Sap pau a data, ei pau in bang I chi tamai di ua? Thu,thil; thei tuan khang. Tulai in data I chih chia chi nih in ki khen hi- Analog data leh Digital data. Analog i chih chiang in a mawl pen in thu in la hita leh tulai a mobile phone leh computer a ki koih theilou thil te analog data ahimai. Nidang a i tape cassette leh camera roll te analog data ahi. Digital data bel computer leh mobile phone te- electronic storage a kikhumthei teng ahimai. Camera bang le digital camera I chih kha. Nidang a camera roll nei a lim iki laak te analog data format hi a, computer a et theih ahih nang in digital data suah ngai a huai di'n I limlak lui te I scan ua; scanner' na tuh analog data digital a convert ahimai.
Digital data toh kisai a confusion om gige gen nuam cheuh ihi. Mihing te'n a theihnop nang in thil tehna I bawl uhi. A tui litre in, a ha kilogram in chihbang. Itna bel teh theihlouh. Digital data bit ahihke byte in ki teh a, mit a muhtheih bang hilebel bial/zero (0) leh khat (1) a om seuhsouh di uh ahi. Etsakna in 10101010 chih bang. Hiai a 1 ahihke 0 pen a mal in bit kichi hi. Bit I chih kammal pen BInary digiT a hon kipan ahi. Huaiziak in Binary digit I chih chia 0 ahihke 1. Huan, bit 8(giat) tan hon phak chiang in byte 1 pha hi. Paisa 100 a phak chia cheng 1 a phak bang in, 0 ahihke 1 kigawm bit 8 a phak chia byte khat pha hi. Zou dekdek.
A taangpi in, bit pen standard symbol dan in b(small b) in ki denote a byte pen B (capital b). Etsakna in 18 Mb chih bel 18 Megabit chihna, 18 MB chih leuleu chia bel 18 Megabyte. I pen-drive(USB 2.0) te ua file iki thot chia 15-20 MBPS(Megabyte per second) tan bang in paizou hi. Megabyte pen a tehna in aki zang taangpi. Pendrive 2 GB bang I chih chia bel Gigabyte mah ahi hi, Gigabit hilou in.
Ahihleh tulai a internet access nangin Tata Photon bang, USB Modem te I zang naak mahmah uh. A advertisement te uh bang I etchia 3.1 Mbps khong kichi, ki lamen sang mahmah. Huai kha amau Mbps(Megabit) a chihna uh ahinalai set hi. Ei theih dan Megabyte in gen le bel 3.1 Mbps pen 0.3875 MBPS ahi di, amau' kiphat dan a hizomah lai. Maimah de. Huaile depeding upon the network and location. Hiai Tata Photon I chihte kha data aki transmit dan lamdang tak a a network tower toh iki naih pouh leh packet/data transfer rate haat ahi.
Etsakna in, hiaite tunglam a thuthak khat bel Google Begins Building 1-Gigabit Internet Service in Kansas City chih ahi a, hiai a 1-Gagabit pen ei theihsiam din gen le 125 MBPS ahi. Ei pendrive a file iki send sang a leh 8 a internet hatzaw Google ten provide uh eive, huaile fibre optic zang a. Fibre optic banga? Huai ei innlam leh singtang lam a gui pink sim, sek khum rong sang a vak zaw te chiphot ni.
A taktak gam ah, tu tan a India khopi khong a le broadband Internet a hat a kigen bel a taangpi in 5-10 MBPS khong ahilai.
[Hiai gelhtupa apat 'Computer sintungbu', first computer book in Paite lamet ahi.]
.