17th Lok Sabha election 2019 ding tawh kisai ah law enforcement agency chuamchuam in a kigawm ah Rs 540 crores tuam man ding matdaw nei

CCpur, Mar. 26: 17th Lok Sabha election 2019 ding tawh kisai ah 26 March 2019 tiang ah Progressive Seizure Report dungzui in, India gamsung ah law enforcement agency chuamchuam in sum leh zu/khamthei, sana leh thil chuamchuam a kigawm ah Rs 540 crores tuam matdaw in a um hi. Zia dungzui a chun, sum (cash) ah kimandawk total Rs. 143.47 Cr. a tung a, zu (Liquor) total ah Rs. 89.64 Cr. man ding, Drugs/Narcotics total Rs. 131.75 Cr.man ding, Metals (Gold etc.) total ah Rs. 162.93 Cr man ding leh Freebies/other items total ah Rs. 12.202 Cr. man ding matdaw in a um hi.

Tamil Nadu ,Uttar Pradesh & Andhra Pradesh ah thil mandaw a tampen a, tamil Nadu ah sum (cash) ah Rs 36.6 Cr. matdaw ah um in, zu (Liquor) total ah Rs .13 Cr. man ding, Drugs/Narcotics total Rs. 0.15 Cr.man ding, Metals (Gold etc.) total ah Rs. 68 Cr. man ding leh Freebies/other items total ah Rs. 2.36 Cr. a vek ah kigawm in, total seizure value Rs. 107.24 Cr. a tung hi.

Uttar Pradesh ah sum (cash) ah Rs 8.26 Cr. matdaw ah um in, zu (Liquor) total ah 22.55 Cr. man ding, Drugs/Narcotics total Rs. 14.68 Cr. man ding, Metals (Gold etc.) total ah Rs. 59.04 Cr. man ding leh Freebies/other items matdaw umlo, a vek ah kigawm in, total seizure value Rs. 104.53 Cr. a tung hi.

Andhra Pradesh ah sum (cash) ah Rs 55 Cr matdaw ah um in, zu (Liquor) total ah 12 Cr. man ding, Drugs/Narcotics total Rs. 0.4 Cr. man ding, Metals (Gold etc.) total ah Rs. 30 Cr. man ding leh Freebies/other items Rs 6 Cr., a vek ah kigawm in, total seizure value Rs. 103.4 Cr. a tung hi.

Manipur ah sum (cash) ah Rs 0.03 Cr. matdaw ah um in, zu (Liquor) total ah 0.29 Cr. man ding, Drugs/Narcotics total Rs. 21.18 Cr. man ding, Metals (Gold etc.) total ah Rs. 1.12 Cr. man ding leh Freebies/other items matdaw umlo, a vek ah kigawm in, Manipur ah total seizure value Rs. 22.62 Cr. a tung hi.

Police in Timothy L. Changsan hawl zing
CCpur, Mar. 26: High Court of Manipur thupiak dungzui ah Superintendent of Police, Churachandpur in Special Judge, POCSO, Imphal West in FIR 2 bulkhum a um Timothy Lalhmunmawi Changsan chung ah thukhenna a bawl himaleh a taimang ziak in, mipi hiat ding in taklatna a nei hi. February 25, 2015 nitaklam dak 3:00 leh dak 3:30 kikal ah Women Police Station, Churachandpur in Timothy Lalhmunmawi Changsan (52) s/o (L) Thangzakham Ghangsan chung ah FIR 2 bulkhum in matdaw ahi banah, charge sheet le bawlkhum ahi nung in Special Judge, POCSO, Imphal West in April 30, 2018 ni ah thukhenna a bawlkhum ahia, April 5, 2018 ni apat damsung suangkul tang ding ah Special Judge, POCSO in thutanna bawl in, a chung ah Non Bailable Warrant le sua in a um hi. Ama mukha ahiloleh a umna hia te’n a kinaipi pen police station ah hiatsak ding ti ahia, zia ding chun, SP Office, 03874-233239, OC Women Police Station 8974-974-580 ahiloleh Case Investigating Officer, Mobile No. 9862-086-204 ale hiatsak theiding hi’n police in mipite kiang ah hiatsakna a bawl hi.

Presiding officer leh polling officer ding ten training pan

CCpur, Mar. 26: 17th Lok Shaba election neina ding tawh kisai in District Election Officer (DEO), CCpur vaisaina nuai ah kisaklawkna chiazawm zel in, Polling personel te’n First Round training a chai nung un, tuni March 26 apat March 30, 2019 sung ah um ding, CCpur Government College, IB Road ah CCpur leh Pherzawl District ah polling personel te’n second round training a pan ui. Training ahileh zingkallam dak 10 apat nitak dak 3 kikal in anei ua, election hun ah vote khiakdan tawh kisai ah buaina umlona ding ah ziltîltu chuamchuam in election chia dingdan banah EVM leh VVPAT machine mat dingdan ziltîlna a nei ui. Tuni’n Shyam Lal Poonia, IAS, DC/ DEO, Ccpur leh Mannuamching IAS, DC Pherzawl in training neina mun etthâkna a nei ui. Zing March 27 in pawsal polling officer I ah 101 apat 302, polling officer 2 ah 1-200 in training neiding ahiu a, March 28 ah pawsal polling officer 2 ah 201-302, pawsal polling officer 3 ah 1-302 in training ding ahiu. March 29 in women personnel 1-130 te’n training nei ding ahiu a, March 30 ahwomen polling personnel team 64-330 te’n neiding ahiu.

NCC ten World Water Day matna lamlian zui

CCpur, Mar. 26: Churachandpur khawpi sung ah institution chuamchuam apat National Cadet Corps. (NCC) te'n tuni, March 26, 2019 World Water Day matna in lampi zuina a nei ui. Zia hun ah pang ding te chu Rayburn College in a kingak khawm ua, Sir Ted Seymore, Florida, USA in zingkal dak 7:00 in flag-off a bawl hi. Rally ahileh Rayburn College, Rayburn High, Bethany College leh Churachandpur Government Higher Secondary School apat NCC cadet tamtak a pang ua, placard chuamchuam chawi in Peace Ground, Tuibuang chan World Water Day matna in lamlian a zui ui. World Water Day ahileh UN nuai a kikhaikhawm gamte ah matdan chi chuamchuam ah mat ahia, khawvel ah tui thiangtho piansak leh kepbit ding tupna ah khawvel pumpi ah kimang hi’n a kigen hi. World Water Day hi March 22 niah kimang sek himaleh Lamka ah government holiday ziak ah tuni kimang hi’n a kigen hi. Tuni ah rally flag-off hun in institution chuamchuam apat Associate NCC Office r(ANO) zosia leh Rev. Dr. Khen P. Tombing, Principal, Rayburn College in a uap ui.

Bethesda School of Nursing, Muolvaiphei kikhak zing nalai

CCpur, Mar. 26: Bethesda School of Nursing, Muolvaiphei akai student nu-le-pate kikhaikhawmna Bethesda School of Nursing Parents Association (BSNPA) lawiupa te Bethesda School of Nursing thuneitu ten akimupi nawplo nung ua, tuni nitaklam dak 1:00 ah GNM 2nd Year student nu-leh-pate kimupi ding ti ah Bethesda School of Nursing thuneitu ten a guanggalna chung ua, BSNPA pawl in Forum lawiupa te tawh kimu masalo ah nu leh pa te college huangsung lut thei umlo ding ti ah anan ziak un, a meeting ding uh chiatha theilo in a um a, Bethesda School of Nursing le tuni tiang in a kikhak zing hi. Hiatthei khat chu, Bethesda School of Nursing (BSN), Muolvaiphei ah course chuamchuam zil student 150 val in a college huangsung ua, ki etkawlna chung ah lung-awilo ziak in March 14, 2019 nitaklam in Bethesda School of Nursing a taidaw san ua, zia chungchang a chu March 16, 2019 ah Bethesda School of Nursing Governing body in nu leh pate ko ah thil umdan genkhawmna nei ding atiu himaleh Governing body in thil umdan genkawm ah ni 7 sung suty a puan tawh thua ah nu leh pa banah guardian lam te thugen theina hun piak hilo ti a hi. Zia ah ni 7 suty sung achu buaina sukven ding ti himaleh School thuneitute'n nu leh pate thuhiat ah a nei kitlona chung ua, zani March 25, 2019 ah nu leh pa ten Bethesda School of Nursing Parents Association (BSNPA) kiti phutdawk ah panlakna nei zing uh ti a hi.

Mizoram Assembly in UNDRIP 2007 adopt abawl ZHRF in kipakpi
CCpur, Mar. 26: Mizoram Legislative Assembly in India Government kiang ah dinpi thei ding ah United Nations Declaration on the Rights of Indigenous People (UNDRIP) 2007 ah article leh clause te chiapi ding ah adopt abawlna chung in Zomi Human Rights Foundation (ZHRF), Headquarter in kipakpi thu a taklang hi. Mizoram Assembly in March 15, 2019 ah UNDRIP 2007 adopt abawl chu Zo-suante te ding ah thil tepte thei kham a hidan le a taklang hi. UNDRIP 2007 ahileh Indigenous mite thuneina venbitna ding, culture, identity, language, employment, health, education leh issues chuamchuam te venbit theina ding ah United Nations General Assembly in India panna gam 144 te lemsakna leh gam 4 lemsakpilona ah September 13, 2007 ah adopt ala bawl a hi.

In kâng panpina peding te DC/Pherzawl in flag-off

CCpur, Mar. 26: Pherzawl District sung a um Leisen khua ah In kâng panpina ding a Hmar Youth Association (HYA), Tuithaphai Joint Headquarter in a dawl khawmte’u tuni, March 26, 2019 zingkal dak 8:00 in Mannuamching, IAS, DC Pherzawl in a flag-off hi. Thu kihiatdan in, a chiata February 22, 2019 nitaklam dak 12:30 vel in Pherzawl District a um, Leisen khua ah meikang ziak in In 4 leh Leisen Village AuthorityOffice a kangtum a, innkangte panpina ding in HYA Tuithaphai Joint Headquarter in bialsung a Branch leh khua chuamchuam apat panpina a dawlkhawm te’u tuni’n Muolvaiphei Phayground mun ah Mannuamching, IAS in flag-off a bawl ahia, Rev. Vanlalruot Joute in pauchapna tawh In kâng panpina peding ah chiading te thakdawna a nei hi. Panpina dawng dingte ahiu leh; Lalrinsan in Langva Bundle 5 leh anchang bag 5, Lalthienghlim in Langva bundle 5 leh anchang bag 5, Lalhminghlu in Langva bundle 3 leh anchang bag 5 leh Lalbieklien in Langva bundle 3 leh anchang bag 5 ban ah panpina van chi chuamchuam le dawngding ahiu.Panpina thilpiak kidawlkhawmte ahileh; sil-le-chen bag 120, um-le-bel bag 4, anchang bag 32, Langva bundle 16 leh a sum ah Rs. 27,700 ahia, HYA Tuithaphai Joint Headquarter in HYA Leisen Branch, Leisen Village Authority leh Pastor Suma kiang ahthilpiakte chung ah mawpuakna a piak uh hi’n le a kigen hi. Thilpiakte puakna ding ah sen-le-so zosia Mannuamching, IAS, DC Pherzawl in seng ding leh, a puakna ding ah kimang TATA Truck (Registration No. MN 07C 3772) neitu Lulun inle a tawmtheipen ah a bawlpiak ziak in, HYA Tuithaphai Joint Headquarter in a chung un kipak thu a gen a, Pathian in ale tamtak ah malzawl ding in dawisak thu a puang hi.

Ropiang FoundationTrust in maban panlak dingdan taklang

CCpur, Mar. 26: Ropiang Foundation Trust in a office uh, Mission Road ah tuni, March 26, 2019 nitaklam dak 3:00 in media te kiang in Trust panlakna leh maban ah panlakna a nei dingdan uh taklatna Trust Chairman, Dr. Thangchinkhup Guite in a nei hi. Trust Chairman, Dr. Thangchinkhup Guite in a genna a hcun, 2018 January ah phudaw ah um Ropiang Foundation Trust kum khat val melmu hipan maleh Pathian' mapuina zal ah chiazawm zel a hidan gen in, kum 2018 ah nasepdaw chuamchuam 7 bang neithei maleh tukum ah damlo-hitan ziak ah panlakna umthei nailo in a gen hi. Tukum bul ah company khenkhat apat single bedsheet ah matthei ding puan bangzat ahi em amu uh hawpdaw nailo ah um te chu tu hapta sung ah khawpi sung leh a kiangnai ah Orphanage Home te naupang umdan tawh kituak ah piak ding ah guanggalna nei a hidan uh gen in, Siamsinpawlpi Residential School panna Government School 10 ah School Eye-Test nei hun ah cover khaklo private school 10 ah School Eye-Test chiapi zawm ding, school khenkhat ah test bawlna nei ah student mitbel/tarmit/mitbul pawimaw te piak ding, zia ding a chu Rayburn High School/College, St. Peter's School, St. Paul's Institute, Donbosco High School/College, VK Tawna High School/College, Saltbrook High School, Covenant High School, Foundation School, Dawn School leh Savior Public School ti te ah "Doing Good Unto All" ti thupi nei ah Eye Check-up Camp bawl hiding, hapta kit apat school thuneite tawh kithuhiat ah Lamka Optical Camps 2019 kiti chiapi hiding ti te a genlang hi.

Outer Manipur constituency ah candidate 8 te scrutiny ah chiatheng
Imphal, March 26: H. Roshita, Returning Officer No.2 - Outer Manipur (ST) Parliamentary constituency in tuni ah17th Lok Sabha election ah candidate ding ah nomination file ah um te scrutiny bawl hun ah Outer Manipur (ST) Parliamentary constituency ah nomination filed, candidate 8 te nomination valid vek a hidan a taklang hi. Outer Manipur (ST) Parliamentary constituency ah candidate ding ah nomination filed bawlte ahiuleh - Hangkhanpau Taithul of Janata Dal (United); Ashang Kasar of North East India Development Party (NEIDP); Lorho S. Pfoze of Naga People's Front (NPF), Houlim Shokhopao Mate (Benjamin) of Bharatiya Janata Party (BJP); Leikhan Kalpu of Independent; Angam Karung Kom of Nationalist Congress Party (NCP); Thangminlien Kipgen of National People's Party (NPP) leh K James of Indian National Congress (INC) te a hiu.

Police in Th. Nando Singh @ Nanao umna hilthei te Rs 1 lakh tiam

Imphal, Mar. 26: Public Relations Officer, Police Department, Manipur, Imphal in tuni ah thusua abawlna a chun, judicial custody ah um Th. Nando Singh @ Nanao (34 yrs) s/o Th. Subol Singh of Khangabok Part-III, Chief of KCP (Mangal/ Nando Group) chu Ortho Ward, JNIMS, Porompat ah medical treatment bawlna apat tuni, 26 March 2019 zingkal ah zamdawk a hidan taklang in, kua hitaleh Th. Nando Singh @ Nanao umna hia leh hilthei te kiang ah Cash Reward Rs 1,00,000/- (Rupees one lakh only) piak hiding in a taklang hi. Police te kiang ah Th. Nando Singh @ Nanao umna hilsawn te hina (Identity) suklat hilo ding in le a taklang a, SP, Imphal East (9862067893), SP, Imphal West (9612759705) leh OC/Porompat PS (9862008508) te thuhiat thei ding in le a taklang hi. Hiatthei khat chu, Th. Nando Singh @ Nanao ahileh kum 2003 ah Lungnila Elizabeth rape and murder case ah kiman leh jail ah kikawi a hi.

Governor Dr. Najma in children home ve'na nei

Imphal, Mar. 26: Manipur Governor, Dr. Najma Heptulla in tuni'n Children Homes of Dewlahland, Imphal East leh Tabitha Children Home, Raphei Valley, Mantripukhri ve'na nei in home ah um naupang te tawh holimna a nei hi. Zia hun a chun, Governor, Dr. Najma Heptulla in naupang te lungtup, carrier ti te dawtna siam in, nekthei leh gift piakna a nei a, tunung ah home ah um naupang te chu Raj Bhavan, Imphal ve'na nei ding ah chial ding in agen hi.

Kangpokpi ah EVM/VVPAT Mobile Training Programme nei

Kangpokpi, March 26: Kangpokpi District ah tuni'n SDO Champhai leh T. Waichong Chunglienmang Kipgen, MCS mapuina nuai in mipi lak ah Electronic Voting Machines ("EVM") /Voter Verifiable Paper Audit Trail (VVPAT) familiarisation rogrammes chiapi in a um hi. Zia hun a chun, mipi hunkhawp ten EVM/VVPAT mat dingdan tawh kisai ah a hiatthiamlo teu dawtna nei in, vote khiakdan kizilna a nei ui. SDO Chunglienmang in le Thadou dialect ah awareness video a siam suklatna nei in, local channels, social media leh watsapp ah mipi te hiatthiam thei ding ah suadaw in a um hi. A langkhatlam ah Deputy Commissioner, Kangpokpi District, Multipurpose Hall ah presiding officers leh polling officers te ding in training a um hi.

Eastern Army Commander, Indian Army in Bangladesh ve'

Dhaka, March. 26: India leh Bangladesh kal ah military cooperation sukhat sem ding dawina ziak in, Lt Gen MM Naravane, PVSM, AVSM, SM, VSM, GOC-in-C Eastern Command in 18-22 Mar 2019 sung in Bangladesh ve'na a nei hi. Zia hun a chun, Dhaka ah 19 martyrs te suuna nei in, Liberation War Museum leh Bangabandhu Memorial Museum te etthakna a nei a, Dhaka ah Mrs Riva Ganguly Das, Indian High Commissioner to Bangladesh kimupi in, MuktiJodha Scholarship felicitation ceremony le a uap a, Chiefs of Bangladesh Armed Forces, Gen Aziz Ahmed, BSP, BGBM, PGBM, BGBMS, psc, G, Chief of Army Staff, Vice Admiral Aurangzeb Chowdhury, NBP, OSP, BGGM, PCGM, BCGMS, ndc, psc, Chief of Naval Staff and Air Chief Marshal MassihuzzamanSerniabat, BBP, OSP, NDU, PSC, Chief of Air Staff te tawh hun mangkhawm in, Lt Gen Sheikh MamunKhaled, SUP, rcds, psc, PhD, Commandant, National Defence College Bangladesh and Maj Gen AnwarulMomen, SBP, rcds, psc, Commandant, Bangladesh Military Academy te tawh le maban panlak khawmna ding tawh kisai in kihona a nei ui.

DEO, Bishnupur mapuina poll ding ah kisak lawkna chiatha zing

Bishnupur, March 26: DEO, Bishnupur mapuina nuai ah Assistant Returning Officers (ARO) in tuni'n Assembly Constituency 6 ah Booth Level Officers (BLOs) leh BLO Supervisors meeting conduct a bawl hi. 27- Moirang leh 29-Kumbi ACs te ding ah Multipurpose Hall, Mini-Secretariat campus in meeting a um a, 26-Bishnupur AC, 24-Nambol AC, 25-Oinam AC leh 28-Thanga AC te ding ah ARO te office chiat in a um hi. Zia ah meeting hun a chun, BLOs leh BLO Supervisors te election hun ah panlak dingdan leh amawpuaknau taklang in ziltilna a nei hi. DEO, Bishnupur district panlakna nuai ah Lok Sabha Election ah kimang ding, Supplementary Randomization of EVM & VVPAT zo thiang ta ti a hi.

Lokpal member ten kitiamna nei ding

New Delhi, March 26 : Lokpal masapen ding ah guat ah um Justice Pinaki Chandra Ghose in achiata 23 March 2019 ni ah kitiamna a nei tak tawh kitawn in Lokpal member ding ah guat ah um mi 8 ten zing 27th March 2019 ah kitiamna nei ding a hiu. Lokpal member ding ah guat ah um mi 8 te ahiuleh - Chief Justices lui - Justices Dilip B Bhosale, Pradip Kumar Mohanty, Abhilasha Kumari, sitting Chief Justice of Chhattisgarh High Court Ajay Kumar Tripathi te Judicial Members ding ah guat ahiu a, former first woman chief of Sashastra Seema Bal Archana Ramasundaram, ex-Maharashtra chief secretary Dinesh Kumar Jain, former IRS officer Mahender Singh and Gujarat cadre ex-IAS officer Indrajeet Prasad Gautam te chu Lokpal’s Non-Judicial Members ding ah guat a hiu.
Lokpal Chairperson, Supreme Court judge lui Justice Pinaki Chandra Ghose (66) ahileh May 2017 ah Supreme Court judge hina apat ala retired, National Human Rights Commission member khat hizing nalai a hia, anti-corruption ombudsman - Lokpal chairperson ding ah achiata 19th March 2019 ni ah appoint ah um a hi.

Hiatthei khat chu, kum 2013 ah Lokpal Bill passed ah a um zaw, January 16, 2014 ah Lokpal Act notified a hinung kum 5 phial a chiatak nung ah Lokpal ding ah Supreme Court judge lui Pinaki Chandra Ghose guat ah um a hia, Lokpal Act dungzui ah nekgukna tawh kisai ah Prime Minister leh Chief Ministers te tiang chung ah nekgukna case khualna neithei ding, CBI panna' investigation agency chung ah superintendence leh direction powers nei ding,

Lokpal leh Lokayuktas Act ahileh Anna Hazare in kum 2011 ah Jan Lokpal movement a chiapi tawh ktawn ah kum 2013 ah Parliament in amendments bawl ah a passed hita a hia, national level ah nekgukna case tawh kisai Lokpal in enzui ding, state level ah nekgukna tawh kisai Lokayukta in enzui ding a hi. Lokpal provision dungzui ah Lokpal in chairperson 1, Lokpal panel ah member a tampen ah 8 a um ding, member 4 te judicial members a hiding, Lokpal member 50% te Scheduled Castes, Scheduled Tribes, Other Backward Classes, minorities leh numei te a hiding uh ti a hi.

Lokpal chairperson appointment ahileh five-member panel - Prime Minister, Lok Sabha Speaker, Leader of Opposition, Chief Justice of India, President in eminent jurist nominate a bawl ten appoint abawl ding uh a hi.

Chairperson leh members ten kum 5 sung ahiloleh kum 70 a tin tiang ua office lua thei ding, Lokpal Chairperson salary leh allowances ahileh Chief Justice of India tawh kibang ding, members te salary and allowances ahileh Supreme Court judge te salary and allowances tawh kibang hiding a hi.

Nagaland Ruling Party's Candidate in NPF MLA 7 support mu

Kohima, Mar. 26: Nagaland Assembly ah opposition Naga People's Front (NPF) lawmakers 7 ten Nationalist Democratic Progressive Party (NDDP) nominee leh ruling People's Democratic Alliance (PDA) consensus candidate, Tokheho Yepthomi chu Nagaland ah Lok Sabha seat 1 umsun contest ding ah support a hidan uh a puang ui. Zia ah support puang NPF MLA te chu - Kejong Chang, EE Pangteang, Eshak Konyak, CL John, BS Nganlang, N Thongwang Konyak leh Toyang Chang te a hiu. 60-member Nagaland Assembly ah NPF in MLA 26 anei hi. Mr Yepthomi of NDDP ahileh tu ah Lok Sabha seat lua zinglai le a hia, ruling PDA, NDDP, Bharatiya Janata Party (BJP), Janata Dal (United) leh Independent member te consensus candidate a hi. Chief Minister Neiphiu Rio mapui PDA government chu pakcha mama kawm in MLA 7 ten Lok Sabha Elections ah NPF in Congress support ding ah lemsakna a nei chu regionalism principle kal hin a gen ua, regionalism principle chiapi kawm ah PDA consensus candidate leh PDA government support ding a hidan uh a taklang bawk ui. A langkhatlam ah NPF spokesperson Achumbemo Kikon in Lok Sabha election ah party in Coordination Committee mapuina tawh secular party leh candidate support bawlna ding tawh kisai genkhawm ding uh leh March 30 ah thupukna siam ding uh tin a gen a hi.

Mizoram govt in Finance Commission team kiang ah memorandum pia
Aizawl, March 26: Mizoram government in tuni'n Mizoram ve'na nei 15th Finance Commission team te kiang in Mizoram state a ding ah Rs 94,647.33 crore demand bawlna memorandum piaklutna a nei hi. 15th Finance Commission team te ahileh Chairman N K Singh mapuina tawh Seppatni a khah Mizoram tung ahiu a, Finance Commission team in Mizoram chief secretary Lalnunmawia Chuaungo leh senior state government officials te tawh kihona nei in, state government in pre-devolution revenue status a ding ah Rs 57,737.38 crore, capital expenditure ding ah Rs 17,357.90 crore leh state assets maintenance a ding Rs 5,779 crore dawtna a nei hi. Financial proposals piaklut ah um te lak a chun state government employee te seventh Central pay commission provision tawh kituak ah seventh Central pay commission chiapi theina ding ah Rs 1,283.70 crore dawtna le a pang hi. Zialo a chun, memorandum in State Disaster relief funda ding Rs 1,000 crore, State disaster mitigation fund, autonomous district councils, urban & rural local bodies leh Sinlung Hills council a ding Rs 2,292.39 crore, forests maintenance Rs 1,450 crore leh state specific needs a ding ah Rs 7,746.96 crore dawtna le a nei ui. 15th Finance Commission of India ahileh November 2017 ah siamdaw ah um a hia, five fiscal years sung ah taxes leh financial chungchang ah centre ah recommendations a piaklut masang ua state chuamchuam ah study bawl a hiu.

Assam ah BJP vaihawmna recruitment scam um: Akhil Gogoi

Guwahati, Mar. 26: Assam ah BJP state government’s chu recruitment scam ziak ah Lok Sabha election kuan tak ah mualpho thim hileh a kilawm hi.
Krishak Mukti Sangram Samiti advisor Akhil Gogoi in a genna a chun BJP mapui government in Department of Panchayat & Rural Development nuai ah semtu ding 886 post a lakna post 450 posts te chu BJP leaders leh candidates insungmi te piak ah um in a gen a, zia chu documents nei ah a gen hi'n a taklang hi. Recruitment results ahileh March first half sung a khah puan ah um a hia, himaleh peasants’ body KMSS in recruitment chiapi dan chung ah lung-awilo ziak ah court ah hekna bawl in, hapta khat vel zaw leh Gauhati High Court ah a case tut hiding in Akhil Gogoi in a gen hi. RTI activist le hi, Akhil Gogoi in ziagual
scam apat chu governing party BJP hina tak kichian in a gen a, nekguk dodalna chiapi ding ah gen leh sak neisek maleu nekgukna nasatak ah chiapi un ngawna a siam hi. Zia ah scam case chu tawh kisai ah kigawl khakna nei te APSC job scam gual ah jail thun hiding un le a gen a, zia ah case zaw theina ding ah documents bangkim sulfel hiding, hun chawmkhat sung buapi ngai ding himaleh nekhukna phawldaw hithotho diong ti'n a gen hi. Chun, Assam government chu office rooms sung ah March 3 leh 5 ah CCTV footage kituptak ah etthakna nei ding in phutna abawl hi.

Assam ah Lok Sabha seats 5 a ding ah candidates 45 in nomination file
Guwahati, Mar. 26: Lok Sabha seat 14 umna Assam ah 17th Lok Sabha election 2019, Phase-I ah Lok Sabha seats 5 a ding in candodate 45 ten nomination a file ui. Phase-I ah ah April 11 leh vote khiakna ding Assam Lok Sabha seats 5 te chu - Tezpur, Kaliabor, Jorhat, Dibrugarh leh Lakhimpur te a hi. Tezpur in candidates 10 a um a, amau lak a chun, state minister Pallab Lochan Das of BJP leh Congress retired bureaucrat M G V K Bhanu te le a pang ui. Kaliabor ah candidates 7 um in, sitting Congress MP Gaurav Gogoi leh AGP candidate Moni Madhab Mahanta te le a pang ui. Jorhat ah candidates 8 um in, amau lak in, state minister Tapan Gogoi of BJP leh former Congress MLA Sushanta Borgohain ten le nomination a filed ui. Dibrugarh ah le candodate 8 um in, sitting BJP MP Rameswar Teli leh former Union Minister leh Congress veteran Paban Singh Ghatowar ten zia mun a chun nomination papers a filed ui. Lakhimpur ah candidate 12 um in amau lak a chun, sitting BJP MP Pradan Baruah leh Anil Borgohain of Congress tele a pang ui. Alangkhatlam in second phase a ding ah nomination file te lak in sitting Congress MP from Silchar Sushmita Dev leh a kitetpi Rajdeep Roy of BJP, sitting AIUDF MP from Karimganj (SC) Radheshyam Biswas, sitting Congress from Autonomous District (ST) Biren Singh Engti te a um ui. Hiatthei khat chu, 2014 Lok Sabha polls a khan, BJP in seats 7 a lua a, Congress in seat 3, AIUDF in seat 3 leh Independent candidate in seat 1 a lua hi.