"Hey, nangpa, newspaper a thu na gelh chiang in lah pil-a-pil na bang a, lampidung a meh khawng na lei chiang in lah hai-a-hai na bang a". – Ms. Biaklun
"Chidan e. Kerkor eive, khawl dih" ka chih leh a paisuak teitei a, maivunsah, mitkhukthuk, midukdaklou, musit-te' tutphah a tu ngeilou, kuamah' puanak tualmong a leng luangkhe ngeilou hi kholkei mahle'ng, ka kamtamna khaam zoulou in mi' lakpi ah "na &#@%$ hia" ka chiphei kuau kha hi. "Eh, hon huchih vial k'oh aw, Miss YPA na hihlai a leng k'on star tuanlouh na hih kha" ka chi-ngam chiah kholkei na a, a pailiam nung a a thugen ka ngaihtuah thak leh nidang deuh a ka U Ngur leh Mungte' kihouna ka phawksuah hi. Mungte in, "Pu Ngur, mihai na bang e" a chih leh, ka U Ngur in, "Nang a hailou na bang e" chihsan. Mihaite a kipilsak nuam mahmah ua, mipilte lah haihuai pipi khawng in a khawsa khanak uhi. Huaiziak in, mihai bat a pil kiukiau hia ut-huaizaw, mipil bat a haiviau? Nang' ngaihdan hi.
Neulai, Class III/IV vel hihlai in teacher-te'n pichin nung a hih-ut, sep-ut chihte, damsung a khawsak tupdan (aim in life) ahon dong sek uhi. A omzia leh huaite tuptaktakna neiloupi in kidawng sek a, huailai a i gente anung in huai dinmun ah, atamzaw kiding lou hial hi. Atangpi in numeite'n Nurse chipah uhi. Lawmte khat in 'chief guest' ahon chih leh ka nuizak uhi. Tunung a ka ngaihtuah thak chiang in chief guest hih ding tup a ana neih kha asiatna om hetlou, hoihlua ahihdan ka musuah hi. Aziak chu, chief guest a pankhaktheih na ding in milawhching, mi' tung a leeng, officer hihlouh tawp in leng sumhau hih ngai hi. Kei chu huchibang-mi ka hihlouh ziak in chief guest in ka pangkha ngeikei a, ka pangkha ngeikei bok ding. Nikum a Delhi Singngat Special Meet a neih dek un lawmte'n ahon hilh ua, chief guest dia ahon chial khollouh ziak un ka va uap tuankei, huai hi'nteh chief guest a ka pankhak teuhpen, lai in.
Ahimhim in Chief Guest hih leng huchitel in ka ut kholkei. Chief hih bang leng ka utkei, ka khua-le-tuite' sang in kei leh ka inkuante khawng ka khualzaw kha ding. Khawsung khantouhna sang in ka inn-le-lou khantouhna ding ka ngaihkhokzaw kha ding. Ka khawsung a ana daikilkar-mi zawdeuhte khawng dopsang naksang in ka simmawhlaw kha ding! Guest hih bang pheiphei chu ka ut teuhkei, mikhual hih a noplouh-louh tawh, i bag sung kia a thu kinei. Mizoram a vanzuak a ka zinlai un chu ka sengvang (bawmrang) puak a lian zou khop a, ka thuneihna a liandeuh. Kei chu ka maingal himhim bok a, khatvei, Khawbel khua a inn khat a, "Ka hong tungthei diam?" ka va chih leh, "Paite mikhual ka deihkei uh" hon na chihsan uh. Ke'n leng kongkhak bul a ngakngak mai, atawp a "hong tung mai ve leh, mi' annhuan nung khawng in tun-inn na zong duuk-duuk ua" hon chi khong. Ann nek hun a naupangte' kar va keek in, gilvah a ne veve. Huaiziak in, mikhual chu khuallian hi in, khual zahtakhuai hileleng......ka chivak kholkei!
Eiloi lak ah chief guest zatdan siamlou taktak kitam hi. 'Siamlou taktak' chih sang in 'siamlou chikchik' chi lehang adikzawk louh tawp in leng nalhzaw leh kilawm. Thumna i neih chiang bang un leng 'Toupa kei hatloutak mai....' khawng i chi sek uhi. Hatchik chih omthei lou ahihman in 'hatlouchik'/'hattak' chi in zang lehang nalhzaw hi. Thugentu khenkhat in leng 'mawltak a gen in' chih zang sek uhi. 'Mawlchik a gen in' chi le'ng kilawmzaw......kei' ngaihdan in. Chief guest zatdan siamlou ka chihna chu, a programme tawh kisaikha hetlou, huai lampang a lunglutmi hi khollou, ahihna leh programme vai kituak ngellou pipi khawng ah mi khenkhat chief guest di'n i chial sek uhi. Etsakna leng hi ka hon gennop chu, DC leh SP bang i district a dia top official hisam ua football tournament khawng, Advent Christmas, musical programme chih khawng neng te ah chialchial chi hi in ka koih kei hi. Ahi a, siamna ban ah kuhkalna tawh milian (officer) hong hi ahihman un student-te tawh kisai programme khawng ah bel chial a, hasotna thu hoihtak-tak gensak ding mah ahi. Alehlam ah lah, sum a hauh nak uleh chialmawh i nei tuankei zel uhi.
Chief guest, guest of honour, chief host, special guest, leh special invitees 20 vual mahmah kichialkhawm ahih chiang in Rs. 2000/- chiat khawng hon pe maimai le uleng, senna teng kidinzou na inteh chi in Voktal tuk 5 leh meter 340.16 (sutvom-khat-guk) kilohertz 882 ka gou top mai ve. Khuallian-te' ann-nek sung in bangbang hiam k'on gen lai ding. Zogamonline.com in Music Award ahon sai uh kipahhuai ka sa mahmah hi. Hiai thu ahong gintunglai in, bangbang condition om a, bangchi sai sawm uh hiam chih theiloupi in "a fair taaaaaaak a leh ka ek ka ne di" chi in ka comment a, mi bangzah hiam in kilawmlah deuh sa ahi ding ua, kam a hon gen a om ban uah phone call bang leng ka dawng nolh mai. Huaiteng leng kipahhuai ka sa himhim. Hiai Music Award ah ka lunglut a, ka ngaipoimawh a, hoihtak leh feltak a sai in hong omleh chih ka deihna ahi chih hon theihpih uh hi a ka theih ziak in. Hiai thu, Award hawmkhiakma teitei a gelh ka sawm himahleh remtanlouhna khenkhat ziak in ka hon gelh lemchang theikei a, tu'n ka hon gelh thouthou ding.
Eimite'n, mite' hihdan enton in, a bouruak in ahon buakkhak chiang in, phurphut policy in thil i sai teive zel uhi. American Idol, Indian Idol, Mizo Idol chihte ahong kithan mahmah lai, kum 2/3 paisa in, eiloi in leng bang Idol-dol hiam, Singdol hia, Dolhou hia, i sai tei neknek sam ua, khatvei kaan i sai zoukei uh. I lunglut taktak kei uh. Huaite leng, gen-le-sak neuhneuh a om vek, zawmah in! Siamsin Music Awards (SIMAS) achi ua, Zogam.com in kum 2008 in Writer's Award a chinawn ua, kum 5 vel a paita, adang a om nawnkei. Mi'n bel kumteng khawng in a sai uhi. ZOLMA kha kum bangzah hal in ahong kisai nawn dia chih theihbut ahikei. Ka gennop zawk chu, kumteng bang in saithei in, mi' lunglut taktak na di'n sai vanglak lehang manpha in phatuamzaw ding hi. Nidang in leng ka gelhngei. Singngat Hill Model High School ah teacher ding in 9 vei ka ki-interview a, siam (hehe) mahle'ng discussion aneih chiang un ka ke zel. Kei' sang in O. K. Lun in a interview munzaw. 12 vei mawngmawng a ki-interview. Huai record chu, Lionel Messi in leng a khupkhezou naikei! ZOL users te'n lasaksiam a sakpen uh SMS tungtawn a a vote nung ua vaisaite'n discussion a neih uh ka gingta kei.
Ka comment tawh kisai leng genchet zek ka ut. Indo-US Nuclear Deal tungtang, newspaper ah leng ka hon gelhkha a, i theihchiat uh ka gingta. Huai thu tawh kisai in, opposition lamte'n naktak in a soisel ua, UPA sorkar in a puklawh dek zezen eihkha. Huai kha, opposition lamte'n a deihlouh ziak uh, hoih a saklouh ziak uh hi thahah lou inchin, hoih salua uh, deih uh, hileleng, felloupi leh America-te' hon nawmvalh na ding maimai thil ahihkhak ding a lauhman uh hizaw hi. Etsakna dang – Painar a pang ka hi a, lampisik ah tupi liangput in ka na pai laulau hi. ZOLMA Team-te gari hatdeuh in ahong tai ua, ka kiang ahong tun un, "Khawl dih uh, awltai deuh uau, huai a lamkoi khenzek ah menchim a om" chi in ka na hilh hi. Na theisiam uhia? Huai menchim ah nidang in accident ana om deuhreng! Thil i sai tei sek ua, soiselna ding om netnut in, fair-lou pipi in i zou gige uh, accident a om gige. Huaiziak in, negative comments a omlou-theikei a, huaite kha, lamhilhtu ahizaw ua, huaite' ziak ahi ding, ZOLMA feltak leh soiselbei (?) a sai a a om!
Eimi tuailaite' lak a ka ngaihsang mahmah mi khat a om, Stephen P. Doukhanlun. Zogam Today, monthly magazine ahihlai in khatvei interview kha uhi. Huai a a dotna uh, "Khatvei piangnawn ding hi lechin kuabang a pian na ut a?" a chih uleh aman, "Piangnawn ding hileng leng, kei mahbang a piannawn ka ut. Ka hinkhua paisa ah kisikna ding khat leng ka theikei" chi'n dawng hi. Thupi atave. Naupan hun leh tuailai hun – mihing' hinkhua a hun poimawh penpen, hun haksa penpen, khawvel sualna leh khelhna tuamtuamte paltouh hun, mihing' damsung a tunung hinkhua taktak ding kiseekna hun, hai mahmah lai napi a kipilsak hun, hoihpen leh felpen kisak hun teng palsuah tou a, sepna hoihtak (a sepna chiah ka theikei, Suanlyan Tungnung in thei inteh...haha) a neih nung a, huai hun poimawh leh haksa a palsuah sung a kisikna ding khat leng theilou/neilou chih himhim, huchibang mihing tamlou ding hi. Tamlou leng hikei, tawmchik kia om inteh. Tawmchik leng hikei lai, om manglou ding hi. Om manglou leng hikei lailai.... khat-le-nih kaan omkei inteh. Amah chauh houh hi'nteh. Eilam a om hileh chief guest in a kichial mun mah di.
1980s hunlai in damdoi khamtheih hong laang mahmah a, tuailaite'n khuh damdoi-tui Phensidyle, Corex, Benedryl ban ah a tang (tablet) tuamtuam thangsak mahmah uhi. Ka lawmte khat in, "Ka Phensidyle dawnkhiak tengteng abuk-hawm sengpi in hon pawsak dek le uh ka pawzou kei ding" chi hial hi. Stephen P. Doukhanlun, ka gintakdan in kum 25 vel hita ding hi. Kum 25 vel-mi ka hihlai ka ngaihtuah a, huai' malam a ka hunzatdante ka sutkik chiang in kisikna ding, hih ding ka na hihlouh, hihlouh ding ka na hih atam mahmah a, Thenjol nupi-neu' sengpi lian deuhmai in hon pawsak le uleng ka puakzawh ka gingta kei. Ahon delhlum khin tham ta ding. Kum 25 ka hihlai apat tuni tan a ka kisikna thilte tawh ka gawmkhawm nawn chiang in houh, puakkhiak a ninpaihna a vapaih ding hileh truck hire a ngai hial ding. Kei kia hilou, mi tamtak huchibang om ding in ka ngaihtuah. Workshop a puaklut a repair theih ahi nawnkei!
Nikum Christmas madeuh in HQ 27 Sector Assam Rifles, Tuibuang ah Officer khat ka va kimuhpih a, a room sung a baang ah hiai kigelh hi. 'Lawhchinna kichi numei gai tawh a kibang. Mitengteng in a kipahpih ua, himahleh, nau a paai na dia bangzahvei hih a om ahia chih kuama'n a theikei uh'. Dik leh nalh ka sa a, ka hon genbeh ek ding. Numei-te'n pasal ahon nei ua, nau ahon paai (gai) pahlouh chiang un amau lungsim ah pasal' ang a bitzou kisaklouhna omthei a, inkuante' lak ah leng kisuanlahna om in tuitumlou deuh a kitheihna om(thei) hi. 'Na om maimai ua hia?' chih bangleng lawhtheih hi. Nau ahon paai khongkhong ua, lawm-le-vual, insungmi leh inkiim-inpaam in leng kipahpih in, 'kha bangzah phata a?', 'kidawm deuh in aw', 'naupuan ding khawng na ngaihtuah ta uhia?' peuh chi in, pakta chiat uhi. Hileleng, huai nau ahon paaitheih na dia bangzahvei 'hih' a om ahia chih kuama'n kitheihpih lou hi. A pasal nangawn in theilou, a lai ve!
Mi kuahiam, lawhching, laisiam, milian, hausa, chief guest dinmun lenthei chiang ahong hih chiang in mi kuapeuh in kipahpih uhi. Loppih dumdum uhi. Kipahpihthu suah kheukhou uhi. Chief guest di'n chial vengvung uhi. Himahleh, huai dinmun chiang ahong tuntheih na dia bangzahta a haksatna, lungkiatna, damlouh-hitaan, maizumna, vual-enna, ihmutmawhna ana tuaktou a, bangzahta a kuhkal a, thum a, hahpan a, semgim hi hiam chih kua'man kitheihpih lou hi. Huaiziak in, "Success is like a pregnant woman. Everybody appreciate her, but nobody knows how many times she was f.....! Chidan e.
mangzouvl/22-1-2013