SELFITIS
By Vungzamuan Valte
Selfie kichi tunaichin a hong kipan ahi kei a, Zawngkuhpi accidental selfie penin Copy Right anei diam, chia court tanpha atunpih ziak ua hong minthang leng ahisam kei hi. Britney Spears leh Paris Hilton te’n selfie ka invent uh ahi chimah le uh zuau-siangthou chikhat leltak ahi hi.
Selfie masapen dan a record om ahihleh, Robert Cornelius in 1839 a Philadephia khopi ah minit 15 sung dingtang zetzat a selfie a kilak ahi hi. 1914 in Mirror selfie kichi Russian Royal family a mi Anastasia Nikolaevna in kum 13 ahih in kila hi. 1920 kum in Joseph Byron in inntung ah Group Selfie la masapen a, camera gik meuhmouh ahihziak in mi 2 in dom kawm hial uhi. Selfie kichi Australia mi Nathan Hope in a Self Portrait a post na ah “Sorry about the focus, it was a Selfie” achih apat hong piangkhia chihdan ahi hi.
John Lennon in mirror selfie a lak pen minthang mahmah mai a, Beatles te Lead Guitarist George Harrison in 1966 kum a Taj Mahal toh a Selfie pen fuhdiak lai hi. Buzz Aldrin in space apat selfie masapen dingin 1966 in la hi. Barrack Obama, Hollywood Stars, Pope Francis chihte khawng in Selfie larsak diak ua, 2013 kum in Oxford English Dictionary in Selfie pen “word of the year” chitop mai hi.
Accidental selfie kichi, 2011 in zawngkuhpi chikhat Macaque in Indonesia gammang lak ah wildlife photographer khat apat camera suhsak a, gammang lak ah tuahmang hi. A khawnungpi in huai camera mukhe-kik ua, zawngkuhpi in photo tampitak a lakna ah SELFIE khat fuhdeuhtak in kila hi. Hiaipen buaipih mahmah mai ua, viral mahmah ahihna ah, a photographer pen zawngkuhpi ahihna ah, kua Copy Right ahi dia? Chihthu hun sawtpi buaipih nilouh uhi. 2016 in USA Federal court thukhenna khat ah “huai Macaque in accidental a photo alak ahih manin, Copy Right a neithei kei ding” chi’n thukhenna nei hi.
Selfie kichi in 2014 vel apat khawvelpumpi a luahdimta a, Hollywood Stars te group selfie khat million 3.4 vei tak a paisawm hial hi. Huchi in selfie kichi household name danin a viral tou semsem a, aneu-alian, atek-akhang tengteng in I hih souhsouh ta mai uhi.
SELFIE ADDICTION:
Selfie Addiction pen SELFITIS kichi a, misiamte’n kansui nasa mahmah mai uhi. Hiai selfie addiction kichipen adiakin tuailai lamte’n thuak nasa zawsem ua; ki-pasakna, ki-nalhsakna, ki-phoukhiak utna, ki show off na leh changkanna dan in nei uhi. Huchia, midangte impress utna lungsim hat semsem te’n, mun lauhuaipipi khawng ah gamtang saka, guam kense lakpi, singkung tung ah, inntung ah, tuiluang zungzung gei ah, huihpi nung lak ah, gari taikawm tung ah, truck/bus tailai mai ah, train tailai maichet ah, huchia SELFIE kilak chitchiat chihte khawng ziakin sihna leh manna tuak tampitak om gige mawk uhi. Hiai selfie kichi fashionable mahmah ahi a, a lakdan siam deuh chitchiat se leng omse uhi.
India PM Narendra Modi zong Selfie lak thangsak thousam ahi a, huaiziak in midang te’n selfie kilakpih ut in hunremchang zong loutheilou uhi. Huchidan a selfie in hunpoimoh tak leh mi poimohte a capture khak chiangin a taktak hi a, ka telkha, ka om chih proof na leng ahi hi. A lucklou vanglakte chu hon selfie pih ding le kimuzoulou chih hial sangin, UP Expressway official te’n ka khualzinna uah, mi 3 in selfie ahon ngen ua, ka hihpih tei chhuih uh aka!
Android phone zangin niteng in selfie billion 93 khawng kila dingin a suitute’n gingta ua, a tamzawte tuailai kum 18-24 kikar te hideuh un gen uhi. Huchia, selfie mahni omna mun a kila-den, ki-en-den, delete zel, fuh kei chia lungkia a lungsim nna-dedu tampitak tuailaite om uhi. Hiai selfie obsession ziakin tamtak te’n lungsim buaina tuak ua, a taktak sang a kilat hoihzawk ding tupna ziakin a lungtang uh khoih mahmah mai mawk hi. Kikhemna chikhat leng ahi a, fb a profile picture mam-henhon, nou-chekchok a kilang, a taktak a huchi silou chihte kha kiselguk haksapi khat ahi hi. Hiaite’n naupangte’ lungsim ah kingaihsiatna chituh tuhthei mawk a, khenkhatte’n depression neihloh in khauhual ok-kha thei sek uhi.
Hiaidan a obsession neite a tangpithu in Extroverts hi ua, mi maingal leh hi-zelzualte ahi tangpi uhi. Tuailai khenkhat te’n a limlak (selfie) uh a lawmte/ngaihzawngte kiang uah agukin thon mahle uh, a thot khit chiangun amau’ control nei nawnlou ua, khawnung buaiphing thei uhi. Hiaidan dinmun a om tuailai tampitakte a hinkhua uh buaisak a, kingaihsiatna khukpi ah lutsak thei mawk hi.
Selfie kichi ahoihna tampitak a omtham ding a, thil hoih tengteng ahoih famkim vek tuankei zel hi. Excessive tak a thil hih himhim te’n buaina toksuah thei veve a, slefitis kichi, obsession/addiction chikhat suakthei a, tuailai tampitak te ngaihtuahna buaisak thei a, mi khenkhat te’n suicidal tendencies neithei zawmah uhi.
Huchidan a SELFITIS neite, a kan-suisuina uah hichidan in mukhia uhi (kei muh hilou ahi aw):
Low Self-Esteem neite ahi ut viau uh chi ua, narcissism kichi mahni hihna sang a kithupisak utte, superiority complex nei leh perfection lam langsak se utte, lah asungguk a a kiselgu om giugiau, mahni ki-muangngamloute omdan ahi chi uhi.......fun danin nei hile hun geih dingdan ahi. Selfitis ichihte... selfie kilateng hizenzen loudan ahi, addiction kichi tuampi khat ahi chih thei ni. Hyper Active te’ Selfie addict baihse uh chi uhi, I gingta diam a...
Hiai obsession kichi gambling haichilh (gambling addict) te toh tehkhin nawn leuleu ua, social leh family ah buaina tunthei te chikhat ahi hi. Mite’ theih ding a kilawm loupipi innsung thil khawng phoukhiak el-ul khak ding lauhuaipi suak hi. Tuadante ziakin sungkuan kinakna leng suakthei veve hi. Sungkuan minsiatna leng tunthei veve hi. Ahun-geih theile bel, thil nuampi ahi a, thil hoihpi khat leng ahi him hi.
Khovel pumpi ah Selfie buaipih ziakin sihna leh manna tampitak omta a, India te hideuh-se ut sese zawmah uhi. Gamdang khawng ah ava si eu ou duchu....
SELFIE DAY CHIH KHAWNG AHONG OM KEI DI CHIH KUAN I GEN THEI A !!