Lamka tuinek tawh kisai.
~ Ginza Vualzong, Admin Zogam.com
Zogam.com in a paisa March 17, 2021 in i gam a tuinek i muhdan uh online survey bawl hi. Hiai survey akipan a muhtheih ahih leh 80.89% in amau private in tuinek kingaihtuah ua, 19.11% kia in Government Water Supply akipan tui mu uh hi. Hiai in a etsak ahih leh Government in Lamka mipite tui pelou ahih keileh pezoulou chihna ahi.
Government in mipite tui pelou ahihman in, tui lou a hingthei ki-omta dih lou ahih man in, Lamka mipi te'n private a tuizuakte akipan bang tui lei ua, underground borewell leh well neiten well akipan tui la ua, khosung khenkhat in amau private in tui koi hiam akipan la uh hi.
February leh April kikal in vuahtui a tamlouh ziakin i gam a tui a haksa diak hi. Well-te nasan tui a tamkei a, mipi a tamzaw in tui leimaingai in om a, mipi ten haksatna namenlou kituak hi.
Ahih leh i government in water supply toh kisai pan lalou mah ahi diam? Kum masa June 2020 in i district Churachandpur Water Supply scheme 23 crores bei in zawhsiang hita chi in CM Biren Singh in media tuamtuam ah ana puangzak a, project honkhiakna Youtube tungtawn in le muhtheih in om hi. CM Biren in mipi kithuahpihna ziak in kha 8 ma a zawhsiangtheih in om chi zawmah lai hi.
"N Biren Singh CM of Manipur mentioned that with the cooperation of the people, the construction of the Water supply scheme for Churachandpur was completed eight months before the stipulated time period. He also appreciated the implementing agency viz. SPML Infra. Ltd, Kolkata for their dedication to complete the work before the stipulated time period. He appealed to the people of the State to support and cooperation in developmental activities taken up by the government for the welfare of the people.
The Water Supply distribution network for Churachandpur for promoting tourism under NESIDS was constructed at the project cost of Rs. Rs. 2339.36 Lakhs. The construction of the project was started in February 2019 and completed in June 2020."
Sources:
https://www.imphaltimes.com/news/itemlist/date/2020/7/8
http://www.pothashang.in/2020/07/08/5-water-supply-projects-among-others-inaugurated/
https://midagemedia.com/regional/manipur/five-water-supply-project-inaugurated-in-manipur
https://www.youtube.com/watch?v=X2-QuLG-sPU
Huchia 23 crores val seng a government in i district sung a water supply bawl ahih leh hiai zah beidi khop a nasep muhtheih di omlou zel hi. Lamka mi a tamzaw in pipe a hong kai tui i muhlouhna uh kum tampi hita ding hi. Ahi, kum tampi hichi bang dinmun a i om nung un tu in veng khenkhat in Dam tui mutheita uh hi. Ahia, tuipiakna toh kisai a sum kiseng toh a tak a kisemkhia kituak mah ahi diam chih ngaihtuah tham pha hi.
Government in i water supply a dia 23 crores seng ahih a, mipi a tamzaw in tui haksa salai i hih leh hiai 23 crores a zatna diktak a kizang khalou a, kua hiamten negu uh chihna himai lou ding hia? I gam ah kiphinna tuamtuam a vangkim in i neisek ua, lampite bang zui in, ahihkei leh bandh khong i bawl uh hi. Himahleh tui haksatna ziak a lungkimlou etsakna mipi in kineikha nailou hi. Lamka mipite sum haulua i hi hia? Sum a tui leilei mai ding chi i hi hia? 23 crores i chih tawm liailou ahi a, kua hiamte khut a thelthang mai dia phal mah i hi uh hiam chih dotna i kibawl uh poimoh hi.
Tuzingkal local paper ka sim leh MLA Pu V. Hangkhanlian in a thugenna ah Lamka a tui supply hoihzawk semna ding in Manipur government in World Bank kiang a 3000 crores loan laksawm ahi chi hi, 3000 crores teng ei tui bawlna di zaw ahivek kei dia. Thu kipah huai mahmah ahi a, himahleh kum masa a 23 crores bangmah lou a thelthang dan a a hiai 3000 crores le hong thelthang khak di ei Lamka mipi ten i etzui ua, pan i lak chiat uh poimoh mahmah hi.
Tu hun in private in tui i leizou maithei. Himahleh khangsawn i tu leh tate khualna in hiai i district water supply hong kibawl nawn di pen, a ma dan a enliam mailou in, enzui in, a poimoh leh pressure piak a nna hoihtak a hon sepna ding in mipite bengvak leh pilvang chiat ding in, poimoh sa in ngetna Zogam.com tungtawn in ka hon bawl uh hi.