LEADERSHIP VACUUM MAH HIA?
By Kimbawi' Pa

Tuni, 14.9.2015 (Seppatni) nitaklam a fb ka hon leh thuthak sim tak ana om khol kei hi. A tampen 'comment' ahi mai. Ka en ka en a, Pauzagin Tonsing in thu gelh a sawm chiang a gelh theilou a hihdan a 'post' ka simkha a, thukup tamlou toh a thuah hi. Huchia thu post 'comment' tuamtuamte ka sim nung in Maj. Thangson Shoute in midang' post a 'comment' ka simkhak ah 'leadership vacuum' chih thumal a zat in ka lung a khei mahmah hi. Hilele hiai ka thugelh in 'leader' i nei kei uh, chihlam nawk a sawm kei a, a hun tak a leader hoih neite a hamphatdan uh lam taklat a sawm hi.

India ah k'on pan di. 1857 a India a Sepoy Mutiny chih a om lai in Princely States tampite'n British-te a na dou uhi. Huai ah Britishte zou hile uh India a Emperor di'n Bahadur Shah II a tel uhi. Himahleh makai kichian a om louh ziak in a vuallel uhi.

India in zalenna a sual tung a kipan in hoih pai sim bang mahleh Indian National Congress ah kikhenna a hong piang zui pah a 'Moderates' leh 'Extremist' in a kiphel uhi. Huchi'n a deihdan uh kibanglou a om a, 'Moderates' kichite takngialle election tuh a, chin a huai a kipan a British solkal noh di ut pawl toh, election tuhlouh ut pawl in a kikhen lai uhi. A kituak thei kei uh. Election tuh hoihsa pawl in a tuh ua, British India solkal nuai ah bangmah a hih zou tuan kei uh.

Huchia kituahlouhna leh maban a panlak didan a buai lai in 1921 in Mohandas Karamchand Gandhi, South Africa a kipan in India zalenna phual ah a hong dawk khia hi. Huchi'n mipi'n amah a zui ua, India a congress makaite'n le a zui souhsouh mai uhi. A thugen a sel kei ua, a zui uh. Huchi bang khop a mipite leh Congress makaite'n a zuih lai un amah a kikoih lian tuan kei a, 1921 – 1947 sung Indian National Congress a makaih sung in khatvei kia President dinmun a luah hi. India in zalenna a muh a kipan a damsung President hih tel hileh a hi mahmah di. Hilele Temple a zuan a, dinmun a ngiat kei a, kaplup in a om hi.

America-te bang le British kumpi in siah (tax) tam a phut luat man in haksa a sa ua, zalenna sual a sawm uhi. Heutu di a zong ua, America sepaih Commander-in-Chief di a zonna lam uah mi kingainiam tak, a farm khawng a azite khawng toh kithuah nuamsa mahmah, Commander-in-Chief dinmun len dia kigingtalou, George Washington a telkhe nolh mai uhi. Wasshington in heutu hihna a chin mahmah mai a, British sepaih training hoih taktak palsuakte dou di'n sepaih dia training neilou himhim American Colonies volunteer-te a makaih mai a ngai hi. Kidouna paizel bang ah a sepaih di mi 1000 a neih louh hun le a tam, chih ahi. Hilele makai ching mahmah ahi dia america zalenna a sulkhiak pih top mai hi.

Ei lawi in hai i sa d'uam ah, a damsung America President hihna piak a sawm ua, ama'n 'Democracy solkal i chi ua, huchia ka damsung President di ka hihleh gam dangte'n dictatorship hon chihsak di uh ahi, achi a, President hihna term nih val a len ut kei. Washington President a hihlai a thu khat a om a, amah le a khualzin in a lampi ah singtum in a dal a, amah ma a pai sepaihte'n lakkhiak sawm in a na hem uhi. Washington in va seppih lou in a na om a, sepaih commander in Washington kiang ah, 'Nang bang hih a hiai a om maimai, hong hepkhiak pih in' a va chihleh a va hihpih mai hi. A khawnung a huai sepaih commander in a President huai bang a thu va pia a hihlam a kitheih tak in ngaihdan a va ngen a, Washington in 'huai mun a thunei pen na hi, n'on sawl di mah ahi' chi'n a dawng achi uh. Chin (qualify) deuh mah na sa uhia? Ka ngaisang himhim.

Huchi'n America mah ah mallam leh simlam a ngaihdan kibatlouhna a hong piang hi. American Civil War kichi a omna ziak thupipen sal neih 'slavery' hilou in, Northern States leh Southern confederates a khantouhna (development) kibatlouh ziak ahi. Northerns States ah industry a khantouhna a hat a, sal neih a ngai nawn kei sim hi. Huchi'n a khangtou na nana in sal neih a sepgimsak a hoihlouhdan a thei uhi. Simlam Southern Confederates ah bel khatouhna a hat kei a, lou nasep a thupi uh ahi a, huai di'n sal (slave) a poimoh uhi.

Huai bang ngaihdan kibatlouhna kal ah makai Abhraham Lincoln a hong dingkhe vual mai hi. Huchi'n sim leh mal a hong kikhuainuai ua, kum khat (1) khawng a huai tualgal veng di a sak uleh kum 5 bang a lut hi. Abhraham Lincoln chihtak in a tualgal uh a bei di deih, a kidouna mun ua va pai in, mun khat a ding sang in 'Unaute i hichi nawn kei di uh, unau ihi uh' chia a va kikou leh captain khat in 'Mihai,si ut na maw, hong kum in' chia va kaikhia (President a hihlam thei lou), Lincoln in 'Very good captian' chia a liangzang a beng khauhkhauh. President chingkam nei uh ahi dia aw, chih in a om.

Vote manphatdan khat k'on taklang lai di. Saupi genna di mun hi'n ka thei kei a, a tom lam a hon gen k'on tum hi. John F. Kenedy in US Senetor, kua theih khollouhte tanchin a kaikhawm a, America a dia a sepsuah gah uh a taklang hi. A laibu min 'Profiles in Courage' ahi. American Civil War nung in mallamte'n ahi thei tan a simlamte nelhsiah a ut ua, America President a ut uleh Senetor seh thum suah senih(2/3rd majority) in a deih kei uleh paihkhiak theih di, chih thu a gel uhi. America President' thuneihna Paihkhiaktheihna Bill pass a tum uhi. Huai tuh to over-ride President's veto, chih ahi.

Edmund G. Ross, Senetor, Kanssas dinmun kichian sa lou in a Party pihte'n a va dong uhi. Party' deihna vote di maw? Amah thu a? Chia a va dot chiang un le a dawng kei hi. A party mite'n chiangkuang a sa kei mahmah uh. Amah party vote kei leh a delhkhe di uh, chih a thei. Senetor hih nawn na di le a haksa di. Himahleh a ni a hong tung a, President kin tak a Impeach theihna di dan vote a la ta uhi, huchi'n a deih leh deihlou a kikimta ua ua Edmund G. Ross in a ngaihtuah vengveng a, mahni President Impeach maimai theih in om leh hoih lou di ahi, a chi a amah party lou lam ah vote a va khia a, huai a a thugen ' Vote ka khiak dek in ka hankuang di ka mu' a chi hi. Huchi'n a Party in a nohkhia a, vangtah tak in a khawsa hi. A ban thei utte'n 'Profiles in Courage' John F Kenedy ah ana en un.

Himahleh khauh hun a khauh a di America in President nei zel hiv'aw. Khovel Galpi (WW II) nung a 'Cold War' hun in Soviet Union in Cuba toh kizom in America (USA) ut hunhun a kap theihna di Missile munpi Cuba gam ah a bawl uhi. America Preseident dia John F. Kennedy telching in a hong om hi. Khawvel a hon en a, America kap thei di a kiang zek a om, a naknuai a om a hon mu hi. Thupuan a bawl a 'Atlantic tuisuahgiat a Soviet longpi muh a omte himhim kapzak ahi di' achi top hi. Huchi'n amah hangsanna ziak in awl in a dai deuhdeuh a, Soviet lamte le a maingal nawn kei uhi.

Galpi Nihna (WW II) a Nazite'n theihtawp a British zoh tum a, a kap lai un gamdangte a pukse vek uhi. Panpihtu bei in a pang ua, German in lah Britain zou leh khawvel pumpi zou di'n a kigingta uhi. Himahleh Britishte huai a na hi dek kei ua, historian khat in 'the greater the danger; the more courageous the people of Great Britain' achi hial hi. Huabang kal ah Winston Churchill, Huai hun a dia kituak (fit) mahmah a hong dingkhia a, a thugente tuni tan in a dai kei a, leitung khangthu a om sung teng a thugen chiamteh tham a genkhia hi. Huchi'n vualzohna a tang mai uhi. Leader dik neih a hamphathuai ngei mai.

Mi'n a hun tak a heutu nei ua, lamdang ahi. Russia ah le revolution a om maimai sek a, nih vei a vuaksuak hi. A Kumpite khawng uh lungkim lou in a paikhia ua, makaitu (sorry, leader vacuum) omlou a nihvei Revolution zang ahi uh. Bolshevik Revolution a kipan in leader a nei pan uhi. Huai a kipan a kibulphuh in a gam vai uh a hawm uh.

China bang le leader diktak nei a revolution sual thawn mahmah gam ahi. Maozedong a hong kilang a, tun i tan a daih.

Pakistan in thagum suah phal ---leader zalenna sualsuah di a nei a, tuni tan in a gam uah thagum a om gige hi.

A tung a k'on gelhte toh i gam dinmun uh a kibang het kei, hilele heutu kisekkhe thei gamte a hampha tel uh.