Doctor ka hikei a, numei lam toh kisai a siamna nei le ka hi bok kei. Himahleh, laibu a ka simkhakte ban ah theihtheihna tuamtuam apat awlmohna toh Teirolte’ Thuguk tamlou phorhkhiak poimoh ka sa a, abiiktak in, nungak-nou (teirol) te’n ahamphatpih uh ka lamen.

Bangziaktak a numeite ahong nungak dekpat (teirol) chiang ua thil ngaihtuah ngeetnguut ua, nu-le-pa’ thuhilhnate za theilou ua, lawmte mahmah khelah ahi ding uh? A thukhel ziak uh hi tuanlou hi. Naupang hinkhua apat piching hinkhua zangtou dia a taksa u’leh a lungsim ngaihtuahna uh kikhen hun ahih ziak ahi. Pasal’ sang in numei ah hiai kikhek danglamna nasazaw a, huai chu, khateng a numeite’ niiknin (khan-si) neih ahi. Hiai ‘si’ pen a omdan a theihma ua thil lamdangpi ahihman in a omzia chiangtak a theihsiamsak poimoh petmah uhi. Nidang in Singngat ah, nungak khat in ‘si’ aneihtung in lamdang salua a, akhut a jutduam in, “Kaaa, san eee, (nam inchin) uih zomahlai” chi!

Ahihleh, si neih kichi bang hi ahia? Bangziak a hong om ahia? Bangchik chiang a om ding ahia? Nasa semsem ding hia beinawn pah mai ding? Huchibang a numei dangte’n le nei saam aduam? Si neih kichi omlou hileh bang achi di? Hiai dotnate kuamah dong ngam silou in, theihnopna toh ngaihtuah ngeetnguut sek ua, amau’ khovel kisiamtawm a khosa in haksatna tampi thuakloh thei uhi. Huchibang dinmun a adinlai un alungsim buaina uh theisiamsaktu ding poimoh petmah ua, thuhilhna leh kaih-huaina hoihtak ngahloute’ adi’n hinkhua zatkhelhtheihna hi a, a hihna tan ding uh, a tunna tan ding uh hihlouh/tunlouh phah thei uhi.

Nu/Nungak piching ana hisate’n mahni kingaihtuah a, bang chiah ka phak a ‘si’ nei ka hia chih suikik a, huai dungzui a i ta/naute mahilh poimoh mahmah hi. Mahilh apoimohna bel ‘si’ ahon neihpat chiang ua hilhpat in zekailuat theih a, ahunma a maituahdan ding leh kikepdan ding, hahdamtak a thuaktheih ahihdan hilhkholh ngeingei ding ahi. Aziakbel, huchibang vual ahih hun uh kha mahni kimuanzohna aneih hun laitak uh hi a, lawmte’ gen a theih maimai hilou a, lawmte theisiamsaktu hizaw dia Nu in a theihkholhsak chiang in a lawmte’ lak ah ‘pil leh kizen’ chih loh ua, huchibang dinmun a koihtu Nu ahon muanngamna leh ngaihsanna naktak in kibehlap hi. Hiai huntak ah amah a kimuanngamna leh kimuanngamlouhna chi, a damsung a adinmun bawltu ding kituh thei hi.

Huchibang ahihziak in, Nu in, nungak-noute’ genlit, zumhuai asak uh, a lungsim uh gimsak a mangbangtak a koihtu hiai ‘thil’ aneihpat hun laitak ua awlmoh a ompihtam a, kithuahpih poimoh petmah a, ahaksatna uh, lungbuaina leh tunung a beidotna atuah hun ua le bangkim a Nute ahon rawn theihna ding un hiai hun a kineelsak a lawmhoih bang a kithuahpih ngai hi. Huchi hileh tangval/ngaihzawng a neih chiang un le hon hilhpah ding ua, a deihloutu’n gai, khodung-khovai a vakthaap chihte omlou deuh ding hi. Huaiziak in, “Kei le ka hunlai in kuama’n hon hilhkei, ka theisiam tei mai” chimai lou a, i tanu/nau’ awlmoh a, hilh ding leh hilhlouh ding khensiam kiphamoh mahmah hi.

1. Lauhhuai lou, numei pichingte’ thiltuah ngeina, nau pai (gai) theita chihna, thil niin leh kihdakhuai hi mawklou ahihdan hilh ding ahi.
2. Hunbi nei a thiltung, khabi chin teng a hong om ding, atamluat/tawmluat hun aom leh taksa a danglamna om chihna, doctor kietsak ngai ding ahihman a huchibang a aom chiang a iim louh a gen pahpah ding ahihdan hilh ding ahi.
3. ‘Si’ neih ahun ding chiang a taksa leh omdan a anuamlou omthei, huaite’ ziak a lungkham ding, huphurhluat ding hilou ahihdan theihsiamsak ding ahi. Mihingte, zunthak leh ekthak nuamlou chihte omlou hileh mun khenkhat ah kimualphou kha thei hi. Huchibang deuh a, numeite’ khabi thilneih a tun ding chiang a ‘anuamlou’ omte kha kivenlawkna ‘warning’ ahi chi a theihsiamsak ding ahi. Ahuchih kei a, a huphurh-huai zawng a i genpih laizang leh bel ‘ahun’ atun ding teng a paracetamol nei mai d’u a’ihkha!
4. Mihing’ damtheihna a kibatlouh dungzui in numeite’n a hunbi uh a maituahdan uh kibanglou maithei hi. Akhente’n bangmah a aveilouh lai un khenkhat-te bel damlou bang khop a lup ngai, nguai leh taksa na tuntun in om kha ding uhi. Atangpi in, huchibang a vei ngoihngoih a haksatak a khateng a thuak i chihte kha taksa lam sang in lungsim ngaihtuahna lam apat kipan hi zaw sim a, ahunlai a mahilhna leh theihsiamsakna dawng khaloute hi nuam mahmah uhi. Huaiziak in, a damsung ua ‘khateng a thuakbiik pawl’ a apan kumkhua louh na ding un akipattung a hilhpil poimoh hi.
5. Hilhdan siam le poimoh mahmah zel. “Ngaihzawng neithei vual na hita chihna ei voi” chi khawng a genhouhsakluat khak ding le pilvan ngai hi. Tumlam gamte khawng in numeite’ khateng lawh lak kha nau neihtheihna, numeite’ tanvou manpha mahmah ahihna lam a ngaihtuah lou in, noksak leh ninhuai a koih in ataksa pianzia uh bawl danglam sek uhi. Huai chu Pathian zahtaklouhna ahi. Huaiziak in, Nute’n tate’ zak a khateng period neih aninhuaidan lampang zawng a genlouh hoih hi. Aziak chu, nungak-noute’ngaihtuahna ah Pathian’ thilpiak ahihna lam theilou a, noksak leh ninhuai a ngaihtuah a, haksatak a nau neih sang a ‘suul paih’ a zangkhaitak a khosak vahvah utna neithei uhi. Sex kha nau neihna ding hilou a, nopteenna ding dan a akoih khak zomah u’leh bel ahinkhua uh kichaivawt himai hi. Huaiziak in, nungak-noute’ zak a paukam, hilh ding leh hilhlouh ding pilvan mahmah poimoh hi.

Numeite’n khabi a athilneih uh hi pichinna lampi zuih akipatna uh ahihdan hilhna remchangtak ahi. Naupang apat piching dinmun a kidopkaina ahihdan, naupang bang a taal maimai thei hi nawnlou, innsung nna – tui toi, kuang sil, ann hawi, ann huan, tuang jut leh adangdang sepsiam kisin hun ahihdan theihsak a, huai ding a chiil hun ahi. Hichibang a numeite’ thuguk theihsiampih apoimohna chu, nungak, pasal neithei vual ahong hih hun uah, pasal neih nitak leh khabi thilneih kituahsak rehruh khawng Nu-le-Pa mawl over chih chetna ahi.

Numei leh pasal kitheihkakna leh dinmun toh kisai in, a khateng thilneih ziak un numeite’n pasalte’ sang a nuainungzaw, kizenlouzaw leh zangkhailouzaw a kikoihna neithei uhi. Ahi a, a thiltung sang in a maituahdan poimohzaw a, i taksa a thiltung kibang gige ahihman in i maituahdan leh i kikepdan ah mite’n hon hehpih/musit thei uh a, hon kih hial thei uhi. Huaiziak in, hichibang hun ah i poimoh ding vanzatte (sanitary pads) koimun ah om lehang le kigingsa a neih gige hoih a, mi’ lak a mualphou louh na di’n kikep siangthou baihlamzaw ding van a kithop pilhuai hi. Huan, pasalte’n leng numeite’ dinmun theihsiampih a, a mualphouna ding zawng uh, a zumna ding lam uh hilou a, haksatna leh ahunloupi a tuahkhak phut thil aneih ua leh leng kivenpih a kithuahpih hi pasal pil leh felte’ omdan hizaw hi.

Numeite’ Thuguk gentaak vanglak leh, hun bangtan hiam paita apat ‘Eimi’ nungakte’n India khopi tuamtuam a sawkgawp, sualluih, vuak leh thah tanpha atuah deuh zut uh toh kisai tamlou ka kum nuam hi. Eiloi, i nalhpih leh nalhpih teilouh lam ngaihtuah khollou a mi’ kicheidan nalh i sakte enton a zui pahpahte ihi uhi. Pasalte le kichei ngaina leh kicheichei mai tawk om mahle, kicheina lam ah numeite uangzaw uhi. Ahuchih ziak mah in tuchiang ah numei tamzaw in khekor teng uh a, himahleh, theih dia hoih chu ‘tulai numeite’n khekor gak taktak teng mahle uh niik sang in suahkhiak baihlam sazaw uh’! Khekor naran hilou in khekorbul peuh ahihkei leh abawkna-akuakna tengteng langvek khop a tight leh armless vuak toh kholak a vialdian ngamte hi uhi. Huchibang a, mi, sahkho kulmut leh numeite’ dinmun niamna mun, vaigam khawng a kicheidan huntawk i va theihlouh ziak khawng ua mi’n hon simmoh ua, hon maingap ua, hon sawkgawp pahpah ahi d’uam? chih ngaihtuahtham ching hi.

A kigendan in India gam khopite a numei khekorbul, armless leh chappal vuak khawng toh kholak a vak i chihte, khualzinmi ahihlouh tawp un le khotual mihausate’ tate, ut hunhun a London, Paris, New York lengtung zetzet-te ahi uh, chi uhi. Huchibang class sang leh neinung, car lakh 10 man nuai a tuan zumhuai sa, credit card zang a van lei ziahziahte ahihkei vanglak u’leh lah ‘kizuak’ chih dandeuhte hi ding uhi. Huchibang in Vai pasalte’n khopi a eimi numei kichei loose deuhte, agintakthu un chi 3 in hon khen uhi – mihausate’ tanu, kizuak, leh khosaklam apat khualzinmi. Himahleh, i dinmun taktak uh ahon theih chiang un, amau hon gintakdan toh kilehbulh ahihman in hon simmoh ua, hon zuam ua, ahon iplah uhi.

Gentaak bang in, eimi nungak, Delhi(?) kholai a loose deuh a kichei a a va vaak zahzah chiang in, khosaklam apat khualzinmi hon sa ua, Buddhist hi di’n hon koih tangpi uh. Ahihkei vanglak leh, numei kholoudeuh lampang hiam, mihausa’ tanu hiam in ahon koih uh. Himahleh, a Raja muam, kam dimdim a kuva hai a tuahna peuh a sunu taat, dawr a van a leina a credit card phorh dia a lamet lai ua sumtang a pia, a gamtat-khohei himhim ah class sangtak mulou uh. Driver tuam nei car changkang deuhmai a taipawt dia a gintat lai ua Auto ana khaam, ‘bahara’ dong zomah. A hoh sawmna mihausa veng hiam, five star hotel di khawng gen dia a lamet lai ua, veng bolhloh leh kilkawm deuhmai hidaih. A kicheidan leh a bouruak bawlkhiak kituak mahmah lou a’ih chu! Huchia – Indian class sangtak apat piangkhia mihing hilou, Rupee value niamzawkna gam apat khual hong zin hilou….. chih hon theita uh. Huchi’n, Auto driver in numei lepchiah leh omkholou, ut-le-dah a sawktheih hi di’n ngaihtuah a, a dinmun se gawp himai!

Mihingte hi, i kimuhtung sang in i kikhen ding kuan a ngaihsanhuai i hihdan i kitheih leh i kingaisang den a, ahoihlou lam a i kikhenkhak leh bel, i kimuhtung in kikoihsang sim lehang le, ahithei nawn taktak kei. Huchibang deuh in, khopi a eimi numeite hi, i va kicheidan leh gamtat-khohei apat zuamhuai, iplahhuai, muhsithuai mahmah a mi’n hon na chiamteh uh hikhathei hi. “Oho… gintak sang a feltak, zahhuaitham leh ngaihsanhuai mahmah ana hi akale, simmohhuaipi i na sak vial leh” ahon chihtheih nawn na ding un chu, kum 5 beek akivei angai maithei.. Khenkhat in, ‘a hon theih utdandan un hon thei u’heh, ka hihkei naak leh’ i chi ahi maithei, huaitak ah i ze kibatpih, i chipihte’ adi’n thaang (trap) lauhhuaitak i kam chihna ahi. Huan, eimi numei teng a kichei duhdah uh, aomdan uh ahoihkei chi i hikei. Khekor teenlouh di, puanja ngen kaih dawldawl di chi i hi zenzen kei, amun leh mual khensiam poimoh hilou hiam? chi i hizaw.