Nisin Thuhiltu – 07 December 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Tipaimukh lampi ah blacktopping bawlna nasep pan

Lamka, Dec. 6 *( Nisin Thuhiltu)* : Border Roads Organization (BRO) nuai ah 80 Road Construction Company (RCC), Thanlon in National Highway 150, Tipaimukh Road ah a siatna diak mun te a siamzaw tak tawh kitawn in blacktopping bawlna nasep a pan hi. Blacktopping ahileh Churachandpur Police Station mai, Zero Point a pat kilometer 3, Bungmual kaw-sak tiang bawl hiding, gari taitua a tawm hun ah nasepna a chiapi sek un a kigen hi. Tipaimukh lampi siamna nasep ahileh a chiata November 6, 2017 a pat Junior Engineer Nishant Saurabh etzuina nuai ah pat ah um, lampi a siat diakna mun te siam masak ah um a hi. Lampi kisiam thakna mun te sa dan chu inch 3 ah sa himaleh a zawna, seal coating chu pan mama in a kilang hi. Seal Coating tawh kisai chu a mun ah semtu te khat in le pansa a hidan a gen a, himaleh kuama complain bawl a umlo ziak ah nasepna ziagual a chu a chiapi zing uh hin a gen hi. A langkhatlam ah nasepna hawitak ah zawthian a hitheina ding ah mipi’n kithuapina pechiat ding in Engineer in-charge, Nishant Saurabh in dawtna a siam hi.

MinisterTh. Shyamkumar in 14th State Level Orange Festival 2017 hawng;
Cold storage kawina ding ah Rs 50 lakh; Tamei ah rural markets sakna ding ah Rs 13.75 lakh puang

Lower Ground, Dec. 6 *( Nisin Thuhiltu)* : Manipur Horticulture and Soil Conservation Minister Thounaojam Shyamkumar in tuni’n Lower Ground, Tamenglong District ah December 6-10, 2017 sung ah um ding, 14th State Level Orange (kawmla) Festival 2017 hawnna a nei a, ama’n a thugenna a chun, cold storage kawina ding ah Rs 50 lakh (fifty lakh rupees) puang kawm in, Mission for Integrated Development of Horticulture (MIDH) 2017-2018 nuai ah lobawlmi te ding ah cold storage kawi hiding in a gen a, Tamei ah rural markets sakna ding ah Rs 13.75 lakh assistance puandawna nei in, lobawlmi te ding ah primary processing unit hawnna ding in Rs 12 lakh assistance a puang hi. Zia ah assistance piak ding ah a puan te chu Christmas masang ah first installment piak hiding in thutiam a bawl a, Orange Festival uap thei ah a um chu kipak mama in a gen hi. Progeny Orchid Farm tawh kisai etthak kit ding dawi a hidan taklang in, Tamenglong oranges a kibelap theina ding ah panlak ding pawimaw in a gen a, district thuneitu te chu Tamei leh Tamenglong ah orange chiing te loan piak a hitheina ding ua farmer list siam ding in hiatsakna a bawl hi.

Horticulture and Soil Conservation department in kum 2018-2019 sung ah NEC (North Eastern Council) funding bawlna Rs 15 crore bei ding ah Tamenglong orange, Senapati kiwi, Kachai Lemon, Imphal East leh Churachandpur ah lengthei (pineapple) production kibelap theina ding ah panla ding hin a gen a, kum 2017-2018 sung a ding ah Horticulture and Soil Conservation department in NEC funding Rs 14 crore mu a hidan a taklang hi. Zia sum chu Sendra, Andro leh Shirui ah Floriculture projects chiapina mat hiding in a gen hi.

District sung ah khantona a um theina ding ah a kisaikhakpi zosia’n panlakna nei chiat ding ah chialna bawl in, Forests and Environment Department in district sung ah gua (bamboo) production kibelap theina ding ah panlakna nei ding hin a gen a, tuchung 14th State Level Orange Festival 2017 ah kawmla chiing hawi penpen prize Rs 1.75 lakh - Rs 2 lakh piak hiding, second prize Rs 1 lakh leh third prize Rs 75,000 hiding a puang in, festival ah pang zosia chu consolation prize Rs 6,000 chiat piak hiding in a puang hi.

Armstrong Pame, DC Tamenglong in a thugenna a chun, Minister Shyamkumar in kawmla chiing tute (orange farmer) te khut ngawn ah ki nungle lo ding, festival ni tawpni leh prize money tawh inn zuan ding a hidan uh a puan chu taklang in, Tamenglong DC in Minister Shyamkumar chu Tamenglong ah farmer te’n organic certification a neitheina ding uh leh fertilizer a matlo theina ding ua panla ding ah chialna bawl in a gen a, tuchung 14th State Level Orange Festival 2017 ah stalls 120 hawn ah um, kawmla lakh 2 val suklat ah um hin a gen hi. State Level Orange Festival chu District Administration Tamenglong in organised a bawl a hia, Samuel Jendai, MLA Tamenglong AC, Awangbow Newmai, MLA Tamei AC, ADC Tamenglong Chairman, DC Tamenglong, DC Thoubal leh Government officials chuamchuam tamtak in a uap ui.

KSP in 60th Annual Session 2017 nei ding
Lamka, Dec. 6 *( Nisin Thuhiltu)* : Khuga Sadar Presbyterian (KSP), Manipur Presbyterian Church Synod, in 7th -10th December 2017 sung ah Kangvai Presbyterian Church ah "La lampi sut ngun un..." (Hag. 1:7) ti thupi nei ah 60th Annual Session 2017 nei ding a hi. Tun kim zan 7th December 2017 nitak dak 5:30 leh Upa Khomlunlal, Moderator in kikhawp khawmna hun mapui ding, malzin lawplutna tawh thua ding a hi. Chun, Pastor te'n report piakna nei ding a hiu a, session uap faternal delegate te a pat le report piakna um ding a hi. 8th December 2017, 10:00 AM -4:00 PM sung chu business session ah nei ding a hiu a, Pro Pastor D Robert Thanga in zia hun chu mapui ding a hi. Chun, Annual Session hun sung ah Rev. Siama Phaltual, Rev. H L Vena te'n Pathian thugenna leh tilkhona thu gen ding a hiu a, Ordination service, Lalpa Anthiang ah kipawlkhawmna hun le um ding a hi.

Manipur a pat NERCORM official te’n Mumbai ah Floating Fish Cage tawh kisai ah meeting uap ding
Lamka, Dec. 6 *( Nisin Thuhiltu)* : Central Govt scheme nuai a Science and Technology Intervention in North East India ( STINER) nuai ah North Eastern Region Community Resource Management Project for Upland Areas (NERCORMP) Shillong in RuTAG IIT, Mumbai tawh Dec 8, 2017 leh RuTAG IIT Mumbai ah Floating Fish Cage in NE India project chungchang ah meeting nei ding a hiu.

NERCORMP team a hi leh Dr. S. Chaudhari Managing Director in mapui in tin, Mr H. Singh Director (Admin) Mr Tychicus Vashum, Project Manager NERCORMP Ukhrul, Mr D. Khuala Vaiphei Project Manager NERCORMP Churachandpur, Mr Jagadish Laishram PTO NERCORMP Churachandpur leh PTO Ukhrul pang ding a hiu.

Zia meeting zaw leh kumkit January 2018 tha sung ah Khuga Dam, Churchandpur leh Ukhrul ah Mr Naveen Verma, Secretary DoNER in official a launch ding ah guang gal a hi.

Zia ding a chun IIT Bombay in NERCORMP technical support piading a hi.Chun, DoNER in fish cage chu NERCORMP te chawk piak ding a hi.
Zia meeting zaw chuleh, D. Khuala Vaiphei Project Manager NERCORMP Churachandpur leh a seppi Jagadish Laishram Project Technical Officer in Institute of Wood Science Technology ( IWST) Malleshwaram, Bangalore, Govt of India nuai ah Dec 11- 15 tiang ah Sandalwood tawh kisai training uap ding a hiu.
Zia zaw chu leh Mysore ah Sandalwood Factory entha bawk ding a hiu a, tunung leh a thau laksawn ding dan plan nei theina ding a hi. Amau teni Dec 17 ah hung kilekit ding a hiu.
Sandalwood tawh kisai in NERCORMP Churachandpur in Kumkit a pat nasa tak ah phu pat ding in plan a nei a, mipi te economy dawpsanna ding a hi. Zia chu mipi te kinepna liantak a hi.

JAC-AATB in JCILPS tawh kihona neikhalo a hidan taklang
Lamka, Dec. 6 *( Nisin Thuhiltu)* : Joint Action Committee Against Anti-Tribal Bills (JAC-AATB) in Imphal pansa, nisin chanchinbu The Sangai Express in December 2, 2017 issue ah JCILPS in JAC-AATB “tawh kihona nei” ti ah a sua chu thudiklo a hidan taklang kawm in hilchianna a bawl hi. JAC-AATB thusua in a taklatna a chun, JCILPS in JAC-AATB thuhiat khalo a hidan taklang in, Imphal JCILPS in thudiklo a taklat te khualchian masalo ah Sangai Express in a suadaw chu demna bawl in, Lamka ah Tribe based organizations leh Innpis te joint meeting ding ah JCILPS in chial maleh joint meeting neina ziak bangma JAC-AATB ahiloleh general public hiatsakna umkhalo hin a gen hi. Chun, Imphal JCILPS chu Inner Line Pennit system tilo thil dang, MLR&LR Act implement ding ti te buaipilo ding in vauhilna a bawl hi.

Child Abuse tawh kisai ah seminar nei

Lamka, Dec. 6 *(Nisin Thuhiltu)* : Centre for Community Initiative (CCI) in tuni’n The Malsawm Ability Resource Centre (MARC), Pearsonmun ah “Child Abuse Awareness and Sexual Harassment at Workplace” ti thupi nei in seminar a bawl a, Resource person hina tawh Chiinngaihlun Guite, Social Worker Specialist Children's Services, London Councils Kingston & Richmond Upon Thames in Child Abuse Awareness and Sexual Harassment at Workplace ti thupi ah a chiakhawm mipi te ziltilna a nei hi. Seminar chu CCI Staff te leh VK Tawmna high a pat teaching staff 3 te’n le a uap ui. A kigendan in, The Malsawm Ability Resource Centre (MARC), Pearsonmun in kumsin leh amat sek gual ah December 16, 2017 leh Thanksgiving Day mang ding ah kisingsakna nei zing in le a kigen hi.

24th Annual General Body Meeting nei

Lamka, Dec. 6 *(Nisin Thuhiltu)* : Evangelical Baptist Convention (EBC) nuai ah mission nasem pension te kilawikhawmna Evangelical Baptist Convention, Worker Pensioners’ Association (EBCWPA) in tuni’n EBC Lamka South Division Conference Hall, New Lamka ah 24th Annual General Body Meeting 2017 a nei hi. Zia hun chu, Rev S Ginjam, President leh Rev V Songkhothang ten a mapui ua, Upa N Thawnzagin, Assistant Secretary in attendant report piakna nei in, Rev K Thuamvung in member thina tuak te suunna hun a mapui hi. Rev V Songkhothang, Vice president in member thak pani, Rev Dr M Ginsuan leh Gouzachin te laklutna a nei a, Upa Ngulkhanjam, Secretary in Annual report piakna a nei hi. Rev V Jelkhokai, Auditor in audit report piakna nei in, EBCWPA Bye-Law et-thakna a nei ui. EBC Worker Pensioners’ Association EBCWPA ahileh November 10, 1996 kum ah Rev H Vanlaljem Inn Bungmual a la phudawk uh, tu ah member 65 um hin a kigen hi.

Street Preaching bawl

Lamka, Dec. 6 *(Nisin Thuhiltu)* : Central Baptist Youth Fellowship (CBYF) mapuina, December 5, 2017 nitak in Lamka South Division huapsung mun chuamchuam in Street Preaching a bawl ui. Street Preaching ahileh Dorcas Hall mai Tedim Road leh Ngulthawng Bazar, New Lamka Vengnuam in a nei ua, Pauthianmuang, Lecturer GBC in Pathian’ thutak genna a nei hi. CBYF in khangthak biak-inn zuan ngam talo ah tamtak um ten Pathian thu a hiat ding uh a nawp ziak ua, ziagual programme chu a chiapi uh hin a kigen hi.

FMPB in Calendar hawnna nei

Lamka, Dec. 6 *(Nisin Thuhiltu)* : Friends Missionary Prayer Band (FMPB) CCpur in kum sin leh a bawl sek gual un, kumkit 2018 calendar ding a siam zaw tak uh tawh kitawn in tuni’n FMPB Office, Beulahlane, Central Lamka ah FMPB 2018 Calendar hawnna leh a latna a nei hi. Zia hun a chun, Upa K Songkhotuan, Honorary Mobilization Secretary, FMPB CCpur in FMPB 2018 Calendar tawh kisai taklatna a nei a, Pastor H Soichinthang, Local pastor NTBC Lamka in FMPB 2018 Calendar hawnna nei in, Pathian kiang in a latna a nei hi. FMPB 2018 Calendar ahileh FMPB 29 high School road, Ambattur, Chennai a pat FMPB CCpur a ding copy 800 tung hin a kigen a, EBC Convention Book House, Dorcas Road, New Lamka ah Christmas discount ah Calendar copy khat ah Rs. 100 ah chawk thei ding hin a kigen hi.

FC Zogene leh LSC in gualzo

Lamka, Dec. 6 *(Nisin Thuhiltu)* : Zou Gal Centenary Shield Open Football Tournament 2017 Quarter Final match tuni, December 6, 2017 in Public Ground, Hiangtam Lamka ah Round pani a um hi. Match masa sun dak 12:00 in United Khawzim Brothers (UKB) leh FC Zogene te a kihel ua, Second Match sunnung dak 2:00 in Lamka SC leh M. Songgel Youth Club (MSYC) te a kihel ui. Match masa ah UKB leh FC Zogene te chu a kisi thei mama ua, match kipat a pat minute 8 in FC Zogene a pat Jersey No. 7, Ginminlun Simte in UKB lam ah goal khat a khum a, first half tiang ah FC Zogene in 1-0 ah kihelna amapui nung in, second half nung minute 47 in UKB a pat Jersey No. 9, Peter Seiminthang in goal khat a khum a, full time tiang ah goal khum kitzo umlo in goal 1-1 in a ki-draw ua, extra time tiang ah goal a ki khum tua kitlo ziak un penalty peksak in a um ui. Penalty ah player 7 gel peksak in a um ua, FC Zogene in 5-4 in gualzawna a chang hi. Second Match ah Lamka SC leh MSYC kihelna a chun, minute 15 chiapan in LSC a pat Jersey No. 7, Rema in goal masa a khum a, first half tiang ah LSC in 1-0 ah kihelna amapui nung in, Second half nung minute 75 in LSC a pat Jersey No. 16, Immanuel in goal khat a khum kit a, full time tiang ah MSYC in a ditkik zawlo ziak in 2-0 ah LSC in gualzawna a chang hi.

“Advent Christmas” lawm ding
Lamka, Dec. 6: Nationwide Gospel Music Festival Committee saina' 16th December 2017 (Kiginni) nitak dak 5:30 leh K. Salbung khua ah ECA Diamond Jubukee Gallery mun ah “Advent Chrsitmas” lawpna um ding a hi. Rev. Dr. Nghakthang, General Secretary, RPVNEI, Rev. Dr. Robert H Vaiphei ten Pathian thugenna nei ding a hiu a,, Evan, G Thangboi in mass prayer mapui ding, ECA, ZPCS, ICI, CFC Central Choir, Reformed Choir (RPC) MHD Chentral Choir (AG), Joint Choir leh Gospel singer chuamchuam in Pathian chawihawina laa sa ding a hiu.

MP, K. Bhabananda Singh in Takhel model village suangphu hawng
Imphal, Dec. 6 *(Nisin Thuhiltu)* : Takhel Village, Imphal East ah tuni’n Rajya Sabha MP K. Bhabananda Singh in Sansad Adarsh Gram Yojana (SAGY) nuai ah Takhel Gram Panchayat hawnna Takhel Chingtam Community Hall in a nei a, Takhel Model Village siamna ding in foundation suangphu hawnna le a nei hi.
MP, K. Bhabananda Singh in a thugenna a chun, Takhel village chu model village ah siamdaw ding lunggul a hidan gen in, MPLAD funds mang ah model village siamdaw hiding in a gen a, a lawtin theina ding ah mipi te’n panlakpi ding in chialna a bawl hi. SAGY nuai ah MP te chu kum 2019 tiang ah khua pathum model village a sua ding uh ti a hi. Zia ah hun matna chu Ksh. Biren MLA, Lamlai; Moirangthem Ningthem Singh, Pradhan, Takhel Gram PAnchayat; Deputy Commissioner, Imphal East Th. Chitra Devi, Luckyson N. Kashung, Addl. DC, M, Mani Singh, BDO-1/IE leh DLO ten le a uap ui.

Cleanliness Mission lawtinna ding ah Civic Sense pawimaw: Health Minister Imphal, Dec. 6 *(Nisin Thuhiltu)* : Manipur Health and Family Welfare Minister L. Jayantakumar Singh in Regional Institute of Medical Sciences, RIMS, Imphal organised bawlna tuni’n Jubilee Hall, RIMS ah Symposium Competition inaugural function a uap a, ama’n a thugenna a chun, Clean India Mission lawtin theina ding ah civic sense nei ding pawimaw a hidan taklang in, thianthona a hawileh Health Sector masawnna hi’n a gen hi. Government in Clean India Mission chu ngaikhawk mama a hidan taklang in, nasatak ah campaign chiapi ding pawimaw in a gen a, cleanest city ah Meghalaya capital Shillong puan ah a um thei ziak chu mipi te pankhawm thiamna ziak hin a gen hi. Director RIMS Prof. A.Shanta Singh in a thugenna a chun, Manipur leh India gamsung ah drainage system kituptak a um ding pawimaw in a gen a, gam dang England leh Australia ah drainage system kitup thei mama in a gen hi. Chun, Dustbins matphatchuam ding pawimaw in a gen a, middle class student te syllabus ah pansak ding dawi hin a gen hi.

Minister Nemcha Kipgen in Social Welfare, head office surprise visit bawl

Imphal, Dec. 6 *(Nisin Thuhiltu)* : Manipur Social Welfare and Cooperation Minister, Nemcha Kipgen in tuni’n Social Welfare, head office surprise visit a bawl a, zia hun a chun room sung zosia etthakna nei in, semtu (employee) te chu a sepna mun uh a inn uh gual ah ngai ding leh thiangtho tak ah kawi ding in hiatsakna a bawl hi. Chun, a hun tak ah nasep thilbawl (punctuality) chiapi ding in semtu te chialna a bawl a, nisin leh official working hours (dakkal 8 sung) sem tung chiat ding in chialna a bawl bawk hi. Sep leh bawl ding kawikhek, hentang ti umsaklo ding in le thupiak a bawl a, a diak ah numei leh naupang, teksia, disabled person te ngaikhawk ding in a hiatsak hi.

ATSUM in Principal recruitment chiadan diklo ah taklang
Imphal, Dec. 6 *(Nisin Thuhiltu)* : All Tribal Students’ Union Manipur in MPSC saina nuai ah tuma college Principal recruitment process diklo ah a gen tawh kitawn in, recruitment process dikloma a hidan a taklang a, ki dawisak chuamna leh gawlgukna um in a taklang hi. Kakai Singsit, Secretary Education, ATSUM in agenna a chun, 24th November, 2017 ah college Principal ding ah select ah um te Ph.D student umlo in a gen a, zia chu educational qualification rule kal hin a gen hi. Application form ah educational qualification chu research guide leh Ph. D. student a hiding uh ti himaleh ATSUM team in khualna a nei nung ah college Principal ding ah lak thak ah um te chu Ph.D student umlo in a gen a, Ph.D student a um khak ua leh a topic thesis uleh UGC or University in approve a bawlna lekha tawh hung kipuang ding in chialna a bawl hi.

Thangal Cinema hawn ah um
Imphal, Dec. 6 *(Nisin Thuhiltu)* :Thangal Bazar, Dolby Digital Pro-Logic Movie Theatre ah tuni’n Thangal Cinema hawnna a um a, zia hun chu khuallian hina tawh MP, Rajya Sabha, K Bhabananda Singh leh Director, IPR, Government of Manipur, Meghachandra Kongbam te’n uap in, MP, K Bhabananda Singh in Thangal Cinema hawnna a nei hi. Thangal Cinema neitu ahiuleh filmmakers- M.C.Binod, Bishwamitra Sharma & Basanta Sharma, Thangal Cinema te a hiu a, Manipur ah cinema-lam ah lunglutna nei te masawn theina ding ah Thangal Cinema kiti a patdaw uh hin a kigen hi. Dolby Digital Pro-Logic Movie Theatre a chu 1920X1080 resolution nei, full Hd Sony data laser projector-VPL-PHZ/PWZ10 mang ah, sound system 6.2 tawh South Indian, Manipuri & selected English movies te sua hisek ding a hi. Nisin leh show pathum um sek ding, a timing ahileh 11:00 AM, 2:00 pm leh nitak ah 5:00 pm hiding a hi. MP, Rajya Sabha, K Bhabananda Singh in a thugenna a chun, Cinema lam ah lunglut te khualna’ Hindi film banned tawh ki bawlna tawh kisai chu etthak ding dawi hin a gen hi.

AYUSH Department in district zosia 50 bedded hospital hawng ding: Director
Imphal, Dec 6 *(Nisin Thuhiltu)* : AYUSH Department , Manipur in AYUSH Care Wellness Centre, Nepra Major, Sagolband Moirang Leirak, Imphal-West in a hawnna a nei a, A Guneshwor, Director of AYUSH in a thugenna a chun, AYUSH Department in district zosia 50 bedded hospitals hawn ding ah guanggalna nei a hidan a gen hi. Directorate of Health Services, department nuai ah district zosia 10 beded AYUSH Hospital hawn ah umta leh 50 beded AYUSH Hospital hawnna ding ah panlakna chiatha zing a hidan taklang kawm in, a vaima theipen ah Imphal-East area 50 beded Ayush Hospital hawn hiding in a gen hi. Lamphel 50 beded AYUSH Hospital hawn ah umta leh kituptak ah function ta hin a gen a, AYUSH Health Care System state in pawimaw hin a gen hi. Zia hun matna a chun, Dr Kh Loken, Former Ex-MLA of Sagolband Assembly Constituency in le thugenna a nei a, AYUSH Health Care facility chu mitamtak in a phatchuampi ding kinem in a gen hi.