CHIPCHIAR NI
By Vanlallian Valte
1. Nidang in khua khat ah Pa Thansang kichi, tua khosung a sagou omsun hi lellel, pa chingkam khollou khat om hi. A pau kin dungzui in gamtat-khohei ah le kin-gang hi. "Gan a kaih leh a gan kaih' khe malam in leitual siik manlou; vaimim emmin khinphet a nek leh a nekkhitna vaimimbul vokpi noukai in ne ngam pah lou..." chih hi zawzen! Sa agoh chiang in azi leh tate'n a panpih zel ban uah, handyman diin Lianmang guai zel.
Pathianni zingkal chiang in salei nuam tam diak sek hiven, khatvei, salei dia kivual hunkhop omlai napiin saseh bei mawk a'itu. Kin le buangin bawnglaa khat gohbeh poimohna lian. Kinoh luatna lam ah a bawngvun hawk lai lentu Lianmang' khuttal giit keh duat – mipa'n naa sa'n khuisa vingving! Sagoupa'n, "Huaikhawng hemhem, bangmah ahi saam a hia, thankiik s* chia le ahihlouh kha!" chihsan. Thankiik in tawvang aneih ka thei a: zunthakna atuamneih lam ka thei ngei kei. Telsuimite'n a neel sung ah chii lut theihna hawmsawn khat nei ahihlam chian uhi.
Ni bangzahhiam nung in, Lianmang' khuttal kituam biaubuau ka mu hi. Aliamna ma hoihtak a nulhul; humbit phot; iodine leh betadine a om kei leh le khawnvaktui hiam tangsam leh tui suuk-khum a tuam hileh zaw damta khamohlou di hiven. Nasia a tuihi peuh lutsak hihtuak hi. Kongzing Carrom Leaque a commentator a pan mai louh tuh sep theih nei nawn tadih lou.
2. New Delhi a 'park nuamtak khat sung ah nupa kop-khat in Sycamore singkung lian huntawk leh etlawm khat teklei in sukchihtak in su uhi. Singvun thel paat nengnung a, thukpi a kehna mun le om hi. Tuak kha pawlkhat in a khouh ua leh, "Singnaai te mihingte vun a dia damdawi hoihtak ahi!" chi uhi. Amau vun' damtheihna dia singkung etlawmtak' vun soisa ek hi maimah uhi.
3. Suun nisat vanglai tak in Muangnu, restaurant khat a kihuihtheu diin luut. A kongkhak amah a kikhak kiik nawn thei te hiven, a tanu Hoihkim adia kongkhak let khawl sak dii phawklou in naupangnu' tal khenpuak buk hi. Naa sa'n kap. Minu'n "Heihui chin, na nung – na ma na en deuh ngal kei di maw ... kap ngam zawmah lai! Vuak belh na nop kei leh tawp...Kin!" chi zawsop hi.
4. Nitum' kuan a papi vaipai khat in Tuivai lui pang tawn hi. Tui kihot ging a zaa ta ngal a. "Ngabengmi' lenseh ging hiam, lawital kibual thawm tou hiinte..." chilou. Ngaihpha lou in va enkhia hi. Zodawn pasal naupang deihthoh-huai khat tuikia a sihsual ana hi. Mipa'n le amah hinna dia lauhthawn-huai ahihlam nawlkhin in tuili sung ah tawmlut in va hon khia. Suanpu: "Ka naak kipah – n'on hunkhia a..." Tanpu: "Bawi, na let chiang in, na hinna hutkhiak phu mah ahihlam phuang le chin chi na'ng e!" chi hi.
5. Naupang uinou' gimsi namlai te'n khavak nuai a kimawl nuam sa uhi. Kimawl khit chiangin, loupa tung leh singbeam tung peuh a thallup thangsak uh. Aksi lenglai (aksi meikhutung bel hilou) a om peuhleh kintak in, "Thui! Laisiam ka ut ... thui! Laisiam ka ut..." chi zu-zut uhi – "I chihchih tangtung nuam mahmah ahi" chih hiven! Sikul kai lou Mr. Kaisiam houh kamzol zou pen a pang zawmah!
Tha-le-zung leh ngaihtuahna tamzaw deihthusamna in zang uhi: Sipai saap, police saap, Daktol saap leh SDO saap a pan nuam khawng ahi tangpi uhi. Mi khat lenna khalhtu a pan nuam om hi. Himahleh, VL Siam in, "Pilot chih khawng leltak thil haksa di hilou pi – a paidan thei le!" chiin hunkhakna bawl (apaidan bangchi theih di le ahi tel diam?)
Deihthusam neih a hoih. Huai deihthusam pen tup-le-ngim a neih hoih sem. Tup-le-ngimte mualsuahna dia hahtak a panlak in gen nei pen hi.
Thukhitna: Khantouhna deih chiat mahle, kiimkiang a thiltung te ngaihkhawk a nei khollou, i ngaihkhawk simte le ei kidaang koih in midang, "akisaipih/chewing-gum haaite" hih dia koih. Mimal, khotang, gamsung leh khovel pumpi a buaina tuntu kimkiang thudonlouhna a hong kipan ahi. Sualdouna ah le, "Ei khawng' gen leh sep a piang di om kei veh! I khotang hinkhua luhthuuk lua, zungkalh vual hi kei..." chih lungput in nei hang. Lungke lou in pantheihna chiat ah pang le "Hih hoih lua" tan ki-tung veve dia, chi pha tuh kihi diing hi. "Kua hihlouh le hilou a!" chite' HIH kisiakna daibang theng dawm deuh diing hi. Tusawn-khangsawn in, "I tun-le-zua lungmawl in..." chia zaila a oih touh nilouh mai diing uh ahi diam unaute?
______________________Voltage/04042016_______________
"This is a little story about four people named Everybody, Somebody, Anybody, and Nobody. There was an important job to be done and Everybody was sure that Somebody would do it. Anybody could have done it, but Nobody did it. Somebody got angry about that because it was Everybody's job. Everybody thought that Anybody could do it, but Nobody realized that Everybody wouldn't do it. It ended up that Everybody blamed Somebody when Nobody did what Anybody could have done.
Everybody, Somebody, Anybody, And Nobody." - Brain Candy humor collection.