BJP National General Secretary in CCpur ah election campaign bawl
CCpur, March 30 (Nisin Thuhiltu) : 17th Lok Sabha election ah II Outer Manipur (ST) Parliamentary Constituency ah Party Candidate, Shokhopao Mate @ Benjamin Mate a ding ah Peace Ground Multipurpose Hall, Tuibuang ah campaign bawlna nei, Manipur Chief Minister N. Biren Singh leh Ram Madhav, National General Secretary, BJP ten tuni'n Kuki Inpi Churachandpru (KIC) office ah Kuki sung ah Civil Society Organization chuamchuam tawh Peace Ground Multipurpose Hall, Tuibuang ah campaign bawlna a pat masang un meeting a nei ui. Zia meeting chu, Onkhopao Haokip, Adivsor, KSO Churachandpur in hun matna mapui in, Sominthang Doungel, Vice President (Political Affairs) Kuki Innpi Manipur in Guest-te mai ah Kuki khangthu tawh kisai taklatna anei a, Ram Madhav apat thugenna a um hi. Ram Madhav in zia hun a chun, Kuki kiti India khua-leh-tui hina diktak nei leh UG group in le issue lunglut um taktak chiapi ah government ah thilphut a nei dungzui ua, government tawh kal a palai ding se' ah a um nung ah Suspension of Operation (SoS) nuai ah um kawm ah kihona chiatha zing in a gen a, mel leh puam danglam maleh mi dang kawilo, 1990 hunlai ah Kuki mi 1,000 val in thina a tuak uh thawkpi a hidan a gen hi. BJP Government nuai ah ziagual ah hiam ngamna thil te chu kuama'n thuak talo ding a hidan uh gen in, BJP support chiat ding in CSO leader te chialna abawl hi. Meeting zaw ah V. Hangkhanlian, Minister, Agriculture, Veterinary and Animal Husbandry, Manipur chenna inn, Zenhang Lamka ah sun-an ne in, zia apat chu Peace Ground in hunpi matna a nei ui.
Peace Ground Multipurpose Hall campaign bawlna hun chu, Mary Haokip in amapui a, Khaipao Haokip, President, BJP Churachandpur District in vaidawnna thu gen in, Mahila apat presentation a um hi. V. Hangkhanlian, Minister, Agriculture, Veterinary and Animal Husbandry, TT Haokip, Chairman, HAC, Benjamin Mate, Intending Candidate apat thugenna um in, Chief Guest apat thugenna a um zawm a, Special Guest in thugenna nei in, K. Bhabananda Singh, State President, BJP in huntawp ah kipakthu gen in hun matna a zo ui.
Minister V. Hangkhanlian in a thugenna a chun, MDC member bangzat ahi em in Congress Party zawm ti tawh kisai ah kuama pataulo ding in mipi te chialna a bawl a, amau' ziak a kuama BJP MLA teltin hilo a hidan a gen hi. TT Haokip in Party dang candidate te hiachian leh mimal tak lawikhat gual ah a kipawlpi te a hina chung ua, Benjamin khel ah a chungchuang diak umlo un a gen a, khantona ding leh mipi te palai ding ah Benjamin dawisakna pechiat ah vote chiat ding in dawtna a siam hi. Intending Candidate Benjamin in district dang apat himaleh Churachandpur ah chu kineisak mama ahidan gen in, Tuibuang hausa tupa ahi banah Thangjam chau azi a hi ti'n a gen a, hun bangchan a hi em chiata apat Manipur tanggam khantosak ding ding lunggul zing a hina chung ah mipi palai hina tawh a lungtup te mualsua theina ding ah election contest ding ah kisingsakna nei a hidan gen in, mipi te support chiat ding in dawtna asiam hi.
Chief Guest Biren in govt in kuama khenchuam neilo a hidan gen in, Prime Minister Narendra Modi mapuina nuai ah BJP in mipi te a ding ah panlakna chuamchuam tamtak neia hidan te taklang in, Benjamin vote chiat ding in mipi te chialna a bawl hi. Special Guest Ram Madhav in tumasang ah Manipur hungpha sek himaleh khangthak 9 te luang a um ziak ah Churachandpur pha nuam seklo in a gen a, himaleh election campaign bawlna' ah Rajnath Singh a hung zui hun ah thutiam dungzui ah Manipur CM Biren mapuina kihona nei ah mi 9 te luang vuidaw ah umta ti'n a gen a,Congress solkal vaihawmna nuai ah kitha-kimat, kisawisakna thuak nasa mama ti'n Congress demna a bawl hi. Manipur bep hilo ah Muslim majority hina Jammu & Kashmir, Christian majority hina Nagaland, Tribal state, Jarkhand te ah le BJP in solkal siam a hidan gen in, mipite' haksatna BJP solkal nuai ah niamkiak chuam mama ahina chung ah vaihawmna a nei zawm ua leh mipi haksatna um te bei ding in a gen hi.
Prime Minister Narendra Modi in Act East Policy dungzui ah South-East Asia gam chuamchuam tawh kizawpna ding ah North-East bep hilo ah Manipur chu munpi pawimaw khat ah siamdaw ding ah panlakna nei zing in a gen a, zia chua a gasua theina ding ah Modi vaihawmna kithuapi pawimaw in a gen hi. UG group chuamchuam tawh SoO chiapi a hi dungzui ah Government in a thiltup teu bildaw ah nei zing in a gen hi.
Ex-Min, Ex MLA leh MDC 8 in Congress zawm
CCpur, March 30 (Nisin Thuhiltu) : Manipur Pradesh Congress Committee in tuni’n Congress Bhawan, BT Road, Imphal ah Congress zawm thak te ding in Reception Ceremony of Newly Joint Ex - Minister, Ex MLA and ADC members of other parties kiti a nei hi. Zia hun a chun, Congress zawmthak- K. Vungzalian, Ex-Minister/ Ex-President, BJP, Ccpur; Jamhenglung Pamai, Ex-MLA; Autonomous District Council (ADC), Churachandpur nuai ah Zamneihching, MDC; CT Lian, MDC; M. Gouzamang, MDC; T Khaikhothang, MDC; Hausuanthang, MDC; G. Suanchinpau, MDC; Pumtulthang, MDC leh Langkhanpau Guite, MDC te laklutna anei ui. Zia hun chu former CM & CLP O Ibobi, MPCC President Gaikhangam, Congress MLAs leh inner-Manipur Candidate O Nabakishore ten le a uap ui.
YVA, Compound Veng Unit in Raising Day lawm
CCpur, March 30 (Nisin Thuhiltu) : Young Vaiphei Association (YVA), Compound Veng Unit in tuni dak 11 in Rostad Memorial High School, Compound Veng ah a 29-veina Raising Day a mang ui. Zia hun achun, Upa Gentinhau Vaiphei, Deputy Manager, SBI Ccpur Branch in zin-gun hina tawh a uap a, Upa S Tinlal, Headmaster, Misao Lhahvom Junior High School, Upa Lalkithang, Organizing Secretary, YVA GHQ leh H. Sangpi, Vice President, YVA GHQ te’n zin za-um, intekpa leh zintuntu hina tawh a uap ban un, Vaiphei sung a pawl chuamchuam YVA GHQ, Zillai ban ah mapuitu bangzat hem in a uap ui. Hun matna Lamkhokhai, Social and Cultural Secretary leh Ngailalnei, Committee Member in a mapui ua, Rev. N. Khanpau, Advisor in hun hawnna nei in, Th. Minlun, Committee Member in vaidawnna thu a gen hi. Chuleh, SK Thanga, Secretary in report piakna nei in, Upa Kaikhokam, Founder President leh Zamkhankap, Chairman, VPC Compound Veng Unit in thugenna a nei ban un, Zillai Compound Veng Unit, YVA GHQ leh Luaithang, President, YVA Compound Unit te’n le thugenna a nei ui. Chun, Luaithang, President mapuina’n Compound Veng Unit sung ah kum 80 chunglam damnalaite kiang ah chawihawina a pia’u a, L. Kapboi, Assistant Secretary in award hawmdawna a nei ban in, Dr Ng Seanboi Vaiphei, Surgeon, District Hospital in Health and Blood Donation Campaign a bawl hi. Khuallian-te apat thugenna leh hun tawp ah Nenglalthamuan, Vice President in kipakthu genna a nei a, Elder Khamgoulian in pauchapna nei in hun a khak ui.
Global Leadership Summit nei
CCpur, March 30 (Nisin Thuhiltu) : GBA, CBA, SBCA leh MBC nuai a mission department-te pangkhawm in tuni dak 10:30 in GBA, Centre Church, Chiengkonpang ah Global Leadership Summit a nei ui. Zia hun achun, kochuam ah department chuamchuam mapuitu leh member-te a pang ua, Hydrebad apat Sabastian leh Rev. Alanni, Mission Secretary, MBC in ziltîlna a nei ui.
Siamsin Free Coach ing 2019 khakna nei
CCpur, March 30 (Nisin Thuhiltu) : Siamsinpawlpi (SSPP), GHQ, Education Department in Jawahar Navodaya vidyalaya (JNV) ah class 6 extrance exam dingte a ding in Siamsin JNV Entrance Free Coaching 2019 a bawl uh tuni’n SSPP Complex, Siloam Veng, Bungmual ah a khakna leh pauchappiakna hun a nei ui. Zia hun chu, coaching ah pangte nu-le-pate’n a uap ua, L Kammuanlal Ngaihte, Joint Secretary, Education Department, SSPP GHQ in hun matna mapui in, Chinglianmawi, Joint Secetary in hun hawnna leh vaidawnna thu a gen a, ziltîltu leh nu-le-pate’n thugenna a nei ui. Free coaching ah student 32 a pang ua, zia hun sung achun, Sir ST Paul, Teacher, JNV, Imphal leh Nangkhanlal, DI, ZEO, CCpur te’n etthâkna a vanei ui.
Ropiang Foundation in chaga etkawlna mun 3 ah panpina pia
CCpur, March 30 (Nisin Thuhiltu) : Ropiang Foundation Trust in tuni’n chaga etkawlna mun 3 in panpina a pia’u a, zia chu mundang apat donation a mu dungzui ua quilt leh bedsheet hawmdawna a nei uh ahi. Panpina dawngte ahiu leh - Sangga muon In, Bijang ; Tunnu Limbel, Zo Colony leh Vondei Sauliim, Zo Colony ahia, kalkit sung ale orphan/children home dangte ale zânpuan hawmdawk kit ding uh hi’n a kigen hi.
Commandant ah kaisang
CCpur, March 30 (Nisin Thuhiltu) : Pauliankap Suantak, Deputy Commandant, Central Industrial Security Force (CISF) ah sem zinglai chu Commandant ding in a kaisang (promotion) hi. Ama ahileh tu leh tu’ Indira Gandhi International Airport, Delhi ah posting a hia, tunaicha a khan a 2 veina ding ah Director General, CISF pat *Commendation Disc and Commendation Certificate (Gold) mu le a hi. Promotion a mu tawh kitawn ah Mumbai ah sepna mun kichawn ding hi'n a kigen hi.
Assessment camp bawl
CCpur, March 30 (Nisin Thuhiltu) : District Family Welfare Office, District Hospital ah tuni’n gualphalo-te a ding ah Disability Certificate mutheina ding in assessment camp a nei ui. Zia hun achun, gualbanlo mi 42 in min a pelut ua, zia lak achun, Ortho ah mi 13, Psychiatric- 6, Pediatric- 6, ENT-10, EYE- 6 leh Surgery ah mi khat ahiu. Centre for Community Initiative (CCI/TMI) apat staff te’n kithuapi in, Paul Rozarlien, Advocacy Coordinator, CCI in Rights of Persons with Disability (RPD Act 2016) leh Disability Schemes (CMST) tawh kisai a phatchuam dan ziltîlna a nei hi.
V.K Tawna High in study trip ah Saidan tâng pha
CCpur, March 30 (Nisin Thuhiltu) : V.K Tawna High in tuni’n study trip in Saidan tâng ava fang ui. A zillai ua History leh Geography subject tawh kisai a student te’n phatchuampi ding dawina ah study trip a bawl uh hi’n a kigen a, zia mun achun, pauchapkhawmna nei in zingkal ann nekkhawmna le a nei ui. Saidan tang ah kawlhawm (cave) ahileh World War II hun lai a General Sato, Japanese Army umna hi’n a kigen a, a langkhat ah Professor Y. Kaburagi in V.K Tawna High a vave lai ah, Saidan Cave chu General Yanagida, Commander, 33 Division Japanese Imperial Army umna ahi ti’n a gen hi.
AMBADA in BJP National General Secy kiang ah memorandum pia
CCpur, March 30 (Nisin Thuhiltu) : Lok Sabha Election, 2019 ah Outer Manipur Parliamentary Constituency ah BJP candidate, Benjamin Mate a ding in tuni’n Tuibuang Peace Ground ah Ram Madhav, National General Secretary, BJP in vote campaign a hung bawl hi. Zia hun chu lemchang ah la'n, All Manipur Border Areas Development Association (AMBADA) lawi-upate’n kimupi in, Border Area Development Program (BADP) nasepna tawh kisai a Manipur Government chung ah a lungkimlo thu uh a zikthaw in Ginsuanhau, Chairman, MANIREDA & MLA, 60-Singngat A/C tungtawn in a pia’u hi. AMBADA thusuak in a taklat dan in, BADP nuai ah nasepnate Village Authority tungtawn in kum tamtak lamzang tak in ala semdawk tau a, himaleh Department of Planning, Government of Manipur in lekhathot No.4.8.2017-18 BADP Plg, dated July 18, 2017 in “Village Authority-te’n nasepna lakh 5 tiang bep semtheita ding” ti’n a kigen a, zia chu Manipur thingtangmite leh Village Authority-te simmawna ahi ti’n a gen hi. Chuleh, Deputy Commissioner, Churachandpur in Circular No. DC(CCP)/BADP/16-17/Main, dated November 29, 2017 dungzui in BADP nasepna mun dingte ah, Hausa in Gift Deed mangcha ah solkal kiang ah gam a thawn ah a piak ding ti’n a kizik a, himaleh AMBADA thusuak in a taklat dan in, Manipur thingtangmite lou nasem leh leichang mang ah khawsa ahiziak in, solkal kiang ah gam piakdaw ding hitheilo hi’n a gen a, thingtangmite gam etla’na ziak ah thu hung pawt hi’n le ngawna a bawl hi. AMBADA thusuak in a genkitna ah, Indo-Myanmar gamgi zûl, Manipur sung ah khawcha 350 vâl a um a, BADP nasepna tawh kisai a panlatu dingin AMBADA phudaw ahi dungzui in, Manipur solkal kiang ah a chung ah order kibawlte zukkik ding ah tamveipi ngekta maleh, solkal in a ngaisaklo ziak in nisim February 18, 2019 in Moreh ah AMBADA General Body Meeting a nei ua, maban chia dingdan genkhawmna ala nei ui. Zia hun achun, palai chiakhawmte’n kigual tak in thupukna a siam ua, zia chu, a hungtung ding phualpi kitelna 2019 ah BJP boycott ding ti ahi. Ram Madhav in Manipur sawlkal a kihopi a, a chung ah order kigente thaimang ahi ding ban ah, Village Authority-te thuneina za’tak ah kepbit ahi ding AMBADA in kinepna liantak a nei thu gen kawm in, mipite khualna ah panlatu, Pu Ginsuanhau, Chairman, MANIREDA & MLA, 60-Singngat A/C chung inle kipakthu a gen hi.
KZP, Rayburn Unit in vaipaw ding telna nei
CCpur, March 30 (Nisin Thuhiltu) : Khangthah Zuun Pawl (KZP), Rayburn Unit in zani’n Simte Inn, Simveng ah unit vaipaw ding kitelna a nei ui. 2019-2020 sung ah vaipaw ding ah President ding in Danial Thanglalsiam, Vice President in Doulunmang, Secretary in H. Thangminlian, Assistant Secretary, S. Ginsuan, Finance Secretary leh treasurer in Esther Kimneihoi leh Information Secretary ding in Glady Nianglunhoih leh Lamkhosiam te a telting ui. Unit office ding ah Albert Ginmindailou-te In, Beulahlane hiding in a lemguat ui.