MOSI DANG PIANG NGEI NAWN LOU DING TANGTAWN IN
~ Vanlallian Valte
Khohun kikheng a phalbi hongtun chiangin kumkhat sunga thiltungte banah, ni 365.25 i zatliam dan etkikna sangin, khotheih kipana tuni dong a hun khat nung et baihlam zaw mawk hi. Singngat Roman Catholic Church te’n winter vacation hun awngthawl suam a sinima - Lai Siangthou a Thukhun Lui tangthute, adiakin, “the Ten Commandments leh Ben Hur" chih khawng a suah sek lai hunte uh ‘phawkluat lak ah’ telban veu hi. Ka khua ua cinema hall, video parlour leh smart phone genlouh 'handset' smart lou zet nasan a om ma tham ahi. RCte' huang lah khopua apan gamla sim a om ahih toh hawkdak dan thutuam hileh, peih tak zaw kihi veh aw! Khatveivei, sinima suaksak thei pah lou ua – lah guntuh taka ngak teitei; entai dimdem. Lusu sim kawm banga inn zuan a pai; lamkim tun chiang peuh a aak-khuan masa ging uul-uul!
Huai hun lai a mi tallang Khakhai Samte kichi in ni khat, a maingap diak khenkhat, (mipa’n maingap louh le nei khollou) “Tuni, nitaklam-ann nekkham chiang in father te’n sinima suah dek uh!” chiin khem laizang hiveh aw! Pa John Tuanzakhup in khodung-khovai ah paungaihna-liangput tangzaang zangin thupuan bawl het kei mahleh; pianphung a songnawina nei Singlian, Thangfal, Chiapau leh Lalrongbawl in namkipna bawl kei mahleuh, hiai tanchin kipahhuai in khosung zelsuak pah hi. Ahong huchih hial tak in, zuaugenpa’n le a thugen hon taksang samta hiven, baksam leng hial khop in RC te mun delh chenchen. Tung masa pawl in pang zawzen hi. Ngaidih, thuzuau mah ana hi lailai! Va aigupta gawp ngi-ngei hih chituak.
Israel namte suangtu Jakob leh a inkuante Aigupta gam a lut chiil un, milip sawmsagih lel ahi uh. Pharo maipha mu a Aigupta gam ukpipa ana pang - a tapa Joshep belh bawl kawm a kialtai hi thahah ve unchin! Hiai gam ah hong chipha ua, tampia kibehlap in gamsung ah hong pumdim uhi. Huchiin gam neitute'n hon mullit panta uh. Joshep theilou Pharo dang khat ahong lal zawkmah toh Israelte nuaisiah leh suk gentheih in hong om ta uh. Amite thuakgimna mu; a kah uh za a; a dahnate uh thei in amaute pikhia a gamchiam pitung ding in Pathian in Mosi sam hi.
Aigupta gam a ataam hun uh kum 430 sungin pasal piching, khe a lampai, galdou dia kuan thei 600,000 pha uhi. Mihing hontenna himhim ah galdou thei zah mililp sehlisuah-sehkhat hi tangpi hi. Aigupta gam a nutsiat tan un - numei, naupang leh teksia simtel in Israel te 600,000x4 = 24,00,000 pha zou mahmah ding uh chihna ahi. Aigupta mi amau zuih teel tampi simtel lai le, ganhon teng toh ‘exodus’ petmah chu ahi ve ua! Aigupta gam pawtsan nung kum nih chin khit in, Pathian thupiak bangin Mosi in Israel tate simpina nei hi. Theihpihna Biakbuk kem dia sehkhiak Levi mite simlouh in galdoumi 603,550 ching tel lawmlawm uhi.
Kikhiat in a naak om e khai! Taanglai Israel tate singgama a saltaanna uh Aigupta pan Mosi in pikhia a, gamchiam Kanan zuan in pai uhi. Ei zaw, Abraham, Isak leh Jakob' Pathian - Pathian hing bia hisaam mahle, pupa luahsa gamlei ah Aigupta gawp hang! Leitung ah mundang gamlei chiam in i om kei a, exodus bok kei ni. Ahihleh i galmual a zing ninou suak zelte ah lametna a om lai diam? “Om sam ken chin...” chi a mahni buut-buut-a-bu ihi ta uhia le? Zawlnei Mosi lah Kum sang vaihawmna om masiah, ahong pai nawn ding gintakhuai lou (Marka 9:2-3, Kilakna 11:3-4). Amah bangbang na-ngawn kou suah but di hilou lai! Hikei veh aw unaute, ei saltanna zaw: Pathian limsak louhna leh zekhem tupna; sung leh pua a polhtehna, zulhzauna angmasialna; nekguk ngaihdauna, leh; mahni metna dia gamlei sesum suah manlangna leh lungput kochiik tak khawng hilim veh aw!
Bangchita di? Johan 1:45 ah hichiin kigelh: “Philip in Nathan a mu a, a kiangah, ‘a tanchin Mosi in dan laibu a a gelh leh zawlneite’n a gelh uh, Amah ka muta uh, Nazaret Jesu, Joseph tapa’ a chi hi.” I Toupa Jesu mahmah in le, Johan 5:46 ah, “Mosi gingta hile uchin aman kei tanchin gelh a kei leng n’on gingta tading uhi” a chi. Laigelh sung ah Toupa Jesu, mohnei ei dia leitung a hong tualkum ding thu hun tampi: Paikan ankuang/kongbiang leh atung a belamnou sisan taat; gamdai a manna leh vengkeng a vakna, suangpi apan tui – Rephidim leh Kadesh mun ah, leh; gamdai a dal gul khaikang en a damna thute ah gelhkhol in om. I saltanna henkol sutpa zehphiit san nawn kei peuh le hon khotuah ding a mansa ahi. NANG mahmah ah kivaat hi. Kiman mai in. Mang pianni’n i gou neih manpha pen lungtang i laan diing uh. Hileh, aman kumthak 2018 loupa hingnou mitmet mun leh khawlna tuigei khawng ah hon tonpih diing hi.
VV’Laidiip/24122017