SAMARI LOCKDOWN & COVID-19 (CORONA VIRUS)
By Rev. T Thangzasiam
THUMASA:Nupi khatin kumlui a shutdown chi, tun lockdown na chinawn zel ua, achih bangdeuh in, a theisiam loute adin hamhaih huai lua hikha ding. Ahia, i dinmun ahihtak ziakin i ki lockdown khum tuh a damdawi omsun ahita ve! Kumlui 2019 Chrismas nuamtak a na zatlai in Wuhan khomiten lockdown nuai ah hinkhua azang ta uhi, hiai natna in meikuang bangin gam 200 vel hon peh ngal in. Eilak tanpha hon sukha a, „sorkar toh hong kihou lem dingua a vengnawn pah maiding‟ chihte ahihlouh manin, buai huaitak ahi, a buaihuai dan tuh „Miss Chapchar Kut‟ na ngawn lar manlou a, a ki lockdown zui charchar maituh, poisak pihthu ka taklang ahi !!
1. COVID-19 LOCKDOWN: Siamsinna school, college leh universityte, factory leh industryte khak a om in, leilam kikawm tuahna teng khak bing vek a hita. International flight te leitual a bawk khip-khep in. Heathrow Airport leh Dubai Airport, sun leh zan a khuai larh/kipem bang mai a lum humhum sekte ganhing kholmun a suak hi, Maya Bay leh Paris Beach te ah dolphin lou muhding a omta kei a, boruak siang nuamsa in tungleng vasa ten hunnuam azang uhi. Donald Trump lenna „Air Force One‟ kichi tuh leitual ah khawl in, India rail station 8,500 leh semtu 1.55 millions te a dinkhol ua, a rail-te uh damlou kepna isolation wards ding in convert khinta uhi. Silh leh ten hoih in value a nei nawnkei a. Private jet sangin Hero cycle zat tak zaw suak hi.
2. NA ETDAN KHEK IN: Covid-19 in hizah zouzai siatna tun mahleh, etdan khek a ngai thlat !. Egypt te Ex-MP khat in “Corona has its advantages, don‟t curse” achih bangziak ahia ?. Politician a thu lel a itsek ten atak a it ngaita, khovel tuh Pathian poimohna phawk khesak in, mihing te public life zatding dan manner hon sinsak hi, huan mikang ten Africa gam a vaten hial a lunggulh ua, Mivom ten mikang gam lunggulh na a nei nawn kei uh, Pathian maizong dia khovel hon phutluih banah, inkuan chihte hun zangkhawm dingin hon kaikhawm ahih dan phawk poimoh hi. Africa kialpi ading “We are the world” chih thupi pansan a Concert neih ngei in om hi, hiai in khovel lesson hoihtak pia in April 18,2020 ni a „One World: Togather At Home Live Concert‟ na enkha hia. Haksatna a omchiangin itna nasep semding leitung ah ki behlap zel hi. Thil hoihdang tampi ki gelhseng lou hi.
3. MI HAUSATE BUAI SEM: America ah mihing-16 millions val te Covid-19 ziakin job lost suak ngal uhi, mi hausa a sing a simten a car mantam pente uh tolkhia in California, Texas, Los Angeles, Florida, Pennylvania ah free food ngak in ki line dim uhi. Bangchi dan a hichi khop a gam hausa leh thupi, ni tamlou chik sung a khutdoh level a om thei ahi ua ? Sum leh pai neilou ahikei uh, i suangtuah na khenlam pek a hausa leh nuamsate ahi uh. Ahia, mak leh lamdang khop a hong buai phut uh bangdang ziak ahikei. A nawpsakna uh comfort level a sang luat ziak ahi zaw !. Bangkim nezou dingte ahihlai un, mahni ann ki huan peih nawnlou in „dine-out‟ achi ua, hotel leh restaurant nuamtak a nek a chindan uh ahi. A fridge sung uah nek ding sangin beer brand tuamtuam lou muhding a omkei ! Covid -19 hiileng apan bitna ding om sun lockdown ahihlai in, „It‟s my life‟ chih hinkhua thupi a neite ahih man un, a ki lockdown zoukei ua, normal life zat ut in a protest ua. Tu‟n a thuak nakpen gam a suak ua, poilua hi. Bangchi tuk a thupi i hizong in, numei naupangin a pu Namaan kiang a, „ Jawlnei in thil haksa tak hon hihsak dek lehleng hih zawk tuak hilou hiam ? (2 Kum 5: 13) achih bangin. Thuman kichi damna ahi.
4. SAMARI LOCKDOWN AH ZOU NI !: 2 Kum 6:24-7:20 ah Samari lockdown thu kimu hi. A tak a mu khalou tangthu a i simkia himahleh, lockdown mulkim huai pen ahih lemet ahi ! Benhadad(Suria kumpi) in a sepaihte tuh Samari khopi a lockdown khumsak a, kuamah lut leh pawt om theihlouh ziakin kial (famine) huaise tak in a buak ta, nek theih liaisiah, gilvah theihna dia gintak peuhmah a ne gaivek uh, sabiltung (neksianglou a ngaih) lutang dangka- 80 leh vakhu ek tanpha zuak hial uh kichi hi. Kial huaisiat luat ziakin mihing sa tanpha a ne ua, ahi atate uh sa a ne uh. Mihingte taksapna a letzoh peuhleh ginomna in mun a neikei hi, mi tate sa nekpih dia sawm in, mahni tate sa nek hun a selmang hial tan kikhemna tung hi, hiai thuin kumpipa beidong sakin, jawlnei Elisa thah asawm a. Huchihlai in, Pathian hong kipan a, kulh kongpi ngak phak-4 te zangin hotdamna nasep a semkheta hi, Toupa hoih hina e ! Pathian vaihawmna tuh a kizen kimvel vek ahi. (Sam 19:9) chih honmu sak hi.
THUKHITNA: Tulaiin India ah mihing 130 crores valte Lockdown nuai ah i om uhi, hiai hun haksa ah insak inkhang suansam om khakding lau in khotang makaiten kal honsuan khia ua. Paul in „Tanchinhoih a kigen nak peuh leh‟ (Phi1;18) a chih bangsim in, kua pawl kua pawl hita leh antang kailut thei peuhmah tuh kipahpih huai himai. Post covid crisis roadmap kichian i nampi zuihding hon gelkhe laile uh a chih huai hi. Mizo paunak ah „Sem sem dam dam, Ei bil thi thi‟ chih om hi, huai tuh a zawng ahau tan kibang, a vah tuam leh, a kialtuam omlou ding a ki fuihna paunak ahi, eileng Gospel khovak i ngahma apan Thanghou leh Liandou tangthu a kep piching te ihi uh. Mimtang tangtang kiphel hawm khop a itna hau nam ihi uh. „Mimtang‟ kichi phel hawm tham hikei mahleh, unau gilkial tuam om khakding venna in, a om bangbang ki phelhawm tiau-tiau uhi, hiai tuh a Kristian huai in a saptuam vai mahmah. Kidoupi-II na hunlaia British Prime Minister. Winston Churchill in„The inherent virtue of Socialism is the equal sharing of miseries‟ achih bangdeuh in, Thanghou leh Liandoute unau bangin haksatna doukhawm ni.