Chief Guest dia mi i chialte khangthakte a dia role model ahi uh.
~ Ginza Vualzong
I gam ah program i hau ua, program khat i neih chiang un Chief Guest neih teitei di dan in i koih uh hi. Chief Guest om sese lou a le program neihtheih luat ahi. Ahia, i topic uh hiai lam hizaw lou in, Chief Guest dia mi i chial dungzui in a chialtute hihna bangtan hiam in a langsak a, khangthakte role model bawlsakna ahi chih lam a houlim ut i hi.
Chief Guest i chih chiang in program or event khat a dia guest thupi pen chihna ahi. Huai ding in kua hiam mi ngaihsanhuai, mi poimohte leh mi thupite chial hi sek uhi. A event toh kituak a mithupi leh mi poimohte chial hitangpi hi. Etsakna ding in siamsinna toh kisai program bang hi leh siamsinna lam a vualtungtuang mi etsakna a IAS, IPS, MBA leh a dangdangte chial thil kilawm ahi. Sports program bang ahih leh sports lam a mi lawhching sports person khong chial kilawm a, music program bang ah music lam a mi lawhching khat chial kituak mahmah hi. Huchibang mi chial a om chiang in a program toh le kituak a, mipi a dia ettontak leh role model ahihna uh lang a, chial a omte a dia le moral boost mahmah ding hi.
Ei gam a i paipih dan uh a tuam deuh a, Chief Guest dia i chialte uh sum a hon panpihthei di te i chial sek uh hi. A event toh kituak hisese lou in sum tampi hon pethei dite i chial sek ua, amau a kipan sum lamen i hih chiang un, mipi phattuampih theih thu gen khiak nei khollou sek uh hi. Sum lamen a mi Chief Guest i chial leh a chialtu le sum mah a buai chihna ahi a, program akipan bangmah khantouhna omlou sek mah hi. I society ua sum hau i chihte politicians te ahi mai uh hi. Huaite kia Chief Guest a i sapsap chiang un, mipi nautang in le politicians te i ngaisang ua, election kia bang i buaipih ua, i role model uh hong suak hi. Sum haute kia Chief Guest a i chial chiang un field tuamtuam a mi ettontak i neihte uh awlawl in i society uah tum mang hiaihiai ua, thumanpha leh khantouhna di lam a honpi di mi tawm hiaihiai a, i society a taksapna lianpi tun hi.
Hiai sum hau politiciante i glorify gige ziak un, i khangnoute, i siamsinte un politiciante hon ngaisang ua, baihlamtak a summuhtheihnate enlah in tup kichian neilou in, mailam nawt lou in i om uh hi. I khangthakte sepna hoih taktak khong a muh ding uh i deih leh hoihtak a motivate ngai uh ahi. Tua eiloi in politiciante kia pibawl in, i student unionte nasan politician khutzat a pang ua, bandh leh strikes khong bawlsak in, i siamsinte a dia motivation om mahmah lou ahi.
Huai ziaka i gam a khantouhna deih taktak i hih leh Chief Guest dia mi i sap un saupi gen kha mahmah ding ahi. Politiciante Chief Guest a saplou di i chi kei a, i program toh kituak in Chief Guest sap leh saplouh di kikal pilvang mahmah leng chi i hi zaw hi. Sum deihtakna ziak a Chief Guest i sap zel ding leh i khangthakte lungsim a chi hoihlou i tuh kha dia, kua mah i ngawh thei kei ding. I khangnoute lam tuamtuam a khangtou uh hen i chih leh a role model di uh en i guan ngai a, Chief guest i sap chiang in hiai i lungsim a koih chiat leng a hoih di.