MAY 2: WORLD LAUGHTER DAY
-Valte Ginkhenpau
Ka zi in zingkal in a phone en a, “Eh! Tuni World Laughter Day eivele maw,” hon chi hi. A ‘day’ chih pian leng tam ka sa chi lungsim kawm in bangmah ka gen kei. A nunglam in ke’n leng ka phone ka en a huai ah “A good laugh heals a lot of hurts” (Kipaktak a nuih in lunggimna tamtak a damsak) chih teng dawk ka mu hi.
World Laughter Day tuh, eilawi in phawkpha khol kei lengle, khovel mun tuamtuam ah nuih poimoh a hihdan leh a hoihna theiphate’n naktak in a na zang uhi. Khopi lianzawte bang ah hiai ni tuh chiamnuih bawlna ni in nuamtak in zat in om sek a, mi a za-za a simte bang pai khawm in nui khawm lualua uhi. Los Angeles khopi ah bel kum 2005 in zat pat in na om a, huchi in khovel mun tuamtuam ah leng awl in hong kithang tou hi. India a khopi kumlui Mumbai ah a hihleh May 10, 1998 in zat pat in na om a, huai pen World Laughter Yoga Movement kichi a na pankhetu Dr. Madan Kataria malakna ahi hi. Ama’n hichi in gen hi, “Na nuih chiang in na kikhek a, nang na kikhek chiang in na kiim-le-kiang khovel na khek pumlum.” Pau sese lou a khovel pumpi nuisaktu Charles Chaplin in, “Nuih tuh damdawi ahi a, thuaknopsak, puaknat beisakna ahi,” chi a a gen ban ah, “Nuihna tellou a ni khat zat tuh bangmahlou a zat ni ahi,” chi hi. American pathianthusuimi Reinhold Niebuhr in leng, “Chiamnuih tuh ginna a di’a thumapi ahi a huan nuih tuh thuumna kipatna ahi,” chi hi.
Mi naran in leng “nuih, damtheihna ahi” i chi sek uh. A na dik mahmah hih tuak hi. Misiamte gendan in, newspaper simlai hiam ahihkeileh television khawng en a na nuih kuhkuh chiang in a na hoih mahmah hi. A ziak bel, lungngaihna beisak a hih man in. Nuih kichi in natna chichih damsak thei hial kei mahleh natna tamtak a ding in phatuam hi. Na nuih chiang in huihsiang tamtak diklut chin a huai in na lungtang, na tuap leh taksa mahmah hatsak in, na khuak sung a lungngaihna lamsang buaipihtu pen tha pia hi. Ban ah, naktak a nuih lualua in na lungphu leh sisan paidan hatsak in awlsak zel a, huaikha a na hoih mahmah hi. Hiai teng lou leng a hoihna gen ding a omlai tham ding; i gen seng kei. Ahi a, mi khat in lakhial inchin nuih kichi damtheihna ahi chi a dakkal 24 a nuih zomleh sihloh hi. Laakdan siam ni i chih nopna ahi.
Bible in leng kipahna leh nuihna kichite a na poimoh gen mahmah hi. Paul in suangkulh sung apan Philipi khua a khristian omte lehkhathon a khakna ah, “Toupa ah kipak gige un: ka chi nawn ding hi kipak un,” chi in na vaikhak hi (4:4). Paunakte 17:22 in, “Lungtang nuamsa damdawi hoih ahi,” a na chi hilhial hi. English version khenkhat toh i etkakleh a gennop pen tuh damdawi bang a lungtang kipak nasep hoih ahi chih ahi hi. Huai kia hilou in, Paunakte mah in, “Lungtang nuam in mel kipak a bawl,” chi hi (15:13). Ahi a, nuihna tengteng kipahna ziak vek bel a hi kei a (Paunakte 14:13), chiamnuih thanghuaite leng kipahpih ding bel a hi kei (Ephesate 5:4). Bible mah zaw bukimpen hi maw (Isai 34:16; II Timothy 3:16-17).
Khovel Nuimite Ni zatnuam! Ha ha ha…!
©Valte Ginkhenpau, 2021