianthakna thupi, kiphawksuahna, kilatthakna bang ana kinei thei hong hilim hi.
Huchi a i hong pianthak vet chiang in theihchian beh utna leh duhna-lunggulhna toh kithuam a hong om in, mahni hihtheih tawk in ka kisin tei hi. Ahihhang in hoihlua leh diklua bang hilehleng laipau pen revolution hilou a evolution ahih ziak in a hun puakkhiak a hong khangkhe ding ahi chih ngaihdan ka nei hi. Tuamah toh CH (chaw) tang a C (cha chih ngen in simta in, sii na chihleh huatna toh na kidim kha ding) zat veuhvauh bang haksa ka sa a, bangtan hiam zang mahleng zat gige a haksa mahmah hi. Ahun puakkhiak a C (cha) hong kizang mai thei, zang lou mai thei hi in ka koih a. Labor leh labour leng om hiven ka chi hi.
Paite sung a laipau beihpi suah a hon hih taktak chiang ua hong piangkhia Guide Book – Pau Gelhdan pen ei lak ah zat in hong om a, Manipur a skulte ah Class A apan BA tan a zat ahong hi hi. Tua kia i sakleh Manipur a Laisimna Bu kichi leh Myanmar a Zolai Sim Bu Tan Langh kichi a sung a thute kibang vive ana hidan ahi. Hiai Guide Book pen hoihsakna lianpi om in jat (tribe) dang in leng pansan pen a nei in phattuampih mahmah uhi. Abiik in Zou, Vaiphei, Simte leh Thadou-Kuki in amau laipau khansakna ding a etkak (reference) in zang uhi. I laigelhdan uh leh paidan uh kinaih sot a, Burma a unaute kia hilou in Manipur a unaute lak leng zel zou mahmah hi.
Gahsuah hoih tak tun ahi chih i theih kawmkawm in July 9, 1985 in YPA Hall, Lamka ah Seminar on Common Writing System for Chin, Kuki & Mizo chih bang leng ana om khin hi. Huai hun in tua i Guide Book gengen uh PLS in ana focus hi. Tuni chiang et in Zomi sung a jat tuamtuamte laigelhdan i et a, i sim chiang in mahni pau bang a sim theih, gelhtheih in omta hi. Theihnop sot in, kinaih zawk semna hon tun thei hi. Tua bang a masawn zel a i om theihleh tunung kum sawm bangzah hiam in luita noute luipi khat a luahkhawm ngei ding hihang.
Pianthakna kichian, kilatna hoih i hon neih chiang in vei leh awlmoh bang i hon nei pah sam hi. Atheikha nailou leh zakha nailoute kiang a thutak puak ding, theihsiamna tasamte kiang theihsak ding, kilaan theilou leh nungtolhte phawnhalh ding, leh ‘Nou Galatia mite aw, kua’n zuau a hon bumhai ahia..’ chihdan deuh a bumhaina kha tangte bang awlmohhuai sakna hong lian kha nak hi.
Huaiziak in, hibang a policy kichian tak a omlai in ana kilaan theilou hunkhop leng ana om veve hi. Ka hun masa lam bang a kilatna neitheiloute ahihleh theihchetna omlouh ziak leh pianthakna tanglou himhim ding a seh pawl (non-predestined) ahih uh gintaak huai hi. Chiantak leh nouneel tak a theihsiamsak zoh chiang a kilaan thei ding hunkhopte a ding a sermon, seminar, crusade, workshop, street preaching sai ngai mahleh PLS in chitlouhna a neihte ziak a kilaan theilou lel hi ding uhi. Na pianthak ngeingei ding ahi chi a mei-am a bik (revolute/force) ngai hetlou mipi sangtampite kiang a tangthupha a tunlouh ziak hi ding in gintaakhuai hi.
Huan, hiai thugelh a Laipau Hunbi thum a i khente lak a hunbi nihna a taangden pawlte ahihleh nungtolh leh pianthak sawm lou himhim, kilatkhiak leng sawmlouh thoh hi ding uh hi. Nungtolhna kichi bang ana om tham ahih chiang in theihsiamna toh kep zong kisam ding hi. Ahun-aphaat a gen-le-sakna a telve thou, hun hong paichiang a ngaihdan khek khenkhat om chihna ahi lel a, phuuilouh chihna banglel ahi. Tua nungtolh leh pianthak sawm lou himhim pawlte’ gen-le-sakte i sui chiang in mahni sepsa humbit ut ziak hiam, mailam suan ngai salou pawl bang, kalh khel himhim bang, unaute itna nei hetlou bang, khantouhna kichi himhim om thei ahihlam phawklou bang, ngaihtuahna kochiik tak nei bang, mahni kideihkhopna bang ahi. Hiai bangte’ hinkhua kichian thei utte’n Pu Lal Neih Thang in Tangkou Vol III No. 6, September 1992 a agelh Paite Laipau Pawlpi Dinmun last paragraph en le i chian mahmah ding uh. Kum 16 paisa a agelh himahleh tuni tan a pianthak sawmloute’ dinmun ahi lai a, adik lai hi. En mah dih:
“Huaiziak in PLS Bye-law leng khek ahihma leh Text Book toh kisai a Manipur Governor Order tan leng zuilou lai, huai hun a PLS Board of Directors (BoD) thupukna khawnglel a Text Book bang prescribe tawm theite (School Text Book-te prescribe theihna BoD, PLS khut ah om kei a State Government thu ahi), PLS General Assembly kia leng hilou PNC makaih a Joint Meeting tamveipi hun tuamtuam a thupuknate policy a neihsa- zuih dia kigelhte leng zahtak a zuihlah sawmloute leh tumloute ban a Literature Soceity khat a mohpuakna nei dia mipite’n muang a telna uh phawkphalou a, laibu neihsa bang ut dandan a soisate’ theih gige dia deihhuai bel Setan in Toupa Jesu khemna Laisiangthou a thu omte a gen toh kibang geih chih ahi,”
Bangteng hileh Paite laipau thu toh kisai a hiai bang thuhoih-lahoih, kichian leh belhtak ana bawlkhia heutute thupi ka sa in, ka phat mahmah hi. Khat-le-nih in hoihsa keimahle uh huai hunlai a dia heutu ka hi kichithei teng kipunkhawm a, talsawn zen a kum thum/ li ana sual uh hoih mahmah hi. I laipau leh laimal ban ah policy hoih ka sa mahmah a, tua in hon zou mahmah ahi ngei ding, ana pianthak loh hial ka hih chiang in. Himahleh tua pen mah hoih gige a, huai kia ka sumkuang chiangpeh ding chi bel ka hi tuan kei hi. Ahun toh kituak a khantouhna leh kikhekna om zel poimoh mahmah ding in upna leh lametna ka nei hi. Khalam pianthakna bang a abung-achang chih gen theih ding hihial keimahleh thil paidan leh hong piankhiakdan chiangtak a theih poimoh ka sak ziak in resolution-te ahi bangbang in ka hon taklangh hi. Athusang a ami enzaw sekte i hihna uah hiai bang laipau toh kisai zuihdia bawlkhiakna a telkha makai suan mahmahte’ min leng ka hon tuangsak hi. Testimony chiangtak a gentheiloute’ pianthakna diklou hi ding ahi chih ngaihdan i neih pahpah ziak un.
***
Ngaihtuah ding:
# Sapau a Book thumal lehna (translation)/khiakna (interpretation) koi a hoihzaw a?
>Gelh chihna a Hindi in Likha - Lehkha – Lehkhabu
>Lai – Laibu
# Akituamna om hi in na thei hia?
> Paite Pau Gelh Ding Dan
> Paite Pau Gelhdan Ding
Gelh (verb) – Gelhdan (Abstract noun)
Dan – Guide/Rule/Law
# Paite pau ah Ding in gen nih nei hi
> Ding – stand
> Diing – for/will (future)
# Alian genna a i zatte uh hichileh bang a chi dia?
> Lian = Thil lian a ning/kil/siik neite
> Gol = Thil lian a bem (round) or kil/ning/sik neiloute
> Ngeng = Lauhhuai khop a lian
> Zaa = Mun awng lianpi
> Za-awng = Huihkhua (Space)
> Zau = ??
© Pauzagin Tonsing | August 19, 2008