Kumpite galdou a kuan hunlai un David bel a leeng inn Jerusalem ah sun ihmut hithiat hi. Huchin ihmut zoh inntung a pan hong dakkhiak leh numei kisil a muta hi. Kumpi ahihna suang ahingei dia, numeinu samsak a, mi zi ahihdan thei gegu in luppih hi. A khelhna selna ding khelhna dang ngaisawn a,mohna neilou Uriah in a hinna tan loh hilhel hi.
David in a hihding tak galdou a kuan ahi. Huai mohpuakna Pathian in a piak ahi. Galdou in kuan leh huai nupi kisil va etlahna ding hun mu hetlou ding a, khelhna ah puk hetlou ding hi. Eimah hinkhua ah ki enchiat leng mohpuakna got a omte sem chitchit chiat leng khemna ah pukna ding hun kinei man khollou ding hi. Khopi khawng a laisim ding a nulepa’n hon sawl khiat uh leh, i mohpuakna laisim kia hiphot ding. Innlam thiltung , politics vai galvei luat hiam, va awlmoh luat phattuamna om khollou hi. Laisimna mohpuakna i neihpen ah gin om phot leng i gam politics ah mohpuakna Pathian in hon pethei lawding ahi. Nulepate’n teng tate etkolna i mohpuakna masa ahi a, tate’n leng i mohpuak masa leh thupipen nulepa thuman ana hihdan Bible in a gen hi. Huaiziak a khemna ah puk louhna ding in mohpuakna theihsiam a zuih kiphamoh hi.
Kumpi David in Uriah a thahzoh in BathSheba kitenpih a, zawlta uh hong piangta hi. Mihingte mitmuh in Kumpi David in khelhna neilou in lang a, meithai kitenpih chin minhoihna bang muzaw maithei hi. Himahleh van a om Pathian in mi diktat sisan mangngilh zenzen lou hi.David angkawmna sawtpi hita, ta bang piang zezen ta i chihchiang in Kha 9 bang val thamta chih na ahi. Kha 9 sung hehpihna hunpia a, kisikding a lam en himaithei hi. Huai hunsung Pathian in bangmah genlou , bangmah lohlou in dai dide hi. A hunta e a chihchiang in Jawlnei Nathan tungtawn in Pathian lungkimlou ahihdan theihsak in om hi.
Khovel ah Pathian thu toh kituaklou a huham deuh a vaihawmte nuamsa bang in i mu uh hi. Mite mittui luan ngoihngoihna ding a gamtangte bang mavang mahmah dan in kimusek hi. Diktatna hoih sak thoh chiat himahleh i gam a mun neilou bang sim hi. Huchibang hunchiang in Pathian in bang ziak a vaihawmlou a de aw chih ngaihsutna omthei hi.Himahleh tangtawn Pathian in vaihawm ahi chih theihchet hoih mahmah hi. Endih, Kumpi David khelhna Pathian in kha 9 nung in thukpan a, kisik ngoihngoih in ann ngawlzen thumna in ngen mahleh a ta piang hinna laksak thouthou hi. Khelhna man tuh gawtna in zui gepgep mai hi. Pathian in bangmah lohlou i chihte hehpihna hun a koihlai himaithei ding ahi. Huaiziak in Pathian vaihawm hun chiang in gawtna om teitei a, kuaman a thangpaihna nangzou lou uhi. Khang sawm tan a leng phuba lathei Pathian ahi.Ei hunbi tehna toh Pathian hunbi nasepdan kibang chetlou ahihziak lel ahi.
Kumpi David a kisik chiang in Pathian ngaidam a, a zi nanung pen BathSheba tungtawn in Solomon piak in om hi. Hinkhua ah bang chituk a khial hi in, bangchik tuk in vakvai lechin leng Jesu Khebul a na kitut ngeingei leh damna na muding hi.Khelhna ngaihdam zohlouh Jesu Kris in a neikei hi. Belam mang khat zong ding a belam 99 te nuse ngam Jesu Kris ahi. Kros a sisan luang nang le kei khelhna, nitna, chitlouhnate sawpsiangna ding in kidaih in kiningching law mahmah ahi . Kisik a amah kiang na naihleh Jesu Kris sisan ziak in siam tansak na hidia, Pathian ta a hong suak ding hi. Leitung etdan in hithei ding in bang kei mahleh nang hoihna,pilna ziak hilou in A ta na hihziak in vualzawlna lam chituamtuam na hinkhua ah na mu ding hi.
Simtute Missionary Day zatnuam!