KAWLGAM KHUALZINNA | J.M. Ngul Khan Pau
(October 29 - Nov 19, 2012)
October 27 zingsang vanleng tawh Guwahati panin Kolkata lam manawh in ka leng uh hi. Tutung kei bek hong kisam ahih hangin Tedim khuapi dong paitheih ding lunggulhna tawh Dimnu leh ka tapa uh Daniel Gin Sian Mung in hong zui uh hi. Dimnu tawh Yangon dong nihvei ka pai khit uh hangin aman mun dang pha nailo hi. Netaji Subhas Chandra Bose International Airtport, Kolkata ah Pa Lian Naulak in hong na muak a, amau inn ah paisuak in zingann lim mahmah ka ne uh hi. Ama'n ka zintun nading uh Thawng Cin Thang (Thangbawi Naulak) kiang dong hong kha hi. A zing Nipini Kolkata Zomi Christian Fellowship ah kikhawm in thugenna hun zong ken ka nei hi.
Kolkata panin Yangon: Kolkata vanlengtual ah immigration check na munah Mizo numei khat immigration officer tawh kimu ung. Ama'n “Mizo pau na thei hiam?” hong ci a, ken zong, “Ka hria a lawm,” cih tawh ka kiho suak uh hi. Air India tawh Kolkata panin lengkhia nai nih sungin Yangon International Airport ka tung uh hi. Vanlengtual ah David Nawltling, a zi Go Ngaih Lun, leh a tate uh leh Sia Thang Khan Khen in hong na muak uh hi. David leh Lun sepna Myanmar Institute of Research and Mission ah ka paisuak uh hi. Topa huhna tawh kumsim mah in na khangto uh hi. Tua zan amau omna tawh kinaih Diamond Hotel ah ka giak uh hi. Tedim Baptist Convention Youth Department min tawh Kolkata-Yangon kikal ciah leh kuan kei vanleng man ding leh visa man ding hong pia pa Tun Khan Pau, pa Zen Thawn Mung, pa Pau Deih Lian leh pa Nang Lam Cin tungah lungdamna lian mahmah hi.
National Youth Leaders Conference: Bible Society of Myanmar General Secretary Rev. Khoi Lam Thang makaihna tawh Kawlgam Khangno Makaite Khoppi October 30-Nov 1, sung Myanmar Baptist Convention zum ah hun kizang hi. Thugen tampi lak panin kei zong Challenges Faced by Youth Today cih ka gen hi. Khangno makai mi 130 hong paikhawm uh a, amau denomination 10 val pan hong paikhawm ahi uh hi. Biakpiakna leh thusinna thalawptakin ni thum sung kizang thei hi. Kawlgam khangnote' haksatna nam guk hong kikum unla, tua ciangin hong pulak un, ci-in hun ka pia a, amau hong pulak nam gukte in: (i) Khamtheih guihtheih (ii) Zawnna leh cihmawhna (iii) Internet pan a milim hoihlo etna (iv) Sangkah zawhlohna (v) Zahmawh thu a kidek zawh lohna (vi) Pasian tawh kizop lohna hihte mahmah in khangno nuntakna siasak pen ci uh hi. Khangno makaite lakah Pasian in a zat mahmah ka muh manin lungdamhuai kasa hi.
Yangon to Mandalay: Air condition bus nuam mahmah tawh zing nai 8 in dingkhia in nitak nai 5 in Mandalay ka tung uh hi. Vanleng tuang dingte mah bangin bus sungah hostess maitai mahmah in hong kem hi. Bus sungah mainul leh tuidawn ding hong pia uh a, lampi hoih mahmah ahih manin kigim man lo hi. Sun hunin annekna nuam mahmah khatah khawl in tua zawh kitai kik vingveng hi. Mandalay ah ZBCM pawlpi chairman upa Do Zam Thang te innkuan in ann hong vak in zintunna Hotel Dynasty pen U Dai Lian te in hong sik uh hi. Nov 2, zing nai 10:00 pan nitak nai 3:00 dong thusinna kinei thei a, Mandalay sunga Zomi pawlpi makaite hong kihel thei uh hi. Rev. Kham Sian Khup in mipi muakna leh thuzaksakna kimtak hong nei masa hi. Sia Khup tawh ko innkuan ka kizop zawh uh kum sawm nih valzo hi. Hun masa ah, Mimal Kisiansuahna thu Late 51 leh 2 Sam 11 sung panin ka gen hi. “Thupha sang ci-in ei leh ei bangzah vei i kigen hangin, mimal mawhna panin siansuah i hih kei leh thupha taktak kingah thei lo ding hi,” cih ka genpi pen ahi hi.
Inntek pawlpite thusiamna tawh sun-aan lim mahmah hong vak zawh uh ciangin nitak lam ah hun nihna kipan kik hi. Hih hunah Innkuan Kisiansuahna cih thulu tawh Paikhiatna 12, Luke 15:8-10 siksanin Dimnu tawh ka genkhawm uh hi. Inn ninsak leivui leh momkhau bek hi loin, gamtatna leh thu hoihlote hangin ninzaw hi. Nu leh pa in Pasian zahtakna tawh hong gamtat ciangin a bulpi siangtho a, tua bang innsung ah tate zong gamtat kilawm leh Pasian zahtakna tawh hong khangkhia hamtang uh hi. Pasian thu mahmah in inn nin hong phiatkhiatsak ciangin, inn siang kinei pan ding hi. Mandalay Zomite tawh hun tamzaw ngah kik ding lametna tawh hun kihial bawl hi. Pa Thang Do Lian in a mawtaw tawh hong vakpih koikoi a, nitak ann Pa Cin Khan Pau te nupa in annsai ah hong vak phitphet uh hi.
Mandalay pan Kawlpi: Nov 3 zingsang nai 7:00 in Pegasus mawtaw tawh Kawlpi lam pai dingin ka dingkhia uh hi. Ko innkuan mawtaw saap Mandalay ZBCM pawlpite'n hong piaksak uh hi. Nai khat val ka tai zawh uh ciang Mungzua khua kitung a, lasa siam Sangpite innah zingann ka ne uh hi. Zomi khangno Pasian phatna lasiam sungah Kawlla tawh a minthang ngiat Sangpi tawh ka kimuh khak loh hangun (amah a nu leh pa tawh Australia lamah zin) a sanggam numeite'n hong zindona uh thupi kasa mahmah uh hi. Tua panin paisuak in nitak nai 8:30 in Kawlpi ka tung uh hi. Lampi pen guahzu citciat ahih manin lamsiat man bek hi loin lamnal a, kimanlang theilo hi. Lam nuam vive a gamtangte adingin dipkuathuai i sak hun om thei hi. Topa hehpihna tawh bangmah buaina om loin Kawlpi ka tung uh a, Rev. Job Thawngno leh siate pawlkhat in hong na ngak uh hi. Amau tawh ka kimuh uh ciangin lampi gimna khempeuh kimangngilhpah hi. Yangon panin Mandalay, Mandalay panin Kawlpi hong hong tawnpih, hong makaih Sia Thang Khan Khen leh a innkuanpihte tungah zong lungdam mahmah ung.
Kawlpi pan Gawngmual Khua: Nov 5 ni-in upa Kap Khen Pau thusiamna tawh ama mawtaw zangin Kawlpi panin Tedim khuapi dong nai 4 sung ka paito uh hi. Tedim Baptist Convention zumpi ah sun ann lim mahmah tawh hong na muak uh hi. Siate leh upate tawh hun tomcik sung ahi zongin kiho biangbuang in Gawngmual khua lamah TBC Khangno khoppi leh Tin Jubilee zang dingin ka paisuk uh hi. Tua nitak a kipanin nitak simin thugenna hun ken ka zang hi. Topa in khangnote bek lawng loin nupi papite zong ki-apna hunah kipiakna kinei ziahziah thei tawntung hi. Hih khoppi Nov 5-8 sung, Gawngmual khua pawlpi tuamtuamte UPC, EBC leh adangdangte kigawmin hong zindo uh hi. Ko innkuan upa Mangbawk leh nu Zamte inn ah ka tung uh hi. Hong it hong kepnate uh Topa'n thupha tawh hong thukkiksak hen.
A zing sun hun sungin thusinna zing nai 8:00 panin nitak nai 4:20 dong kinei hi. Rev. Dr. Pau Suan Kam in 21st century Khangnote' kalsuanzia ding, Pa Kap Khen Pau in Khangnote leh sumzonzia, Rev. Go Van Mung in The role of Christian Youth in Nation building, Pa Do Khan Khup in Youth and Sport Ministry, Tang Lang Khan Mung in Khangno leh Politics leh ken Mihing Manphatna ka pia uh hi. Khua kiim khua pam panin khangno bek hi loin nupi papi thungai dingin hong kihel thei uh hi.
Nitak kikhop zawh simin hun nihna kibawl den a, Karen, Kachin minamte namlam leh Zomite daklam, sawngsik, tonko lam, laphuah sa in kidemna, fashion show, skit, musical night cih bangin hun kizang hi. Ni nih sung guah zuzu kikhawmte lah tawp tuanlo, innteek annhuan sabawlte zong guahnuai ah sep leh bawl khawl loin sem tangtang in, kuama guahzuk manin kithadahsak cih bang om lo hi. Khangnote zong sunkhua mah in thusinna ah tu khipkhep uh a, kithumang mahmah kasa hi. Music leh phatna la tawh hong makaih makaite zong kipia zo mahmah kasa hi. Khuatualte kipiakzawhna etteh tak kasa uh hi, a gim a tawlna khempeuh uh Topa'n a zah tampi in thukkik hen.
Gawngmual khua panin Kawlpi: Upa Suan Pau te deihsakna tawh Nov 9 ni-in amau inn ah zingann ka ne uh hi. Hornbill Hospital zong Dr. Piang tawh en in thungetna ka neihsak hi. Dr. Piang pen Rajasthan lamah MBBS a zawh ciangin Tura Christian Hospital ah Medical Officer hong sem ngei a, tua zawh ciangin multiple specialist sinin a zawh ciangin Tedim khuapi ah i mi leh sate kem dingin ciah kik hi. Dr. Piang te'n vok khat hong gawh in a liang nih tawh Kawlpi lam Kapno mawtaw tawh ka ciahsuk uh hi. Nov 10 ni-in zing kikhop Tahan Baptist Church ah, Tainih a pai Khristian cih ka gen a, amau zong vok khat mah hong gawh uh hi. Tua nitak in Emmanuel Baptist Church ah Gunkuang Namthum leh Khristian Nuntakna cih zangin hun ka zang uh a, amau zong vok khat mah hong gawh uh hi.
ZCLS, A.G. Galilee Pawlpi: ZCLS inntekna tawh A cidam innkuan cih ko nupa in sun khat thusinna hong kihel makaite tawh ka zangkhawm uh hi. Nitak nih Topa lam innkuan (Late 127) leh Topa zahtak pa leh a innsung (Late 128) sung panin thugenna hun ka zang thei hi. Biakinn ah kitalo ahih manin amau biakinn huang sungah kitu dim phitphet hi. ZCLS in sepkhiat ding ngaihsutna a neihte uh thapiak ding leh lai leh pau kepcingna leh zuunna ding phualpi khat in ka tuat hi. Zomite sung ah lasiam leh music siam kitam ahih manin hih bang vai limci i neih ciangin zong amaute hangin mipi kithalawp, tha zong kingah hi. Ko hun ka zawh ciangun Yangon lam manawh in ka pai uh a, Pu Hau Khen Kham in Zomi leh Democracy cih thusinna neihpih hi. Tua nitakin Kalay ZOMUS makaihna tawh lasiam leh music siamte'n concert bawl uh hi.
Kawlpi panin Yangon: Nov 14 ni-in Kawlpi panin Yangon lam manawh in kumpi vanleng tawh ka leng uh hi. Kapno te nupa in vanlengtual ah hong na muak uh hi. Ka tunna ding uh YMCA ah hong kha uh hi. A zing ciangin GZA Central Committee Queen's Park Hotel ah kamkumna kinei thei hi. Nov 16 ni zing lamin Myanmar Baptist Convention a Mission Secretary Rev. Thawng Khan Siing tawh mission leh mailam nasepzia ding kikupna hun ka nei thei hi. Tua ciang sun hun in Rev. Ngul Cin Thang, MEGST a Church history lecturer tawh kum kik vai ding thu pawl khat geelkhopna ka nei uh hi. Nov 17 ni-in All Nations Theological Seminary (ANTS) ah hunzang dingin siapipa Lam Cin Thang te nupa tawh ka pai uh hi. Daniel Gin Sian Mung in laisimna leh social work a lunglutna hang gen a, Dimnu in Lai Siangtho sang ah a kah lai thumang mawh a sak genna nei hi. Ken 2 Tim 1:1-10 sung panin Fan the Flame cih thulu zangin thuhilhna ka nei hi.
Nov 18, Nipi ni-in Tedim Baptist Church, Yangon ah thugenna ka nei a, Innkuan tawh kisai dotna namli cih thulu zangin hansuahna ka nei hi. Tua zawh in Yangon Sizang Baptist Church ah Innkuan Nuam cih thu ka gen kik hi. Pawlpite thusiamna sunann lim mahmah annsai ah hong vak uh hi. Tua nitak lamin Ciimnuai Student (MIT Sanginn pan) te in hong kimuhpih uh a, thudotna leh dawnna hun nuamtak ka zang thei uh hi. Mandalay leh Kawlpi ah zong Zomi Sangnaupang kipawl khawmte'n hun hong zatpih uh hi. Tua nitak in Sia Go Chin Zam, OM National Director in ko innkuan leh Rev. Khoi Lam Thang ann hong nekpih hi. A zing ciangin Sia Zambawi mah in vanlengtual ah ama mawtaw tawh hong kha hi.
Zomi Khristiante adingin: Kawlgam Khristiante leh a deuh kholin Zomi Khristiante adingin ngaihsutna tamlo kong behlap nuam hi. USSR hong kitapma 1980 kiim in Leitungbup Khristian Kipawlna tuamtuamte'n USSR ah mission nasep ding lim ngaihsut mahmah uh hi. Hong kihon ciangin Europe leh America gam panin mission leh denomination tuamtuam lut in tua gam a Khristiante amau pawlpi (denomination) dingin sepna leh sum tawh na pantah na zol uh hi. Communist nuai a omkhawm Khristiante gam hong kihontak ciangin khenpi in kikhen uh hi. Bang hang hiam cih leh a suakta gam a om Pawlpite zong kigawm theilo vive ahih manun amau aituam ding ciat kituh bawl uh hi.
Nepal gam Hindu Kingdom ci-in kiciamteh penkum 1990 ma in kikhakcip bikbek hi. Ahi zongin Democracy deihna tawh kumpi khat ukna panin multi-party government hong suah ciangin gamdang panin mission leh denomination hong lut leuleu uh hi. Kei 1984 kum in Kathmandu ah survey bawl in ka pai lai-in United Mission to Nepal nuai ah mission nasepna khempeuh kipawlkhawm uh hi. Lai Siangtho sanginn khat om a, tua zong mi theih loh dingin leinuai ah laihilhna nei uh hi. Tu'n Kathmandu ah denomination tampi om khin zo, Pastor tampite zong khasum tampi pia zo dingte na bel mengmeng uh ahih manin Nepal gam Khristiante kikhen zihziah hi.
Thukhupna: Hih khualzinna ah gelhkhak loh, lungdam koh ding a kilawm tampi om hi. Ko innkuan in tuate hangin Topa tungah lungdam ka koko uh hi. Kong ciah ni un, President Barak Obama in Kawlgam hong phak ni tawh kituak a, Yangon vanlengtual ah USA vanlengpi nih na om hi. A zat ding mawtaw leh vandangte amau gam pan vanleng khat in hong pua uh hi. Ko zakna ah Kawlgam pen tulaitak leitung gam khualzin mite hawhna ah a thumna (third most tourist nation in the world) ci-in ka za uh hi. Hong kihon mah bangin hoihna tampi hong tung ding a, siatna in zong hong zui ding hi. Topa in a sim u leh naute thupha hong pia hen.