NAUPANG SUALLUIH A OMTOH KISAI...
Written by David Son

Tulai naupang sualluih a om chih zak khak in om hong om zezeuh hi. A poi mahmah bel a thuaktu naupang a ding in damsung daih ding “trauma” suakthei hi. Hiai bang vangsiatna kuapeuh in tuakthei ihihna ah nu-le-pa ban ah kemtute ading panlak dan bang omthei hiam chih ngaihsut huai hi.

Khovel ah sualna chih bei ngeilou ding ahihman in kiventheih tawp a panlak kisam hi. Ei lam in I hih tam ngellouh in lah poimoh mahmah khat Sex toh kisai sinsakna ahi. Bang chibang a tate theihsiam sak ding chihbang naupang etkol siam penpen ten le haksa a sak uh ahi.

A neulai ua naupang I sil chiang in a zunthakna uh amau a liuliau, kuamah in hon khoihsak theihlouh ahihdan sinsak theih hi. “Kou na nulepa nangawn in hon khoihsak theihlouh nang a liuliau ahi. Huchibang hon khoihsak dek omleh na phallouh ding , na hon gen pah ding” chihbang in hilhthei hi. Aziakbel naupang ana khoih tu in kuamah kiang a na genlouh ding chih vauna nei ngeingei ding ahi.

Piching te'n naupang melhoih deuh isakte bang pakta in kipom nuam sek hi. Hiai chiindan a sia ichi zenzen kei himahleh “naupang enlah tute” a dia hunlem hoihtak hikha thei ahihman in pilvan kaan omlou hi. Ban ah naupang I pahtak lele va pom sese louh a hoihtak a houpih tiautiau theih thou hi.

News a hong kisuahte I sim chiang in naupang sualluih a omkhate nulepate'n neekzonna buaiziak hiam , etkol khaklouhna hun ah tungsek hi. Etkai gige kuapeuh in haksa sa chiat himahleh hiai sang pilvang leh ngai poimoh zawdeuh in kuate toh kithuah a, kuate a lawm ahia chih etkai zawkdeuh theihdan omkha ding hi.

Atawpna leh poimoh pen, zingkal thoh chiang a Pathian kiang eimah leh I tate kikepsak ngeingei ding ahi. Mihing lam a panlakna zaw Toupa a tellouh chia vuaksuak maimah sek a... (Psalm 127)