SAKBEI MAI DI’A PAMMAIH LAA KHENKHAT
-Valte Ginkhenpau
Laa i chih thu, thu i chih laa chih kigen kiza mun mahmah hi. Thudik mah leng ahi. Ahi a, laa khenkhat sak-a-sak thoh lel tan in i beisak ua, huaite pammaih lua hi. Thu leh laa hoih taktak i gen a i sakte pen a tak a sepsuahna lampang pibawl thei leng i tulel dinmun uh sang in i khangtou zaw ngei ding in gintakhuai hi.
“Kikhenthei i hi poi...” chih laa ngaih mahmah hi. Dohsang tung a etlawmtak a kichei a, siamtak a sak ekek a laampih dupdup tanlel in kibeisak sek. Pammaih lua! Pau-le-ham ziak khawng in i kikhen a, hunzatna banghiam i neih chiang in lah hiai laa khawng mah i sa in i ngaikhia ua, i deihthoh mahmah uhi. Khanggui kibang, suangtu kibang, beh leh phung a leng kikhatte kithei hi lou mah hi hang. Gawm ding simthu leel tan kia ah hun sa lou in, semsuah leng laphuaktu in a phuahnasan buchingsak i hi zaw ding in gintakhuai hi.
Laa ngaih mahmah nawn dang khat ahihleh “Tuun sung khat pan piang hi ngeingei hang e...” chih ahi. Hiai laa khawng sa a mitsi diaudiau a laam diaidiai zen a sak a beisak lel ding in pammaih lua hi. Sepsuah ding a hoih laa ahi a, saksak a beisak lel ding in pammaih mahmah hi. Sakmi, khangmi kikhen lou ding chih hiai laa thupi ahi a, saksak kia hi lou in a sep-a-sepsuah ding chii ahi. Chiimnuai-Geltui apan lalkhia Zomite kimuhdah kei leng maw.
“Tuipi sang sisan gik zaw...” Hiai laa sasa a thei lua hinapi sanggamte hoihna ding sem nuam lou, huh nuam lou i hih mawkleh sak maimai ding in pammaih lua hi. Suangtu khat apan khangkhia laizomte a ki-it tuah kei mawk uleh midangte’n simmoh ding ua, lawi-le-pai lak ah leng vuallel ding uhi. Sum-le-pai ban ah lalnate leh thuneihnate deihna ziak lel khawng a laizomte i khotmang mai khak ding lauhuai hi.
“Zogam aw, ke’n hong taisan kei ning...” Zogam taisan lou ding chi a sasa napi a nam dangte hong luah ding poisa lou hi leng kilawm! Zogam khantouhna ding, hoihna ding, Zomite kigawmkhawmna ding, kituahna ding, chihte leh a hoihlam himhimte semsuah a i omkhak louh chiang in, Zogam ah teeng leh khosasa kichi tawk lengle, a taisan toh kibang lel i hi. Puah louh, zuun louh gam tuh tulpan kaai ding a, nam dang a pilzaw, siamzaw leh hauzawte’n hong luah in puah mai ding uhi. A hong luah nung chiang un i heh mahmah ding a, i kineisak mahmahlai ding a, himahleh a zekai lam ana hita ding hi.
“Tang a i pipute sakmin lohsa Lamka... i Zolei gam mitnauta hi... Nibang elte nuihchiam leel i phal ding maw?...”
Gen ding tampi a omlai. Hiai thu na sim sung a na lungsim a laa hoih taktak hong lutte tengteng khawng leng huamtelsak vek in. A laphuaktute leh a satute gen nuam i hi kei a, a lathu hoih taktakte bangchileh taksuahsak thei ding i hi hiam chih lamsang ahi i lunglutna.
Sak leng save ni hang in, zuih leng i zui kei ding ua hia.
Na chi kei maw?
©Valte Ginkhenpau, 2020