Beti Bachao, Beti Padhao scheme tawh kisai ah Orientation Workshop nei

CCpur, Oct. 12 *(Nisin Thuhiltu)* : Churachandpur District a ding ah Beti Bachao, Beti Padhao (BBBP) Scheme hawndaw a hi dungzui in, October 12, 2018 ni’n BRGF Resource Centre, DC Office ah District Level Officer (DLO) te a ding in Orientation Workshop a um hi. Workshop hun ah resource person, Glory Kim Singsit, Junior MCS, Nodal Officer, BBBP in a gendan in, chanu dawilo ziak ah nau sutha ahiloleh chanu pianlim ah that tihaw evidence umlo maleh, cha pawsal dawi ziak ah cha tampi nei khawlaw tampi um hi’n a gen a, zia chun inchen khawsak haksatna, nek-le-chak haksatna banah chate lekha sang tak simsaklo tampi um hi’n a gen hi. Chapa nei kiti social security dan ah ngaitua ziak ah, chapa neilote a ding ah kingaisiatna umthei hi’n a gen a, zia ziak a chun chanute duat ding gualtak ah duat changlo uh hi’n le a gen hi. District sung a Child Sex Ratio, 2001 census ah pawsal 1000 lak a numei 968 umna ah, 2011 census ah pawsal 1000 umna ah numei 948 ah kiam hi’n a gen a, ngaitua khamtak ahi’dan a gen hi. Orientation Workshop chu, Shyam Lal Poonia, IAS, Deputy Commissioner, Churachandpur; Lalramsang Fimate, MCS, Additional DC; T. Kammuanlal Simte, MCS, CEO, ADCC te banah district sung a DLO tamtak in le a uap ui.

Gas connection thak bawl ut te'n bawlthei ding

CCpur, Oct. 12 *(Nisin Thuhiltu)* : Achiata September 19, 2018 ni ah Lamzang khua ah M/S Sangbiaklal Indane Gramin Vitrak kiti Gas Agency hawndaw a hi nung in, Donbosco School main gate mai, Salem Veng ah sub-centre khat a hawngdawk ua, zia mun a chu gas connection thak bawl ut zosia’n bawlthei ding hi’n a kigen hi. Sangbiaklal Gas Agency in tu hapta a khan UJJAWALA nuai ah BPL innkuan 70, Lamzang leh Geljang kim-leh-kiang a chengte kiang ah Gas Connection a bawlpiak ban ah hawmdawna le a la nei hi. Tulaitak in a Sub Centre mun ah Domestic/Normal Connection single leh double cylinder a ding in zingkal dak 9 apat nitaklam dak 2 sung ah ngaitua thei ding, commercial connection le bawlthei, BPL leh Ujjawala Scheme nuai a le bawlthei hi’n a kigen hi. A ngaitua nuam te ding ah, Aadhaar Card, Bank Passbook, Passport photo, Tribe Certificate, Domicile Certificate leh BPL/Ration card pawimaw ding ahi. Maban ah home delivery service banah card mang ah gas chawktheina, Card Swipe Machine le kawi ding uh hi’n a kigen hi.

Hornbill Genius Quiz competition chiatha zing

CCpur, Oct. 12 *(Nisin Thuhiltu)* : Hornbill Cable Network (HCN), Mission Road, Hiangtam Lamka in zillai naupangte masawna ding ah, Hornbill Studio ah a khatveina ding ah Inter School Hornbill Genius Quiz competition, September 21, 2018 ah a pat uh chiatha zing in tuni’n episode 4-na a pan ui. Tuni kidemna a chun, school 4 a pang ua, North Eastern Council Academy, Royal Academy, Savior Public School leh NKT School apat team khat ah student pani chiat a pang ui. Zia kidemna chu HCN neitu, Upa Mangpu Tonsing in a la hawn, Pathianni zingkal dak 7:30, nitak lam dak 1:30 ban ah nitak dak 8 ah sua hisek ding a hi. Youtube channel Hornbill digital cable ah le etthei ding a hi.

District Level Volleyball Tournament 2018 um ding
CCpur, Oct. 12 *(Nisin Thuhiltu)* : Churachandpur District Sports Association (CDSA), For One Life, Asia lehHmar Youth Association (HYA), Tuithaphai Joint Headquarter kithua in, The First District Level Volleyball Tournament 2018 kiti November 5, 2018 in Stephen High School Campus, Saikot ah kipan ding a hi. Tournament ahileh open ding ahia, himaleh district sung apat bep panthei ding a hi. Winner prize Rs. 35,000 leh runner-up Rs. 10,000 hiding ahi. A lunglutte’n entry fee 2,000 leh security deposit Rs. 500 piak a, CDSA Office, Hiangtam Lamka, Life Café, Rengkai Road leh VL Store, Khawmawi Bazaar ah Entry Form lakthei ding a hia, October 30, 2018 chan ah submit thei ding ahi.

CMHT leh PMJAY chiandan tawh kisai hilchian
CCpur, Oct. 11 *(Nisin Thuhiltu)* : Chief Minister-gi Hakselgi Tengbang (CMHT) leh Ayushman Bharat nuai ah Pradhan Mantri Jan Arogya Yojana (PMJAY) tawh kisai mi tamtak in hiathiamlo ah a um nau tawh kisai in tuni, October 12, 2018 in thuthak lakhawm mite'n Medical Superintendent, District Hospital leh District Coordinator, CHMT/PMJAY-te kiang ah scheme chiadan tawh kisai kanchianna a nei ui. Zia hun a chun, hilchianna kimu dungzui in CHMT nuai ah Socio-Economic Caste Census (SECC) 2011, Disability Certificate, Widow (Meithai), AAY Card neite, Newly added SECC families (DC Verification case) te'n zia scheme chu apply bawl thei ding a hiu a, CMHT benificiary khat in damlona chung ah government panpina Rs 2 Lakhs tiang health benefit muthei ding, PMJAY nuai ah benificiary khat in Rs 5 Lakhs tiang per family, per year ah health benefit muthei ding uh ti a hi.

PMJAY scheme dungzui ah SECC list ah min umlo ten Aadhaar base leh Birth Certificate mang ah, innkuan ah insung enkawltu min umsa dungzui ah Beneficiary Identification System (BIS) ah khumlut thei hiding in le a kigen hi. CMHT ah innkuan khat in Health Card khat kikawp thei maleu PMJAY ah innkuan ah family member zosia e-card piak hiding, registration hun a biometric mang ah finger print lak a hi ziak ah innkuan kim a min khum ding ah kuan ngai in a kigen hi. Zia nasepna tawh kisai a chun, National Health Agency, Ministry of Health & Family Welfare in Implementing Support Agency khut ah mawpuakna a piak dungzui in, State Health Agency in Manipur ah enzui in, Churachandpur District ah Thuamkhanlian Ngaihte, District Coordinator, CMHT/PMJAY etkawlna nuai ah Health Coordinator 3 in CMHT/PMJAY Counter, Opposite Maternity Ward ah mipi te ding in dawkan a hawng ui. Amau kithuapi ding a chun, Hospital Administration in tuni’n Medical Coordinator/Healthcare Coordinator ding lakna interview a bawl a, mi 32 in min khum maleh nasep dingdan tawh kisai kituptak ah hilchian a hi nung un, mi 18 in interview a maitua ua, amau lak a chun, Manlunching, B.Sc Nursing of Kamdou Veng a tekdawk ua, Chingngaihkim, B.Sc Nursing of Kamdou Veng, Khawlching Khuptong, GNM Nursing of Zenhang Lamka leh VDM Lun, GNM Nursing of Zenhang Lamka-te Waiting List in a um ui.

Hiatthei khat chu, District Hospital, Churachandpur ah CMHT/PMJAY Counter ah tuni tiang ah CMHT Card 12,000 piakdaw ah um ta, mi 700 val in damlona chung ah mangta, PMJAY e-card ahileh innkuan 34, mi 100 val kiang ah piakdaw hita ti a hi.

SDO/BDO Suangdoh in nasep panta

CCpur, Oct. 12 *(Nisin Thuhiltu)* : SDO/BDO Suangdoh ding ah se' ah um Lianminthang Samte MCS in a chiata 4th October, 2018 nitaklam dak 02:30 in Jameson Hangshing MCS, SDO/BDO Singngat apat in SDO/BDO Suangdoh mawpuakna la'n, kikhutsanna a nei pi hi. Lianminthang Samte MCS, SDO/BDO Suangdoh in a genna a chun, SDO/BDO Suangdoh office ding kisa zing nalai a hina chung ah Lamka ah inn lua ah nasem ding uh tin a gen a, SDO/BDO Suangdoh in staff 4 nei a hina chung ah DC/CCPur thupiak dungzui ah Singngat SDO/BDO staff te’n a pawimaw dungzui ah kithuapi zing phawt ding uh ti'n a gen hi. Suangdoh Sub-Division/TD Block ahileh, Manipur State Cabinet in 23/11/2016 ah lemsakna a nei dungzui ah kisiam dawk thak a hia, Guite kual ah khua 28 huap ding a hi.

KKL in Kangla ah “Ras Leela Dance Hall kisa dawilo
Imphal, Oct. 12 *(Nisin Thuhiltu)* : Kangla Kanba Lup (KKL) in Kangla fort sung ah “Ras Leela Dance Hall of Hindu religion” kisa zing chawlsak ding in state government kiang in phutna a bawl hi. KKL publicity secretary I. Teirenthaba in thusua a bawlna a chun, state in Framework Agreement, Citizenship Amendment Bill, Border Pillar 81 etc te chung ah buaina a nei zing lai ah state government in Kangla mun ah “Ras Leela Dance Hall of Hindu religion” a sak KKL in pawmlo in a gen a, Maharaja Bheigyachandra hun ah “Ras Leela” umpanta himaleh Manipur leng te Kangla sung ah “Ras Leela” chiapi kha umlo un a gen hi.

Education Minister in National Seminar-cum-Training workshop “Youth & Agenda 2030” hawng

Imphal, Oct. 12 *(Nisin Thuhiltu)* : People’s UNESCO Club of Manipur in Confederation of UNESCO Club & Association of India (CUCAI) leh Centre for Study of Social Exclusion & Inclusive Policy, Manipur University kithuapina organised a bawl, City Convention, Imphal ah ni 3 sung um ding, ‘National Seminar cum Training workshop “Youth & Agenda 2030” hawnna tuni'n a um hi. Zia hun chu, Education, Labour & Employment Minister Thokchom Radheshyam in khuallian hina tawh uap in, Seminar cum Training workshop hawnna a nei hi. Ama'n a thugenna a chun, tuhun ah khangthak te dinmun siamhawi thak leh dawpkang ding pawimaw a hidan gen in, khawvel ah resource pawimaw pen, human resource, India ah 35% khangthak te chung ah kinga hin a gen hi. Tuhun ah modern telecommunication system khangto mama a hitakna chung ah khawvel chu khawsung khat gual hita ti'n le a gen a, gam zosia'n a hatna leh a hatlona nei chiat, khangthak te chu maban a ding ah gamsung hatna hiding ti'n a gen hi. Zia ni 3 sung, ‘National Seminar cum Training workshop “Youth & Agenda 2030” a chu, India gamsung mun chuamchuam apat student te pang ding a hiu.

Nodal Officer ding mi 2 appoint
Bishnupur, Oct.12 *(Nisin Thuhiltu)* : Bishnupur District ah tui thiang dawn ding tapsapna a um zingna chung ah Deputy Commissioner Pawan Yadav in tui thiang dawn ding tawh kisai enzui ding in - Mr.U. Somendro, Sub-Divisional Agriculture Officer leh Mc. Milan, SDC/Branch Officer, DC Office, District Coordination Committee te chu nodal officer ding in appoint a bawl hi. Zia chu tawh kitawn ah tui tawh kisai ah haksatna nei mipi te'n a kisaipi Nodal Officers te Mobile Numbers 9856674283 leh 9436026897 ah thuhiat thei ding uh ti a hi.

National Integration Tour ah chiate vaitutna nei
CCpur, Oct. 12 *(Nisin Thuhiltu)* : Red Shield Division nuai ah Sendra Battalion, Loktak Brigade in Jaipur leh Jodhpur ah National Integration Tour (NIT) Kangvai Higher Secondary School, Churachandpur apat student 18 leh teacher 2 a sawlte tuni'n vaitut in a um ui. Tour a chia hun sung ua, Pink City Jaipur, tourist munpi deu ah kihia, Amer Fort, Hawa Mahal, Jantar Mantar Observatory leh Jal Mahal, Nahargarh Fort ti te etthakna nei un a kigen a, zialo a chu City Palace etna nei ah Jaipur ah Royal Family te tawh holimna a nei banua Lieutenant General Cherish Mathson, Army Commander, South Western Command tawh le holimna nei un a kigen hi. Chuleh, Jodhpur ah tourist mun - Umed Bhavan Palace, Balsamand Lake, Ranisar Lake leh GhantaGhar mun te etna nei ah Army leh Airforce Station ah hun a mat banua Surface to Air Missiles, Indian Air Force Fighter Jets te le etna nei un a kigen hi.

Jarnail Singh is Manipur University’s new administrator

Imphal, Oct. 12 *(Nisin Thuhiltu)* : Manipur University buaina sukven theina ding ah High Court of Manipur in Manipur University administrator ding ah a guat, Jarnail Singh, IAS (retired) in tuni'n mawpuakna a la, thupi tak ah Manipur University ah vaidawn in a um hi. Jarnail Singh, IAS (retired) ahileh thiamna lam ah Bachelor of Engineering (Honours), Punjab University; Master of Engineering (Distinction), Punjab University; Master of Public Administration, Harvard University USA ah zo, Chief Secretary, Government of Manipur ah a la semlui, Manipur umdan leh thil chiadan hechian mama mia hi.

State leh central in MU buaina suveng zo lo: MPCC

Imphal, Oct. 12 *(Nisin Thuhiltu)* : Manipur Pradesh Congress Committee in Manipur University buaina chung ah Manipur High Court in panlakna a nei tawh kitawn ah buaina sukven thei ah a um chu Executive leh Legislature lam kituplo ziak in a gen hi. Former vice-chancellor of Manipur University leh Congress executive member Ng. Bijoy in thuthak lakhawm mite kiang ah a genna a chun, state leh central in buaina a sukven theilo ziak ah judiciary in panlakna nei a hidan gen in, MPCC in Union HRD minister in moral ground ah a panmun a nutsia ding phutna nei in a gen hi. MLA K. Ranjit, spokesperson of MPCC in a genna a chun, state government leh Union HRD minister in ni 130 zaw nung tiang ah buaina suveng zo lo in a gen a, Union HRD minister in a panmun a nutsia pawimaw in a gen hi. Chun, mat ah um Manipur University teacher leh student te thasuak ding phutna a bawl hi.

British Council India leh NEC in MoU suai kai
Guwahati; Oct. 12 *(Nisin Thuhiltu)* : Alan Gemmell, OBE, Director British Council India leh Kh. Siile Anthony, Director (HRD & E), North Eastern Council (NEC) in tuni'n North East state 8 ah educational lehcultural cooperation lam promote bawlna ding in Memorandum of Understanding (MoU) suai a kai ui. Zia chu India ah British Council’s 70th anniversary a hitak tawh kitawn ah Northeast India leh UK in cultural lam ah kizawp matna a nei te sukhat thakna ding ti a hi. MoU dungzui a chu Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura ah higher education, English language, skills & cultural aspirations lam thil ah khangthak te dinmun dawpkangna ding ah British Council India leh NEC in panlakna neikhawm ding a hi.

GST Refunds chung ah hilchian
New Delhi, Oct. 12 *(Nisin Thuhiltu)* : GST refunds tawh kisai ah Government in hilchianna a bawlna a chun, exports chung ah GST refund kibawl ding pending ah um te a tamzaw refunds kibawl a hitakdan taklang in pending ah um nalai te a fello a um ziak ah hentang ah um nalai in a gen hi. Total IGST refund claims (Rs. 41,889 crore) um lak ah 92.68% (Rs 38,824 crore) refund kibawlta ti'n a taklang a, zia lak a chu Rs. 3065 crores vat nalai a hidan gen in, a kivat nalai te sukvenna ding ah panlak hizing in a taklang hi. Chun, RFD-01A (ITC Refund) claims tawh kisai ah Centre leh States in total refund claims Rs. 39,372 Crore a mu lak ah Rs. 32,345 Crore refund hita leh a dang, Rs. 4,951 Crore pending a umna chung ah deficiency memos issued ah um in a gen hi. Chun, pending refund claims zosia sukvenna ding ah panlakna um zing in a taklang hi.

Mob lynching chung ah Supreme Court in khautak ah action la ding
Imphal, Oct. 12 *(Nisin Thuhiltu)* : Supreme Court in Centre, States zosia leh Union Territories zosia te a hiatsakna a chun,bawlkhial nei ahiloleh ngawna dik leh diklo hitaleh mipi'n mipi thuneina mang ah kua hem khat sawisak, sawisaklup, (mob violence ahiloleh mob lynching) kiti himhim khautak ah etzui hiding a hidan hiatsak in gamsung mipi te'n zia chu a hiatthei ding ua, publicity nasatak ah bawl ding in hiatsakna a bawl hi. Zia dungzui a chu State Home Department in official website leh Police Department website ah hiatsakna notice a sua ding, Television leh Radio banah media dangdang ah le a thezak ding uh ti a hi. Zia chu tawh kitawn in State Home Department in mob violence ahiloleh mob lynching kiti kuama'n a chiapilo ding, a chiapi te chung ah Supreme Court in khautak ah action la ding ti'n state mipi te hiatding in hiatsakna a bawl hi.