KINGAKNA CHING AHI : Zoudawn siamsinna chi a i gengen Paite kampau mite tenna Manipur Guite Kual leh Vangaitang a siamsinna-In te tuhuna i mimasate sekkhetu, Paite kampau kamding khangmasate khankhiakna mun na hi ngei ahi chih khangthak te a galmuh banlou tamkhop ki omta dingin ka ngaihsun vel maimai a. Masanglai in tuni a i buaipih bang zena buaipih ngai leh beidothuai hilou ahi chih thei masa ni. Manipur gamsung Guite kual ah - Hansip, Bukpi, Thanlon leh Songtal khuate banah Vangaitang ah - Buangmun khua a om High School ten misiam tampi gahkhia ua, khawneuzaw khawdang ten leng amau toh kikhawm in milaka suan leh zattham mihing bangzah hiam na sekkhia uhi. A sekkhetute bel SiamsinnaIn/SkulIn hilou in sinsaktute/Ojate ahi uh. Tuahunlaiin siamsinnaheutu/skulpute amau omna dia solkal in a piakna mun ah lungkim takin om kinken ua,kuamahin subuai seselou in a lungsim ah Lamka a inten-khosak ding lunggulhna kilangpha vetlou bang hi. Khatawp chianga khaloh la dia khea ninih/nithum paia Lamka a phak uah lungkim huntawk mahmah uhi. Khawtualmi kia hilou in Phaizang apan in Meiteimi skulpu tamtak Zodawn High School omna khuate ah inluaha kikulh ahihklei leh midang bel in siamsinnaupangte kem in hong khosa ta lawmlawm uhi. Tua hunlaiin Tipaimukh Road leh Guite Road ah lamlian mumal omloua, Singngat chiang gari/motor pai thei a; aban Maukot na ngawn khe a pai ngai hi tanghial !!!
ZOUDAWN SIAMSINNA PUKSIA : A tunga kigen Zoudawn siamsinna lohching taka a paitouh zel laiin khovel khantouhna in a puakkhiak himaithei kikhekna thupitak in Zoudawn a hon nuaia huai tuh tunitana a kigen mangmoh, i vangsiat zomzel leh a kigen sawnsawn lai ding ‘Zoudawn siamsinna puksiat’ kipatna ahi. A hunlai mite leh a kihelkha miten zong hiaibang zena siatna bel kuamah in lungtup a nei ding un ka ngaihsun ut kei hi. Mihing ngen tengkhawmte lakah kideidanna omlou theiloua tua toh kizui in kideihsakna leng omtou zel hi. Phaizang mite’n a mite uh haksa taka Zodawn siamsinna a semte a mangngilh kei ua, Phaipi leh Lamka a eimi milian leh thilhihthei singtangmiten leng amau deihsak leh deihsaklouh khentuam dan a siamthou uhi. Mahni langpang pawlte khinkhiak theihna dingin a thunei thei ten ‘utilized’ thumal zang in a thuneihna un a sawkkhak theih solkal nasem amau langpangte amau bial pawlama suankhiak a hon pan ua (Manipur pumpi a paidan a kinei himaithei), solkal pisa a om khenkhat in amau ngaihnatlouh mite in ana behlap sak nawn ua; Zoudawn siamsinna a sem tamtak Lamka khua ah hong khawsa panta uhi. Kigawtna vanzat ‘utilized posting’ pansana Lamka zanga solkal nasemte khosakna ( office/skul kai mumal ngailou, khaloh a kima la,tate skul hoih a kaisak, sameh meh leh adg.) a muh chiang un thuneite angvanna tang kisaa munngak solkal nasem ten a hon eng nawn ua, Lamka zang zuan in ‘uitilized’ lampi mah tawn in alom-atang in a hong kizuikhe duahduah nawn uhi. Tua in siamsinna kia hilou damtheihna lam a sem banah khawsung tuihawmte nangawn hon peh in Zoudawn tuh solkal nasemten’ eknutsiat in a nusia uhi !! Siamsinna belhtak omlou, damtheihna dia kikepna omlou, solkal buhpang sawkpha chiang khetehnen dawl ding omlou dia a taisan uh Zoudawn tuh a hong heu panta. Mimasate khang a bei toh kitona Zoudawn Siamsinna leh Khosakna muih ding dinmun
PROJECT NEHEMIAH : Evangelical Baptist Convention Saptuam khangthu a om ngei nailou leh a kigengen ding EBCC Delhi Baptist Youth Fellowship in 2009 April 2 a thupukna la a 2009 Missionary Day a puankhiakna a neih ‘Project Nehemiah/ Nehemia Project’ in tuni chiang tana Zoudawn siamsinna dopkang na dia a nasepsate a lim/lem mahmah toh i muh leh thupilua ahihmanin ‘eheu’ chih leh khasiat kituakchet hivaw. Pathian min lou kawma Project Nehemiah/Nehemia Phroject nasepna ten a tunga kigen Zoudawn siamsinna puksiatna a kihelkhate kisuanlahna neukhachik leng a neihsak zoh kei leh Zoudawn siamsinna leh khawsakna khankhiak taktak na ding om ngeilou ding hi. Mihing lungsim tak in ka ngaihsun ahi maithei, Delhi khopi a tuailaite lakah ‘Zodawn vangkhua ka vangkhua’ chi a ngaina thei ding mi tawm hiaihiai leh ‘Project Nehemiah’ ngaihnep in a omkha diam, ahihkeileh ‘ Project Nehemiah’ in hiaizah a sepkhiak nung nangawn a Zoudawn Siamsinna puah taktak thei ding heutu makai leh Zoudawn hamphatna gahlou solkal nasemte phonhalh zoh ahihkei lailai uleh ‘Project Nehemiah’ phungvuhtute a hong thanem uhiam a hong lusu uhiam khovel tawp dong in a pang gige zou kei kha ding uh chih bang kana lauthawng thepthup a, a puah taktak thei ding leh a puahtu ding diktak zaw om hiveh aw chiin kana ngaihsun vel maimai hi. Abanghitaleh, India khopi tuamtuama saptuam leh tuailaipawl om tiltelte zong ‘thupiak lianpen zom/nihna’ kha toh i tonkhawm lailai mah in hiai ‘Project Nehemiah’ in hon phonghalh leh maw.....