A hongtung ding April 24, 2021 nitaklam dak 6pm akipan in YPA GHQ Hall, Hiangtam Lamka ah Joint Artistes Fellowship (JAF) leh District Administration vaisaina nuai in music lam a kipolhkhawmna JAA SPRING FEST 2021 sai hi ding hi. Joint Artistes Fellowship (JAF) i chih Mizo Zaimi Inzawmkhawm (MZI), Hmar Artistes Association (HAA), Kuki Artistes Progressive Union (KAPU) leh Zogam Artistes Association (ZAA) kigawmkhawm ahi.

JAF Spring Fest 2021 theme ding in "Campaign for peace & prosperity through music" chih hi a, hiai fest in a tup leh ngiimte ahih leh (i) free & fair election, (ii) campaign for clean Lamka, (iii) Anti-Drugs campaign leh (iv) environmental awareness - protection of rivers and streams, and flora & fauna chihte ahi.

Joint Artistes Fellowship in hun paisa a Lamka khopi sung a teng Zosuante lak ah kipumkhatna hoihzawsem a om theihna dia ma alakna uh sutzopna hi a, hiai hun sung in, gam leh guate neitu i hihdan leh akepbitna michih mohpuakna ahihdan lahna awarness campaign visual a nei ding uh hi.

Hong tung ding Churachandpur ADC 2021 election chidamtaka i neih theih uh deihna in tutung MDC intending candidate teng hiai fest ah chial hi ua, candidate teng mellahna leh a manifesto chiat uh pulaktheihna hun piak hi ding uhi.

Hiai Spring Fest ah gam ngaihla leh unau ki-itna la sa a kithuahkhawmna hi ding a, lasa siam tuamtuam akipan lasak ngaihnop taktak ngaihkhiak hi ding hi.

Hiai Spring Fest toh kisai kisakkholhna pat hita a, media team te’n i luite uh leh mun tuamtuam video lakna nei ua, finance department lam te’n hiai fest a dia sum leh pai bangzah hiam kaikhawmkhinta uh hi. Music lam a kisakkholhna leng tukal sung a pat hi ding hi.

Music tungtawn a unau kipumkhatna leh i gam leh guate itna a program bawl ahihman in, kua peuhmah hiai hun a tel chiat ding in organizer te’n mipi chialna hiai i media tungtawn in bawl uh hi.