ROPIANG FOUNDATION IN SKILLS' TRAINING MI DITE KHAKHIA
Tuzingkal baihtak in ICICI Academy of Skills, Jaipur a "electric & motor repairs" training di mi 15 te Ropiang Foundation office-bearers teen khakhia uhi. Dr. Thangchinkhup Guite, Chairman, Ropiang Foundation Trust, in thumna neihsak zoh in kuankhia uhi. Hoihtaka apaitheih uleh zingni in Guwahati tungdiing ua, huai apat train man in Jaipur khotual tarik ni 9 in tungdiin uhi.
Amau kha 3 sung intensive residential training neidiing ua, omman, nekman, zilman te athawn (free) ahihbanah azilsuak te paiman leeng reimburse hidiing hi. Siamtaka hongkiik uh lam-en hang!
ROPIANG FOUNDATION IN BRANDED JACKETS 80 HAWM KHETA
Tuni sunnung dak 1 in Ropiang Foundation Headquarter, Mission Road ah azawng-apoimoh diakte adiing in Royal Enfield jackets hawmkhiat in om hi. Hiaini in, orphans, niteng neektawm zong, singtangkawm a teengte, leh physically challenged te kiang ah jackets te piakkhiat in om a, Churachandpur DC Shyam Lal Poonia IAS in uap in Ropiang Foundation Chairman, Dr. Thangchinkhup Guite, Rev. Haokhomang, Add. DC leh SP pa zi, toh pekhia uhi.
Applicants tamluat ziakin apuan in daihkei mahleh anawnchiang adia waiting list in atel khalou qualified te koih uhi.
Hiai hun ah, mite theih ut mahmah "Ropiang Kua Ahia" chihtoh kisai Foundation chairman Dr. Thangchinkhup Guite in genna nei a, Sialbu khua sattu ahih kia hilou in, ata 3 teen khua saat chiat ua, anihna Phungkhothang Guite in Lamka khua saat in, ata thumna Ngulzapum in Takvom khua saat ahihdaan gen hi. Agenzom zeelna ah hiai Ropiang Foundation in tup-leh-ngiim hoihtak nei a kibawl hi a, political bias leh religious bias nei hetlou a na seemdiing leh, azang-angau, tagah-meithai leh panpih ngai penteh panpih kawm in, healthcare leh educational initiatives tuamtuam leeng neihtum ahihdan uh genlang hi. Banah, hiaipuan kipe khete mantam ngen hi a, Chairman himahleh amah mah inleeng jacket hichituk a mantam lei ngeilou ahihdaan gen in, aneizoulouteen aneizou peente neihte neithei dia lampi hon bawlsak Pa Pathian leh Clothes Box Foundation tetung ah kipahthu geen hi. DC Churachandpur Shyam Lal Poonia IAS in Ropiang Foundation nasepte akipahpih daan gen in, tunung ciang ngei a le na tuamtuam a pangkhawm a, lohchintak thil tuamtuam saitheih nadiing in hasotna thu puak hi.
