Abraham Sikhapan nungak melhoih Rebekah kiang ah dawn ding tui a ngetlai in Rebekah ading in khualzin dangtak tui piak thil kilawm, nungak gamtat ding dan mah hikha ding ahi. Himahleh a sa ngawngsau tui hai petmahte tui kon piaksak ding chih a mahni kipumpiakna pen a leen pih nungak dangte sang a tuam vilvelna ahi.

Internet ah Sa Ngawngsauten a tangpi in khatvei thu in tui 110 litre dawnzel chi uhi. Bible hunlai a sa ngawngsaute leh tulai a sangawngsaute tuihai dan kibang thou ding hi. Abraham sikhapan sangawngsau bangzah tonpih hiam chih kigelh chetkei mahleh a tawmpen in thum bangpha tham ding hi. Sa ngawngsau thum dawng ding tui a tawmpen in 330 litre bang ngai suak hi.Hanship centenary 1992 kum a Belsellui apan Jerekan tin a tui litre sawm le phalou ding ka hon tawi a haksatdan ka ngaihtuah kikchian nungak Rebekah ngaihsan huaina leh thupina ka musuah dedeuh hi.Khatvei ,nihvei ,eh thumvei tui tawi a pha ding hileh adan omlai ven aw.. Tampi vei mahmah Rebekah in a tawi ngai ding hi.

Mahni mohpuakna leng hilou, mi sawlleng hilou himahleh khualzin tawl a tui duhkha ding chih khualna a sa ngawngsaute dawnding tui a tawi kenken peih Bible hunlai in leng vaang in chia! Hichibang hehpihna lungsim nei lianu pen,Pathian in a damsung a tui tawi ngai nawnlou ding in mihausa ,sikha tampi mahmah nei ,Isaac pasal in peta hi.

Midang panpih theihna ding Pathian in hih theihna hon pechiat hi. A thupi lua panpih a, newspaper a kipahthu genna ding zen a midang panpih ding in Pathian in hon sam hikhol kei ding. Eimah omna mun a I kim I kiang ate panpih theihna hun lem chiklai peuh in hon pe gige hi.Tha hiam,sum le pai hiam,thu hilhna hiam , makaihna hiam,lam hilhna hiam , hehnepna hiam,lungsim thawmhaute vehna in I panpih theihna omchiat hi.Khat veivei panpihna khut I zak khak hunchiang in tawl tuam kisakna bang omthei hi. Himahleh Rebekah tawl tuamna Pathian in a haih kei chih thei thakni. Na hoihsep in eimah lungsim a kipahna honpiak pen manpha ahihdan phawk in sem zomtou zel ni..