Theihkhawl Louh Tuahsiatnate (Disaster) A kipan Khotaang Leh Innsung Etkhiakna

10/15/2020

By: Langthianmung Vualzong

Research Scholar, Centre for the Study of Law and Governance, JNU. New Delhi-67

Introduction

Ei gam a minautang in disaster chi dân a I theihte uh ahihleh, leitolh/menchim (landslide) chih bang, zinliing (earthquake) chih bang, tûi-khang (floods), chih bang, kawlphia (lightning) chih leh, gamkaang (forest fire) chihte khawng ahi deuh taangpi uhi. Hiai bang tuahsiatna in mihing lungmuanna teng hon kiamsak phet hilou in, hon patausak thei mahmah a. Mihing I hihna ziak in a lau lou kuamah ki omlou hi. I tenna i gam i lei uh, misiamte geendaan in, "Seismic Zone V" a om ahi a chi ua. Huai bang geenna hiam I chihleh, disaster chi a atung a I geente tengteng in, chiklaipeuh leh I kigin khollouh lâi in, I teenna gam hon nawkthei gige uh ahi I chihna ahi. Mihing I hihna ah, mailam ah bang hongtung ding a hia chih ngaihtuah ngellou a I khosak hun a tam mahmah. Ngeinadaan a zing khua hong vaak ding, thou ding, I niteng sep-leh-bawl neih teng mah, seem nawn ding hiam, hih nawn ding hiam in, I ki-ngaihtuah sek uhi. Himahleh, ana huchi gige thei khollou ahi sek hi. A ziak ahih lebel, siatna I chih in bangchik hun chiang a, ei Lamka lamte hon nawk ding hiam chih, gen theih louh ahi. Sukkhâk/victim I hih chiang un, I patau gawppah a, I ginna uh bang a bah loh zou hial thei sek hi. Hiai siatna disaster I gênte: menchim (landslide), zinliing (earthquake), tûi-khang (floods), kawlphia (lightning) leh, gamkaang (forest fire) I chihte ahihleh, mihing daal theih tan leh control theih het louh tan om ahih ziak in disaster (natural disaster deuh te) a kichi hi. Hiaipen I theihsiamsa uh, I pi-leh-pu khang a I na tuah zêl uh thil ahi. Tutung a I geen tuppen ahihleh mihing bawltawm (man-made) disaster ahi.

Eimihingte’n I bawltawm (man-made) disaster bang ahia? Mihing bawl (man-made) disaster kichi ahihleh, tualthahna bang, mipi kiphinna (mob violence) bang, khotang buaina (social disorder), cyber attack (media khawng a kitotna) bang, leh a dangdang ahi thei, Mihing tupdaan (human intent) in hoihlam sang in siatna lam a tun taangpi hi. Hiaite poimoh thou mahleh, hiaite geenlou in, I pi-leh-pu khang a I na tuah thilte, sungkuan a buaina tuamtuamte kikup sawm I hi. Sungkuan fellouh ziak a buaina bawlkhiak a om tamloute ahihleh: Insungkuan kisia khawng, tagahna khawng, meithaina/pathoina khawng, khotaang buaina khawng leh a dangdangte ahi. Disaster I chih hiai landslide, earthquake, floods, lightning, forest fire leh adangdang., te khawng kia I saklai in, I theihlouh kal in I khotang tokbuaitu (disaster) bulpi tuh, insung hoih louh ziak ana hi maimah hi. Sungkuan kituahlouhna in khotang peh tou a, I Paite paunak inle a gen “Inn gua hah lou a gam gua hah” chih in saupi gen nei hi. Hiai “Inn gua hah lou a gam gua hah” ki chi pen, nu-le-pa ahihkeileh, sungkuan a kuahiam in mahni insung awlmoh zoulou zeen a I buaina pen, insung buaina hon tuntu khat hi ding in gintakhuai hi. Ahihkeileh, insung a om chiang a ngui a ngui in, kholak or lawmte lak a om chiang a lah, nuui silsel thei, mihing leeng a om ding in gingtakhuai hi. Mahni inkuan sungte sang a mi dang sungkuante awlmoh zaw leh, mi dangte adiing a kiphal mahmah mi leeng a om ding. Huai in buai louhna di tantan le a buaisak thei ding hi. A ziak, mihingte kihazatna a dim a kihihna ah, Cain leh Abel unau kal a thiltung ah leng etsakna hoih tak ahi. Insung buaina enkai a, bawllem masak sawm sang in, mi dangte haksatnate leh buainate bawllem sawm chihna toh le kibang ding in ngaihtuah theih leh kilawm ka sa. Hiai in buaina tam tak tokkha in, puansia kaihsiat bang a bawllem theih nawnlouh di khop in buaisak thei hi. Sungkuan leh sungkuan buaisak in, unau pianpih laizom lakah kikhenna, kideidanna tungsak zomah laai hi.

Bawldik di I chihleh hiai thil poimoh tak mai I theih a kuul dîng. I singkuante,, I tenpihte, I vengte, I mi leh sate theih a kuul in, a poimoh mahmah hi. A ziak bel hiai man-made disaster in sungkuan khat kituahlouhna omsak a, inveeng inpaamte leeng pehloh baan ahihman in, mahni gamgi (boundary) le bawlsiam a poimoh mahmah. Mahni a kibawl masakna di’n, sungkuan a nu-leh-pa a poimoh mahmah hi. Nu-leh-pa nei nawnloute ading in bel, unau a Innpi pa/Inpinu’ mohpuakna (role) poimoh mahmah hi. Azom ah, mahni dinmun chiang (individual level) a kibawl sawm diing ahi. Upa pen hiam, nu-leh-pa hiam a fel zoh kei ualeh, amau role laksak zek a, sep leh bawl a unau/sungkuan a pang thei liai teng pangkhawm leeng, inkuan kibawl hoih thei ding hi. Hiai in a gen tup peen bel, nu-leh-pa or Innpi pa/nu teek hut I ngaaklah luat chiang in, buaina om thei hi. A ziak bel a hong upat chiang ua amau kia a thil hih zoulou uh ahihmanin. Hiai i gen kawmkawm in eimite lak a I taksap mahmah khat, patriarchal mindset (paching lungsim) ahi. Hiai tâksapna in unau pianpih dangte panpih khawng poimoh saklouhna leh, hazat bawlna khong le om sek hi a theihtheih ahi. Hiai upa pen gouluah di kichi peen, ipi-ipute uapat I paipih uh ahi. Himahleh, nam paidaan kibatlouh dungzui in, I paidaan uh ana tuam tiltel. Unau Mizote leh Hmarte’n bel, a neupen gouluah di’n a koih ua, Paitete’n bel upa pen gouluah di’n koih uhi.

         Natural disaster hia man-made disaster lauhhuaizaw? Hiai dawnna ahihleh, mihing I kibatlouh dungzui in, dawn dan a tuam chiat maithei ding hi. Himahleh, disaster ahihna uah, anih un a lauhhuai tuaktuak. A lauhhuaina ziak bel, anih ua manna (loss) pokhe tuak uh ahiziak ahi. Hiai manna leh maban a buaina om theite a kipan, kivenna ding in, ei mihing hihtheihna tan a bawlhoih theihte ngaihsak a, bildoh a bawlhoih sawm I tup uh leh I ngaih ding uh ahi. Bangziak in? Aziakbel, Pathian’ vualzawlna toh nu-le-pa nei a piang chiat in, sungkuan neilou a khangkhia, khovel ah kuamah om ngeilou hi. Huaiziak in, I sungkuante toh kituaklou a hinkhua zat diing a ngaihngam huai kei. Damlai meidil kaai kibang ding hi. Pathian in nu-le-pa honpia a. I nu-leh-pa te hiai khovel a a hong pian un, gentheisa a pian a ût ding uh, agintaakhuai het kei hi. Huai gentheihna pen amau adi’n disaster/ vulnerability khat ana himai mah hi. Hiai gentheitak a kipatkhiakna a kipan, hatsatna tamtak palsuah in, mi lak a genthei kisakna lungsim nei den in, hinkhua ana zangzang tou den kha mawk uhi. Nu-leh-pate’n hihtheih khomkhom in a nna seem in, a na kisakhol (prepare) ua, khenkhat bel kisakhol le uh le deihtan tungzou lou uhi. Aziak bel mihing te’n tupna I nei chiat a, himahleh a tang tungsaktu pen Pathian ahi. Sungkuan khenkhatte’ pianpih ki-ngaihsiatna (inbuilt vulnerability) pen, sungkuan haksate a kipan hi deuh in muhtheih hi. Sungkuan hoih ah bel, pianpih hilou a, awl a a khantouh dungzui ua, khovel in a sekkhiak bel a om thei. Sungkuan neilou kisate bel damsung a thawmhauna a om den ding bang uhi. Hiai zawnna, haksatna leh sungkuan buaina tuamtuamte le man-made vulnerability ana hi maimah hi. Hiai buaina nawkkhate’n saptuam leh khotang ah tan mun neilou kisa in, khotuahtu di vang mahmah hi’n a ki-ngaihtuah uhi. Huai kawmkal ah mihing bawl man-made disaster in I khawtang ua buaina tuamtuam hon omsakte I gen ut ahi.

Bangchileh hiai inkuan, khotang buaina, natna leh lauhna sukkiam theih diing hiam? Hiai mi chih kidot di’n a hoih hi. Mahni in dawnna kinei chiat di’n a gintakhuai. Sungkuan I neih bang un, saptuam kinei chiat ua, himahleh amau khut a thil teng ngak theihlouh natan a om hi. Gensa bangmah in, inkuan a hiai man-made disaster/vulnerability I beih kei leh, hiai pen sungkuan buaina, indongta te natan in bawl haksa honsakpih ding uh ahi. Hiai I geen in, saptuam toh indongta muhniamna a gen hilou ahi. Thil khenkhat sungkuan tan a solve theih om ahi chihna dan ahi. Aziak bel amau secondary to family ahi ua, a role uh poimoh dungzui in, zatdan le I siam uh ngai diing in muhtheih ahi. Hiai saptuam leh indongtate sungkuan khenkhatte adia first and last resort ahia, a role uh poimoh mahmah hi. Saptuamte poimoh dungzui in, gensa bang a daikilkal a omte adia haksa deuhmah a batna hun om hileh kilawm in muh theih zeel hi. Hiai innsung buaina chi tuamtuamte, sungkuan a pang a, Pathian muangte I hihleh sungkuan damna di zong a lampi sat a sialsawm di ahi. Aziakbel ‘Inn sung nuam Vangam naipeen ahi”chih theihgige hoih hi. Mahni sep di sem a, mahni huangsung hah poimoh ding hi. Hiai kihuatnate, sungkuan buainate, khotang buainate, angmasialnate koihkhia a, kingaihniamnate, mahni a neihsawm a panlak a hinpih poimoh petmah hi. Hiai family disaster/vulnerability douna di’n mimal tek in mohpuakna ki-neichiat hi. Hiai bawllem leng Inn sung a hong nuam dia, innsak-inkhangte toh kilem in khotaang hong nuam ding hi.

Conclusion

Hiai buaina (man-made disaster) inn chih phial in I phukha uh, chi le’ng I geenkhial lawmlawm lou ding hi. Hiai buaina pen community resilience “tawmngaihna” tungtawn a dou theihdi’n a gintakhuai hi. Kipanpihtuah a ki-awlmohtuah a, I boundary I keeklet ua, I thilmuh dan (perspective) le mi nautang in, I kivelthak uh ngaileh kilawm hi. Hiai kawmkal ah eimite taksap mahmah khat Galatiate 5:22-23 ah kigelh chiang mahmah hi. Hiai Bible a kigelh pen mi teng in zui thei leh hiai buaina tuamtuam (disaster/vulnerability) te dou theih ding hi. Suangkuante leh I mi-leh-sate I kikantuah ua, ki-iit a I kihawmthoh kei leh, kuaman hon huai lou ding ahi chih, thei kawm in, hiai thu ki-gente I lungtang ah gelh in, zuih sawm ni. Hileh, I innkuan, I khotang leh I saptuam a dam ding hi.