Book Review
MUANHUAI TOUPA
- Muanniang Tunglut
Zosuante lak leh namdang, gamtuam a Pathian gam nasepna a kizang, Rev. Dr Ginnei Thang Ngaihte in a suahkhiak Muanhuai Toupa tuh a taksa kum 70 a chinna leh Pathian nna asep kum 45 a chinna 'Souvenir’ ahi. Haksatnate leh a thiltuah tuamtuamte’ tungtawn a Pathian muanhuaina a muhdan hiai laibu ah taklang. Lungluthuai mahmah leh hon suthathoutu ahih banah hanthawnna tampi leng ngah ding om hi.
Singtang dawn a kho neuchik a piang, meivak dia phutuan zang, laigelhna aneih zohlouh ziak a chiangkang suihzum hiam akmul atzum khong bepiteh tuisuk a diah a zang in laizil ana pan mahleh naktak a laisim a, laisiam ding chih thupukna poimohtak ana bawl hi. Aman, “Hiai thupukna tuh ka hinkhua hon pumkhek ding thupukna poimoh masa ka bawlkhiak ahi hi” chi’n gen hi.
Sinlaite a di’n hiai apan zil ding tampi om hi.
Thupukna poimoh abawl nawn tuh BA azoh a, Sorkal nna sang a Pathian nasep ding chih ahi. Huailai in mi khenkhat in 'mihai’ chi mahleuh aman Pathian a hailouh dan leh sepna bit leh detdou pen Pathian gam nasepna ahihdan muchian mahmah hi. Gingtu tuailaite’ a din chouna lian mahmah ahi hi.
Pathian gam nna asepkhawmpih ding a kituahpih (Life’s purpose compatibility), zi a aneih tuh thupukna poimoh a bawlte lak a khat ahi nawn leuleu hi. A lawinu, Pi Ching tuh thapetu leh seppihtu hong hi hi.
Thailand mite lak a Tangthupa gen dia sapna angah lai in maban ding gel felsa bangmah omlouh banah a chawmtu ding leng omlou himahleh inkuan a kuankhiak ding in thupukna poimohtak bawl hi. Pathian’ thumanna asangpen a akoih ettontak mahmah hi.
OMF International tungtawn a Thailand mite lak a Tanchinhoih gen a kuan dia akisakkholh lai un leh missionary training, namdang lak a tawndan zil a om lai un ginna etkhiakna, haksatna tuamtuam leh damlouhna bang tuak uhi. Khalam galdouna, Giloupa toh atatak a kimaituahna bang leng tuak mahleh lungkiatna a la lou in, manpha sa mahmah hi.
La phuaktu in Toupa gam nasep zaw naang bang in neem lou hi ana chih bang in haksakna tampi tuak toutou uhi. Sum-le-pai a haksatna banah chindan leh tawndan tuam lak a nasep tuh kisin thak ding leh kibawllem ding tampi om hi. Atate un len’g kum 6 aphak uapan gamdang ah skul kaikhiaksan uh. Inlam a iit leh ngaih mahmahte’ omlouhsanna tungtawn in lungngaihna bang tuak ua, himahleh Pathian phat thei veve uhi.
Setan apan doudalna tuamtuam leh a taksa tung mahmah a douna, sihtheihna dinmun tan leng ana tuak hi. Hiai hun in Pathian in nuse ngeilou a, taisan samlou hi. Simtute’n Pathian muanhuaina muh toutouh ding tampi om.
Pathian gam nasepna tuh aman piak ding om hi. Amau nupa in bel Pathian thumanna ziak a adeih leh mansuah uh Toupa lam a punna in sep uhi. A kipiakzohna uh sang mahmah.
Joshua 24:15 a kigelh bang a, inkuan a Toupa nna sem dia akilatkhiak uh zahtakhuai in ettontham mahmah. Hiai lah mihingte hih di, I hinsan mah ahi ngal a.
Taangpi theihdan in mison nasep tuh a field a va om a, hunteng a Tangthupha vagen ding chihkhong ahi. Hiai ngaihdan adiklouhdan Ching Laikung pan in muhtheih hi. Aman a genna ah, June 2018 a Thai naupang 12 football team khat, a coach utoh kawhawm a ataan lai un alak uah kristian khat, Abdul Sam omkha hi. Asian Cross Cultural Training Institute a training apiakte utoh hiai naupangpa’ saptuam, Maesai Grace Church ah kumkhat khat a nihvei English zilna camp leh Sunday School a English zang a hilh, thugenna vanei kha uhi.
Abdul Sam tuh English zil lunglut mahmah a, a siamlua hikei mahleh Pathian in vanzat a zang in, alawmte leh a coach uh hutkhiakna ding a vanzat poimoh mahmah hong suakkha chi’n gen a, huaimah 'mison’ I chihchih ahihdan taklang hi.
Kawhawm a taangte hutkhiakna leh naupangpa’ pankhakna thusaite tungtawn a I theihkhak vek uh ahi. Hiai apan in kuapeuh in mison nna septheih ahihdan muhtheih hi.
OMF International in India malsuah lam a panlakna thak, New Horizon chih minvuah na nuai a EBC toh sepkhawmna di’n a nupa un pan hahtak in la ua, February 9, 2017 in Kitheisiamna Lai (MoU) suai kaih in om hi. India malsuah a akai masapen EBC hongsuak hi.
Muanhuai Toupa apan Belveltu in tungman a khut a amek a, a bawl bang a Pathian in laigelhpa’ hinkhua seek a, a maban ding gelkholhsak toutou ahihdan kimu. A Pitu’ thupidan phawk semsem in om hi. Amah ngei len’g dohzoutak a akiluikhiakna ah gintute’n zil ding tampi kinei.
Pathian a thuchiam a amuanhuaidan, I taksap teng hon guan gige, A panpihna kikhel chih omlou, haksakna hun a leng a itna langsak gige, vualzou dia hon thopna leh leitung a lamdangtak a nna semlai ahihdan hiai laibu ah muhtheih a, Amah a kingak ding ahihdan, ginomna a ngiatdan leh thumanna leh kipumpiakna a poimohdan len’g hon sinsak hi.
Muanhuai Toupa manpha kasakna mahmah tuh missionarite’ hinkhua, atatak a aniteng khosak didan uleh a lungsim suangtuah didan bang uh muhtheihna bangtan hiam honpia a, a dinmun uh theihsiamna hontun hi. Hiaite’n Pathian gam nasepna apoimohdan leh semtute nakpitak a kithuahpih gige ding ahihdan hon sinsak hi.
Pathian gam nna kum 45 bang semta, taksa kum leng tamta, May - June 2017 a major operation ana hihta himahleh laigelhpan’n khawl sawmdek nailou. Kum 50 sung bek hon semsak lai in chi’n ngen a, A hehpihna ziak a sepzom zel lai kilamen. Gingtu teng in hiaibang lungput nei hile buh lak ding tawmdeuh ding hi a.
Sinsakna leh Tangthupa genna India, Myanmar, Thailand, Singapore, Phillipines, Malaysia, Cambodia leh USA gamte ah neikha hi. January, 2019 apan Serving in Missions (SIM) International toh semkhawm a, North East India leh Thailand a sinsakna sunzom a, Guwahati pansan a sem ding in a nupa un kisa uh.
Muanhuai Toupa tuh Paite kampau a kigelh, colour limlak pek 24 tel a, pek 288 a sah ahi. 19 January, 2019 a honkhiak hi a, aman Rs 200 ahi hi.
Sin ding tampi om banah gingtute’ hon hihhattu hi dia lamen in, deihsakna lianpi toh kuapeuh in simchiat di’n kon chial hi.