KANDEM
~Vanlallian Valte
Kungfu shoes hong than tuung lai pan in, “Mawngbang ikikawi lai…” chih lapau fuh sa lua hinapi’n kuh simpi ahihlam ka phawk thak hi. Mawng kung pen aneulai a khaugui bang a dengdel hiven, mung khat hiam, singkung dang pansan in zaam tou hi. Tua singdang toh hong kikawi in sanmun muang uh e! A etlawmna un gamlei tanvak singseng. Ahia, mawng sing bel khang haat ahihman in a kawi khaak taphot kawi mang tawmtawm a, khovel theih in mawng kung keleu hong suak ta hi. Kawimang a om pen in, “I want justice!” chichi mahleh a awsuak bildoh diing omlou a, khotaang’ vaikuan tanni a tuisam phuldok bu-but bang lel lah ahita ngal a.

Houlimna masa, “Tara Raho!” kichi ah ‘butterfly’ min masa ‘flutter by’ ahihdan i genta. Gual in Shaktiman mai hawksa a tai bombom toh ateh theih khop a piandang leh mai kem deidai le mihinpih itna lungtang toh en le kimu pangpalek mai ahihdan simgen hang. Tunglam zuan a leng kokalh kop helhel pangpalekte’ min masa ‘pawngpawlen hiam paaklen’ chih peuh hi diin ka ngaihtuah thei zel hi. Pangpalek te’n paakzu tawp ua, himahleh pangpalek khat leh pangpalek dang akitawp lam uh ka mu nai tadih kei. English pau a, “Butterfly Kiss” kichi – koppih toh naichik (mitmul leh mitmul ki-het pha) a kimaingat, a sam leh baanzaal zuut hianhian, maimit siing, mitmul phe sak leplep kawm a deihthoh taka kitawp ngoihngoih genna ahi. Chiinchi thou ei ngal ve!

“Boycott” chih thumal hong kipatdan leh ‘etsanna’ diktak omzia i pulak ta uh. Cancel leh condem kipan a hong piang thumal ‘kandem’ sappau in ‘discard’ chihna ahi le ichi thei. Awle, khovel ah zaw kandem theih louh taktak le ana om lou hilim veh! Himahleh, 'koppih kandem' chih thu genmaih hang, “Apoi se kei!” chi a, chillum toh valh liam suk vel maimai houh hi ni. Thilluite thudon lou pi in thilthak lamen kei ni. “Huchi ahih ziak in, kuapeuh Khrist a a om leh, thilsiam thak a hong hi a; thil luite a mangta a; ngai un, a hong thakta uhi. (2 Korinte:5:17)”

Kituahpih louh, lungtang hon vit te nawlkhin lou in lailung damna piang ngeingei lou ding hi. Etsakna diin hichiin gen le: Saulim Restaurant ah na lut a, nek-le-dawn di hiing nam sim hon luui dimdiam uhi. Na ngaihtuahna’n thoupi peuh kilaam in na mu. Aneitu in hon zetheih a, kuang dang – limchi zaw, siangthou zaw leh thaklai zaw a hon khensak khit in na kuang masa hepkhiat diing na phal kei mawk hi. Tua dohkan (leh na lungtang, khuak leh na kha) in lah dawl zoh zah nei hizenpi maw!

Kidouna long bang le kandem theih luat ana hi. Khovel a kidouna long, aircraft carrier sem sawtpen INS Viraat ahi. November, 1959 kum in ‘HMS Hermes’ chih min pua’n siansuah in om. British kumpi dia kum 27 sung vingveng sem a, Argentina toh Falkland tuikulhgam kituhna gaal ah le che-hoih mohlou hiin kigen. 1984 kum in kandem uhi. Puahpha ua, India in leikhia a minthak, ‘INS Viraat’ vuah uhi. Indian Navy in May ni 12, 1987 in siansuahna nei thak. Tukum March ni 16 in Kandem taktak hita. 'Andhra Pradesh Goverment in leikhia a Museum dia puah diin' kigen mahleh, tuchiang dong thuchian om nai lou hi. Huchi kawmkal ah Indian Navy in Maritime museum suah sak sawmbawl ahihdan le kigen hiau-hiau. "Lamka te hon pia uh henla, pumbuuk diin zang mai le" chih bang nak om lua hiin maw!

Indian Airforce in le lenna lui te khenpek a siksia zuakna a zuak khe mai lou uh. TTLE (Total technical life expired)/obsolete stores/surplus/gift worthy (aircraft/airframe/aero-engines/other spares) minvoh uhi.  Khosung a mun poimoh cheina leh motivational purposes dia deihte kiang ah hawm khia:-

Category-A: IAF Units/Commands/Institutions.
Category-B: Ministry of Defence organizations including other Services/Defence PSUs,
Category-C: Cetnre/State Govt and Orgns/Local/Municipal and local bodies under their control, (the requests shall be forwarded to the Dte of Lgs Plg, Air Headquarters, WB-VI, RK Puram, New Delhi-66 along with recommendations of an officer not below the rank of Jt Secretary in the Government of India)
Category-D:Central/State Government Educational Institutions/Colleges/Schools;
Category-E: Private organizations/educational institutions/colleges/schools/NGOs and others; and,
Category-F: Foreign Government/Agencies.

VV'Laidiip/09052017