Kumkhat sung a hun simdan a tapphou hun (Doupi) March kha hong bei in, mangtom hun leh buhtuh hunsanlai (Zingkha) April kha hong beipetmah ding hita cih in (28 April,2013), zingsang loukuan hun vel laitak(5:30am) in ka makpa masapen leh upa pen, ka u numei lianpen pasal, Lawibual Hausa minpu (Goukhai) Khaigin in sawtkuam tak gilpi cancer a dou nung in, a gilpi bangleng a tamzaw paikhiak ahihnung in,anatna in adang leng na lohtoujel ahihman in, Pathian hunsehni a hong tun in,Lamka ah honna beisan ta hi.Pathian lemsakna in amah inlum sung mahmah a akha pham thei ding in,atu leh tate panghuan in inn khat a sa uhi.Ka khotheih milmial apan ka makpa uh na hita ahihman in leh inn kimaituah a teng,ki kawmkawm mah ka hih ciang un, ka pianpih U taktak bang kana sa hial hi. Nidang pek a Mission munpi na hingei,ka khawkiang ua Tinsuong kici ah,Dispensary a om a, huai a huailai pek apan a Damdawitui Khai(Water Carrier) nna nasem ahi.Singtang a tui haksa ahihman a,damdawi in a tuizat di te 'Lui'apan vatawi jel hi ngei ding hi.Hucibang post phaijang lam ah om mah diam ka thei kei.Ahihziakin, Lawibual khua a dia Doctor ahi mai a,damlou et toh,damdawi piak toh,akap toh,amah in a hihkhawm vek hi.Kuamah kiang a damdawi man alak lam leng ka thei ngei kei. A damdawi theihdan nih ka mangngilh theih louh a om: Khatvei a lawinu sunghatna damdawi peding in Zusa lou a pe kha a,apiak nung zek in a hihkhelh a phawk khia a,huai zusa lou thahna ding in Avil apia a,a lawinu bel sawtkuamtak khotheilou sim dan in ihmu vengveng maimah hi. Aman ahon hilh dan in, 'ka insung ua thil ki mu maimai ngei hetlou ahi a(tapa 5 leh tanu 3a nau nen ahi ua)huaini in,Avil ka zawn leh ka vamu pah geih a,Pathian in asih ding deihnai lou ahi cih ka theician lua' aci a,ataktak in sinlai thupitak amukhia hi. Anihna ah, kei damtheilou, huut nei a gawng phinphen ,gilpuak kiukeu hihtuak ka hi a,khatvei U Khaigin in 'hutlou damdawi vui' a hon tawi a,sikkeu in hong pia hi.Huai kanek apan,ka lung hong am a,ka et peuh san zialzual in ka mu a, thou theilou in lupna tung ah ka om den a,ka buai petmah hi. Huai hun a leng Avil khong mah hong penawn hi ngei din ka gingta a, bangtan hiam nung in ka damkhia hi. A khonung a Compounder kiang ka gen ua leh, 'hiai te antang buk khat kaan neklouh di ci ahi a,nou sikkeu a na kihawpsak na hih ciang ua,na buaisiat louh u leng kipahhuai lua ahi' ci hi.A ngeina bang in U Khaigin kisuanglahtak in nui lel hi. Deihsak luatman a ahih khelh khak neu khakha I gen hang in, amah khut tungtawn a damna mu leh hatna ngah Lawibual mipi te ading in, lungmuanna leh kipahna tuntu lian mahmah ahi cih imvuallouh thudik ahi. A thilhoih hihte tampi te lak ah,Lawibual gam toh kisai case Thadou ten a bawl uh amah mimal sum tamzaw seng a Court a na pang den ahi. Huaiziak a gamlai om thei hi phet hi. Lawibual suak khempeuh a dia kisakpih theih tham cing mihing ahi,kaci lou thei kei.
Ahi a, I tanau, I mel theih I ngaih leh I it mahmah te,natna in buak a,nasa leh haksa sa tak a,natna in a neklup mai ding et a neih zaw thil haksa taka hi.Huaidan ngen mah himah leng, mipicing,hat leh hangsan khat,a hong puk ciang in,mihing hinkhua a daidan kilang ciang sese hi. Gimlua nasalua ahihciang in sizawmai leh va ci lengle,a utthu a si thei hi jel lou hi. Damzek bek utlai veng aw cih man a leng vadam non theih thil hi jel lou hi. Mit a ki en a, ngaihtuahna kisang tuah alah bangmah hihtheilou a omkhak hun om thei hi.Huai hunte ah,leitung hinkhua haksatna liansem in muh theih hi. Sihna te hong tun ciang in,iki it a ikingaih ziak a kilentang thei nawnlou ihih man in, ei leh ei kinepna in 'leitung zaw tangtawn gam a cing lou...' cin la bang isa uhi. Siamtu Pathian in mihing si ding a abawl ahi cih imvuallouh a thudik ahi. Hiai khovel a om apan,kuamah a hing den omlou in, kum hun tuamtuam ah, nu gilsung apan a piang khia a om jel bang in, si a hanmual a phummang dia puak khiak niteng leh hunteng in om gige hi. Khovel a khosa nungta te ading in, sihna leh mannate atung thei gige ahi a,ahong tun ciang in,bang citak in pan laleng le,sihna kuamah in a peel zou kei hi. Hiai khovel a iten sung in, hicibang in sihna leh manna te I tuak tou jel lai ding uhi. Bangziak in ?
Hiai khovel I cih bang hitakpi mah hiam cih na ngaihsun ngei hia le ?Ciamnuih kampau khat a kigen sek:Skulpu in anaupang te khat kiang, 'Khovel bang ahia ?'ci a adot leh, anaupangpa kingaihtuah vengveng in, 'Sa-ngak' cin a dawng aci uhi. Sa-ngak in ak a lak ding ciang in,khua kim velvel a,a mat baihlam ding zawng ahi,kici hi.Huaiziakin, hiai naupang in Khovel tuh Sa-ngak toh kibang sa hi. Hucibang leltak zaw na hisam lou hi. Piancil Bu I sim a leh,vaak a om ma in,khovel pumpi leh tuipi te 'kha-ten' a op khum uh aci hi. Huailai in mihing, tua I ombang a khosa, kuamah om lou in, kha ngen in a om uh cihna ahi. Pathian in Vaak hon omsak a, sun leh zan bang hon khen a,sing leh loute ahon bawl ciang in, 'mihing te' tentheihna ding hong hipan hi. Huaidung zui in,mihing masa Adam leh Evi hon bawl hi. Hiai a ciamteh tuak mahmah tuh, Pathian in mihing a bawlma in, ana omsa, ana tengsa 'kha-te'a nohkhia hiam a hihbei hiam cihna om lou hi.Vaak a om takciang in, hiai kha te'n Vaak lau in,mun mialna te ah kisel uh hilel zaw u hi.Aziak bel, 'kha' ahihman un sihni neilou uhi.Huaiziakin, mihing leh ganhing te leh thilsiam dangte khempeuh, kha-te gam ukna mun khovel a teeng kihi lel hi. Pathian apan vakna a omziak lel in,hiai kha ten mihing te tung ah deihbang in nasem theilou uhi.Ahihziakin, beitheilou, kha-te sitheilou ahihman un,a kim ikiang ah om gige hizaw uhi.
Hiai atung a khovel omdan igendan ngaihtuah kawm a Jesu thugen te, adiak in, khovel toh kisai a agen nate,I et leh,hiai 'kha-te' na gengen abang hi. Etsak nan:Khovel ah haksatna, gimthuakna na thuak ding uh-Johan 16:33,Khovel a ka omsung in khovel vak ka hi-John 9:5,Khovel a lemlengsak dia hongpai ka hi kei-Luke 12:51,Khovel a mei khesuk dia hong ka hi –Luke 12:49, Khovel in a hon huat leh lamdang saken-John 15:18,Khovel piak bang in ka hon pe kei-John 14:27, Khovel vak na hi uh-Mathai 5:14,Khovel pumpi giloupa thuthu in a om-John 5:19, cih le adang tampi te.Tua I tenna pen khovel kici a, amin khiakna omthei sun tuh Dawi leh Kaute cihna hi lel hi.Jesu Kris hong paikik ciang a Olive taang hon sikkham a,Kidron luiguam te phaijang hong suak a, Pathian Lalgam kici kum 1000 hun a Diabol kokhukmong neilou(Gehen) a khiak ahih matan khovel dawite lalgam hitou jel lai ding a,Pathian hamsiatna dawng tou jellai ding hi.Hucibang hunsung in,damlouhna tuamtuam ten mihing leh thilsiamte buaktou jel ding a,natna, lungkhamna leh sihna te'n vaihawm tou jellai ding uhi. Hiai tuh a hi 'khovel'.
Hiai khovel a I len sung in,dawi leh kau icih kha-te lalna gam leh thuneihna gam ahih man in, natna ci tuamtuam leeng in,nek hoih lelah- sugar natna,nekhoih kei le lah typhod/TB, nopsakna neukhat tuak lelah High Blood pressure.I duh pen nekha gige bang in om leng,kum 1 kum 2 a kinelum dingen kihi zawmah lai.Zawng le lah damlouhna tam, hausa leng le damlouhna tam thou ahihman in hiai khovel zaw ka inn hilou,ka khualzinna lampi ci'n, I tunna ding Lametna Kipahhuai ziak in,hiai dawi leh kaute bawl gentheihna kipak leh hangsantak a thuak jel tum in ihinguhi. I gam a Gospel hong lutma in leng, I pu-ipa ten sihnung lametna ana nei tei ua,Ciaugaal ah naubangkahna leh mauna om nonlou in, ngabang lengkhwm ta ding ana ci uhi. Amau cihkan ei gingtu ten kici kha nai lou hi.
If I'm laden at all
I'm laden with sadness
That everyone's heart
Isn't filled with the gladness
Of love for one another
It's a long, long road
From which there is no return
While we're on the way to there
Why not share
And the load
Doesn't weigh me down at all
He ain't heavy, he's my brother –The Hollies
(08052013)