Mualnuam Khua ah 2020 kum a Pawl 10 & 12 Zoute Kipahpihna Hun zang
Mualnuam Socio Economic and Educational Trust (SEET) kichi te panlakna in tukum TEACHER's DAY ni 5th September 2020 ni in, Mualnuam khosuak mi Pawl 10 & 12 zouthakte kipahpihna hun, Mualnuam khua ah zang uhi. Hiai hunzek a tel ding in, Mualnuam khomi Lamka leh asehvel a teng te paikhawm in Bus 2 leh Gari dang 30 val te, Pu M Thangzalian, Dorkas Veng in ah zingkal baihtak apan kingak in, azoh Buallian khua ah Pastor K Dongkhankhup thumna nei in, Pu M Ngulzapau Guite in FLAG-OFF na toh kha khia hi.
Mualnuam Hausapu Mangmuanlal Guite makaih in Kaihlam lampi petna apan ana Vaidawn ua, sun dak 12 in hiai a nuai a bang in tukum Pawl 10 & 12 zoukhe te toh hun manpha tak zang khawm uhi.
Kipahpihna leh Kihanthawnna hun manpha tak mai zang khin in, annek khawmna leng om ngal hi. Lamka lak apan ava uap tampite adia pianna leh khanletna khua ah a lawm leh vualte te toh hunnuam tomchik zanga kimuh khawmna hun hi a, kikhelah leh lunglengtak in hunnuam zang zou uhi.
Hiai Mualnuam SEET kichi ten kum teng in, Mualnuam khosuak mi Pawl 10, 12 leh lohchinna tuamtuam ngahte Lamka mun tuamtuam ah kipahpihna hun ana nei gige ua, tukum in Mualnuam khomun mah ah neih a om, et ton tak mahmah uhi.
