SIMLEI AH VAKVAI
Biak S Tawmbing.
(Laigelhtu apan: Hiai laigelh na sim ding a, na simkhit chiangin midangte sim dia na deih leh hon na share sawnsak zel ding in ka hon ngen hi)
Tu zingkal ka thawh apat in ka lungsim ah Nuai simlei ah gahliang in vai zong leng in leh lou sumlehpai bangmah ka neilou zong thangvan a hon it Jesu ka nei hi hiai laa honglang mahmah a, ka sa hauhau hi. Huchi kawm in ka omna mun a kipanin ka lungsim ka vaksak hi.
A tangpi a et in I gamsung ei singtang mite lak ah mihausa sum nei deuhten tanau a hau ua, haksa mangbatna a tuah chiang un leng veh a kan tu ding nei uhi. Mi genthei te a ding in bel huchibang a haksatna gentheihna a tuah hun chiang un, va veh a bang na chi ua chi a nem a khotuahtu ding a tawm mahmah hi. ka gen khial kholkei ding in ka gingta hi. A tangpi a et in a dik mahmah hi.
Ei singtang mite lakah leng vaite bang zenin ki deihdanna mihau leh mizawng kal ah uang takin om keimah leh ei lak ah leng om thamtham ta. Mi inn luah maimai a khosate bang a ziak a san diktak gen leng omlou a, suanlam ding tuamtuam bawl a ki nawh khiakna gam I gam lamka khopi sung a leng hongtung ta hi. Huai hun chiang in amaute lungtang ah vakvai kisakna leh mite sang a genthei kisak zawkna lian mahmah thei hi.
Mizawng leh mi genthei te a dingin thil bang hiam hih ding hile uh leng gensak tu ding khotuah tu ding neilou in valzel ah I gamsung a hichibang a om mi tampi takte ki om hi. Niteng a kilawh tawm a nekzong te a ding in tanau hoih I neih kei leh kilawhna ding vakta, mi hausa lah I lamka khawmpi a a dik a tang a hausakna sangin black money apan hausa tam mahmah zaw mah lai. Inn hoih pipi lam in aluah man tampi pi la ua, tenna ding neiloute a ding in huaite luah in haksa takin khosa uhi.
Nuai simlei ah mizawng leh gentheitak a I khosak lai kuaman I haksatna I dinmun I hihna hon phawk pih lou in genthei leh liangvai takin khosa in khawvel ah leng mah le hang, Khawvel ah hon hingsak a hon damsak tupa’n honna mu gige hi. Simlei ah vakvai kisa in hun leh nite zang mah le hang Thangvan a hon ittu Toupa’n honna en gige a hon mu gige hi.