SALPHA NGALLIAM – JAMES KHAIJAMANG TOUTHANG' TANCHIN
By Manipur Express Team

Manipur Express Team in singtangmite' gam leh leitang humbitna dinga hinna pia 'Tribal Martyrs' 9te 'zahna' pekawm in a tanchin uh mipi' theih dingin abanban in hong kitaklang hi. Amaute' tanchin tungtawn in mipite hi'n makai hitaleh ana lungke simte'n leng thathak hong lak ua, kitat hiamna ding a azat theihna ding uh ngimna leng ahi hi. I mihangsante' uh min leh mel theilou leh mukhalou, ei singtangmite lak ah atawm mahmah ding. Himahleh, a innkuan khawsakna uh banah a tanchin uh ana theikha tamlou maithei ahihman in amau tanchin i theihte tungtawn in thathak hon guan leh chih, 'Manipur Express Team' in kideih mahmah hi.

September 28, 2015 ( Seppatni) nitak in 'Tribal Martyrs' 9te laka naupangpen hi a kithei Khaijamang Touthang' nutsiat a innkuante houlimpih dingin a tenna uh Bijang lam zuan in 'Manipur Express Team' apan mi 4 kikuan hi. Police Station konga Nupi duty-te lak kitaisuak thei hamham mahleh, kiklam chianga huaimun tawn nawnlou ding a 'thuhilhna' a kituah nung in Sielmat lei gei ah 'Identity Card velchetna' in zuinawn a, atawpin hawhna ding mun damtakin kitung khongkhong hi. Huai hun a houlimnate 'tangthu' dan in kigelhkhia a, mipi' theih dingin anuai ah saulou in i taklang ding.

Salpha Khaijamang Touthang May 10, 2004 in piang hi ( mun khenkhat ah March 7 hi'n kigelh mahleh May 10 hizaw hi). Amin a gelh chiangin 'James Khaijamang Touthang' chi'n gelh zel a, 'James' a zatna ziak bel theih hituanlou hi. Amah (late) Haokhothang Touthang leh Nu Nemneilhing' gil a gah goutan 6-te laka a 4na ahi hi. Sanggam numei 2 leh pasal 3 nei a, a asanggam numei lianzaw pen in pasal neikhin a, numei khatpen ( Vahkimchan) bel nautum kum 4 lel hilai hi. A sanggam pasal lianpen Thongminlen (19 yrs) bel Imphal (Langol) ah a pute' inn a om in, Savio School ah Class XII simlel hi. A fee leh bangkim ahihleh a papite'n piaksak vek uhi. A tunga pasal leh anuai a pa ahihleh Hmuia Veng a om 'Bethel Children Home' ah om uh a, Blue Star Academy ah kai uhi. Anau neupen(numei) leh anu banah a pi(apa' nu) tawh Bijang ( Agape Cottage) a a gang uh Holkhothang' inn ah khawsa uhi.

Khawsakna haksat ziakin siamsinna lam leng School hoih ah ana kai zoukei hi. Tuibuang Government School ah Class III tan ana sin a, private school tawh tehvual hilou ahihdan haih deklou hi. Aneu apan naupang fel leh tei mahmah ahi hi. A ngeklai in leng kahneh hetlou a, mi khenkhat in kap theilou sa hial uhi. Mi pautam ahi kei. Himahleh mi' sawlna nial ngei sese lou in a utlouhna mun a sawlkhak ahih hun in leng kuanteitei sek hi. Inn nasem a kizang pipen leng amah ahi mai hi. A nute'n School a kaisak nana uah kai mahleh a lungsim khat ah bel a siamsinna mun lungkim zoulou deuh ahi ding a, anu' kiang ah, " Nu, kei leng school hoih ah hon kaisak bek ve..." chi'n kingaise kawm takin gen zel hi. Anu'n ahihleh, " Bawi, tulai a Government school-te hoihlawta ahi. Private school sang a niamzaw tuanlou ahi. Lai hoihtakin sim lechin private school hoih taktak a kaite sanga leng siamzaw a omthei na hi. Kingaise mawk lou in lai hoihtakin n'on sim dia, Officer liantak khat n'ong hihsawm ding aw.." chi a hehnem kawmin hasotna thu hilhzel hi.

Sungna ziakin apa'n January 2012 in ana beisan hi. Apa' sihnung in a khawsakna uh haksa mahmah a, anu'n innsungpa zat a a zat leng ahi hi ( a sanggam dangte muntuam ngen a koih ahihman in). Anu'n siam khawng agat banah New Bazar apan 'ngakeu' khawng lasawn zel in Imphal lam ah va zuaksawn zel hi. Huai a asum muhte in 'dish wash – kuangsawpna dia kibawltawmte ' lei zel a, Lamka lam ah kibawltawm in zuaksawn zel hi. Api'n ahihleh tanghou ( buhman sang) khawng bawl zel a, Bazar ah vazuak sek hi. Api'n tanghou abawl chiangin va panpih gige a, atuunna ding nahtang nah apoimawh chiangin leng alei in pang a, alang-alang ah diangtuah hi. Achangin an huanzel a, a naunu leng adon in pang sek hi. A inn-neitu agang (uncle) te'n 'rice mill' nei ahihman un aman kal chiangin huh zelzel a, agang in pakta thei mahmah hi.

Naupang kum 11 lel himahleh mi houlimna khawng a ngainuam thei mahmah hi. Pau hetlou in mi' thugen hoihtakin ngaikhe zel a, akiang khawng uah vatu tiutiau zel hi. Mipi' omkhawmna khawng a kihel a utlam ahi a, lawm leng angai thei mahmah. Khawtang hi'n saptuam thil ah hitaleh sep-le-bawl ding a omhun chiangin kuankhial ngeilou hi. Sunday School kai taima mahmah a, vuahzuk-daikai' hun in leng kai gige hi. Damlouh ziaka a kikhop khaklouh hun chiangin leng alung anuam theikei a, anu' kiangah a kai khaklouh kisik ahihdan gen zel hi. Kikhopna lam ah saptuam khatpeuh hileleng a khentuam sese kei. Huaiziak mah leng ahi dia kum 2013 in a biakinn uah saptuam mipite tengteng laka kikhop taimapen leh a demzou omlou ahihdan latsakna in ' BIBLE'(Laisiangthou) piak in om hi.

Tutung buaina ah leng ana lunglut mahmah hi. August 31, 2015 nitak a inn a kihal zelzul lai in leng ana phur mahmah a, himahleh anu'n pawtkhiat a phalkei hi. Anu' kiang ah, " Nu, inn halna a ka lawmte hawh ua, kei n'on phallouh sese..." chi hial hi. September 1, 2015 ni hong hi a, khawvak phet in inn apan diangpawt hi. A innkhang uh Tedim Road a tangval bangzah hiam in siik(tuilawng) zanga lampi a khaktan lai un leng va hahpan mahmah hi. Anu'n akhut a len in inntan kaitung zel mahleh a om maimai thei kei hi. Zinglam dak 8:00 velin an ne uh a, an nekhin phet mipi omna lak va tungkik man zel hi. Sun dak 12:00 velin anu'n vasam nawn a, " Bawi, mipi leng thangpai vek ahi ua, sepaihte leng heh mahmah ahi uh. Na va pawtkhiat leh sepaih te'n honna kapkha dng uh ahi " chi'a agen leh, " Nu, sepaihte'n 'thau' a mi pawng kap mawkmawk loupi uh. Hon kap ualeh leng thautang taktak ( live bullets) hon zatkhum lou dng uh eive. Mipi' om nana a om-a, bawl ding a chihchih uh bawl ding ahi " chi'n dawng kik lel hi.

Anu' awilouhna hial ah zaw paingam taktak tuanlou ahi ngei ding a, atawp in " Commando-te hong lut ngeingei ua leh 'buangnai gawphel ( catapult)' a ka na kapna ding sailiim(sailuum) ka hual ding leh.." chi'n a lawmpa tawh a innkiang uah sailiim hual in om den uhi. Anu'n a pawtkhiak khak ding lau in va enzel mahleh a etlouh laitak in ana pawtkhia ahi ngei ding a, Lamka Police Station lam vatungtou kha hi. Mi khenkhat in a gendan un Police Station kong ah suang tomkhawm in pang a, ama' sanga lianzawte'n asuang tomkhawmte zangin Police Station buden zungzung mai uh, chi uhi.

Mipi'n Police-te thahgam sawm hikei mahle uh Police Station luhkhiat sawm uh ahihman in zattheih bangkim zangin bei uhi. Thau (gun) zang bel a omkei ua, Police-te target leng a om sam kei. Huchibanga mipi'n nawktheih-nawkmawh a anawk lai un thautang vanlam a lengtou lou in aphei zawng in(horizontal) in leng zungzung mai a, mi 2 kap puk in om ngal uhi. Thautang taktak kap hial ding ua gintakna nei ngeilou himhim ahihman in a gintak hong batlouh takin amah leng ahinna humbitna di'n tai sam hi. Police Station kong lampi khanglam ( Old Bazar lutsukna lam) a footh-path tung a omlai, saklam ( New Lamka lam) zuan a a taitouh laitakin 'thautang' in a taklam taainem ah vut phei in, a veilam ah pawtsuak ngal hi. Huai hunin zaw, naupang kum 11 lel hipan adi'n taisuak zawh ding ahi nawn kei. Akhut taklam in a taainem hum tinten mai a, achang in akhut a si bang neunuaute enzel hi. Na salua zaw ahi ngei ding a, kunsuk kawmin a khut veilam in foot-path tung nengsuk zel a, panpihna ngen hileh kilawm in akhut veilam liktou zel hi.

Thau agin tawh kiton a ataithei taphot tai souhsouh ahihman un amah leh midang nih(kaplup ngal a omte gel) kia omkha uhi. Mun gamla a tailoute leng 'traffic stand' liah khawng a bawk zelzul mai hidan un mit a mute'n gen uhi. Huchihlai in Lalsei ( Kholmun khawkhang a Zalenmun khawmi) in mangbang leh beidong taka naupang omlai amuh chiangin thuak theilou a,a hansanna tengteng suah in va pomkhia hi. Laisei in a gendan in, " Kapkhak a om naupang pen ka theihngei leng ahi kei. Himahleh maban sawntheilou a om ka muhchiang in ka om maimai theikei a, traffic stand liah a kibu zual in thau ginlouh sungin ka va pikhia hi. Huai hun in honna kap himaizen le uh bel ka suakta kei hial ding. Agil akapkhakna mun humsak kawmin ka pom a, mipi' lam ah ka taitouh pih hi. Huai akipan mi khat in a Activa uh hon 'start' ngal a, kintak in Damdawi Inn lam ka zotpih uhi. Amin, omna, nu-le-pa' min leh a school kaina mun ka dong man hamham a, ama'n leng ka dotna hoihtak in hon dawng hi. Apa' min ka dot in bel, ' ka pa om nawnlou ' chi'n hon dawng lel. Ka khut ah kiptakin hon len a, ' ka kawng, ka kawng ', ' tui ka duh; ka dang atak lua...' chi'n hong paukhia a, anu zong hileh kilawm a alu hon peituah leplep hang in a meltheih khat leng omlou ahihdan theikhia in, a mel hong tuam ngal hi. Akiang ah, ' Lungkham ke'n...Pa Pathian' kiang tung thouthou ding na hi..lungnuam takin om in ' ka chih takin amel ah kipahmel hong dawk bangin ka mu a, ka khut hon letna awl in khah hiai-hiai a, hon beisanta " chi'n gen hi.

Anu'n agenna ah, " Ka tapa...alawmpa tawh sailiim hual chi' a lungmuang taka ka omlai in kisukha ahihdan hilh in ka om a, ka manglam abang zawzen. Lampi lian lah totngam huailou ahihman in, a kawmkawm a pai in Damdawi Inn ka tung a, ka tapa houpih theih ana hinawn kei. Mi leng atam mahmah mai a, himahleh kuakua ahi ua chih natawm ka thei kei a; hon houpihte leng kuate hi ua, bangchi melpu ahi ua chih natawm leng ka thei bun kei. Ni 3 paisa apan ka khenuai thakthak ahihman in misi om ding ahi chih bel ka theikhawl. Aziak ahihleh ka khenuai a thak chiangin misi omnuam deuh ahi a, ahihhangin ka tapa hi khelkhel dingin ka koih kei himhim. Ka tapa in, ' ka upa tawh ka naupa – Home a om tegel n'on pikhiatsak teitei ding ahi Nu. Ka ute tawh sun nitum a ball peknuam ka hi. Na pikhiat kei leh, kei vapai ding ing a, va pikhe thouthou ding ka hi' chi'a hon genlai in athu ana mangkha himai le'ng zaw ka lung nuamdeuh ding hi a. Ka tanu neupen in lah, ' Nu, tunitan bangziak a ka U Mang inn a n'on pii nailouh e?' chi khawng in hondong zel a, ka khasiatna khop a pha zel. Huaibanah, JAC, JPO leh mipite agim mahmahta ding uh chih leng ka haih kei. Huaiziakin, tuni tanpha ka gim chilou hial a ma hon lakpih ua, ka tapa himahleh amau' tapa bangbang a hon bawlsak ziak un ka kipak mahmah " chi'n gen hi.

A unu (pasal neisa) in leng, " ka naupa' sihma zan in ka ihmu theikei a, ka innkong khawng ua mi hong paiging khawng ka za zel. Guta ding khawng sa a ka va-et chiangin kuamah muh ding a om kei. Zingkal chiangin vanmang omleh omlouh ka 'check' zel a, bangmah amang a omkei. September 1 zan nung tanpha in leng bangmah thu ka thei naikei ( ka nute' lungsim a bangmah ngaihtuah detdetna hunman omlou – hon hilh khalou uh). Buaina khawng hong kihah genlua ahihman in internet pack ka va thun hi. Ka lupdek kuanin, misite lak a ka naupa leng telkha ahihdan ka thei a, ka om dingdan ka thekei. Ka innlam uh phaksawm mahleng 'curfew' puan a om ahihman in ka pawtkhe ngamkei zel uhi. Ihmut sawm a ka mitsin chiangin ka nau' damlai hinkhua ka mitkha ah hong kilang dundun a, huchihlouh kal in 'internet' a alim ki-post pen ka muzel hi. Football siamkei mahleh kimawl lunglut ahihman in football form adeih mahmah ana hisam hi. Ka kianga, ' U, ka football form dng non leisak ding ' hon chihlai a, ' na laisimna hon subuai kha ding' ka chihlai khawng ka ngaihtuah vungvung zel a, ka kisik mahmah. Police Station kong a ka paikhak chiangin a kapkhak lai ua a om dingdan khawng ka ngaihtuah kha zel a, ka omdan alem thei mahmah kei. Chrismass la khawng ka zakkhak chiangin ka naute tawh Chrismass ka zatkhawm lai uh ka phawksuah zungzung zel a, tukum Chrismass hong tun ding leng ka ngaingam kei " chi'n gen hi.

Ani ( Aunty ) in leng, " Mangcha ahihleh 'mifel mahmah ahi' chih lel in leng a genkha bankei phial ding. Asanggam dangte ka sap dek chiang ua leng, 'Khaijamang' chikha sek ka hihman un, ama' omlouh ka pawna mahmah ua, thawmhau huai leng ka sa uhi. Meiteite'n, singtangmite a bawldan khawng uh ( Moreh lam khawng a) a zakkhak chiangin a hehthei mahmah mai hi. Amah ahihleh nam-le-gam nasep lunglut ahi ngei ding a, ' kei, ka let chianga NAMPI SEPAIH a pang ding ka hi. Kei dandan a alang-alang a sawltuah vialvial theih ding mi deih-a-deih uh ahi ' chi'n hon gen zel hi. Naupang kum 11 lel in huchibang kampau a zattheih mawk mak kasa. Mi thumang mahmah ahi ngut a, pautam sese lou in a utlouhna sim a i sawlkhak leleng va kuan teitei sek ahi. Ka ngai mahmah mai a, poi leng ka poimawh mahmah uh; himahleh kou sanga i nam leh gam in poimawhzaw ahi ding – Nam leh gam a di'n ahinna ana peta. Adamlai a, chichih-namchih khentuamlou a, program omna tenga va telsek – Mangcha' sihna tungtawn in singtangmite' lak ah KIGAWMNA hong omta. Huaiziakin si hampha ka sak hun leng atam mahmah hi. ' Tribal Martyrs' mi 9-te tungtawn a singtangmite'n SUAHTAKNA ingah ngei uh ka lam-en gige hi(uhi)" chi'n a gen hi.

Anu'n leng hon gen nawn a, " Ka tapa' sihma in ka manglam ah ka tate ka na mu a, himahleh a pumpi un bel ka mu theikei. Amai (face) vuak uh ka muthei hamham a, ka lungsim in ' ka tate gamdang (foreign) a om uh ahi ta' ka chi hi. Amun a ka va et takin Mangcha' mittui ana pawt a, nulsak dia ka kisak takin ka khanglou chet hi. Ka tapa in zaw a sihding theihkholhna nei bangmai in a unu leng phone tungtawn in samsam sek hi. Meiteite thautang in a hinna alaksak nungin morgue ah koih in a om a, amel-apuam muhtheih nawnlouh dinga koih a om ka muh chiangin ka lungtang a na mahmah. Himahleh amah kia ahi kei a, akiang ah leng midang tampi a lum phengphung uhi. Huaite ka muh chiangin ka tapa naupangchik himahleh akha muangtuan mahmah di'n ka gingta. Mipi' khut a ka piakkhiatsa ahihman in mipi' lungtunna banga i buaina uh a ven ma huchi'n omden leh leng poi ka sa kei " chi'n hon gen hi.

Dakkal 1 leh akim vel Salpha - Khaijamang Touthang' nutsiat a innkuante tawh houlimna neih ahihzawh in Pathian in amau innkuan hinkhua leh a khawsakna uah lamkaihzel ding a deihsakna thu Manipur Express min a khakkawm in 'Mangpha' kikhak in ka paisanta uhi.