SUANGPI BANG KIP THUCIAM NIHTE LEH KIDOUNA NANUNG PEN by Ginvum Ngaihte, Etkikna:
ABRAHAM BANG PA, ISAAK BANG TA ~L.T.Ngaihte, Kabul
Juda phungpi Abraham bang Pa leh Isaak bang Ta na omlou hita leh,Pathian kici thu zuaupi na hi ding a Bible a genkholhna tengteng zong thuzuaupi lel na hi ding hi.
Abraham kiang a kheelnawn theihlouh thuciam masa:
• Hoihkim (perfect) a na om naak a leh – Tampi tak in ka hon pungsak ding a,ci tampi pa in ka hon bawl ding.Na min leng Abram hi nawnta lou in Abraham ahi zaw ta ding,nam tampi sungpa dia ka hon bawltak ziak in(Genesis 17:1-5). Nam tampi pa a bawl ahihtheihna dia Abraham hih ding omsun tuh Pathian mitmuh a hoihkim(perfect) a hih ding ahi. Ahucih zoh kei aleh namtampi pa a bawl ahi teitei kei ding.
• Teknung-vuainung a tapa apiak, Isaak, maitam a gangoh a gou a kithoihna a laan dia a phut,phunlou-paulou a Abraham in a picinsak ziak in,Pathian in Abraham ‘hoihkim’ in a ngai a,huaiziakin, a condition kimsakta ahihman in,kheelnawn theihlouh thuciam hicibang in a pia hi – Na tapa neihsun non itlouh ziak in, Ka hon vualzawl ngeingei ding a, van a aksi zah leh tuipi piau a piaunel zah in na suante ka pungsak ngeingei ding. Na suanten a melmate uh kulh kongpite a laksak ding uh.Ka aw na zuihziakin,na suan ah khovel a namcih a navak ding uh, ci in(Genesis 22:15-18).
Pathian mahmah in ‘ngei ngei ding’ ci a a thuciam tuh kheelnawn theihlouh thuciam ahi a, a tangtunna om ngeingei ding ahi cih a ciang. Aihleh, bang ci lampi tawnin, bangcibang hun ah a tangtung a,cih et ding ahi.
Hiai Pathian thuciam te Abraham dam sung in a tangtung kei. Abraham tapa neihsun, a gouluahtu ding tuh Isaak ahi.Isaak hun in leng thuciam te atangtung nai kei. Isaak in tapa nih a nei a,a upa zaw Esau ahi a, anaupang zaw Jakob ahi. Himahleh,Esau in a upa-hihna(birthright), anaupa Jakob kiang an kamkhat in a zuak.Huai omdan tuh, Abraham kiang a leitung vualzawlna thupitak piak louh theih louh a ciamsa tuh Jakob leh a suante a hong hiding cihna ahi. Jakob min omzia ‘tuhkhepa’ cihna ahi a,min hoih ahi kei,ahihziakin,vualzawlna deih a Pathian a kibuanpih ek nung in,Pathian in minthak Israel cih apia hi,huaituh ‘vualzoupa’ cihna hi leuleu.Hucibang dinmun luah kha himahleh, a upa Esau in thahsawm ahihman in a lang a lang ah atai khop a, atawpin apu,Laban tanu te Leah leh Rakil zi ding in ava loh khia hi.Huaite lak a pan Jakob in ta 12 a hon nei a,hiai tuh Israel nam 12 te hong kipatna ahi.Huaite lak a naupang pen zom Joseph ahi a,Jakob in a deihsak bik deuh pa ahi. Apa un deihsaktuam cihziak in a ute kithutuak in Persia sumsinmi te kiang a zuak ua,apa uh kiang thuzuau gen in ‘sahang in ane’ aci uhi.Hiai zuak a om pen,atawp in,haksatna leh khemna te ginomtak a adou zoh khit ciang in, Aigupta gam a Pharo inpi a vaihawmtu lianpen in a hong om hi. Buh-leh-baal tampi ana kaihkhawm te ngeen a Canaan gam a pan hongkuan, a unaute mah toh hong kithei khia in,Joseph in a unaute Aigupta gam a Goshen gam ah atengsak ta hi.Hun hongpaijel a,kumpi(Pharo) gilou taktak hong lal ua,hiai Joseph te unau leh a suante uh Aigupta ah suak leh sal ahong hi ua,huaite Cannan gamzuan a pikhe ding in Pathian in Mosi a hon sep hi. A hong kipatna gam mah ua pikik nawn ding in.Kaal gamla ahihlouh hang in Kum 40 mahmah Pathian in gawt kawm a hawidan siamtak in a pi a, huaisung in Israel nam a ding bik in thuciam,dan 10 piak tel in, bang zah hiam apia hi.
Pathian Dan 10 piak te leh thuhilhna dangdang te pansan in Israel taten gamciam a hon luah ua,vaihawm mite (Judges) te makaihna in,Pathian mah kumpi a nei in, Pathian leh mipi te kaal a Siampu te pang in hong kipua uhi.Ahong lungkim kei pah ua, Jentel te bang a kumpi nei a kivaipuak a hon lunggulh ua,Siampu Samuel kiang aphuhphu uhi. Atawpin,Kumpi Saul piak ahi uhi. Saul zoh in Kumpi David, huai khit in atapa Solomon.Solomon a gamtat hoih louh a thaiboi tak a azi te pathian peuh a biakziak in,Pathian a heh a,’na lalgam kimkhat kon laksak ding,na dam sung in zaw hikei dia,na tapa lal sung in,ka hon laksak ding’ aci hi.Acih bang in Solomon tapa Rehoboam lal sung in Israel lalgam nih in – Juda Lalgam(Kingdom of Judea) leh Israel Lalgam(Kingdom of Israel) (Samaria bang le kici)cih hong piangkhia hi.Juda Lalgam, simlam a om teng Rehoboam in vai a hawm a,Israel Lalgam a mallam a om teng Jeroboam in vai a hawm hi.Rehoboam nuai ah Juda nam leh Benjamin nam kia a om ua,adang nam 10 te Jeroboam nuai ah a om uhi.Hiai huntak in,nam khat sung a vaihawmtu 2 hong om ahihna uah,Bible in lalciang(scepter) Juda a pan manglou ding acih toh,ta upa hihna(birthright) Joseph a ahi cih hong pai tuam hita hi.Huai omzia tuh salam gou kiluahna pen Jacob suante lak ah (Kingdom of Israel)a tung ding a,khalam lalciang(sceptre) pen Juda Lalgam(Kingdom of Judea) ah apai ding cihna ahita.
Deih bang a tom theilou di abang a,hiai apan kong tawm tou zialzial phot ding:
• Jacob ta 12 te lak a a upa pen Reuben ahi a,pianken a gouluahtu ding ahi.Ahihziakin,apa lupna ahih buah ziak in,ta upa hihna Joseph tapa – Ephraim leh Manasseh kiang a piak ahi uh. Kheelnawn theihlouh taksa vualzawlna piak ngeingei ding a Pathian kiciamna hiai te tung tawn in a tung ding,cihna ahi.
• ‘Joseph in atapa nih te (Manasseh leh Ephraim) a kaai a, a naupang zawpen a khut taklam a kaai in,Israel khut veilam pang ah a hon pi a, a upa zaw Manasseh pen a khut veilam pang a kai in,Israel khut taklam pang ah,honpi hi. Israel in a khut a hon zan khia a,tangtak a koih lou in, a hon helh a,akhut taklam anaupang zaw Ephraim lutung ah a hon nga ta,a upa zaw Manasseh lutung ah a khut veilam hong omkha daih hi. Huan apa uh Joseph a avualzawl a, ‘hon suangpa Abraham leh Isaac, A ma ua peizel na Pathian,tunitan a ka damsung tengteng a hon vaakpa Pathian,gilou tengteng akipan a hon tanpa vansawltak in,valnoute vualzawl hen. Huan ka min Israel amaute tung ah om henla,hon suangtu Abraham leh Isaac min toh.Huciin khovel laizang ah,mipi thupi tak (multitude) hiding in hong pung uhen’ achi a’(Gen 48:13-16). Khovel laizang pen a sutkhiak tuh Great Britain ahi.Latitude leh Longitute zang in.
• Kingdom of Israel a nam 10 teengte,Assyria ten a va dou ua,a taizak lou siah,Assyria gam ah a pi uhi. Amaute hong kiknawna thu koimah a akigen kei a,huaiziakin,nam 10 mangthangte (The Lost Ten Tribes of Israel) cih min a pua uhi.Hiai nam 10 te koi a teeng kha uhiam cih history a le genkhak na muh ahi kei,mindang a theih nahita uh hi ding ua gintak ahi. Ahihziakin,Bible(Hosea 12:1) ah ‘Ephraim huih in a ki vaak a,suahlam huih(east wind) a zui a..’aci. Suahlam huih icih suahlam a kipan te a hi a,tumlam manoh in a nung tangpi hi.Hiai dungzui in, nam 10 mangthang te, awl awl a tumlam manoh in tulai a Europe gam tungsuk uh hiding hi. Genesis 49:17 ‘Dan nam tuh lampi a gulpi ahi ding’ cih imu.Dan tuh Israel nam mangthang 10 te lak khat ahi a,hiai khualzinna a apitu deuh hidin a gintak theih hi.Tuamah bang in,Dan min pua akisam Europe gam ah mun leh mual,mi leh sa tampi om leuleu hi.
• Juda Nam Mangthang 10 te luahna gam,Europe ah kum zabi 19 bul in khovel pumpi khek zoudia kikhekna ahong tung a,huai tuh Industrial Revolution akichi.Hiai bang lawm a kikhekna leh masawn na thupi omkha ngei nailou tuh gam neukha, Great Britain ah kum 1800 kipat ma deuh in hong kipan hi.Sumdawnna leh thilhihtheihna ah British te, Europe gam dang te sang mah in le ma nasawn ahihman un, a lalgam uh lian deuhdeuh in,atawp ngial in ‘nitum senglou gam’ kici hial in,India natan ahon uk uhi.Bangziak a 1800 kum a Industrial Revolution(Van bawlkhiakna toh kisai kikhek lamdanna thupi) Great Britain gam ahong kipan sese hiam cih lunglut huai mah mah,himah leh hiah I gen man kei ding.
• Jacoh huaituh Israel in Joseph tapa nih Ephraim leh Manasseh avual zawl lai in, a naupang zaw Ephraim thupi zaw ding ahi cih leng a gen lawksa ahi (Gen 48:19).Hiai nam 10te lak a tel, Manasse leh Ephaim unau ciamsa khelnawntheihlou vualzawlna pawtu ahih mah bang un,a upa zaw Manasee suante tuh Great Britain te a hi ua, anauzaw lah athupi zaw gige Ephraim suante tuh kuamahdang hilou in America(USA) te a hi uhi.Hiai bangmah dang ziak hilou in, Jacob in Joseph tate avualzawl deklai a akhut a helh sese ziak ahi.Vualzawlna thupi zaw a khut taklam ah a om a,anuainung zaw a veilam ah.Huaiziakin, Great Britain sang in America te hatzaw gige uhi.
KHENPI II NA: SUANGPI BANGKIP GINNA THUCIAM
• Hiai khalam thilciam, nam cih kouzan na ding pen Abraham suan hong paitouzel a kipan a,David kiang ah hihkip in hong omthak hi.Tung a ni leh khapi a man kei ua leh,David suan laltutphah ngak ding kitasam louding cih ahi top mai. ‘Lalciang Juda akipan a mang kei ding a,Messiah hong pai matan,dan pepa lah,a khe kaal a kipan in a mangsam kei ding;A hongpai ciang in,nam cihin,Athu a mang ding uh’(Gen 49:10).
• David suan apan laltutphah ngak ding kitasam lou a aomna ding a panla ding in zawlnei Jeremia seh ahi.A nasep pipen dia Pathian thupiak tuh ‘Tuni in namte tung leh lalgam te tung ah,botkhe ding toh,phelsia ding toh, hihse ding toh, paikhia ding in leh lamthak ding leh phutkip ding in ka hon sep hi(Jer1:10). Huai tuh a tompen a gen in ‘Israel lalgam botkhe ding leh tungding ding’ cihna ahi.
• Kumpi Zedekia hunlai in Babylon te khut ah Jerusalem apukta.Zedekia leh atapa tengteng thah ahi uh.Kumpi laltutphah luahtu ding om nawnlou bang tuk a om tungding ding a sap a ompa Jeremia bel lamdang tak a taikhiak sak ahi a,amah kia hilou in Kumpi Zedekia tanu te leng atai khiak pih hi.Huai kumpi tanu te tuh Juda laltutphah tunding na ding cii omsun ahi ta uhi.
• Juda kici Jacob tate lak a khat ahi.A ta upa Er in zi anei a,amin Tamar ahi.Ta neimanlou in Er a si a,azi luah theiding atate omnailou ahihman in Juda in anawlam ah a sawl kik hi. Ata dangte hong picin nung a le Juda in a sapkik louh ciang in,Tamar heh in hong kizuak a,Juda in theilou pi in khatvei a va luppih a,sum a neihlemtang louhziak in a ciangkhun leh zungbuh a nusia hi.Juda luppih ziak in Tamar hong gai a,ta phik a pai hi. A sung apan naupang khut a hong dawk a,naudomnu’n aupa zaw ciamtehna in khausan ana gaksak hi.Ahihziakin,huai khut a tum nawn a,adang khat hong piang leltak hi.Apiang masapen mindin Pharez (bohsiatna) asa a,khausan bun kha pen,apiangmasadek pen Zerah a sa uhi.David akipan Zedekia tan ah Israel kumpi tuh Pharez suan te ngen ahi tou ua,atawpna Zedekia leh atapa teng lah thah ahita uh. ‘A niam tawisang unla,asaang hihniam un(Ezek 21:26) a Pathian in ana cih bang in,apiangmasa khialpa Zerah suante vaihawm hun hong tung ding hita hi.Hiai tuh kileplemna(healing of the breach) akici.
• Zerah in tapa 5 anei- Zimri, Ethan, Heman,Kalkol leh Darda. Vial pempem nam ahi ua,Kumpi David hun in Ireland gam ah a pemlut uhi.Jeremia toh a taikhe khawm,Kumpi Zedekia tanu Tea Tephi toh Zera suan a mi Ireland kumpi Harremon tapa hong kiteng uhi.Hiai in David suan a laltutphah a tuding khang tasamlou ding ci a kigen hong tangtung ta a,Jeremiah mohpuakna nihna ‘tunding nawnna’ a hong bukim ta hi.
• ‘Ka lumlet (overturn) ding, Ka lumlet (overturn) ding, Ka lumlet (overturn) ding,aneitu ding diktak a hong pai matan a kilumlet nawn kei ding,huai hun ciang in,Amah kiang ah Ka pe ding’ (Ezek 21:27) ci a Pathian in ana gen tangtunna hiai ah akimu:Kumpi Zedekia apat Ireland a laltutphah hong kisuanna,lumleh khatna ahi.Ireland akipan laltutphah Scotland ah phuh in om nawn a,hiai lumlehna nihna ahi. Scotland apan laltutphah England ah a kisuan nawn a,huai tuh lumlehna thumna ahi.Tulel a I omna uh hiai ahi.Huaiziak a England leh ahuzap teng Kumpinu Gam kici ahi,kumpinu pen Zedekiah tanu zung khak ahih man in.England gam mite kicihna British cih thumal Hebrew pau in ‘thukhun mite’ cihna ahi.(Brith-thukhun,ish-mite).Tua I British Kumpinu un a neitu diktak Jesu Krist hong pai matan Kumpinu min in David laltutphah a len ding hi.
THUTE TAWPNA:
• Nou England leh America te aw, na pu uh Abraham kiang a salam hauhsakna ka ciamsa dongtute aw,nitum senglou gam a lalding in ka hon bawl a,khovel hauhsakna,nam dangte kiang a kapiak ngei nailouh, kon pia a,na pu uh Abraham kiang a kheelnawn theilouh suangpi bangkip,thuciam ka bawl ziak in,namdangte tung a leeng ding in ka hon bawl hi. Huci pipi a leeng,Ka thu naman nop kei teitei lai ua leh,Assyria sal a konpi lai a,haksatna sang a, aleh sagih a thupizaw in leh,na zaw in, noute ka hon gawt ding hi’,cih Pathian thupawt hihtuak ta hi.
• America leh England te hatlai pen Kidoupi II na tawp lak vela hi. Huainung siah kiakniamna in a zui.Hiai tuh a nasep hoih lou,Pathian thu toh kikalh tampi te ziak ahi.Kumpi Nu ding in pasal dang angai a,car accident in asi.Apasal in laltutphah leh nuthawi a sai kak a,nuthawi a teel. Nausuksiat(abortion) dan bang in a phal uh,tawmkha sung a kitenna te aphal uh.Amau sang in anaupa uh America te a ginakei zawlai uh-President in nungak White House a seem khat a ngai a,Danbawpawl(senate) in amohsa ngam kei,pasal leh pasal kiten bang a phal uh,gam tuamtuam- Vietnam,Iraq leh Afghanistan te a migilou a angaihte uh sukbei a sawmna te u leng,lohcing taktak a om nawn kei.
• Hicibang a khovel tung a thunei tak a aom na te u leh kidoupi II a vuallelhna phuba lanuam gige United Germany in pan honla dia,phubah lakna England leh America te tung ah ahon nei ding,hiai tuh gal tengteng a atawpna ding ahita.Tulel in,Europe gam tuamtuam te lak ah kizopkhawmna thupitak deih in panlakna om hi.Germany in galvan lam ah,Roman Catholic saptuam te makai Pope in khalam ah, Europe gam tengteng a kaikhawm ding uhi.Hiai a kidouna mulkimhuai ding dan leh a huaisiat ding dan theinuam te a din Kilakna bung 8 sim ding ahi.
*****(26052013)*****