NA HONPI DAN
Biak S Tawmbing
Lungngaihna lungkhamna mangbatna po kinken a hun zang khawm khawm in ka om a, haksatna leh lungngaihna kichi khawvel ah kuaman in hon theisiam lou in kisathei leh kiliansak bang a ngaih in ka om hi. Mite taisan simmawh nelhsiah in ka hun leh nite zang lellel in om mah leng, kei kua ka hi a, hoihna chitna khat leng neilou himahleng hiai tantan na honpi, ka innkuante leng bang ahi ua ahia hiai tantan na hon pi. Mi sim mawh huaite thumna dawngtu, lawm itte taisan leh simmawhna thuak in om mah leng hoihna chitna khat leng neilou hon pi dan a lamdang..
Kiginni a ka mi etna mun ah thiltung ka ngaihtuah chiang in lamdang ka chilou theikei hi. Zing dak 6 ginma phial phial a gate a honna na ngak a, huai banah mi hong ki mek ut teng leng kikoih zoulou ahihna ah kiginni huai tuh zomi nami ahi a, Zing dak 6:30 a pan in mi ka hon en pan hi. Mi tampi tak ka khoih/mek a phone call leng dawng manlou buai tak a a ban a ban a ka mek lai in, mi khat hun sawt sim paita a pan a khe na sa pai theilou, doctor te damdawi piakte ne zel lah phatuam lou huai a nek chiang a, a nna(pain) pen sawt lou pha, lah lei sik thei lou.
Kar nih paita a, a nna hong ki pan thakin, damdawi ba nek chiang a leng pha thei non lou chi in mi tampi om lehleng tawl mahmah lechin leng hon khoih sak mai in chin in honna ngak mai hi. Ken leng zingkal a hong kuante a thensim nung un..hon pi lut ua, ka room ah a khe hoihtak a vel in thumkawm in ka hon pan ta hi. Sawt lou dak kim khat lak vel khoih a a om nung in,lei sik in la, pai dih le ka chi Pathian ziak kia in lei hon sik thei in hon paita hi.
Toupan mi simmawh huaite, mi lungngaite lungsim lungtang a gentheih na leh hinkhua mahmah a leng gen theihna tuakte zaw Pathian in taisan lou hi. Toupa honpi dan lamdang hi. Aman muan huai khut in hon pi. Lungsim tengteng ngaihtuahna tengteng bah a lamet bei a I om lai na tawm in leng I thum theih dandan in I thum zel ding uh aw... Lawm leh vualte aw na lawm itte a ding in thum gige in Pathian in na thumna thei a amau na thumpih lam theikei mah le uh, Toupan a thei. Aman bangkim thei a, pi ding hi.
© Biak S Tawmbing | 22 feb 2021|12: 19 am