DAMLAI MAH IN I KI IT DING UH
By Mawi Tombing

Upate paunak in 'Kamsiam in sial lei a sang' china zenpi'n kamsiam suah ding haksa kisa thei chiat hi. Damlai a thil hoih tampi semkhia in, kuamah phat leh pahtak lohlou in, pahtawitu di neilou a hinkhua zang tampi ki om hi. Mihingte azawng ahau kamhoih, kampha, kamsiam taka phatna 'aw' za nuamlou ki omlou hi. Kamsiam a kiphatna in mi kipaksak in, bah a nguite, pukse dia ki sate thaguantu ahi. Huai ziakin, kamsiam taka kipahtawi athak a kisin a chilbawl hetlou a zattam, zatsiam i kisin uh poimawh law petmah hi.

Miningte i ki chiziat dan a khovel puak hia? uang in nasa semsem ding bang mai hi. Azawng ahau kideidanna thupi lua hi, gentehna in damlouhna, sihna mun ah leng' a hauten vehtu, galtu leh uaptu ding hau ua, a zawngten vehtu, galtu leh uaptu di tam neilou uhi. Hiaite' i ngeina leh paidan le hitamai hiam chih hon ngaihtuah sak hi. I kam in kon it, kon ngaina, kon hehpih i chih sang in ataktak in i itna langsak theih le huai manpha zaw di ahi. I kam chauh a ki itte hilou in, I Toupa Jesu itna dik koppih in tomkhah i damsung in i mi hinpihte toh kiit in kituah sawmni uh mo..... Unau!!

Khovel ah piang teng hinkhua kikimlou ihihman in a haksa zaw, a genthei zawte a di leng ngaihtuah zel sam le mo? i sih chiang a bangmah thei nonlou kiang a kon it lua, kon ngailua, kon hehpihlua chih sa'ng i damlai kiphat in, kiit in kihehpih leng manpha pen ding hi. Mihingte hinna kikim a Pathian hon bawlte ihi. Pathian thil bawl tengteng laka hoih asak pente mihingte ihi. I hinna amah batpih a bawlte i hih manpha lua ahihziakin dam a khotheih lai kipah dan, khasiat dan i theihlai mah in kiit in ki phatni. Sihnung a kiit a kingaih in bangmah phattuamna neinawn lou in, gen a neinawn kei. A si in bang mah atheih nawnlouh ziak in.

Sih nung ngai in, kap in bangteng gen in, hun paisa ngai in samsam leng le sapkik zoh ding hi nawnlou hi. Lungkimna din ahan ah pak hoih leh mantam pen va koih in leng gen a neinawn kei. A han ah na it dan, na ngaihdan kamsiam takin gen le chin leng a phattuamna om tuanlou in, ngai in bang chituk in kap lechin le a si pen in theinonlou hi. Huaijiak in damlai mah in kamsiam leh itna toh ki hehpihni. Hun paisa kisam kik theilou ahihziak damlai mah in ki it ni uh aw.

I Toupan hon nutsiat anasep mabante zom a, itna loungal kuamah bang mah bakei un a chih koppihin, ki itna bei theilou tangtawn itna tulngeilou in kiit ni. Itna ziak in Jesu nang leh kei sika thuak in, a hong tan hi. Khros ah gentheihna, lungkhamna chiteng mualphouna leh engbawlna chiteng, zum leh zah leh khual zoulou in nang leh kei hong it luat man in Khros ah ahinna hong pia hi. Niteng hun teng a i muh gige it theilou ihih intuh chikmah a muh ngeilouh Pathian it ngeilou ding ahi.... i Laisiangthou in chi hi. Tomkhah i damsung in kideidanna tellou it dite it in, Toupa hon itna chikmah adang ngeilou, itna tullou koppihin damsung hinkhua i zang ding uh aw.... Unaute.

I Toupa Jesu'n napil, na siam ziak a hon tat i hi kei a, i hauh ziak hiam neih leh lam ziaka hon tat leng i hisam kei. Na kamsiam zoh man, na gensiam jiak a hon tat le ihi kei. I siamnate in vangam hon tunpih zoulou ding a, nang leh kei hon itluat ziaka A sisan mantam taka hon leite ihi. Itna ziak liauliau a hong thuak ahih bang in, i laigui zoppihte, i hinna kibatpihte bang ziaka kikhentuam a, ki itlou ding i hia? I Toupa hon it dan ngaihtuah thak le'ng ki itlou thei ding vual ihi kei uh. I Toupa'n itna gui a, ahon na phankhawm khitsate ihi a, ki itna sisan in hon tan zouta ahi chih phawkthak ni.

Toupa itna koppih a i mi hinpihte it thei di'n simtute Toupa'n hon vualzawl chiat hen.. Amen