GAMSUNGA MOBILE PHONE TOWER
by H. Chinzason
Gamkhangte khekhap tawna ‘IT Revolution’ huihzam nungin Lamka vangkhua leng hon zelsuakin, computers, lap-top, mobile phones, iphones, ipad, ipod, ichih leh adangdangte uangtakin izangta uhi. Mobile phones ahih ngial aleh pencil leh pen thakhektu di hileh kilawm khopin ipakta chiat uhi. Anei nailou innkuan a omlai diam? chiin kidong leng, buhpawl laka makhai kisel zonkhiak toh kibang ding hi!
Tuma khawnga hiai vanzat poimohte minautang neih dinga kigen banlou himahleh tua niteng khosaknaa zatpen hongsuakta; khenkhatte ading banga niteng-lawmhoih chih hizomah lai hi. Hichibang zattheihna tamkuam honpiak hoihtakte a thupi zaw buk kakpih ding om hiam i chihnop laiin, cellphones leh mobile towerte’n mihingte damtheihna lam kia hilou in khua-leh-tui, ganhing-vasate tanpha tunga poikhoih thei ahihdan lauthawngna nei om a, mawka nelhsiah theih ahi di uam?
Mobile Tower / Base Transceiver Station (BTS)
BTS, abaihlam agen in mobile tower, kichi tuh cellphones zattheihna dinga radio signal hawmzaktu leh naktheihna-hu petu poimohtak ahi. Innsunga elektrik meibawm (bulb) in kongzinga meigui kikhung tawna current amuh bangjela mei hongtang ahihdan in mobile tower omkei leh cellphones in signal mulou dia, zatna neilou ding hi. BTS akipan guibei (wireless) huih-zung thahatna luangden (Radio Frequency radiation) tungtawn in mobile phones, cordless phones, computer-internet, Wi-fi, leh adangdangte zattheih dingin om hi. Mobile tower huzap nuai ah EMF radiation (electro-magnetic radiation) huih-tha hattak pawtkhia pen mihing adia natna tunthei dinga muangmawh pawl om uhi.
Mobile Tower – tulel dinmun
Thildang teng banah, spectrum kiningching om dan toh kituak dungzuia cellphones zangtute (tawm leh tam) poimoh banga mobile tower kibawl hitangpi hi. Mobile tower ahihleh antenna (huihkhua thumatna-sikgui) kibulhnanga tang-leh-mualtung, inntung ahihkeh mun-awng khawnga sikkhuam lepsang ahi. Mobile tower khat zangkhawm in mobile service network companyte’n amau BTS antenna kivuahtuam ua, huchiloua mobile tower kineih tuam bang leng om uhi. Tulel in India gamsunga mobile tower nuai li (4 lakh) khawng oma, tua ah base station (BTS) nuai guk (6 lakh) vel kibulh dinga tuat ahi. Manipur a mobile tower base stations 425 vel om.
Maban ah…
I gama cellphone zangtu kibehlap toujel ahihmanin mobile tower leng hongpunbeh ding mawk chihtheih ahi sam kei, advanced technology zat hitaleh. Optical fibre tuipi nuaia kikhung tawnin leitung pumpi internet kizomsak chih ngaihsut nate khawng muh in. Mobile tower khat lamna dinga companyte sumsen Rs.18 lakh – Rs.25 lakh khawnga hisap hitaleh, huaibanah khatenga etkolna toh kisai sum senna/zatna (DG set/AC/Rent/ Caretaker piakdite) tawh kithaman asak ngai uhi.
Gen leh sak
Cellphone tower apat RF radiation ziakin natna lauhuai cancer tanpha tungsak dinga gingta tinten pawlkhat om uhi. Thuksutna (scientific research) kichian pansan theihding omchiah kei mahleh World Health Organization (WHO), Geneva leh International Agency Research on Cancer (IARC), Lyon, France palai te’n India khopi muntuamtuam Delhi/Mumbai sunga mihing tenna munsah kuam lak khawnga mobile tower omte amuh un EMF radiation ‘lauhthawnghuai’ sa uhi. Tuabanglou in, Europe gam ah mobile towers leh antennas munsangtak leh kikal gamlapipi khawnga kitung ahihman in EMF radiation lauhthawngna ding dinmun ah omlou chi uh. Mobile phones toh kibang lou deuh in, cellphone tower antenna in tatsatloua huih(radiation) khahpawt ahihmanin mun sang leh tenna toh kigamla akoih tuh pilvan huai zaw dingin gen uhi.
India bel WHO member khat hisam mahleh agam aioha kuan AIIMS (Delhi) apat leh Cancer Institute, Adyar (Chennai) akipan professors 2(nih) te’n gamsunga telecom network apat EMF radiation tungtang genkhak din ana polut khalou uhi. Himahleh, tukum bul February 19-21, 2013 in Deptt. of Telecom apatin India sorkarin Team khat WHO (H.Q.),Geneva ah sawl a, cellphones/mobile tower radiation in mihingte leh sing-leh-gua adia poikhoih khakna nei taktak hiam chih kikum uhi.
Mobile tower toh kisai agen khenkhatte uh:
• Mobile tower RF radiation toh kisai ICMR leh WHO in minautang lauhthawngnate muhchet hikeimahleh suilel.
• Mobile tower kiim leh kianga huangvulh, sing-leh-lou omte tunga nasep om hiam case study ki bawl ding.
• Mobile handset leh BTS antenna safety standards toh kituaka bawl ding. India a mobile handset SAR value 1.6 watt/ kg. ahih ding.
• Mobile Tower hiam cell phones in brain tumour/cancer piangsakthei kichite kichiantak muh hi nailou.
• Mobile tower antenna mai ngatna mun a om louh ding.
• Damlou omna hospital leh naupangte omna school kianga mobile tower koihlouh ding.
• BTS antenna akipan a naipen metre 3a kigamlat ding. BTS antennas 2 omna mun akipan 35 meter gamlat ding.
• Mobile tower munkochik meter 5 sanga neuzaw akoihlouh di.
• Zinling leh huihmut puklouh nanga mobile tower khung di ahi. Thuneitu, kiim leh kianga-te lemsakna toh.
Zatdan theihtuak tamlou
• Cellphone zatchiangin bluetooth leh headset zat tam hileh RF energy toh lutang kinaihluat louh nangin. Adiaka, sawtpau nuam adingin.
• Mobile signal hatlouhna mun ah zat teitei louh a pilvanhuai hi.
• Sam kawt laipi tohin mobile phone zang dah maiin.
• ‘ON’ kawma taksa vuak toh kimatsak louh ding ahi.
• Lu hiam bilbuk(ear) toh thuahkawma call lak pahlouh ding a hi.
• Na sapuma medical implants(pace-maker khawng) kithuah a om leh cellphone toh kinaihsak louh ding a hi.
• SMS hiam ‘speaker mode’ zat mun zawk sawmin.
• Cellphone kicharge lai a zatlouh ding ahi.
A kigen teng pum gintak / gingtalou om jela. Huan, sum maktaduai tampi kisaikhakna bang ahihman in gupnei tuam ding mimal/NGO hitaleh Company liantaktak banah akisaipih sorkar department tuamtuamte (eg. Health Ministry/ Environment & Forest/ Telecom/ Earth Sciences/ Science & Technology, etc.) omchiat uhi. Huchikalah, mite lunglut theih semna dingin network company-te’n 3G, 4G/5G mobile phones leh services (hiaite azatnop leh kintaka 5 seconds sunga movie/films record zou ding) omsak dek uh kichi nawn leu leu uhi. Azangtute khualna mah hi e, zangtu hampha aw bills na piak lai teng!