Lamka 07 July 2019 (Zogamdotcom) | Tuni Sunday zinglam dak 9:30am vel in, ADCC volunteer mi 4 in Pi Nianglam of New Bazar insung ah va lut in Pi Nianglam trade license va balkek sak uh chih thutut kiza hi.

Pi Nianglam ahih leh New Bazar a aksa zuak hi a, aksa zuak theihna dia ADCC akipan trade license leng nei hi (License no:ADCC/3/Fowl/V-16). ADCC in Sunday Close thupiak a bawl ziak un, Pi Nianglam Sabbath sahkhua zui mi ahih ziakin a insung ah aksa zuak hi. Huchi hina pi in tu zingkal dak 9:30am vel in ADCC volunteer mi 4 te'n Pi Nianglam insung a va lut in, aksa zuak lou ding in va vau ua, a trade license ensak ding in va ngen uh hi. Pi Nianglam in license a etsak tak in ADCC Volunteer ten a license balkek sak uh hi.

ADCC ten Local TV Channel ah Sabbath sahkhua zui ten 'Saturday Closed' chih tak a dawr hong thei ding chi a thupuan a bawl nung ua, mahni insung a aksa zuak vau lau a, a license nasan a balkek sak uh hi huham sak in om hi.

Hichi a huham tak a mi nekzonna kikhaksak ding dinmun ahih leh, den chiang in mi tampi thangpaihna hong hi ding a, i khosung ah buaina hon om thei di dinmun ahi. Sunday Close toh kisai a ADCCte dan pansan bang le gen le sak tampi om khin ahih na ah, ADCC ten sahkhua ziaka Sunday a dawr hongte bek theihsiamna pe le uh chih huai mahmah sak in om hi.