Gelh a om bang in zingsang pi in na thou ua, na khawl hak mahmah ua, na sepgim gah uh nou din a thawn ahi.. Lungsim ngaihtuahna saudeuh in ngaihsun leng , sepna neihna ding a panla hang a, sepna I neih tak in sepna ah kibuai chiat sek a, himahleh I milesate a ding bang phatuam I sem khia a, hon siamtu Pathian a ding bang I sepkhia chih kidong mawk leng genhak pi khat hong suak ding hi . Niteng a office kai a kuan , nitak chiang a tung, I hinkhua bang chileng manpha zawdeuh a zatdan omthei ding hiam chih ngaihsutna lungsim ah om ngei hiam?
Mihing in lungsim ah thiltup leh lungsim a gelkholh a omchiat ding hi. Himahleh tamzaw ten I tup le ngimte tangtun na ding panla chiat mahleng a lohcing sitset tam hetlou ding hi. Ei deihtelna a paithei kitawm sim ding.Anai pen a gen college a subject deihbang mu zoulou! mihing in in I deihtel na leh I lem gel dan a hong pai louh chiang in lungkiat huai vungvung hun bang hong tungthei hi.Hinkhua ah I phakna chiang chiang lungkim dan theileng mi hampha leh nuamsa hiding ihi. Mi nuamsa mahmah hi a gintakte bang leng lungsim a puak gik pipi pua zong hithei uhi.
Khatvei Tripura a sem eimi khat toh houlim khakna ah na omna ah eimi tawm lawding a, chimhuai mahmah ding eive maw chin ka chiamnuih kha hi. Himahleh aman bel huchibang in ngaihsun lou a, sepna deih a zong ing a, Pathian in hon piakna mun ahihziak in nuam sa ka hi. Eimi a tamlouh ziak in eilam apan student hong paithakte’n hong bel zel ua, panpih theihtan in ka na panpih chin lungkim mahmah hi. Ahi nguttak, Pathian in student tampite belh theihding a ana omkholsak ahihdan ka muh in I nasepna mun chiat Pathian nasepna dan ettheih hita chin ka theisuah hi.
Siamsin Pawlpi Delhi vaisaina nuai ah programme khat ah Delhi a om masapente etna neih ahi. Huai programme a telkha Delhi omsa pen in Pa L T Ngaihte ahikha hi. Ka ngaihsut kikchiang in Pa Kam Delhi a om tunglai in bangbang haksatna a tuak de aw chih ka kan ngam hetlouh hang in theinuam mahmah ing. Zeldim thubawl leng vaipau houh a tate bang in siam balbal sam kei ven chin, Lawibuai Singtangpa pen “Nepali pa” chin vaite’n ana koukha himawng lele “Nepali pa hon chivial uh” chia a hehdan a genna ding NuKhawl loungal omlou ding !. Tulai dan a facebook a va highlight cheuh chihte lah omlou dia, innlam lawmte laithon khak ding chilelah kha khat val bang a hong kileh kikna ding angakngai ding ! Damlouh hitaan hun in vehtu ding Dorca pawl chihte lah mang in le matban kei unteh. Nitak zaal mang mat hun in Delhi tual a lenna mangmat khollou ding a, nungak helna mun a Pherzawl tangval te toh tetoh kibichiarh hun khawng mangmat zawdaih ding in ka ngaihsut sak hi. Naupai lai hun in Nu Khawl in suangmuat khawng a duhtha ana suakmawk hihen la, gongthak a Beteh meh lungngulh mahmah, Munirka vaiten zuaktheih ahihlam lam thei a, ana zuak peuh mahlou ding ahihman in NuKhawl hehna zaw tuakkha peuhmah ding hi...Sum lam taksap phutna om,kha loh lakding lah gamla laisim hun ah Zomi Welfare Association ahihkei leh Eimi Thrift society khatpeuh a loan va lakzualna ding lah omsam lou ding. Innlam a pan Super Fast Money te in hon khak un chihziau na ding lah omsam lou ding ahihman in sum lam management ah etton tak mahmah uhi. Huai hunlai in Delhi zaw ana ngaihhuai leh khiaklah huai tuntun ding in ka ngaihsut sak kei hi.
Ahi, PaKam bang a ana om masate tengteng khalim beel in ei a dang tampi te’n Delhi khopi tual ah loutul lampi tawn bang deuh in nuamtak in I khosa thei uhi. .Tuchiang in Saptuam hunkhop, social organization hunkhop bang I om ua, inn bawl in innlam vai teng bang Delhi ah patsawm I bang ua, himahleh innlam ahihlouh ziak in innlam vai tengteng hihtheih leng ahisek kei hi.
Khopi ah teng mahleng innlam thute’n I lungsim hon kambaih mahmah sek hi. Bang chi’n migam ah Zion late ka sathei ding ua chih ngaihsutna lian hiding a, tenna Delhi a thiltung sang in Lamka, Thanlon leh Singngat a MLAte’n bang gen ,bang sem uh chih bang kitheinuam zaw sim mawk hi, I gam ngaihna lian a, himahleh migam a I sepna nuam lou chia va kiktheihmawk hinawn lou hi. Vaigam a I sep zahzah in I gam ah sem leng nek I ngawl tuan ding a hia chih ngaihdan lianpi om hi. Hichibang ngaihtuahna pen semsate a ding in hihtheih louh ding wish list maimai suaksim ta hi.Himahleh sinlai te’n I deihtelna uh taksuah theihding in a manpha mahmah ‘hun’ kichi I nei lai uhi.Huai deihtelna I bawl ah I gam mahmah ah sepding I lunggel uh hunta hi.
Tuni chiang in Manipur solkar bang ah teacher lakna ding hong om zeuhzeuh a, nekgukna omthou maithei himahleh sum ziak hilou a siamziak a ching tampi I lak ah omta hi. MPSC bang leng siangthou lam hong manoh in a siamzoute a ding I gam a septheihna chance hong suak hi. Hichibang hun hoih kichi Pakam hunlai ah ana omkha khollou hiding, pasal chiatchiat sepna lei thahah lou e chihziak asepna state danga neikha tampi omding hi. I pilna hin I siamna hileh I mi le sate zarzoh theih ding in omkha leng manpha diak ding in ngaih sun ing. Tua hang in siamsin ten lungsim put thak nei a, I gam ah sepna ding opportunity hong omchiang a semthei ding a qualified petmah hiding in ana kisakhol leng, ei gam mah Zion late sa ding hihang e…
“I must prepare , for my opportunity will come” Lincoln..