Siamsinte kiang a laikhak – Part 1
David Neihguka, Dr. Pau Biak Sangb
“Two roads diverged in a wood, and I—
I took the one less traveled by,
And that has made all the difference.” – Robert Frost
Thumapi
Class X pass dangka cheng 10 toh tehtheih hi. Tanglai a, I Pu-Pa te hunlai toh teh in dangka (currency) (etsaknadin, cheng 10) a manphatdan kiamta mah leh sum ahihziak in a poimoh dan kiam tuanlou hi. Cheng 10 neih man a hausak ding chihna hipahlou in, a zatdan i siamleh hausak pih thei hi. Siamsinten’, I cheng 10 uh bang chin‘ zat I sawm ua leh?
Laphuaktu in “Khen tuam a nei lo, Pa nong itna lian lua; Dei dan tuan nei lo, kei a ding na ngawn ki ching” achih mahbangin siamsinna in deidan neilou a, siamsin ut khempeuh ading in hunlem (opportunity) kichingtak om hi. Siamna leh pilnate sum-leh-pai a leitheih hilou a, kideihsak thu a kipiak theih leng ahisam kei hi. Huaiziakin, mipil-milian khat suah theih nading in sum leh pai lamtam (neih-leh-lam) sang in siamsin utna lungsim mah poimoh masa zaw hi. Pilna tuh nuntakna ahi a, siamsinna tuh gualtoh tanbang kimna ahi. Gualtoh tanbang kim utlou kua i om dia maw?
Tukum Class X leh XII exam a bei toh kiton in, maban ah bang ziltouh ding hiam chih tampitak buaina leh ngaihtuahna hiding in a gintak huai hi. Huaiziakin, kuahiam khat in I phattuampih ngei uh lametnatoh anuaia thu thumte saulou enkhawm ni:
- Thupukna (decision): Class X zoh chia bang la ding?
- Laisim dingdan tangpi leh
- Lohching ngeingei dia panlak dingdan
Thupukna (decision): Class X zoh chia bang la ding?
Class X zoh chiangin lampi ka bul a om toh kibang hi. Atangpi in, telding lampi thum om a, huaite ahihleh Arts, Commerce leh Science ahi. Hiai teng thum lak a koipen lak ding hiam chih a lungbuai tampi ki om hi. I theih ding ua poimoh ahihleh a hoihzaw tuam chih a om kei a, mahni lunglutna leh tempaina lam lak mah ahoih zaw hi. Kuate hiam in hoih a chih man ahih keileh lawm leh vual ten a lak man ua theichiang lou pi a thupukna lak louh ding ahi.
Siamsin tampiten Science ah career option tamzaw chihmanin Science la ua, a haksat leh Commerce/Arts a kituankik theih thou chih ngaihdan chiangkuanglou nei uhi. Ahihhangin, theih dia poimoh mahmah khat ahih leh Class X toh Class XI a sinlaite kikhoukhiat mahmah a, Class X subject haksa sa khollou ten le Class XI a hon zil chiang un haksa sa mahmah uh a, Class X ana nuamlua ahih lam khawnung phawk uh hi.
Huaiziak in Science lak na sawm leh kingaihtuah detdet inla, a khonung a haksa sak ziak a stream dang a kituan mai ding khong ngaihsun nahih leh lak selouh hoihzaw kha ding hi. Huchi hilou a, Science lam a lunglut tinten nahih a, maban a na tup-leh-ngimte tangtun nadia Science poimoh ahih leh bel chihtakna toh na lak teitei kul ding hi.
Siamsinten’ hiai hun poimohtak a thupukna I lak te ei khang kia hilou in khangsawnte tanpha sukha thei thil ahi. Thupukna lak khialh louh na dingin chiangtak a kingaihtuah ngai hi. Huai ahih theihna dingin Science lak ding leh laklouh ding toh kisai ah mahni ki-et-telna (self examination) poimoh mahmah hi.
1.1 Science la taktak di ka diam?
Science lak ding leh laklouh ding kikal saikakna a hon lamkak ding leh thupukna taktak lak theihna dia hon panpihtu dingin anuai a point te kahon luikhia uhi :
- Maban ah MBBS, Nurse (GNM chih louh), Engineer, Scientist, Architech, Army, Airforce, Navy, Pilot, Information Technology (IT), Computer programmer leh adangte khong a pang nuam nahih leh bel Science na lak teitei kul ding hi. Huchi hilou a IAS, Bank PO, Chartered Accountant, MBA, Designer, Musician, Sports person, Chef leh adang adangte khong a ut na hih lehbel Science lak teitei ngailou ding hi.
- Thil theihut hau (curious) mahmah khat nahih a, thil tuamtuam theinuam, dotna tuamtuam bawlbawl, thil a kibawl dan theinuam, thil bawlkhe nuam mi khat nahih leh Science lungpu nahi.
- Science lungpu chih bangchi kitheih ding?
(a) Na neulai a tape-record khong ana phel,
(b) Mobile sung munuam a phel sia,
(c) Sana (watch) khong a sung munuam a phel sia,
(d) JCB, lenna, rocket chihte khong thupisa a lem khong bawl,
(e) Computer lam lunglut (game kimol kia lunglut hilou, a games te bangchi dan a kibawl, computer sung a bang om), chih khong thei ut,
(f) Hiai a tung a ten’ na hihna hon genkha hi a natheih leh Science lungpu nahi.
- Pianken a lungsim hat adiak a number toh kisai, logical reasoning lam siam, banah Science toh kisai himhim lunglut mi nahih a, na mi ngaihsang te Albert Einstein, Issac Newtonte khong ahih leh Science na lak ahoih ding hi.
- Mahni kithununthei, khanvual polh dan siam leh niteng a hunbi nei a atawm pen a dakkal 2-3 bek lai sim thei gige mi nahih leh Science subject toh kituak mahmah ding hi. Bangziak hiam ichih leh a tung a I gensa mah bang in, a syllabus lianlua ahih man in school a niteng a zillai a ahon simsak dandan ua enle isim touh keileh a kumtawp lamchia miksi leh saipi kisual mah abang dia, a haksa mahmah ding hi.
- Mathematics tellou a Science lak theih himahleh hiaipen theichiang tak a thupukna (well-informed decision) lak ding ahi. Maban a Biology subject specialization laksawm (Biologist hi hut) te leh Mathematics a lunglut lou himhim leh chauhna/bahna (weakness) nei lah Science lam lunglut tinten te adding in bel Maths lak teitei ngailou hi. Huchiloute ading in tuh Mathematics lak teitei ding ahi. Aziak ahihleh, Mathematics leh Science paikhawm mahmah ahihman in Science lunglutte ading in Maths nawlkhin taktak theihlouh ding hi. A niampen a Class XII tan Maths bel ahunkhop a theih in maban ah phatuamna (sepna zonna lam hitaleh) tam mahmah ding hi. Maths tellou a science lak pen akisam khat om nasak hun hong om ding hi.
Hiai a tung a kigente a tamzaw dik hi a na theih leh Science na lak ding ahi.
- Laisim dingdan tangpi
Eimi siamsinlaite hihkhelh khat ahih leh “class XI i limsak louh uh ahi.” Class XI sim ginalou in Class XII na lut thei maithei, himahleh a syllabus “phim leh khau banga kizom” ahihmanin competitive exam hitaleh sepna nazon hun chiang in class XI syllabus na theihna in a hon panpih mahmah ding hi. Huaiziakin class XI chihtakna mah toh sim ngai hi.
Tulai khovel pilna leh siamna a kidemna khovel ahih tak man in, lai siam leh khuak zang siamte mi lohching leh mi tung a lengte ahi uh. Huaiziakin mi I phak nop leh siamsinna mah ngaih poimoh petmah hun hita hi. Mihing i kibatlouh dingzui in I laisim dan le kibang lou hi. I lunglut lam le kibang lou a, lai I simchia I lunglut hun sung le kibang lou hi. Himah leh lai simdan a hoih leh phatuampen hi a kitheih uh khenkhat ka hon taklang nuam uh hi. Huaite ahihleh:
2.1 Student ihih sung teng laisim I nasep pi pen ahih gige ding ahi. School a subject tampi kitawi ahih man in hun zatdan siam mahmah ngai hi. Niteng a zillai tampi kila ahih man in, laisim ding kikhelsaksak louh ding ahi, thupil khat in “Nasep sunsiah seplouh suak semsem” achih mahbangin a huntak a simlou a exam dek kuan chiah sim vek na sawm leh vut lak a zunthak abang lel ding hi.
2.2 Nikhat a dakkal tampi laisim a tut sese a ngai masa pen kei a (a tuthei te bel hoihsem), himahleh niteng a dakkal nih leh thum tan bek hiam zingsang hun, sun hun ahihkeileh nitak hun dak kal li/nga(mahni lunglut theih dandan) a hun kibang a sim gige hoih mahmah hi. Laisim na study table kineih tuam ahoih a, huai mun a a hun kibang a sim gige ten thei baihzaw uhi.
2.3 Lai na sim chiang in a kizom a sot pipi na sim kunkun sang in avangkim dakkal khat hal khawng a break zel ahoih hi. Dakkal 10 lunglut lo kholou a na sim sang in dakkal 2 lunglut tak a sim phatuam in manpha zaw hi. Na lunglut hun teng lunglut tak in sim zaw in.
2.4 Telsui mite sui dan in, mihing te I ihmut chiang in I khuak (brain) ah nerve cell ki bawl a, huai te akipan theihtheihna (memory) hong piang achi uh hi. Huaiziak in I laisimte I lungsim a ataamdet theih nadingin, ihmut kham poimoh mahmah hi. Zan i ihmut kal un I laisim te I lungsim uah ana belh zel hi.
2.5 Sapte thupil in “Well begin is half done” achih toh kiton in kumbul apat hoihtak a laisim nakipat leh a kimkhat zawhsa toh kibang ahi. Huchi hileh exam hundek kuan chiang in lai tampi sim angaikei ding a, na simsate enphakik (revise) in lungmuantakin na om thei ding hi. Huchilouin zaw, kinoh hehu a lai tampi sim in theihna akibehlap louh banah hon lunggim sak mahmah ding hi.
2.6 Class XI khawng I hon sim chiang in, I khut te bang le hih nit zek hong ngaita ding hi (get (one's) hands dirty). Huai omzia tuh, classroom a teaching ngaihkhiak kia hilou, khut mahmah toh gelhthawh a kizil – note bawl, maths (physics leh chemistry le tel in) khuat, question paper luite kaikhawm in huaia question kidong te khuat, guide book/refresher book a point poimohte highlight toh question kipiate kizil ding. Hiai kawmkawm a text book akipan concept/point poimoh te gelh khia (note bawl). Syllabus zalua ahih ziak in exam dek chiang a thilteng simkik nadi hun omlou ding hi. Hiai hun chiang in na note akipan in hoihtak in enphakik (revise) thei ding hi. Na khut a nit zawh khop leh na mark muh a sang ding hi.
2.7 Class XI toh Class XII hunsung sinlaite ading a “Golden age” chih thei hi. Aziak ahihleh hiai kum 2 sung a na hunzat dan in na hinkhua leh nek leh taak zonna (Career) hong kinga ding hi. Hiai hun a ngaihzawng neihlouh ahoih pen ding a, sai vet louh a damdoi hoihpen ahi. Huaibanah, thil tampi chaan (sacrifice) angai a, lawm polh kidaam, khotang vai a kizat kidaam leh thil dang hun sumangthei thilte a zat louh poimoh petmah ding hi.
Huai banah, Engineering (B.tech, BE) hiam, MBBS hiam, Architech hiam tum nahih leh lai nakpitaka sim kul zosem ding hi. Hun zatdan (Time management) zong siam mahmah ngai ding a, hunzatdan tuam tuam toh laisimna ki balance siam mahmah ngai ding hi.
- Lohching ngeingei dia panlak dingdan
Siamsinna in a tup pipen ahih leh thildang tengteng sang in nek-leh-taak muh nading ahi masapen hi. Huai ahih dungzui in, Class XI leh XII sinlaite ading a lohchinna taktak tuh Class XII board exam pass kia hilouin maban zilna dia competitive examination a qualify hiam ahihkeileh sepna muh ahi.
Hiai teng thum lak ah board exam pass pen baihlampen leh aval a hahpan luat ngailouin a tamzawten zohtheih hi. Tuchiang in board exam saituten mi atamtheilam a pass theih nading in exam pattern bawlta uh hi. Huaiziak in, board exam a pass pen thupilua, hoihlua hinapi in atung a kigen te tellou in lohchinna bukim hilou hi.
Huchi ahihleh competitive examination qualify nadia bangchi panlak ding?
3.1 Competitive examination qualify nadia panlak dingdan
Sapte thupil in “killing two birds with one stone” achih Class XI leh Class XII sinlaite ading in zattheih mahmah hi. Aziaktuh, class XI leh XII zawh tawh kiton a competitive exam zoh theih hi. Huai dia panlak dingdan ahih leh class X exam khit chiang in (result suah ngak ngai sese lou), 2 years coaching correspondence course ah ki enroll theih pah hi. Huchi mahbang in tulaitak a class XI zillel te ading in 1 year correspondence course ah ki enroll theih ding hi. Class X nuailam te ading in zong amau lunglutna bang in correspondence in coaching laktheih hi.
Correspondence course omzia ahihleh, ki enrol khit chiang in study material na sim khopkhop di hon khak ding ua, mahni self-study a kisim ding ahi. Na theih siam louh a omleh huai te leng email tungtawn in dottheih hi.
Correspondence course ahoihna ahihleh subject te conceptual understanding tampi honpia hi. Competitive exam toh board exam a syllabus kibang ahih ziak in, a syllabus enkawn a topic-wise a I sim leh board exam a te haksa kisa hetlou hi.
Coaching institute hoih khenkhat te ahihleh:
- Brilliant Tutorials (http://brilliant-tutorials.com/)
- FITJEE (http://www.fiitjee.co/)
- Resonance (https://www.resonance.ac.in/)
- Akash (http://www.aakash.ac.in/)
Hiai atung a kigelh te banah tulai hun a thil toh kisai (up-to-date) zawdeuh a theih na ding in magazine khat beek siamsinlai a sim poimoh mahmah hi. Hiai toh kisai a magazine hoih mahmah ahihleh Physics/Chemistry/Mathematics/Biology (PCBM) Today ahi. Hiai magazine te sung ah competitive exam a topper te interview nate bang, science topic khat bukim tak a kigelh article bang leh competitive exam tuamtuam leh coaching institute chih te chiangtak in muhtheih hi. Na school kaina a library a om leh va enpah inla, na library un a subscribe keileh na school thuneite kiang ah subscribe dingin ngetna pelut pah in. Hiai a nuai a link tungtawn in a subscribe theih ding.
Class XII zoh chia Career options, Competitive entrance examination leh sepna tuamtuam omte a kimzaw in Part 2 ah hong ki gelh ding hi.
- Thukhitna leh hasotna
Ei siamsinten‘ pilna leh siamna lam ah National hi in International level tan hitaleh mi kiphazou mahmah hi. Himahleh, I taksap uh ahihleh pilvanna ichi hiam theihkholhna (awareness) ahi. Thil a hun laitak a thei in pan ana lathei chiat leng a lohching lou kuamah kiomlou ding hi. Hiai thugelh simkha siamsinte Pathian in a lawhching ngeingei ding in hong vualzawl hen.
“Hiai ka lohchinna in ahon etsak tuh ei Zomite leng midang i.e. general te phalah tuanlou ihi. Maiteh khuak hilou in Pathian honpiak khuak ahi” – Haulianlal Guite IAS*
*SSPP Annual Magazine 2012, Vol. XLVII & XLVIII, page-63
**Laigelh tuten ’ hiai article hon etdiksak leh feedback hoih taktak hon pia Mr. Samuel T. Thawngkhanlian leh Miss. Linda Samte te tungah kipahthu kagen uhi.
___________________________________________________________________________
aDavid Neihguk in IIT Madras apan B.Tech 2010 in zou hi. Mahindra & Mahindra ah kum 7 asep nung in tun Bombardier Transportation ah Acoustics & Vibration Engineer sem lel hi. Mahindra a asep lai in scholarship tungtawn in M.Tech zou khia hi. Email: This email address is being protected from spambots. You need JavaScript enabled to view it.
bDr. Pau Biak Sang in Indian Institute of Science (IISc) Bangalore apat PhD 2015 in zou hi. Tun University of Texas Health Science Centre at Tyler (UTHSCT) Texas, USA ah Post Doctorate Research hih lel hi. Email: This email address is being protected from spambots. You need JavaScript enabled to view it.
RELATED ARTICLE: Siamsinte kiang a laikhak – Part 2