State Govt in SDO leh Police officer 61 te kiang ah gari piakdawna nei ;
Asian Development Bank kithuapina Imphal ah Flyovers 2 leh Ring Road kawibe hiding: CM

Imphal, Sept. 22 *(Nisin Thuhiltu)* : Manipur Chief Minister N. Biren Singh in tuni’n 1st Battalion Manipur Rifles Ground ah Improving Mobility for Field Functionaries function in police officer leh SDO mun chuamchuam ah sem officer 61 te kiang in GPS-fit kibawl gari piakdawna a nei hi. Chief Minister in a thugenna a chun, Asian Development Bank (ADB) financial assistance bawlna’ Imphal ah ring road leh flyovers 2 siambe hiding in a gen a, zia chu tunung sawtlo ah nasepna kipan ding ti’n a gen hi. Asian Development Bank (ADB) in flyovers 2 siamna ding ah Rs. 14,000 crore leh ring road siamna ding ah Rs. 8000 crore approved bawl in a gen a, tuni ah officer te kiang ah gari piakdaw ah um chu state sung mun chuamchuam ah SDOs leh police officer te’n Government gari taksap ziak ah haksatna a tuak zing sek uh sukven theina ding hin a gen hi. Government in officer te gari piakdawna a nei chu government a ding ah a hizing mawng himaleh officer te khut ngei ah gari piakdaw kiti chu state khangthu a khatveina hinalai tin’n a gen a, officer gari pawimaw te gari piak ah um hin a gen hi. Tuni ah gari piakthak ah um te’n khua leh veng thawveng tak ah a etthak thei ding uh a kinepthu gen in, zia gual panlakna a pat chu government in mipi te ding ah kituptak ah nasepna chiapi thei ding ah kinepna nei in a gen hi. Manipur University issue tawh kisai, Chief Minister in a genna a chun, kihiatthiamna umsak hiding leh ngaina gual ah University function sak hiding ti’n a gen hi. Tuni ah officer gari piak ah um te chu - OCs of Jessami, Bishnupur, Moirang, Singhat, Kakching, Mayang Imphal, Noney, Nungba, Jiribam, Kangpokpi, Kamjong, Tengnoupal, Moreh, Pherzawl, Singjamei, Sekmai, City, Porompat, Ukhrul, Sagolmang, Thoubal, Senapati, Tamenglong, NAB leh Churachandpur Police Stations te kiang ah Maruti Gypsies (Soft Top) khat chiat piak ahiu a, SDO/ Borobekra, Waikhong, Chakpikarong, Khengjoy, Machi, Mualnam, Henglep, Vangai Range, Thanlon, Tipaimukh (Parbung), Tousem, Tamei, Khoupum, Longmai, Willong, Phaibung, Song Song, Champhai, Bungte Chiru, Ukhrul, Lungchong Maiphai, Jessami, Phungyar, Kamjong leh Kasom Khullen te Maruti Gypsies (Hard Top) khat chiat piak a hiu. Chun, IGP (Zone-I), IGP (Zone-II) and SPs of Chandel, Imphal West, Imphal East, Thoubal, Churachandpur, Kangpokpi, Senapati, Ukhrul leh Jiribam te Mahindra Scorpio khat chiat piak a hiu. State government in gari a piakdaw chu a kigawm ah gari 61 a hia, gari zosia GPS kikawi, movement leh location trace bawlna mat thei vek ding a hi.

Health Minister in Chandel ah Free Diagnostic Centre hawng

Imphal, Sept. 22 *(Nisin Thuhiltu)* : Health and Family Welfare minister L. Jayantakumar Singh in tuni’n District Hospital (DH) Chandel ah Free Diagnostic Centre hawnna a nei a, Free Diagnostic Centre hawn a hitak tawhkitawn ah Chandel District ah mipi ten natna chi chuamchuam a thawn ah test bawl theita ding uh hin a gen hi. Zia gual panlakna apat chu mipi te’n damlona chung ah sen leh so neitawm chuam ding uh ti’n le a gen a, natna chi chuamchuam te a vaima theilam ah hiatdawna le mat thei hiding in a gen hi. Mihing hinna value geldawk zing kawm ah state government in panlakna a nei zing tawh kitawn ah mipi te damlona thil ah dawnzangkhai theina ding ah panlakna um zing in le a gen a, Chandel chu state sung ah Churachanpur lehThoubal banah Free Diagnostic Service nei District a pathum tinna hin a gen hi. Chun, District Hospitals leh Sub-Divisional Hospitals te ah le zia gual facility chu tunung sawtlo ah hawn hiding in a gen hi. Zia ah hun matna chu Director Health Services Manipur Dr. K. Rajo Singh leh CMO Chandel te’n le a uap ui.

WY chang 10,000 tawh mi 1 mat ah um

CCpur, Sept. 22 *(Nisin Thuhiltu)* : District Police in khamthei dodalna a chiapi zing tawh kitawn in tuni, September 22, 2018 in khamthei WY chang tamtak leh a neitu amandawk ui. Khamthei leh a neitu matdaw ah a umna tawh kisai in, Police Station ah district police in Press Conference ko in, Lunkhomang Khongsai, MPS, Additional SP (Law & Order) in Media briefing bawlna a nei hi. Lunkhomang Khongsai in a genna a chun, tuni, September 22, 2018 zingkallam dak 5:30 a thuguk a mu dungzui ua Gensanglian Vaiphei (48) s/o Thangtintong Vaiphei of Bidna Part IV, Moreh, Tengnoupal District in Churachandpur apat Tedim Road chuan ah passenger gari ah Jiribam ah zawk ding WY chang puak ding gua ti a hiat uh tawh kitawn ah Rommel Gangte, in-charge, Drug Cell Unit leh district police team khat in SI Letjapao Kipgen leh SI Shominthang Kipgen mapuina' a nei zui ngal uh tawh kitawn ah Police-te Team thum ah kikhen ah, Sielmat Lei, Circuit House, Hmarveng leh Kangvai ah a chang pan hun ua, Circuit House ah pang te’n a lim (photo) tawh kituak ah Tata Sumo (Registration Number MN05A 5572) ah chuang, Gensanglian Vaiphei hentang ah a van puak a chek ua leh Table Fan sung ah kikhum WY chang tamtak mudawk uh ti'n a gen hi. Zia ah WY leh apawtu chu OC Churachandpur Police Station khut ah pelut un le a gen hi. Police in Gensanglian amat uh tawh kitawn in ama a pat in Rs. Lakh 6 man ding ah hisap, WY tang 10,000, Kenbo Chinese Mobile phone khat, Nokia handset (Black & White) khat, WY chang chuunna plastic packet 50, Senko stand fan khat amatkhawm banun Tata Sumo le a henthang ua, thudawtna a pat a kithuapi te le matdaw hiding ti'n Mr. Khongsai in a gen hi. A langkhatlam ah Gensanglian Vaiphei chu Special Judge, ND & PS court ah dinsak in a um a, court in ni 7 sung police custody um ding in lemsakna a nei hi.

STC, BSF/CCpur mapuina' District Hospital ah cleanliness drive bawl

CCpur, Sept. 22 *(Nisin Thuhiltu)* : STC, BSF/CCpur in tuni 22 September 2018 zingkal dak 7:00 in Swachhta Hi Seva Campaign bawlna, District Hospital, Churachandpur ah cleanliness drive a bawl hi. Zia ah pang ding te chu STC BSF CCpur, Mualkoi ah kingak khawm in, damtheina leh thianthona ngaikhawk chiat ding pawimaw a hidan kizikna placard, banner chawi in, lampi zuina a nei ui. Zia hun chu, Solomon Yash Minz, IPS, IG, BSF mapuina nuai in rank officer leh training bawl zing lai, BSF personnel te a pang ua, Churachandpur District Hospital tiang lampi zuina nei in, Churachandpur District Hospital ah cleanliness drive bawl in, Hospital sung leh pawlam a suthiang ui. Hospital sukthianna a nei hun un, STC BSF CCpur in chialna a bawl dungzui ah district sung ah School 2- Don Bosco Higher Secondary School leh Hope Baptist Academy apat Class VIII, IX & X student banah Simte Youth Organization, Young Paite Association (YPA), Young Vaiphei Association (YVA) leh Zou Youth Organization te banah district hospital apat T Nengkhanmang, Deputy Medical Superintendent, District Hospital leh Staff ten le a kithuapi ui. STC, BSF/CCpur in 3rd September 2018 ah le New Bazar ah Cleanliness Drive chiapi zawm ding a hi. Swachhta Hi Seva Campaign kiti ahileh India gamsung sukthiantho ding ti ngaituana tawh September 15, 2018 ni ah India Prime Minister Narendra Modi in New Delhi ah official tak ah a hawndawna a la nei hita a hia, CCpur district a ding ah Water and Sanitation Committee, CCpur mapuina' YPA GHQ Hall, Hiangtam Lamka ah Shyam Lal Poonia, IAS DC Ccpur in a hawn a hi. Chun, October 2 ah India Pa ti ah kihia Mahatma Gandhi pianni tawh kituak ah Cleanliness Day mat tiang ah chiapi hiding a hi.

Routine Immunization nei
CCpur, Sept. 22 *(Nisin Thuhiltu)* : District Family Welfare Officer (DFWO) Churachandpur in district sung ah Routine Immunization tawh kisai ah Session Site a siamdawna mun chuamchuam ah tuni, September 22, 2018 in Routine Immunization a chiapi hi. Routine Immunization ahileh thasin ah Ninga-ni leh Kiginni ah Session Site mun ah chiapi hisek, numei nauvawp, naupang kum 16 apat a nuailamte natna chuamchuam apat kivenna ding ah damdawi kap leh dawnsak hisek a hiu. Routine Immunization hun ah naupang kum 10 -15 te leh numei nauvawp te Tetanus kap a hiu a, naupang kum 5-te DPT kap in Vaitamin A le dawnsak in a um ui. Naupang kum 2 - 4 te Vitamin A dawnsak a hiu a, nausen tha 9-te Vitamin A dawnsak a hi banua, Measles-Rubella (MR) leh Japatese Encephalitis (JE) a pawimaw dungzui ah kap a hiu.

Child Friendly Office, CCpur hawng

CCpur, Sept. 22 *(Nisin Thuhiltu)* : Churachandpur District Police panlakna' Manipur ah amasapen ding in tuni, September 22, 2018 zingkallam dak 11:00 in Women Police Station ah Child Friendly Office hawnna a um hi. Zia hun chu, Sumatibala Ningthoujam, Chairperson, Manipur Commission for Protection of Child Rights in Chief Guest hina tawh uap in, Shyam Lal Poonia, IAS, DC Churachandpur in Guest of Honor hina tawh a uap a, Chief Guest in Ribbon cheptan kawm in Child Friendly Office a hawng hi. Hun matna ahileh Lunkhomang Khongsai, MPS, Additional SP (Law & Order) in amapui a, Guest-te a pat thugenna um in, Lunkhomang in kipakthu genna nei in hun amang zo ui. Guest of Honor Shyam Lal in a thugenna a chun, district police panlakn' Child Friendly Office hawndaw thei ah a umna chung ah District Police panlakna pakcha mama kawm in, district administration in numei leh naupangte dinmun dawpkangna ding ah Beti-Bachao, Beti-Padhao mission chiapi zing a hidan a gen hi. Chief Guest Sumatibala in Manipur ah amasapen ding, Churachandpur Women Police Station ah Child Friendly Office hawng ah apan chu kipak mama a hidan gen in, Deputy Commissioner, Superintendent of Police, Rank officer banah police personnel zosia te panlakna pakcha mama kawm in, Manipur Commission for Protection of Child Right in ziagual office chu district zosia hawn a hitheina ding ah panlakna nei zing a hidan a gen hi. Child Friendly Office ahileh huham tak ah Dan kal ah naupang chung ah gamtatna, naupang lauthawng tak ah a umlona ding ua etkawlna ding ah kisiam, nasep patna ding ah naupang kihelna van mat chi chuamchuam chawkna ding ah Kabib K, IPS, Sr. Superintendent of Police (SP) Churachandpur in ama mimal sum Rs. 20,000 a puakdaw a hi.

Annual Sports Marathon tai
CCpur, Sept. 22 *(Nisin Thuhiltu)* : New Lamka College Road Venguam ah um VK Tawna High in 24th - 27th September 2018 sung ah Annual Sport 2018 a matna ding uh tawh kisai in, kisaklawkna dan in tuni September 22, 2018 zingkal in Marathon a nei ui. Marathon ah pang ding student te zingkal dak 4:30 ah school mun ah kingak khawm in, Siamnunlian Valte, Executive director VK Tawna High in Pathian kiang ah kawlsakna nei in, Marathon a tai ding student-te Saktiman/truck ah pawto in, Tualnuam FCI Godown apat Tedim Road zui in New Lamka manaw in, Tedim Road apat College Road ah tai suk in, a school mun un marathon a zo ui. Annual Sport 2018 Marathon ah class VI apat Class X apat numei student 55 leh pawsal student 84, a kigawm ah student 135 te a pang ui.

5 Days Mushroom Cultivation Skill Training khakna nei

CCpur, Sept. 22 *(Nisin Thuhiltu)* : Zillai Kangvai Block (ZKB) leh 54 Battalion, Border Security Force BSF, CI Post Torbung Bunglow kithua ah September 18, 2018 apat Torbung Community Hall ah Five Days Mushroom Cultivation Skill Training a nei uh tuni September 22, 2018 in a zo thiang ui. Tuni ah training khakna hun chu, MKT Simte, Second-in-Command (2IC), 54Bn BSF in Special Guest hina tawh uap in, thugenna leh training khakna a nei hi. MKT Simte in a thugenna a chun, 54 Battalion, Border Security Force in CCpur district ah mushroom (pateh) training a piak amasapen hinalai a hidan gen in, training ah pang ten a thil zildaw uh a phachuam thei ding pen ah a mat ding uh a nawpthu a gen hi. Zia ah training khakna hun chu, Deputy Commander V.L.K. Vaiphei, 54Bn BSF panna mi chuamchuam in le a uap ua, Lamboi Vaiphei, President, ZKB in kiapakthu genna nei in, Kapbawi Vaiphei, Secretary, ZKB in khualliante banah training instructor Kakap Vaiphei, Training Co-ordinator, NARPS/LBI, CCpur kiang ah memento piakna a nei a, MKT Simte in training ah pang mi 30-te kiang ah pache chi (seed) packet khat chiat banah plastic piece 2 chiat piakdawna a nei hi.

3rd Zillai Joint Freshers' Meet 2018 nei

CCpur, Sept. 22 *(Nisin Thuhiltu)* : Churachandpur District huapsung ah Zillai (Vaiphei Students' Association) Unit chuamchuam - CCpur Government College Unit, Raybur College Unit, VK Tawna College Unit leh Don Bosco Higher Secondary School Unit te'n tuni September 22, 2018 zinkallam dak 10:30 in VPC Hall, Bethel New Lamka ah 3rd Zillai Joint Freshers' Meet 2018 a nei ui. Zia hun chu, Dr Joseph Suantak, Proprietor, Jesus and Mary School, Tuibong in Chief Guest hina tawh uap in, Pauchungnung Vaiphei, Associate Professor, CCpur Government College thasik ah HS Kaiminlun, Asst. Professor leh Dr Lamkhogen Vaiphei, Ex President Zillia GHQ ten Functional President leh Guest of Honour hina tawh a uap ui. Chun, Zillai Churachandpur District, Block lawiupa, Adviser te'n le a uap ui.
Zillai Joint Fresher’s Meet 2018 ahileh session pani ah kikhen in, zingkallam dak 10:30 ah session masa kipan in, Th. Lian Vaiphei leh Kimlalfel ten hun matna amapui ua, zillai laapi sakna tawh, Elder Liansawmthang pauchapna tawh hun matna a hawng hi. Thangmuanjem President, Zillai CCpur Government College Unit ZCCCU in vaidawnna thu gen in, khuallian te apat in thugenna a um a, Zillai Don Bosco Unit apat cultural dance suklatna um in, We Dance Academy in Choreography suklatna a nei hi. Rev Lamkhogin Khaute in tukum ah Zillai Freshers te Pathian kiang ah pauchappiakna leh tilkhona a nei a, Jamkhankhup President, Zillai Rayburn College Unit ZRCU in kipakthu genna nei in, Elder Soitinsong in pauchapna tawh hun matna a khak hi. Session panina ahileh kipawllimna leh kithuahkhawmna hun in amang ua, Eleazar leh Phallianmawi ten hun matna mapui in, Unit tin ah President ten introduction hun la'n, We Dance Academy leh Zillai Ccpur College Unit ten Choreography present a bawl ui. Zia ah Zillai Joint Fresher’s Meet 2018 nei hun sung a chun, Vaiphei Artists Association VAA apat Francis Mimin Vaiphei leh Mary Vaiphei banah Zillai Unit apat artists - Jason, Lalkholun, Nianghoichong leh Pricilla Lianhoi ten le a kal hel in laa sakna a nei ua, Functional President HS Kaiminlun, Asst. Professor in a thugenna a chun, student te'n lawtinna ding ah mimal ding ah thil phalo leh thiam zilna chawkbuai thei ding thil te apat kikawi kang ding, mobile matdan thiam ding, maban kalsuanna chawkbuai thei ding te apat kikawikang ding pawimaw in a gen hi. Guest Of Honour, Dr lamkhogen Vaiphei, Ex President Zillia GHQ in a thugenna a chun, zillai te mun chuamchuam ah nam min susiatu hizawlo ding leh a siamhawitu hizaw ding in chialna a bawl a, thiam zilna lam ah lawtinna sangtak neitheina ding ah panlakna nei chiat ding ah tilkhona nei in, Bible in Pathian lau leh nu-le-pa banah sang a Upa zaw-te zadan thiam pawimaw a hidan a gen hi. Chief Guest Dr Joseph Suantak, Proprietor Jesus And Mary School in a genna a chun, Zillai te'n mimal hina kihia chiat ah nam leh gam, nu-le-pa kinepna mualsua zo ding ah panlakna a nei uh pawimaw a hidan gen in, khat leh khat kal ah kihiatthiamlona um te thagum mang pai zianglo ah a thu ah lemna siam guat ding, nampuan leh chawndan chi chuamchuam-te matdan thiam ding pawimaw in a gen hi.

CCpur/TCP in Helmet check

CCpur, Sept. 22 *(Nisin Thuhiltu)* : District sung ah Traffic etkawlna lam ah mawpuatu Traffic Control Police (TCP), Churachandpur in tuni, September 22, 2018 nitaklam dak 2:00 in Police Station mai ah helmet drive bawlna a nei a, helmet khuklo ah garineu (two-wheeler) tawl tamtak man in a liausak hi. Helmet drive ahileh Augustine J. Khongsai, MPS, SDPO Thanlon mapuina nuai in a nei ua, SI Lianthansang, OC, Traffic mapuina' civil police, women police, TCP leh VDF personnel te’n helmet khuklo te TR-5 cut in Rs. 100 chiat a liausak ui. Tuni ah police in helmet drive a nei hun sung un, helmet khuklo ah two-wheeler ah tai, a kigawm in mi 72 aman ua, TR-5 challan apat in Rs. 8,800 a mudawk ui.

TKSU in Joint Freshers’ Meet 2018 nei

CCpur, Sept. 22 *(Nisin Thuhiltu)* : Thadou-Kuki Students’ Union (TKSU) General Headquarter in tuni, September 22, 2018 in M. Songgel Community Hall ah Joint Freshers’ Meet a nei hi. Zia hun chu, Henkhopao Haokip, Vice President, KIC in Chief Guest hina tawh a uap a, Kamthang Haokip, President, KKL GHQ in Functional President hina tawh uap in, Ngailun Kipgen, Vice President, KWOHR, Churachandpur in Guest of Honor hina tawh a uap banin Lalkhohao Haokip, President, KSO Churachandpur in Special Guest hina tawh a uap hi. Seiminlen Haokip leh Kimcy te’n hun matna mapui in, Elder Nohjang Haokip in pauchapna tawh hun matna a hawng a, Lunkhohao Haokip, President, TKSU GHQ in a chiakhawm te vaidawnna bawl in, Elder Jamlun Baite in Freshers te pauchap piakna a nei hi. Guest-te apat thugenna um in, Thangkhohao Haokip, Vice President (Administration), TKSU GHQ in huntawp kipakthu gen in, hun amang zo ui. Nitaklam hun ahileh kipawllimna hun in amang ua, Mr leh Miss Freshers telna nei in, Letjapao, Paominlen, Albert, Seiminlen, Kimneineng, Ryan, Iron Guite, Jangminthang, Tongtinthang leh Elizabeth ti te apat laasakna um in, Dimp Crew pawl apat laam a um hi. TKSU Churachandpur ahileh tu leh tu Branch 5 nei a hi.