NUNGZUISUAHNA
(Khen Thumna)
“Kei kiangah a hong pai mite peuhmah in a nu leh a pa, a zi leh a ta, a sanggam numeite leh a sanggam pasalte, leh ama pumpi mahmah a nial ngam kei leh keima nungzui suak theilo ding hi. Ama singlamteh mah puatawmin ka nung hong zuilote, keima nungzui hi theilo hi” (Luke 14:26-27)
1. Tualniam nuntakna zang dingin sapte hi: Tualniam nuntakna ka cih ciangin Mikang pau in “simple living,” a cih uh ka gen nopna hi. Mikangte'n kammal a zat mahmah khat uh “simple living high thinking” (ngaihsutna sang ahih hang tualniam nuntakna tawh nungta) cih hi. Zomite sungah tulai atunga tawh a kilehbulh “simple thinking high living” (ngaisutna niam ahih hang nuntakna sang mahmah) om hi leng kilawm hi. Mikangte adingin gamdang hong zin ciang bek uh hilo Pasian thu hangin amau mahmah amau dinmun (standard) ah nungta loin a niamzaw a teel mi tampi om hi. A diakdiakin evangelical Khristian sungah midangte khualna hangin nuamtak a nungta ding kimlai niamtak a nungta om uh hi. Zomite adingin tualniam nuntakna i theihsa i sinsa ahih manin kisin tawm kisam peuhmahlo hi. Ahi zongin gamdang tung khin Zomite'n i theih ding deihhuai kasa mahmah hi. Tua bek hi loin Yangon, Mumbai, Delhi, Chennai leh khuapi danga teeng Zomite'n ahithei zahzah mi neih bang neih sawmna hangin ah i puk ding lauhhuai kasa hi. Pasian khut in hong domto takpi ahih manin sum leh pai i neih leh zong hih tualniam nuntakna i zuih loh pelmawh hi. Jesu nungzui na hih leh na Topa in vantung tokhom nusia in tualniam nuntakna hong teel hi cih phawk den in (Filip 2:5-11). Laibu gelh siam Richard Foster in tualniam nuntakna a teel mite adingin hih a nuai a nam sawm tawh na lamlak hi:
ñ Neih leh lamh na kisap bek lei inla, na dinmun (standard) lahna in lei kei in
ñ Hong zongsangsak thei nate khempeuh panin kikem in
ñ Kholkhol kei inla, neih leh lamh a kisamte pia khia pahpah in
ñ Hun tawh kisai zatzia siam inla, a manpha thei pen ding teel in
ñ Na khat peuhpeuh neih teitei sangin zat siam ding kisin in
ñ Pasian bawlsa nate pahtak dan kisin inla, zang siam in
ñ “Tu'n lei inla, a sum dam piak in” kici peuhpeuh lunglut sawm ken
ñ Kampau kidawm inla, thudik bek gen sawm in
ñ Midangte adingin gimna, lungkhamna a tun thei na khempeuh nial in
ñ Pasian Gam sangin na dang na lungsim hong la thei khempeuh pan kikem in
Ama deihteelna tawh nuntakna tualniam ahi nuam mite adingin laigelh mi khat in hih bangin na gelh behlap hi.
ñ Neih leh lamh kisam mahmah cih ciangah ciangtan neih ding
ñ Nasep nuam sa, sum thalawhin thalawh kei leh nasem nuam mi hi ding hi.
ñ Innkuanpihte leh lawmte tawh kikholh hun hoih pia mi hi ding hi
ñ Hun awngah ama lunglutna lam na khat peuhpeuhah a kizang mi hi ding hi
ñ Sum leh pai in a neih mi hi loin ama'n sum leh pai nei hi-zaw ding hi
ñ Khuasung leh minam sungah midang tawh kikhawl mi hi ding hi
ñ Ihmut hun, thalak hun hoih takin a pia siam mi hi ding hi
ñ Zatkhiat lam, nektum lamah kidek mahmah mi hi ding hi
ñ Biakna, thungetna, laibu hoih simna hun a nei mi hi ding hi
ñ Hih leitung puah kikna dingah ama hih theih bangbang sem mi hi ding hi
ñ Kim leh kiang siangthosak, singkung pakkung suante hi ding hi
ñ Thumaanna leh cihtakna, na manpha bawlna dingah kipia zo mi hi ding hi.
2. Hihna bangbang tawh zui dingin sapte hi: Topa in nungzui masate a sap lai-in amau hihna bangbang tawh zui dingin na sam hi. Peter leh Andrew, James leh John te zong ngasa man lai a sap ciangin a ngente uh nusia in na zuipah uh hi (Matt 4:18-20). Tua zawh sawtloin Matthai, siahdongpa a nasepna-a tu a muh ciangin, “Hong zui in,” ci-in sam a, a zuipah hi (Matt 9:9). Lai Siangtho siamte'n Matthai in Jesu zui dingin a paikhiat lai-in na khempeuh nusia a, a laigelhna laikung bek tawh zui a, tua laikung tawh Matthai laibu hong gelh hi, ci pawl om uh hi. Topa in i hihna bangbang leh tunna ciangciang tawh zui dingin hong sam hi. Laipilna, sum leh pai i neihte tawh zong zuihtheih hi.
3. Pasian innkuanpih dingin sapte hi: Nungzui mite ciamtehna khat ahih leh Pasian tate hihna ngah uh hi (Johan 1:12-13). Tate ahih manun Topa tawh innkuan khat zong hi uh hi (Eph 2:19, Gal 6:10). Upna sungah amaute Abraham tate suak uh hi; banghang hiam cih leh Abraham upna bang lim a neih man uh ahi hi (Luke 19:9, Rom 4:16, Gal 3:7). Tua upna hangin Abraham in Pasian maiah diksakna na ngah hi; gamtatna hi peuh mah lo hi (Pian 15:6, Rom 4:9).
4. Nungzui mite ciamtehna limte: Nungzui ciamtehna lim ka cih ciangin a kicing ahih loh hangin hih dotna a nuaia kigelhte na lungsim takpi tawh na dawng thei hiam? Nang nungzui na kicih hangin na nuntakna in hih ciamtehna limte neilo na hih leh na kingaihsut phat mahmah kisam ding hi. Nungzui ciamtehna limte in:
ñ Midangte' nasem nuam hi: Jesu in dinmun sang lamen nungzuite amau khe silsakna tawh thuhilh hi (John 13, Marka 10:35-45).
ñ Thungaih ding kisin hi: Mel kilamdanna mualtungah Peter in ngaihsutna tuamtuam a neihte a gen leh Pasian in a Tapa thu ngai dingin na hilh hi (Luke 9:35). Martha zong annhuan tawh manlah lua Jesu kiangah a gen leh Mary bangin a thugente ngai dingin na hilh hi (Luke 10:38-42).
ñ Kisin nuam mi hi: Peter in Jesu tui tunga pai a muh ciangin, “Topa aw, kei zong tui tung tawnin nang kiang lamah kei zong hong paisak in,” ci-in ngen hi (Matthai 14:28). Upna tawh kalsuan ding a kisin ngam ahih bangin nungzuite makaipa a suak hi.
ñ Hilh theih mi ahi hi: Martha annhuan buaina thu Jesu in a taihilh zawh amah zong tua thu ah hilh kik kul nawnlo hi. Lazarus sihna panin a thawhkik zawh ciang khatvei Jesu tawh ann ne khawm uh a, Martha in ann vak hi cih i mu hi (John 12:2). Topa hilhna thu Martha in zuipah in a Topa ann na vak kik hi.
ñ Makaite thumang hi: Ukna nei makaite' thumang thei i cihte nungzui ciamtehna lim khat hi. Makai ahih ma-un amau tunga thuneite ukna na zui uh hi. Tua hangin makai hihna-za hong ngah uh hi. Thumanna kici a om lohna munah nungzuisuahna piang theilo hi. Jesu in vantung a pa deihna sihna nangawn a thuak dongin na mang hi (Marka 14:36, I Thes 5:12, Heb 13:17).
ñ Kiniamkhiatna sin mi hi: Midangte lawhcinna ah lungdampih thei, pahtak dingte pakta thei mi hi. Amah sangin midangte a sangzaw ah a kilaptoh ciangin zong a lungdampih hi (Filip 2:3-4, Rom 12:15-16).
ñ Midang tawh upna ah kalsuan khawm hi: Amah bek thupi in kingahsunlo a, upna lampi ah khualzin khawm ciat hih lam phawk hi (Sawltak 2: 45-47, I John 1:1-3).
ñ Ama nuntakna ki-en cian (sit-tel) mi hi: Midangte' cinlohna muh baih mahmah a, eima cinlohna kimuh ding haksa hi. Nungzui mi in amah leh amah kisittel mi ahi hi (Matt 7:1-5).
ñ Ama cinlohna thei mi: Ama cinlohna thei ahih manin Pasian hehpihna tha tawh a nungta mi hi. Cing a kisa mahmahte cinglo ahihna uh hi. Pasian hehpihna hangin cinglo hong cingsak ahih lam kiphawk mite hi (II Cor 12:9-10).
ñ Cingtaak kisa mi hilo hi: Cingtaak kisa mite amau hoih kisakna nei, midangte thukhenna mit tawh en leh neu muh uh hi. Kuamah a cingtaak, kisapna neilo cih omlo hi (Filip 3:12-13, James 3:2, I John 1:8-10).
ñ Mi maisak hi: Midangte khialhna maisak pahpah mite hi (Matt 5:23-24, 18:21-22). Amaute ciamtehna lim pen Topa in amau mawhna bangzah maisak cih mangngilhlo ahih manun mite mawhna zong maisak ding hanciam uh hi. “Ka mawhna hong maisak in” hong cih manin maisak ding bek hiloin, hong cihma un zong maisak ding hi. I maisak madong ei mahmah zong maisaklohna henkol ah taang ihi hi. Midangte na maisak ciangin henkol panin a suakta khat om a, tua pen nang na hi hi.
ñ Muanhuai leh sep dingte thanuam taka sem mi: Nungzui mite in muanhuai in gamta uh a, nasep leh silbawl khat peuhpeuhah thanuam takin sem uh hi. I Pasian zong nasem Pasian hi a, a thadah a gimthei Pasian hi lo hi. Ama lim i sutna khat in thanuam takin nasem in i sep theih bangbang i sep ciangin nungzui mite lim lak i hi hi.
ñ Mi gensia leh siatna ding ngaihsunlo: Nungzui mite in midangte gensia in amau siat nading ngaihsut in neilo hi. Zomi sungah i cidam lohna khat pen “kigensiatna” hi. Khris lim leh mel suun khat a kisam lopi-in i gensiat ciangin hansuahna, thapiakna hi loin a dingto ding khat leilak denna tawh kibang hi. Gen ding dang i theih het kei leh bangmah genloin na om hithiat leng hoihzaw hi. Innkuanpihte gensia, i veng i pamte gensia – tua bang mite pen amau zong a hoihzaw tuan dingin kimu theilo hi. Tua bek hiloin hong kem siate khawng gensiat theih bangbangin i gen sangin thungetna limtak neihsak leng phatuamzaw ding hi.
ñ Hun zeekzia siam hi: Khris zui mite in amau nuntakna zeeksiam uh hi. Hun zeeksiamna pen nuntakna zeeksiamna hi. Hun om toto ding a, ahi zongin i nuntakna om tawntunglo ding hi. Tua ahih manin nuntak hun tom i neih sungin bang ci zat ding cih lungngaihhuai mahmah hi. Laisim hunin laisim mite'n hunzeek siam kisam a, tua mah bangin sum leh pai zong mite'n zong hun mah sum bangin zeeksiam ding kisam hi.
ñ Pasian lungdamna ding ngaihsun: Nungzuite in a zuihpa uh lungdamsak ding hanciam uh hi. Khris ka zui ci-in ahi zongin i zuihpa' lungdamsak nading nasem lo cih pen a piangthei hi vetlo hi. Pasian lungdamna bang hiam, bang ka cih ciangin Pasian lungdam ding cih ngaihsuthuai hi. Pasian lungdamna lampi i zuihloh manin nuntakna maimang tam lua hi. A mangthang kha khat Khris kiangah i tut ciangin Pasian lungdamna lian cih i thei hi (Luke 15:6,10, 22-24). Tua bekah Pasian a lungdam na hi loin a gilkial mi ann i piak ciang, a dangtak khat dawn ding i piak ciang, khualmi khat i zindo ciang, puan neilo puan pia in, cina kat i veh ciang leh thongkia khat a kiat lai-in ama kiangah i hawh ciangin Topa lungdamsak hi (Matt 25: 35-39).
ñ Thumang mi hi: “Thumanna in meihal biakna sangin ka deihzaw” (I Sam. 15:22) a cih kammal bangin thu ummite in thumang mite hi ding hi. Topa thu i man ciangin amah i zahtakna leh i pahtawina hi. Jesu Khris in sawlna lianpi nih hong pia a, “Pai unla, mite nungzui dingin na bawl un,” (Matt 28:19-20) a cih leh, “Na Topa Pasian uh, na lungsim khempeuh, na nuntakna khempeuh, na pilna khempeuh, leh na thahatna khempeuh uh tawh na it un,” a cihna ahi hi. A nihna in: “Nangma pumpi na it bangin na vengte na it in,” (Mark 12:30-31) cih hi. Hih sawlna liante i zui hiam cih ki-et dingin kisam mahmah hi.
ñ Kha Siangtho kimakaihsak hi: Topa nasep pen eima tha tawh kisem thei a, ahi zongin Kha Siangtho vangliatna tawh sem leng lamdang hamtang hi. Tua mah bangin i vai khat peuhpeuhah Kha Siangtho kimakaihsak mite nuntakna muibunzaw, thupizaw teitei hi (Zech 4:6, Gal 5:15-26).
Thukhupna: Topa nungzui mite ciamtehna lim pawlkhat i en khinzo hi. Nang, nungzui hoih na hi hiam, ahih kei leh nungzui lim leh mel neilo na hi hiam cih na kithei ding hi. Topa zui muanhuai, gahsuah leh ama lim suun i hih theih nadingin hanciam ni. I Topa in amah a zui mite gal-et loin amau tawh tonkhawm hi. Nang kiangah hong tonpih na kumpipa leh Topa' deihna bangin na gamta in. Tua hi leh eite zong “Jesu nungzui” i hih lam mite'n thei bek loin amau zong zuihnopna nei ding uh hi. Topa in thupha hong pia ciat ta hen. //
.