Lamka, 01st October 2018 (Zogam.com) | YPA Press Release akipan thu kimu dan in YPA GHQ General Secretary Pu Lianmuanthang Valte of Vengnuam, New Lamka thahsawm om ahih dan taklat in om hi. YPA thusuah in a gen dan in Mr. Lalnuntluanga @ John S/O (L) Lalhmingthanga of Salem Veng in tamveipi Pu Lianmuanthang ana thahsawm ahih dan gen hi. Tluanga in Pu Lianmuanthang a inn ngei ua ki muhpih a "ZRA ten hon thahsawm ua, pilvang in" chi in hilh a, kua sawl a kua thupukna hi hiam chih dotna a dawnna ah Cabinet thupukna leh Romeo min gen chi in taklang uh hi.
Angel's Vision news in a genna ah Policete akipan thutut amuh dan un, Tluanga in Pu Lianmuanthang Valte thahna dingin Romeo, Ex Town Commander, ZRA in dangka sing sagih, activa khat leh akibukna ding inkhat Headquarter veng ah ngaihtuah sak ahih dan gen hi.
Tu in Tluanga leh Romeo leng Police custody ah om tuak ua, YPA GHQ heutute ngei in leng Police te kiang a hiai case ngaipoimoh dingin vagen uh hi. Police in Cyber Crime team zang a hiai thu suisuah ahih dan uh a gen ban ua, FIR Case leng bulh khin uh ahih dan zong taklang uh hi.
Huchi kawmkal in Vengnuam Village Authority in Vengnuam, New Lamka area sung nitak dak 9 nung curfew puang ua, pawt leh lut kham uh hi. Vengnuam VA ten ZRO/ZRA heutute leng hiai thu toh kisai in kimuhpih uh hi. Hiai thu toh kisai mah in PTC leh YPA heututen ZRO President lai pia ua, Paite heutu khat thahsawm ahihna tung a poisa ahih dan uh gen ua, hiai thu toh kisai a hilhchetna ngen uh hi. ZRO/ZRA akipan tu tadih in hiai thu toh kisai thusuah bangmah muh hinai tadih lou hi.
YPA Press Release in a gen zomna ah hichi bang mulkimhuai thiltung toh kisai lungkimlouh lahna dingin hongtungding 3 October 2018 zinglam dak 9 akipan nitaklam dak 4 tan Lamka Total Shutdown hi ding hi. Tua banah YPA GHQ General Secretary thahna dia tunitan a kigolhkha Tluanga leh Romeo tungtang a lawyer leh midang kuamah pan lalou dingin leng ngetna bawl uh hi.
Hichi bang mulkimhuai thuthang in i gam lungphawngsak mahmah a, Social Network ah hiai thu gen pi pen in om hi. Maban a hiai thu toh kisai bang hong om diam chih kuapeuh bildoh pen ahi.
