Makuri dinmun bang ahia!
By Vungzamuan Valte

Unaunu Rebecca Saimawi-i ( Makuri) a kipuankhiakna fb post leh whatsapp ah kithehzak ahi di a muhkhakna khat ka neitei hi. Mimaltak a theihna nei kichi le lah a dik kholkei dia, huchitel dinmun ihih louh hangin Aizawl khawpi sung ah a tallang mahmah a, Vanapa Hall ah chalngam tak khat ahi.

Guite pasal ( a min gen lou) khat suan ahi, Pachuau sungkuan a numei khat hinkhiak ahi, apa lam ah Paite ahi a, anu toh belhkhawm in Mizo ahi chi'n genkhia hi. Lungkim huntawk mahmah ahihdan leng gen kawm lai hi.

Huchidan ahihleh, ei buailuatna di omlou abang sim maimah a, a hihna leh a mihdan genkhia hilel dan in koih theih veve hi. Mi'n huchi mi, khachi mi kahi, kei hiaite kahi, chia a pomkip inchu ahimah voi maw! Chihtheih kha a tawldam pen mai kei maw!!

Leitung ah numei te sung apat suakkhia ngen mihing ihi ua, numei tellou in mihing khat leng i piangkhe nai kei uhi. Surrogacy ichi ua, numei in a naubawm zangsak in nupa ... ta nei theiloute a neihsak thei uhi.

Matrialchal society khenkhat a om ua, nute lam apat kisui ua, gou leh gam kiluahsawn leng om thamtham uhi. Khangthu sutna dingin leng numeite lam la uhi ( Meghalaya ah, Gonds te etc)

A tangpi thu in America, Africa, Asia, Russia, Australia, Europe gambup tengteng ah mihing tengphial in patrialchal thuneihna kizang hi. Kulmut tak a et in, pate lam apat kisui ding mah ahihna om hi. Gamsa, gal leh huihsia, natsia omna khovel a khosa ihi ua, pasal thahat zawte khazakna nuai ah numei leh naupang a khamuang ua a khangkhia uhi. Huchidan a pasate kepna nuai a omlou hile uh piching zoulou, khosuak zoulou leh mangthang maithei dinmun ahihna uah.

Ei society chi le, Zosuante society ah numei dinmun a niam mahmah mai a, gou leh gam kiluahna, tate tung a neitu hihna leh numei chavaih maimai chia koihna lian petmah mai hi. Aziak bel, numeite suak leh sal dinmun phial a koihna kinei hi. Right ichih, birth right neilou tuak a koihna om ahi a, Christian hinkhua inle a bawlhoih zou tuankei hial hi. Numeite lu chu pasal ahi chia kithumopte leh pasalte chihdandan a omding a kithuhilh leh ginna kiptak neite ihih ziak un.

Hiai paidan leh tawndan, ichi, a khanggui, i hihna, beh leh phung, kinship relations leh indongta a kivaipuakna te kiptak in khuampi kiptak a kibawl, taise thei maimai ihih louhdan a gen chiang mahmah mai hi. Ahia, numei khat peuhpeuh in pasal tuamtuam nei teltul henla, a pasal te'n a tate uh la kei mawk le ubel, numei pen in a tate bang a lohta dia le??? Na pa va bel in, na pu va bel in, na sanggamte va bek in..
..achi maimah thei diam?? Naupang in a pa, pu,sanggam te theilou ahih maimah chiangin, bang mi asuak ta dia le???

Feminist kichi te'n pasal lam kia lak ding hilou ahi, numei te'n role tamzaw kinei ahi achi uhi.

Women empowerment saitute leh equality of both sexes chia tangkou pawl te'n pasal thuneihna kia hilou ahi, numeite mahmah poimoh zaw ahi uh, a niamzaw kihilou himhim ahi chi uhi. A dikna tampi om ngeingut dingin gintakhuai hi.

Huaiziakin, numei pasal neilou a ta nei, pasalte khen, pasalte sihsan leh aziak tampite ziakin numei khenkhat te'n pasalte toh khosalou in tate kem piching uhi. Tua dan a omkha te'n, pasal te tellou in khosak theih lua ahihdan leh, pasalte toh tenkhawm sese ziak a mihing te piching suak hizawlou in, nute kepna ziak a mihing hongsuak ahihdan uh a tate tung uah thei kichian mahmah kelkul uhi.

Huchidan ahih ziakin, pate gou leh gam kiluahna, tan neithei ahihdante uh thei touzel ua, equal rights to parental property, ancestral property chih khong tuhthei dinmun in omta uhi. Huaite mah ziakin numei te'n pi leh pu, nu leh pa te apat a gou a luahtheihte uh hon theisuah thakthak ua, equal right to parental property chihdan tanpha dan omta ahi hi.

Numei te'n pasal a neih chiang un a hihna uh taisan ua, pasalte lam koppih tangpi uhi. Hillary Rodham pen Hillary Clinton suak a, Rani Suri pen Rani Ranjan suak a, Chingnu Suantak pen Chingnu Naulak suak uhi..khovel paidan leh patriarchal society kivaipuak dan ahih ziakin.

Ahihleh, Makuri in kei Mizo ka hi a.. ka lungkim mahmah... bangziak a chithei ahi dia le?

Gamsa leh mihingte, hinna nei khempeuh te'n, chromosome kinei chiat a hiai chromosome sung ah ganhing leh mihingte hinna thuguk kiselgu om hi. I kichikhah theihna thuguk uh ahi a, chromosome kibangloute kichikhah theillou uhi. Ui in chromosome 39 aphik nei ua, gamsa tamzaw te'n chromosome 20 khong 22 khong a pair in nei tangpi uhi.

Mihing te'n cell sung ah chromosome hinna nak kinei a huaite pair 22 pha uhi, a kigawmkhawm in 44 chihna ahi. Hiai chromosome sung ah khauhual bang mai a kizial lom DNA kichi om nawn leuleu uhi. Hiai DNA kichite ahi i hinna naak. Chromosome tuamdeuh khat a pair omnawn leuleu a, hiai a 23 na pen a vaal hilou in, a tuam deuh khat ahi zaw a, pair mah ahih ziakin mihing te'n chromosome 46 kinei suak hi. Hiai pentak ahi sex chromosome ichih.

Sex chromosome pen numei te'n xx nei ua, pasal te'n x y nei daih mawk uhi. Numei toh pasal in ta a neih ding chiang un, numeite sul sung ah xx cromosome omkhinsa ahih ziakin, pasalte sperm ah x toh y kigawm khawm taituah heuhu hial uhi. Numeite bel a piantung uapat tui (egg) a neih ding zah uh omkhinsa ahi a, huaite lak a tui khat a ki fretilize theih hunchiangin, a kituahpih ding pasal toh kipawl kha hile uh, pasalte sperm a X toh Y khat peuhpeuh va lut hitaleh ki fertilize mai dingdan ahi hi. Sperm lak a ahat penpen huai numeite egg sung ah va tuaklut a, huchi in mihing hong kibawl khia ahi hi.

A omdan bel, numei te'n x neisa ahi ua, pasalte chromosome X a lut khak ngeingei leh chu X+X = numei. Pasalte chromosome Y a lut khak ngeingei leh chu X+Y= pasal. Huaiziakin, numei hiam, pasal hiam nau ahon paita hi. Numeite'n tanu ngen hon paipai mawk le uh amau mohna omlou ahi, pasal te'n i chi (gene) ipiak khak dan dungzui a ta numei hiam pasal hiam nei ihilim zaw uhi.

Hiai chromosome te'n i tate damtheihna leh hinkhua ding saupi gen nei mawk ua, huaipen bel xx + y, x+ y, xxx+ yy, xx+ yy ziak khong ahi tangpi. Numei hizenpi a pasal suak mahmah, pasal hizenpi a numei pian dendun etc. A pichin chiang ua ta neithei ding ahih uleh hihlouh tanpha hiai x+ y combination in gen nei mawk hi. Huailam gen sawm ihi kei.

Numeite sung ah zygote a hong kibawl ding chiangin, pasalte DNA chikhat (mitochondria) zang hetlou in numeite mitochondria chauh zangin mihing hong kisiam khe mawk hi. Pasalte panglou in numeite a gai thei kei ua, numeite tellou in Karan Johar loungal in taphik a nei ngei kei ( a suggrogate mother im tret trut). Hilele, mihing khat a hong kibawl khiakna dingin, numeite sisan, hoihna, siatna, lungsim, pheiphung, mit, nak, bil, khut leh khe a tamzaw ala uhi. Pasal in chu chii (gene) va khah-khe cheuh lel, a dang tengteng numeite tum vek ahi. A hong piangkhia ua, numeite sisan apat suak nawitui mah toh ahong khang lian lai zawmah uhi. Numei te'n kei ta ahi achi tonton namah ua, adik lua....

Mihingte numei leh pasal a hong kigawm chiang un kichikhah sawn ding a siamtu gawm ahi ichi ua, sex omlou hileh kichikhah sawn theilou ding uhi (traditional leh Conventional practice dan in, tulai inbel misisate sperm zang khongin numei a gai thei mawkta ua hiven). Huchia mihing nihte (nupa) chii (gene) ahong kipiaktuah chiang un, 50:50 share holders ahi uhi. Naungek hong piang khia in anu hihna 50% leh apa hihna 50% la tuaktuak a huaipen hereditary kichi hi. Kiluahsawn theih nu leh pate hoihna leh siatna tampi mahmah a omte tengteng 50:50 a luahsawntu naungek in anu personality traits, leh apa personality traits kichi achii ah belh in khenletpih hi. Hiaipa le anu lam sunna e, hiainu le apa lam sunna e, ichih a om, banghang a 50% tuaktuak lakhawm a mihing khat hong piang penin anu lam sun sese or a pa lam sun sese?? Hiai hihna kiselgu te a dawkkhiak hun om teitei sek a hidden talent kichi khong leh akpi noukai hangsawk bang lomlom ichih khongte ahun amun a izia hong suak khe thei veve hi. Recessive leh dominant gene te ziak ahi a, apa samkir thelthul ahih a, a tapa/tanu samkir thelthul ahih inchu a pa gene a dominant chihna ahi hi. A nu recessive gene pen a tu tung hiam ah hong kilangkhe veve ding hi.

Tuadan a mihing thak vilvel khat 50:50 share nei a ahong kibawlkhiak chiang in mihing tuam mawng mawng, anu lah hilou, apa lah hilou ahong piangkhia hi. 50:50 a ki contri ahihna uah, numei ta leng ahi a, pasal ta leng ahi hi. Solomon dan a nupi nih nau kituhte gensawm ihi kei..

Huchidan ahihleh, Makuri in Kei Rebrcca Saimawii, ka pa Paite (Guite) ahi a, ka nu Pachuau ahi a, a belhkawm in kei Mizo kahi, ka lungkim mahmah. Achih leh, huat luatna di a om diam?

Genetically, Medically, Scientifically...she is correct.

Himahleh, khang sutna dingin medical leh genetic thutak i zang kei chih man thu lel hi.