Bang ziak a Chivu Stone Inscription doudal ding i hia?
By Ginza Vualzong.
Chandrakirti park leh Chivu suang deihlouh thu hun paisa ah kigen zeuhzeuh mah leh platform lian ah kigen kha ngei lou hi. Zan May 16, 2020 zinglam dak 11 in New Lamka mun a om The Vine ah Chivu Stone Inscription toh kisai houlimna (Exclussive Discussion on Chivu Stone Inscription) neih in om hi. Covid-19 lockdown lai ahih ziakin organizer ten mi tam chial thei lou ua, intellectual bangzah hiam paikhawm ten historians te thugen ngaikhia in, houlimna nei khawm uh hi. Mipi a tamzawte ettheih dingin organizer ten video coverage leng bawl ua, tunung chiang a hong kikhah khiak pah lamet ahi.
Hiai hun ah historians Dr. Tualchin Neihsial, Dr. Thathang Hangsing leh ZRO Advisor Pu K. Guite ten Chivu toh kisai history ngentel tak a sutna nei ua, Pu R. Sanga in Tribal Land Holding and Chieftainship toh kisai houlimna nei hi. Zinglam dak 11 akipan in dakkal 6 val lunglut takin houlimna nei ua, nitaklam dak 5:30 vel in kikhen uh hi.
Bang a Chivu?
Chivu ahih leh Churachandpur district sung a om Myanmar gamgi zul a om Tonzang khua a om ahi. Lamka town akipan km 55 vel a gamla hi a, Behiang toh kinaih ahi. Tonzang ahih leh Manlunte hauhsatna khua hi a, Tuivai lui toh le ki naih mahmah ahi. Nidang lai in ei singtangmi te'n chi ana bawlna mun uh ahi a, mun poimoh leh etlah huai mahmah mun ahi. Chi tui ana huan ua chi vu (ash) vum tam mahmah ahih manin CHIVU ana chi uh hi. Version dang ah Chi ki but na mun ahih ziakin CHIBU kichi ahi chi pawl leng om veve hi.
1872 kum in British te makaih in Lushai Expedition kithuahpih dingin meitei Major nih tel in sepaih mi 2000 te Chivu ah giahphual ana bawl uh hi. Hiai mun ah meitei ten suang phum bangzah hiam koih ua, huai hun a lengpa Maharaja Chandrakirti zahna suang bawl ua, a nuai chet ah lengpa khekhap lim suangpek ah kigelh koih uh hi. Tua banah huai hun a sepaih sapte theih gigena suang bangzah hiam leng koih tel uh hi. Hiai Maharaja Chandrakirti suang tung ah meitei pau bengali script a kigelh thugelh om a, huai ah lushai hausate tung a vualzou ahih dan gelh uh hi. Tu in hiai pansan in meitei ten panmun khou ua, hiai Chivu mun pen Indian Archaelogy Reviews 1987-88 ah pelut ua, 1993 in Archaelogical Site hi di'n namkipna bawl khin uh hi. Kum thum paita 2017 December 19 in Chief Minister N. Biren Singh in Chivu ah Maharaja Chandrakirti Memorial Park bawlna dingin foundation stone honna ana nei hi.
Hiai a minthang Chivu suang tung ah bang kigelh himhim hiam chih en ni. The Chin Hills by Bertram S. Carey leh H.N Tuck in a gelh lehkha bu pek 123 na nuai ah hichi in kigelh hi:
To commemorate the part which the Manipuris played in the Lushai expedition the Maharajah Chandra Kirti Singh caused a huge stone slab to be set up at the salt wells. On this stone is inscribed in the Manipur language expressed in Bengali character the following story:
==============
"His Highness endowed with the five qualities, Lord of Manipur, Snake King of the Meithees, born to the throne, Ruler of the sky, the Maharajah Chandra Kirti Singh, on Saturday, 3rd Wakching of the year 1793 of the Sakabda ‘era’ when Laisrabra Purma Singh was Chaithapa reduced to subjection the Lushais towards the south. The two servants of His Highness who attended (him) were San Kaichamba Balaram Sing, Steward of Ahalup, Major of the Tuhihal Regiment, and Thangal, born of the Kangbam caste, Steward of Laifam, Major of the Tulinaha Regiment, with whom were General Nuthall, 130 officers, and 2,000 muskets".
"They took as tribute elephant tusks and gongs and dedicated this brine spring and carved here these foot-prints of his Highness.
"They subdued the following Hao villages: Poiboi, Lengkham, Dambam, Bum hang &co, in all 112 villages, and including Thankalet, the Lushai, they captured four Chiefs and one village".
“Written by Nong Chamba Dhormeshwar, Wahengba, Sijjamocha, Pratap Singh and Gokul Chundra, chief salt agent"
=============
Hiai suang akigelh dan in Chandrakirti lalna nuai ah Lushai hausate zoh hi ua, singtang khua 112 nuai chimit ahih banah lushai hausa 4 mat hi dan in gen uh hi.
A diktak in, history lehkhabute ah akigelh dan in, Tonzang khua ah gal leh kidouna huai hun lak ah omkha lou hi. A history background hichi dan ahi. 1871 kumbul lak in Cachar, Assam singpiteh huan bawl a om English mi Winchester leh a zi Lushai ten ana that ua, a tanu uh Mary Winchester kum 6 mi ana pi mang uh hi. British ten Lushai Hills gam sung a naupang zong khe ding, lulakna betdaihna ding leh Assam phaizang ah muanna leh bitna omna dia panlak ding chi in thupukna hon bawl uh hi. Huai semkhe dingin military column nih bawlkhia ua (Cachar leh Chittagong Column), a commander ding in General Brownlow leh Bourchier sep uh hi. Hiai hi history ah Lushai Expedition 1871-1872 kichi hi. Brigadier-General Bourchier thuneihna nuaiah kikoih Cachar Columnte huh leh panpih ding in Manipur a om political agent Major General Nuthall makaih in contingent mi 2000 toh va kuan in, Manipur apan major nih K. Balaram Singh leh Thangal in le va panpih uh hi. Suahlam a Kamhau namte'n Lushaite apanpih khak ding uh veng dingin Chivu ah giahphual va sat uh hi.
Cachar Column ten Champhai tan va luh ua, Lushai hausa bangzah hiam va zou ua, nek leh tak hatsakna leh damlouhna in hon phak ziak un hong kik uh hi. Huchi in nasep ding a om nawn louh ziakin General Nutthal leh mi bangzah hiamte Imphal lam zuan in March 6, 1872 in kik uh hi. Meitei Major nihte K. Balaram Singh leh Thangal te bel nituang lai uh hi. Hiai a nituan sung un, a mi leh sate a khua Mualpi a pi kik a hong pai Raja Goukhothang ten Chivu a ki camp te tuak kha uh hi. Meitei Major tegel in chalak in ana bei ua Raja Goukhothang ana man ua, sal in a kaihzatam te toh Imphal lam ah tonpih uh hi. A khonung sawtlou in Raja Goukhothang meitei khut ah si hi.
Hichi bang ahi a, Chivu mun a Meitei ten lushai hausa a zohna uh om kei a, khua 112 a zohna uh le omlou ahi. Lushai hausa va zou te ahih leh British Column Champhai lam a kuante hi zaw uh ahi. Huai ah meiteite tel kha lou uh ahi. Huai ziakin Chivu suang a kigelh thu zuau pumlum ahi. Hiai suangte 1894 in Mr. Carey leh Mr. Porteous in va en khia ua "It will be noticed that the Manipuris claim to have done more conquering than our records credit them with." chi maimah uh hi.
Hiai tangthu te hiai laibu te ah muhtheih ding hi:
1. R.G. Woodthrope (1873), The Lushai Expedition 1871-1872, page No.327-332.
2. Carey and Tuck (1896), The Chin Hills, Volume No.1, page No.122-124.
3. Alexander Mackenzie (1884), The North Eastern Frontier of India, page No.164.
Dotna poimoh: Ahih leh meitei ten bang ziak a zuau thu suang tung ah gelh ahi ding uh? Bang ziak tak a meitei ten hiai Chivu mun lunglutna nei a hon vilvil uh ahi di? Bang ziak a archaelogical site dia bawl a, Chandrakirti park bawl dek uh ahi di?
Ka kumpi pa uh vualzawhna mun, a khekhap om na hiai tan ka gam uh ahi a chih nop man uh hi ngei ding in gintak huai pen hi. India solkar in Look East Policy zang a South East Asia trade bawlhoih na dia Behiang area etlahna ziak leng ahi ngei di.
Bang ziak a Chivu Stone Inscription leh Chandrakirti park deih lou i hia?
Hiai Chivu suangphuh akipan meitei ten a gamgi uh bawl ut ua, ka gam uh hiai chiang ahi a chi utna uh ahi. Ka lengpa un hiai tan gam hong la ahi a, kou a ahi a chih utna uh ahi pen hi. Hiai suang phum i nan a, i hih bei kei uh leh tua i tenna gam teng, i hauhsatna gam chi a i kisaktheihpih teng uh meitei lengpa a ahi i chihna hi ding a, i gam mansuah thei di dinmun a ki om hi. Ka pupa gam uh chi a government kiang a thau vui thau tang toh separate state, autonomy i ngette uh omzia om lou suak ding hi.
Hoih takin ngaihtuah ni. Khovel pumpi ah tua i tenna gam lou mun dang nei tuan lou i hi. Mansuah kei ni. Government in a hih dingding uh hih khinta, zekai lua hita lou hiam chi bang le i om ding. 1992-93 lakvel a DC in newspaper a hiai Chivu Archaelogical site oppose om hiam chi a thu a suah lai a kiphawk khe lou mah ahi. Kum 148 vel a pai nung a khanglou pan te i hi. Tua le panlak theih lai ahi. The Aizawl Post, 15 May 2020 issue a kisuah dan in Mizoram a i sanggamten Manipur CM kiang a history diklou paipih lou dingin ngetna bang ana khe ta uh hi.
I gam ah development program i deih mah tham hi. Tua Tonzang khua a park hoihtak hong kibawl ding engsiat i hi kei a, meitei te hidden agenda pen ahi i deihlouh. Khenkhat in Tonzang hausa ten a mun a zuak khit uh ei loi gen di bang om a chi bang le i om ding hi. Eiloi le tua khanglou pan i hih chiang ua, Tonzang hausate mohsakna di om lou hi. Himahleh ka gam sung ua thil deih huai lou tak, suang tung a history diklou taka kigelh banah ka lengpa uh Goukhothang hon matsak a hon thahsakte pahtawina suang phum leh park kibawl ka deih kei uh chih ding ahi.
Khenkhat in hiai park kibawlna a sum tampi muhtheihna dia humlem sa a, hiai park kibawl oppose ngai salou bang le ki om maithei. Khenkhat in hiai Chivu issue makaihte mimal muhdahna ziak bang a support utlou bang le om maithei. Hiai Chivu stone inscription leh park bawl deihlouhna pen ei mimal kimuhdahna leh mimal hamphatna khen lam pek ah i tu i ta a dia thil poi mahmah omthei ahi. Huai ziaka mimal hamphatna, kimuhdahnate leh ngaihdan kikelki i neihte uh tunglam ah thil i et uh ngai ahi. Ei leh ei i ki keihkeih kal ua, talpakten a gamgi di uh ana khung uh ahi chih i khanlawh uh hunta ahi. Britishte thuzoh ua ei utthu omlou in meitei ten Map hon bawl khum ua, 1988-93 lak a District Council a defunct sung in Chivu Archaeological site din ana guan ua, 1997 a ei leh ei i ki nak kal un Kaihlam Sanctuary bang ana bawl ua, hausa thuneihna hih bei sawm in Act tuamtuamte ana khenglam dang uh chih leng i theihsa vek uh ahi. Tun le i kituahlou uh a theih ziak un Park bawl di hon ngaihtuah nawn uh ahi.
Ei sung a kitheihsiamlouhnate, election ziak bang ahih kei leh issue tuamtuam a i neihte uh koih khia phot in, a lian zaw i tu leh tate a dia thil poi thei, khonung a i kisik louhna ding un hiai Chivu Stone Inscription doudal dingin i lungsim uh hong chiat in pan la dingin i ki chial ahi. Maban panlak di dan hiai thu toh kisai a makaiten hon thuzak zel ding ua, ana nung thuap chiat ni. A nung i thuap ngap kei leh leng ana doudal/soisel dah ni.