MU buaina ziak ah mobile internet service khak ah um
Imphal, Sept. 21 *(Nisin Thuhiltu)* : Manipur University (MU) buaina a um zing tawh kitawn in, a lung awilo pawl khat in zani a khan kiphinna neikit ui. Zia chu tawh kitawn in a chiatha zing exam a buai banah state sung ah mobile data (internet) le khak in a um hi. A kihiatdan in, official leave piak ah um Vice Chancellor AP Pandey in mawpuakna a piak, Pro-Vice Chancellor Professor Y. Yugindro Singh in mawpuakna la ding ah Security venbitna nuai ah University Complex a lut ziak ah kiphinna kipan kit hi’n a kigen a, zia kiphinna ziak a chu police tawh kinawk tuana a pian banah police in tear gas, mock bomb leh a dangdang mipi te sukthipna ding ah mang un a kigen hi. Chu, Police te’n zan sawt nung ah University huangsung ah hostel warden, dean leh student-te ko dawk in, identification parade bawlsak in, student 89 leh professor 6 man in a hentang ui. Manipur University Students’ Union, General Secretary, Laishram Kendy in ahileh student 100 te police puidawk a hidan uh gen in, Hostel No. 5 apat student 55 umna hiatlo ah um in a gen hi. Zia ah thil tung tawh kisai a chun, buaina huaisia zaw a tun khak ding venna state sung ah mobile internet zosia khak in a um a, 26th September 2018 tiang ah kikhak ding hin a kigen hi.
CDSA in Club/Team Managers’ te meeting neipi
CCpur, Sept. 21 *(Nisin Thuhiltu)* : Churachandpur District Sports Association (CDSA) in Super Division League ding tawh kisai in tuni, September 21, 2018 zingkallam dak 10:00 in CDSA Office, Hiangtam Lamka ah Club/Team Managers’ te meeting a neipi hi. Thiauthianmung Guite, President, CDSA in meeting mapui in, district Super Division Club 7 apat manager te chikhawm in (L) T. Lianboi Simte Memorial District Super Division League 2018 ding tawh kisai genkhawmna a nei ui. Meeting a neizaw un, James Thangluai, Vice President, CDSA in pauchapna tawh hun khakna a bawl hi. (L) T. Lianboi Simte Memorial District Super Division League 2018 ahileh September 28, 2018 ah kipan ding, League ah district sung ah Super Division Cub 7; Koite Youth Union (KYU), Lamka Sporting Club (LSC), New Lamka Youth Club (NLYC), Headquarter Sporting Club (HSC), Ganggam Sorting Club (GSC), Bungmual Youth Club (BYC) leh Ahsijolnieng Football Club (AFC) te pang ding, tuni meeting sung in First Phase a ding Fixture le a siam ngal ui. Zia dungzui a chu, September 28, 2018 ah Koite Youth Union leh Bungmual Youth Club first match ah kihel ding, September 29, 2018 ah Lamka Sporting Club leh Ganggam Sorting Club kihel ding, October 1, 2018 ah Headquarter Sporting Club leh New Lamka Youth Club te kihel ding leh October 2, 2018 ah Ahsijolnieng Football Club leh Koite Youth Union te kihel ding a hiu.
State Information Commissioner ding ah mi 2 appoint bawl
Imphal, Sept. 21 *(Nisin Thuhiltu)* : Dr. J. Suresh babu, Secretary (DP& AR) to the Government of Manipur in tuni ah thusua a bawlna a chun, sub-section (3) of section 15 of the Right to Information Act, 2005 ah thuneina kipia mang ah Manipur Governor in Dr. S. Ibocha Singh, IPS (Retired) leh (2) Oinam Sunil Singh te State Information Commissioner ding ah appoint bawl in a taklang hi. Term of Office & conditions of service ahileh sub-section (2) of section 16 of Right to information Act, 2005 tawh kituak hiding in le a taklang hi.
Delhi ah KCP Commander leh Chairman man
New Delhi, Sept. 21 *(Nisin Thuhiltu)* : Kangleipak Communist Party (KCP) Commander leh Chairman, Chief Minister N. Biren Singh tha ding ah vauna bawltu Oinam Ibochouba Singh @ Khoirangba (45) chu Delhi Police Special Cell in zani a khan South Delhi- Kotla Mubarakpur area in a mandawk hi. Oinam Ibochouba Singh @ Khoirangba (45) ahileh Kangleipak Communist Party (KCP) - Peoples War Group (PWG) top commander banah acting chairman hizing lai le a hi. Sanjeev Yadav, Deputy Commissioner of Police, Special Cell in Khoirangba chu thil dawi umlo tak bawl ding ah guanggalna nei ah Delhi ah pansakna ding mun ngaitua ti’n a gen hi. Hiatthei khat chu, Khoirangba in Voice Message ah MU Vice Chancellor AP Pandey paithak ding phutna bawl in, Indo-Myanmar border pillar buaina chung ah Chief Minister demna bawl in, Naga framwork agreement chung in NSCN-IM Chief Th. Muivah le demna bawl in, AIR Imphal discussion hour le Chief Minister Biren in ngaina gual ah a umsak kit ding phutna bawl in, Chief Minister chu project work zosia chung ah percent ne leh Minister te amau thuneina manglo ah Chief Minister lung hawlna kisabuai un ngawna a la siam hi.
District Level Competition um ding
CCpur, Sept. 21 *(Nisin Thuhiltu)* : Divisional Forest Officer (DFO), CCpur in Forest Division mapuina’ tukum 2018 October hapta masa, 63rd Wildlife Week Celebration 2018 matna ding tawh kisai ah District Level Competition um ding a hidan taklang kawm in, school/college-te a ding in hiatsakna leh chialna thusua a bawl hi. District level competition ahileh category pathum - Quiz, Debate leh Painting hiding, Quiz ah Class XI-XII te pang thei ding, Debate ah Class IX –X te pang thei ding leh Painting ah Class VI apat Class VIII student te pang thei ding uh ti’n a gen hi. Zia chu tawh kisai ah lunglutna nei school/college ten DFO Office ah September 25, 2018 nitaklam dak 3 tiang ah min pelut thei ding un a gen hi.
Vitamin A leh Albendazole piak dan ding tawh kisai ah seminar nei
CCpur, Sept. 21 *(Nisin Thuhiltu)* : Vitamin Angel’s Team, India in tuni, September 21, 2018 zingkallam dak 9:00 apat Dorcas Mini-Auditorium, New Lamka ah kochuam lawiupa te naupangte Vitamin A leh huutlo, Albendazole piak dan ding tawh kisai in ziltilna anei ui. Zia hun a chun, Tuithaphai Presbyterian Church, Independent Church of India (ICI), Evangelical Synod Church (ESC), Evangelical Churches Association (ECA), Reformed Presbyterian Church (RPC-NEI) leh Evangelical Baptist Convention (EBC) apat palai te a chiakhawm ua, Swapam Kumar Das, State Consultant, Kolkata in naupangte Vitamin A leh Albendazole piak ding dan tawh kisai in ziltilna a nei hi. Swapam Kumar Das in a genna a chun, World Health Organization (WHO) mudaw dan ah lei apat piang huut chikhat, Soil Transmitted Helmints (STH) kiti khawvel pumpi khualna a um hun ah India ah zia gual natna chu piang thei ding ah muanmawna 64% tung a hidan gen in, zia natna nei te chu a taksa’u chau ah a thisan uh tawm, taksa leh lungthim leh a khandaw ding gual ah khangdawk theilo ti’n a gen hi. Zia ziak a chu India government in naupangte damtheina ngaikhawk ah naupang te damtheina ding panlakna a nei zing banah NGO chuamchuam tawh kithua ah panlakna nei zing in a gen hi.
Hornbill Genius Quiz Inter School Competition kipan
CCpur, Sept. 21 *(Nisin Thuhiltu)* : CCpur district sung ah student te ding ah Hornbill Cable Network HCN, Mission Road, Hiangtam Lamka in Hornbill Studio ah district khangthu amasapen ding in a khat-veina Hornbill Genius Quiz Inter School Competition a bawl hi. Zia chu tuni nitaklam dak 3:30 in a kipan a, C Lian, Program Director, Hornbill Cable Network HCN in hun matna mapui in, Hornbill Cable Network HCN neitu Upa Mangpu Tonsing in Hornbill Genius Quiz Inter School Competition hawnna leh Pathian kiang ah a latna a nei hi. Hornbill Genius Quiz Inter School Competition a chu, district sung a school chuamchuam 16 apat in participant a um ua, tuni’n Don Bosco Higher Secondary School, The Dawn School, Hope Baptist Academy leh Children Training High School ten kidemna a nei ui. Hornbill Genius Quiz Inter School Competition ahileh hapta sin Simhaini leh nitaklam dak 3:30 ah um sek ding, Round khat ah school 4 zel in kidemna nei ding a hiu.
Bomb sukpuak khak ziak ah PLA cadre 3 in thina tuak
Imphal, Sept. 21 *(Nisin Thuhiltu)* : People's Liberation Army (PLA) cadre 3 in a base camp uh Indo-Myanmar border, Aungjiya village ah bomb a sukpuak khak ziak ua thina tuak un a kigen a, cadre 2 in nasatak ah liamna tuak un le a kigen hi. Assam Rifles official thusuak in a taklatna a chun, PLA ten 25th September 2018 leh Raising Day amatna ding ua, security te attack bawl ding ah guanggalna a neizingna chung ua ziagual tuaksiatna chu tuak uh hin a gen a, Kamjong district ah khua mi khenkhat in bomb git a hiat banua, bomb a sukpuakna mun ua PLA cadre 3 in thina tuak ua confirm un a gen a, local mi khenkhat te gendan ah PLA te’n Improvised Explosive Device kam ding ah gua panlakna nei uh ti a hi. A langkhatlam ah Chassad Battalion of Assam Rifles in zani a khan, Kamjong district ah kg 8 ah gik Remote Controlled IED a mudawk ua, Khangpat Khullen village ah local mite’n bomb hiding ah muanmaw thil Kamtong-Skipe road ah kikawi ah a gen uh tawh kitawn ah 31 Assam Rifles Battalion in etthakna nei uh tawh kitawn ah Remote Controlled IED hi ah mudawk un Assam Rifles thusuak in a gen hi. Zia ah IED kikam chu self-styled commander Major Humi of PLA mapuina nuai ah kikam hin le a kigen hi.
C.M N. Biren in 23rd Sept. leh PradhanMantri Jan ArogyaYojana hawng ding: Health Minister
Imphal, Sept. 21 *(Nisin Thuhiltu)* : Health and Family Welfare Minister L. jayantakumar Singh in tuni’n old secretariat conference hall ah Press conference in thuthak lakhawm mite kiang in, Manipur Chief Minister N. Biren Singh in 23rd September 2018 leh Pradhan Mantri Jan ArogyaYojana, PM-JAY kiti migenthei te ding ah special health scheme hawnna nei ding a hidan a gen a, health scheme chu Prime Minister Narendra Modi in India gamsung pumpi huap ding ah New Delhi ah a hawnna nei ding ti’n a gen hi. Zia ah Health scheme thak chu gamsung ah health sector siamhawitu hiding leh migenthei te ding ah kingakna tak hiding in a gen hi. Pradhan Mantri Jan ArogyaYojana, PM-JAY scheme phatchuampi ding te’n government leh empanelled private hospitals te ah free treatment muding, free medical insurance Rs 5 lakhs tiang cover ding hin a gen hi. Scheme chiapina ding ah Imphal West, Thoubal, Churachandpur leh Chandel district ah a kigawm ah Health and Wellness Centres 30 kihawngta leh Free Diagnostic centres le kihawng in a gen a, zia mun a chu free laboratory & diagnostic test facility le kikawi in a gen hi. Zia press conference chu Joint. Secretary Health Rang Peter, Director Health Services Manipur Dr. K. Rajo Singh, Managing Directors of Shija Hospital, Raj Medicity, Advance Hospital, Medical Superintendents of District Hospitals te’n le a uap ui.