THU ZATE KIA HILOU IN A SEMSUAHTE HI NI
-Valte Ginkhenpau
Mingoute’ thupil khat in “Sem tam inla, pau tawm in” chi hi. Gen zauzau thei napi a thadah mahmahte kuamah in kipakta lou hi. Tuabang mah in, khristiante ngei leng a gen pawng siam ding himai lou in, a sepsuahna lam leng a siam dingte i hi uhi.
Matthai 7:24 ah Toupa Jesu in, “Huchi in, michih hiai Ka thu za a, zom peuh tuh, mi pil suangpi tung a inn lam mi toh ka teh ding ahi,” chi hi. Hiai tang kal khat hoihtak a i etleh mohpuakna nih piak in i om chih a muh theih hi. Amasapen in, “Ka thu za a” chih i mu a huai tuh Jesu Khrist’ sinsakna i zak ding, i ngaihkhiak ding, i theih ding chihna ahi. A nihna ding in, “zom peuh tuh” chih i mu nawn leuleu hi. Hiai a “zom” chih thumal pen “hih, semsuah, a thuzak bangbang semkhia” chihna ahi hi. Hiai “zom” chih thumal mah tuh Luka 6:47 leh 49 ah “mang” chi a lehkhiak in om hi1. Tomkim a gen in, mohpuakna nih kigente tuh “Jesu Khrist’ thu zak ding” leh huai thu i zakte “zuih ding” ahi hi.
Khristiante tuh thu zatute leh ngaikhetute lel mai hi ding in Pasian in hon deih lou a, a zuitu, a zomtu, a semsuahtu, a mangtu hi ding in hon deih zaw hi. Jakob 1:22-25 ah hichi in kigelh hi: “Himahleh, noumau kikhem in ngaikhete2 kia hilou in thuzuite3 hong hi zaw un. Kuapeuh thu ngaikhia hi a, zui hi tuanlou tuh, mi limlang a a pianpih maitang hoihtak a ki-en bang phet tuh ahi. Hoihtak in a ki-en a, a pai mang a, mi bang chi ahia a hih chih a kimangngilh nawn pah ngal hi. Himahleh kuapeuh daan kim, noplenna daan tuh veel a, huchibang a om gige a, ngaikhia a, mangngilh nawn maimah nak bang hilou a, zui a na sem gige hi zaw tuh, huai mi tuh a thilhih ah vualzawl in a om ding hi.” Tang 22na in “thu ngaikhete kia hilou a thuzuite” hi zaw ding in hon sinsak hi. Tang 23na leh 24na in Pasian thutak ngaikhe napi a “zui tuanloute” pen “limlang a mahni mel ki-en” toh tehkhin a, limlang a a mel “a etsa ngei leng mangngilh kik pah in ki-en thakthak ut” bang toh tehkhin hi. Tang 25na in noplenna daan “ngaikhia a zui a huaite mah semkhe gigete” tuh vualzawlna in zui ding ahihdan gen hi. Matthai 7:24-25 in leng Jesu’ thute za a semsuahte pen “mi pil suangpi tung a inn lam mi” toh tehkhin in, huai a inn lam tuh vuahpi zu in tui hong khang in huihpi in nuai zialzial mahleh “a chim kei” chi hi. Luka 6:47-48 leng en thak in.
Laisiangthou thute thei mahmah napi a zui tuanlou khristian tamtakte ziak in khovel ah tamveitak Khrist’ mel hemsak in omta hi. “Huaiziak in, bil a i zakte khawng phatuamngaitak in i khawksa nawn diak ding uhi, huchilou in zaw i tolh mangsan zenzen kha ding” (Heb. 2:1).
Chiamtehnate:
1 Matthai 7:24 leh Luka 6:47,49. Paite e-Holy Bible, Version 1.0. Copyright (c) 2008.
2 “Ngaikhete” chih thumal pen Matthai 7:24 a “za” kichi toh thubul kibang, “akouo” apan ahi.
3 “thuzuite” kichi pen Matthai 7:24 a “zom” kichi toh thubul kibang, “poieo” apan ahi.
©Valte Ginkhenpau, 2019. Hiai thugelh a ut peuh in bangmah khek lamdang lou in a tuahsawn in a suahsawn thei ding.